Sunday, April 5, 2009

ဘာသာရေး ပြဿနာ ( ၄၇ )

( ဘဒ္ဒန္တ တိလောကသာရ ဖြေသည် )

( မေး ) ( မြတ်စွာဘုရား သီတင်းသုံးခဲ့ရာ မြို့ရွာဒေသများ )
ဆရာတော်ဘုရား ဗုဒ္ဓဂေါတမဘုရား ၄၅-၀ါပတ်လုံး သီတင်းသုံးတော်မူသွားတဲ့ မြို့ရွာများကို ယခုခေတ် အတိအကျ လတ္တီကျု၊ လောင်ဂျီကျုဖြင့် ရေးဆွဲထားတဲ့ မြေပုံများရှိပါသလားဘုရား၊ ယခုခေတ်တွင် မြန်မာသာမက ကမ္ဘာတ၀န်းလုံးက ဗုဒ္ဓဘာသာကို စိတ်ဝင်စားနေချိန်တွင် ထိုဗုဒ္ဓသာသနာ မြေပုံများရှိလျှင် ဘာသာရေးမဂ္ဂဇင်းတွေမှာ ဖော်ပြပေးစေလိုပါသည်ဘုရား။
( ဦးမိုးသစ်-အမက၊ ၀ါးတော၊ မြကန်သာရပ်၊ ဆီဆိုင်မြို့၊ ရှမ်ူပြည်တောင်ပိုင်း )

( ဖြေ )
မြတ်စွာဘုရားသည် သက်တော်ထင်ရှားရှိစဉ်က မဇ္ဈိမဒေသ (အိန္ဒိယပြည် အရှေ့မြောက်ပိုင်း) တွင် အနှံ့အပြား သီတင်းသုံးခဲ့ရာ ရာဇဂြိုဟ်ပြည်၊ သာဝတ္ထိပြည်၊ ဗာရာဏသီပြည် စသည့်မြို့များမှာ အများအားဖြင့် ယခုတိုင် ထိုနာမည်များနှင့် တည်ရှိနေကြသည်၊
အိန္ဒိယဆိုင်ရာ မြေပုံများတွင်လည်း လတ္တီကျု၊ လောင်ဂျီကျုများနှင့် ထုတ်ဝေထားကြသည်၊ ဗုဒ္ဓသာသနိက မြေပုံများလည်း မြန်မာနိုင်ငံတွင် ရောင်းချနေကြပါသည်။ အချို့ဘာသာရေး စာရေးဆရာများလည်း စာစောင်အချို့တွင် ရေးသားနေကြပါသည်၊ အထူးအားဖြင့် မော်လမြိုင်၊ တောင်ပေါက်ဆရာတော်ဘုရားကြီး ပြုစုတော်မူခဲ့သော ဗုဒ္ဓသာသနာ ပထ၀ီဝင် ကျမ်းကြီး၊ မိဂဒါဝုန် ဆရာတော် ဦးကိတ္တိမာ၏ အိန္ဒိယကြေးမုံ ကျမ်းကြီးများတွင် ဓာတ်ပုံ မြေပုံ များနှင့် စုံစုံလင်လင် ဖော်ပြထားသည်ကို တွေ့ရပါသည်။
*********************************************************************************

( မေး ) ( ထွက်သက် ၀င်သက် ရှိ - မဲ့ သတ္တ၀ါ )
ဆရာတော်ဘုရား၊ မေတ္တသုတ်ပရိတ်တော်တွင် ယေကေစိ ပါဏဘူတတ္တိ-အစရှိသော အပိုဒ်တွင် မြန်မာအနက်ပြန်ရာ၌ ကြွင်းမဲ့ဥဿုံ အလုံးစုံကုန်သော ထွက်သက်-၀င်သက်ရှိ သတ္တ၀ါ၊ ထွက်သက်-၀င်သက် မဲ့ သတ္တ၀ါ-ဟု ဖော်ပြထားရာ ထွက်သက် ၀င်သက်မဲ့ သတ္တ၀ါနှင့် ပတ်သက်၍ မရှင်းလင်းပါသဖြင့် ရှင်းလင်းဖြေကြား ပေးတော်မူပါဘုရား။
( မတင်မြ-မော်လမြိုင်မြို့ )

( ဖြေ )
သုံးဆယ့်တဘုံရှိရာတွင် အပါယ် ၄-ဘုံနှင့် လူ့ ၁-ဘုံ၊ နတ် ၆-ဘုံ ဟူသော ကာမ ၁၁-ဘုံသားတို့သည် ထွက်သက် ၀င်သက်ရှိ သတ္တ၀ါတို့ဖြစ်ကြသည်။

ရူပ ၁၆-ဘုံနှင့် အရူပ ၄-ဘုံ ဟူသော ဗြဟ္မာ ၂၀-တို့သည် ထွက်သက် ၀င်သက်မဲ့ သတ္တ၀ါတို့ ဖြစ်ကြပါသည်။

( ရူပ ၁၆-ဘုံရှိ သတ္တ၀ါတို့သည် အဘယ့်ကြောင့် ထွက်သက် ၀င်သက် မရှိသနည်းဆိုသော် ကဗဠီကာရ အာဟာရ-ဟူသော အာဟာရစားသောက်ရခြင်း မရှိသောကြောင့် မရှိ-ဟု ကျမ်းဂန်တို့တွင် ဆို၏။
အရူပ ၄-ဘုံရှိ သတ္တ၀ါတို့ကား ရုပ်တရားပင် လုံးဝမရှိသဖြင့် ထွက်သက် ၀င်သက် မရှိ ဖြစ်ရလေသည်။ )
*********************************************************************************

( မေး ) ( ပါဏာတိပါတကံ ထိုက်-မထိုက် )
ဆရာတော်ဘုရား သတ္တ၀ါများကို သေစေလိုသောဆန္ဒ မဖြစ်ပေါ်ဘဲ အကြောင်းတစုံတရာ ပြုလုပ်မှုကြောင့် သေဆုံးသွားသည့်အခါ (ပြုလုပ်သူမှာ) ပါဏာတိပါတကံ ထိုက်ပါသလားဘုရား၊ သို့မဟုတ်ပါက မည်သည့်ကံမျိုး ထိုက်ပါသလဲဘုရား၊ ဖြေကြားပေးတော်မူပါရန် တောင်းပန်အပ်ပါသည် ဘုရား။
( မောင်မိုးလွင်-သဲကောကြီး၊ လယ်ဝေးမြို့ )

( ဖြေ )
ပါဏာတိပါတကံထိုက်ရန် အင်္ဂါ ၅-ပါးရှိပါသည်။
၁။ သတ္တ၀ါလည်းမှန်စေ
၂။ သတ္တ၀ါဟု အမှတ်ရှိသည်လည်း ဖြစ်စေ
၃။ သေစေလိုသော စေတနာလည်း ရှိစေ
၎။ သေရန် လုံ့လပြုသည်လည်း ဖြစ်စေ
၅။ သေလည်း သေစေ
ဤအင်္ဂါ ၅-ပါးပြည့်စုံမှ ပါဏာတိပါတကံ ထိုက်ပါသည်။

ပြဿနာရှင်၏အလိုအရ သေစေလိုသောဆန္ဒ မဖြစ်ပေါ်ဘဲ-ဟု ဆိုသဖြင့် အမှတ် ၃-အင်္ဂါ ချို့တဲ့၍ ပါဏာတိပါတကံ မထိုက်ပါ။

မြတ်စွာဘုရား လက်ထက်တော်ကာလက မျက်စိမမြင်သော ရဟန္တာအရှင် စက္ခုပါလမထေရ် စင်္ကြံလျှောက်ရာတွင် ပိုးပရန်များကိုနင်းမိ၍ သေကြေသည်ကို ရဟန်းများက မြတ်စွာဘုရားအား လျှောက်ထားရာ၌ ( မနောပုဗ္ဗင်္ဂမာ ဓမ္မာ ) စသော ဂါထာကို ဟောတော်မူသည်၊
ကံ ၃-ပါးတွင် မနောကံ အရေးကြီးကြောင်း၊ မနောကံပါမှ ကမ္မပထ မြောက်ကြောင်း ဟောကြားထားသည်မှာ ဓမ္မပဒပါဠိတော်တွင် ထင်ရှားပါသည်။
*********************************************************************************

( မေး ) ( မြန်မာလူမျိုးနှင့် ဘုရားဆုပန်ကိစ္စ )
ဆရာတော်ဘုရား ခတ္တိယ၊ ဗြဟ္မဏအမျိုးတွေသာ ဘုရားဖြစ်နိုင်သည်-ဟု ဆရာတော်ဘုရား ဖြေကြားသည်ကို ဖတ်ရှုရသဖြင့် တပည့်တော်တို့ မြန်မာဗုဒ္ဓဘာသာလူမျိုးများ ဘုရားဆုပန်၍ ပါရမီပြည့်စုံပါမည်လား၊ ဘုရားဖြစ်နိုင်ပါမည်လား၊ ထပ်ဖြေကြားပေးပါဘုရား။
( ဦးစိုးကြည်-သထုံမြို့ )

( ဖြေ )
ခတ္တိယ-မင်းမျိုး၊ ဗြဟ္မဏ-ပုဏ္ဏားမျိုး၊ ၀ဿ-ကုန်သည်မျိုး၊ သုဒ္ဒ-သူဆင်းရဲမျိုး ဟူ၍ အမျိုးလေးပါးရှိသည်။
ဗုဒ္ဓပွင့်တော်မူရာခေတ်တွင် ခတ္တိယမင်းမျိုးကို အမြတ်ထားနေက ခတ္တိယမျိုး၌၊
ဲဗြဟ္မဏပုဏ္ဏားမျိုးကို အမြတ်ထားနေက ဗြဟ္မဏမျိုး၌ ဘုရားပွင့်တော်မူခြင်း ဖြစ်ပါသည်။
မည်သည့်လူမျိုးမဆို ဘုရားဆုတောင်းနိုင်၍ ပါရမီပြည့်စုံပြီး ဘုရားဖြစ်တော်မူချိန်တန်လျှင် ဖော်ပြပါ ခတ္တိယနှင့် ဗြဟ္မဏမျိုး တမျိုးမျိုး၌ဖြစ်၍ ဘုရားဖြစ်ရပေမည်။
*********************************************************************************

( မေး ) ( နိဗ္ဗာန်ရောက်မည့် အချိန်ကာလ )
အရှင်ဘုရား နိဗ္ဗာန်ကို မသေခင်ရောက်ပါသလား၊ သေဆုံးပြီးမှ ရောက်တာလား ဆိုတာကို သိလိုပါသဖြင့် ဖြေကြားပေးပါရန် လျှောက်ထားပါသည်ဘုရား။
( မောင်ဆန်းဦး-သန်လျင်မြို့ )

( ဖြေ )
နိဗ္ဗာန်ဟူသည်မှာ
၁။ ခန္ဓာအကြွင်းရှိသော သဥပါဒိသေသ နိဗ္ဗာန်။
၂။ ခန္ဓာအကြွင်းမရှိသော အနုပါဒိသေသ နိဗ္ဗာန်-ဟူ၍ ၂-မျိုးရှိပါသည်။

မြတ်စွာဘုရားသည် မဟာသက္ကရာဇ် ၁၀၃-ခု ကဆုန်လပြည့်နေ့တွင် ဗောဓိပင်နှင့် ရွှေပလ္လင်ဝယ် ကိလေသာဟူသမျှကို အကြွင်းအကျန်မရှိအောင် ပယ်သတ်၍ ဘုရားအဖြစ်သို့ ရောက်ပါသည်၊
ထိုသို့ ကိလေသာဟူသမျှကို ပယ်ရှား၍ ဘုရားဖြစ်တော်မူခြင်းကို ခန္ဓာအကြွင်းရှိသော သဥပါဒိသေသနိဗ္ဗာန်သို့ ရောက်တော်မူခြင်း-ဟု ဆိုပါသည်။

သက်တော် ၈၀၊ ၀ါတော် ၄၅-တွင် ကုသိနာရုံ အင်ကြင်းစုံ၌ မဟာပရိနိဗ္ဗာန် စံဝင်တော်မူခြင်းကို ခန္ဓာအကြွင်းမရှိသော အနုပါဒိသေသနိဗ္ဗာန်သို့ ရောက်တော်မူသည်ဟု ဆိုပါသည်။
ရဟန္တာပုဂ္ဂိုလ်များလည်း ရဟန္တာအဖြစ်သို့ ရောက်ခြင်းကို သဥပါဒိသေသနိဗ္ဗာန်၊
ဘ၀ဇာတ်သိမ်း အေးငြိမ်းချုပ်ဆုံးသွားခြင်းကို အနုပါဒိသေသနိဗ္ဗာန်ဟု ဆိုပါသည်။

ထိုနိဗ္ဗာန်နှစ်မျိုးကို မှတ်သား၍ အကြောင်းအားလျော်စွာ နိဗ္ဗာန်အယူအဆ၌ ဉာဏ်အမြင် ရှင်းလင်းစေလိုပါသည်။
*********************************************************************************

( မေး ) ( ပါရာဇိက ရဟန်းနှင့် ဥပသမ္ပဒကံ )
ဆရာတော်ဘုရား ရဟန်းခံရာသိမ်အတွင်း ပါရာဇိကကျပြီးသော ရဟန်းတပါးပါး ပါနေက ရဟန်းလောင်း ရဟန်းမဖြစ်ဟု အချို့ဆိုကြပါသည်၊ အချို့ကလည်း ကျသောရဟန်းနှင့် မကျသောရဟန်း ထက်ဝက်စီညီမျှလျှင် ရဟန်းဖြစ်၏ဟု ဆိုကြပြန်ပါသည်၊ ထိုအချက်ကို ရှင်းလင်းဖြေကြားပေးပါဘုရား။
( ရှင်ဝိစိတ္တ-ကြို့ဝန်းရွာ )

( ဖြေ )
ပါရာဇိကကျသောရဟန်း၌ သံသယမကင်းသော်လည်း ရဟန်းမဟုတ်ဟု အမှန်မဆိုနိုင်သောကြောင့်၎င်း၊
ရဟန်းမဟုတ်သော်လည်း ရဟန်းဟု ၀န်ခံချက်ရှိသောကြောင့်၎င်း၊ ရဟန်းဟူသော အမှတ်သညာဖြင့် ကံဆောင်နိုင်မူ အာပတ်လည်း မသင့်၊ ကံလည်း မပျက်၊

အထူးအားဖြင့် ဥပသမ္ပဒ ရဟန်းခံကံပြုရာ၌ ထိုပါရာဇိကကျပြီးသော ရဟန်းမှတပါး အခြားရဟန်းသံဃာသည် ငါးပါးထက်ပိုလွန်မူ ထိုတပါးတည်းသော ပါရာဇိကရဟန်းက ပြုလုပ်သောကံကို မဖျက်နိုင်ပေ။
ထို့ပြင် ပါရာဇိကကျသောရဟန်းသည် ရဟန်းအသွင်ကို မစွန့်သေးက ရဟန်းပင်ဖြစ်၍ သံဃာ့ကံများ၌ ပါဝင်ခွင့်ရှိနေသေးသည်ဟု ဆိုပါသည်၊

ထို့ကြောင့် ပါရာဇိက ရဟန်း တပါးတလေ ပါသော်လည်း ပါရာဇိက မကျသောရဟန်း ၅-ပါးအထက် အလွန်ရှိလျှင် ရဟန်းလောင်း ရဟန်းဖြစ်နိုင်ပါသည်၊ သို့ဖြစ်၍ ရဟန်းခံကံဆောင်ရာတွင် ရဟန်း ၁၀-ပါးစသည်ထက် အလွန်ပင် ဆောင်ကြသည်ကို တွေ့နိုင်ပါသည်။( ၀ိမတိ-ဋီ-၁၊ ၁၅၆၊ ၁၅၇ )

( မြတ်မင်္ဂလာ ၁၉၉၅-ခု ဧပြီလ )

No comments: