Saturday, April 4, 2009

ဘာသာရေး ပြဿနာ ( ၄၂ )

( ဘဒ္ဒန္တ တိလောကသာရ ဖြေသည် )

( မေး ) ( ဖုတ် တစ္ဆေ ဘယ်ဘုံသားလဲ )
ယုတ်ကဝေ၊ ဖုတ်တစ္ဆေ သူယောင်တို့၊ လူ့ဘောင်မှီစား၊
ဘယ်ဘုံသားရယ်လို့၊ ယုံမှားစွာ မတွေရအောင်၊ ဖြေပြပါဘုရား။
( ဦးတင်မြင့်-ရေးမြို့ )

( ဖြေ )
ယုတ်ကဝေ၊ ဖုတ်တစ္ဆေ သူယောင်တို့၊ လူ့ဘောင်မှီစား၊
အပါယာ၊ ပေတ သန္ဓေဟာမို့၊ ပြိတ္တာမှာ သွင်းဆိုရမယ်၊ မြဲစွာမှတ်သား။

( နေရယိကာ တိရစ္ဆာနာ၊ ပေတာ ဒေ၀ါ စ မာနုသာ ) စသည် လာသော ဋီကာစသည်တို့နှင့်အညီ ဤဂတိငါးပါးမှ ထူးခြား၍ ဖုတ်တစ္ဆေမျိုးဟူ၍ ရှိသည်မဟုတ်-စသည်ဖြင့် ဆိုသော သတပဒိက ပုစ္ဆာနံပါတ် ၆၆-အဖြေကို မှီးသည်။

ဤ၌ ကဝေ-ဟူသောစကားကို သီးခြားဆိုလျှင် ဇော်ဂနီ၊ စုန်း-ဃရဏီ ဖြစ်၍ ပေတမဟုတ်၊ မာနုသ-ဟု ဆိုသင့်၏။
*********************************************************************************

( မေး ) ( ဥပုသ်နှင့် ဒေါသ )
အရှင်ဘုရား၊ ၈-ပါးသီလ ခံယူထားသော ဥပုသ်သည် ဒေါသကြီးလျှင် အပြစ်ရှိပါသလား၊
ခံယူထားသော ၈-ပါးသီလ ပျက်ပါသလား၊ သိလိုပါသဖြင့် ဖြေကြားပေးတော်မူပါဘုရား။
( မမိုးမိုး-မန္တလေး )

( ဖြေ )
သီလသည် မည်သည့်သီလမဆို ကာယကံမှု၊ ၀စီကံမှုတို့ကိုသာ ထိန်းသိမ်းရသည်၊
မနောကံမှုမှာ သီလ၏ အရာမဟုတ်၊
ကိုယ်ဖြင့် ပြစ်မှားကျူးလွန်မှုနှင့် နှုတ်ဖြင့် ပြစ်မှားကျူးလွန်မှုတို့ကို ပြုမှသာ သီလပျက်ပါသည်။
စိတ်ထဲက ဒေါသဖြစ်နေရုံဖြင့်ကား သီလမပျက်ပါ။
ဒေါသအလျောက် ရုန့်ရင်းစွာ ပြောဆိုခြင်း၊ ပြုမူခြင်း ဖြစ်လာလျှင်သာ ပျက်နိုင်သည်၊
သို့သော် သီလကို စင်ကြယ်အောင် စောင့်ထိန်းနေသူအဖို့ ဒေါသကြီးခြင်း။ ဒေါသထွက်ခြင်းတို့ နည်းပါးသွားနိုင်သဖြင့် မိမိစောင့်ထိန်းထားသည့် သီလကိုသာ မကျိုးမပေါက် မပြောက်မကျားရအောင် ကြိုးစားကြဖို့လိုပါသည်။
*********************************************************************************

( မေး ) ( ဘာလီဖျော်ရည် )
အရှင်ဘုရား၊ ကျောင်းတကျောင်း ရဟန်းခံသိမ်ဆင်းတွင် သံဃာတော်များအား
ဘာလီဖျော်ရည် ဆက်ကပ်ရာ၌ တကြိမ်၊
တပည့်မကိုယ်တိုင် သီလရှင်ဝတ်ရာ၌ တကြိမ်၊
ဘာလီဖျော်ရည်ကို ရဟန်းသံဃာ သီလရှင် ဥပုသ်သည်တို့ ညနေပိုင်း၌ မသောက်ကောင်း၊
အခြားအဖျော်ရည်ကိုသာ သောက်ကောင်းသည်ဟု ပြောဆိုသည်ကို ကြားရပါသည်၊ အဘယ်ကြောင့် ဘုန်းတော်ကြီးကျောင်းများမှာ အဆိုပါ ( ဘာလီဖျော်ရည် ) ကို မသုံးဆောင်ရန် တားမြစ်သည်ကို သိလိုပါသည်အရှင်ဘုရား။
( တင်မာဝင်း-ဒဂုံမြို့သစ် မြောက်ပိုင်း၊ ရန်ကုန်မြို့ )

( ဖြေ )
ဘာလီ ဟူသည်မှာ ဘာလီဆန်စပါး၏ အမည်တမျိုးဖြစ်၍ ယင်းဘာလီဖျော်ရည်ကို ဘာလီဆန်စပါးနှင့် ဖော်စပ်ပြုလုပ်သည်ဟု ယူဆလျက် တားမြစ်ဟန်တူပါသည်၊

ဘာလီရည်ပုလင်းတွင်လည်း ယင်းစပါးနှံပုံ ပါရှိသည်ကို တွေ့ရပါသည်၊ စုံစမ်းကြည့်ရာ ဘာလီရည်ကို ဆန်စပါးတို့ဖြင့် ဖျော်စပ်ပြုလုပ်သည်မဟုတ်၊ သံပုရာရည်၊ သကြား စသည်တို့ဖြင့်သာ ဖော်စပ်ကြောင်း၊ ဘာလီမှာ ဘာလီစပါးနှံကို တံဆိပ်ပြုလုပ်သဖြင့် အမည်တွင်နေခြင်းသာဖြစ်ကြောင်း၊ သံဃာတော်များ ညနေ၌ သောက်သုံးနိုင်ကြောင်း သိရပါသည်၊ ဤခေတ် ဖျော်ရည်များမှာ အသီးစုံကို ပြုလုပ်ကြသဖြင့် အချို့တွင် (စပရိုက် စသည်) သခွားရည်ထည့်သွင်း၍ ပြုကြောင်း သိရသဖြင့် ( ထန်း အုန်း နှစ်တွဲ၊ ပိန္နဲ နှစ်စုံ၊ ဘူး ဖရုံ၊ မှတ်တုံ သုံးသခွား ) ဟူသော ဖျော်ရည်မအပ်သော အသီးရည်များရှိနိုင်၍ သံဃာတော်များ ဥပုသ်သည်များ ညနေပိုင်း သောက်သုံးမှုတို့တွင် စိစစ်နိုင်လေ ကောင်းလေပင် ဖြစ်ပါသည်။
*********************************************************************************

( မေး ) ( ယောင်ယမ်းရွတ်ဆိုခြင်း )
အရှင်ဘုရား၊ သေခါနီးဆဲဆဲတွင် ဘုရားဂုဏ်တော်များကို ယောင်ယမ်းရွတ်ဆိုပြီး သေဆုံးသွားသူသည် ကောင်းရာသုဂတိသို့ ရောက်နိုင်-မရောက်နိုင် ဖြေကြားပေးတော်မူစေလိုပါသည် ဘုရား
( ပျံလွှားမောင်-ချောင်းဦး )

( ဖြေ )
သေခါနီးဆဲဆဲတွင် ရောဂါဝေဒနာဒဏ်ကို သည်းသည်းထန်ထန် ခံစားနေရ၍ မိမိရွတ်ဆိုနေကျ ဘုရားဂုဏ်တော်များကို ရွတ်ဆိုရာတွင် မပီမသဖြစ်နေခြင်းသာ ဖြစ်နေဟန်တူပါသည်၊
ယောင်ယမ်းရွတ်ဆိုနေခြင်း ဟုတ်မည်မထင်၊ ဘုရားဂုဏ်တော်များကို ရွတ်ပွားနေကျဖြစ်၍သာ ဤအချိန်အခါမျိုးတွင် အမှတ်ရနိုင်ဖွယ် ရှိပေသည်။

ထို့ကြောင့် ထိုသို့ မပီမသ ရွတ်ဆိုသော်လည်း အားကိုးအားထားပြု၍ ရွတ်ဆိုခြင်းကြောင့် ကုသိုလ်တရား ဖြစ်ပွား၍ ကောင်းရာသုဂတိသို့ လားရောက်နိုင်စရာ ရှိပါသည်။

( မြတ်မင်္ဂလာ ၁၉၉၄-ခု အောက်တိုဘာလ )

No comments: