Sunday, May 3, 2009

ဒုလ္လဘာ သမ္ပတ္တိ လေးပါး

ကျွန်ုပ်တို့သည် နေ့စဉ် ညစဉ် ရှိခိုးဝတ်ပြုကြရာ၌ မဂ်တရား ဖိုလ်တရား နိဗ္ဗာန်တရားတော်မြတ်ကို ရပါလို၏-ဟု အမြဲဆုတောင်းကြသည်။ ဆရာတော်များထံ သီလခံယူရာ၌ မဂ်ဉာဏ် ဖိုလ်ဉာဏ် နိဗ္ဗာန်တရားတို့ကို မပင်မပန်း ချမ်းသာလွယ်ကူစွာ ကြိုးစားအားထုတ်နိုင်ကြစေ-ဟုနှိုးဆော် ဆုပေးတော်မူကြသည်။ ထိုလိုလားတောင်းတသော ဆုကြီးကို ရယူရန်မှာ ယခုအချိန်သည် အကောင်းဆုံးအချိန် ဖြစ်ပါ၏။ ယခုအချိန်တွင် ကျွန်ုပ်တို့သည် ဒုလ္လဘာ သမ္ပတ္တိလေးပါးကို ကိုယ်စီရရှိနေကြပါသည်။
ထိုလေးပါးမှာ-
၁။ ပတိရူပဒေသ၀ါသသမ္ပတ္တိ=ဗုဒ္ဓအဆုံးအမ သာသနာတော် အရှိန်အ၀ါ ထွန်းတောက်နေပြီး မိမိပြုလိုသော ဒါန သီလ ဘာဝနာ အလုပ်များကို လွယ်ကူစွာ လုပ်ကိုင်နိုင်သော အရပ်ဒေသတွင် လူဖြစ်နေရခြင်းသည် မွန်မြတ်လှသော သမ္ပတ္တိ ( ပြည့်စုံခြင်း ) ဖြစ်သည်။

၂။ အင်္ဂသမ္ပတ္တိ=မျက်စိ နား နှာ အင်္ဂါ ခြေလက် ကောင်းမွန်ကြသည်။
မြင်နိုင် ကြားနိုင် သွားနိုင် လာနိုင် ဖူးမြော်နိုင် ပူဇော်နိုင် နာယူနိုင် သင်ယူနိုင် ကျင့်ဆောင်နိုင်သော ခန္ဓာကိုယ်ကို ရရှိထားကြသည်။

၃။ သပ္ပုရိသူပနိဿယ သမ္ပတ္တိ=မိကောင်း ဖကောင်း ဆရာကောင်း သမားကောင်း အဆွေခင်ပွန်းကောင်းတို့နှင့် တွေ့ကြုံနေရသည်။ မှန်ကန်တိကျသော မြတ်ဘုရား၏ အဆုံးအမ ဒေသနာတော်များကို အချိန်မရွေး ချဉ်းကပ်နာယူနိုင်သည်။ ဆွေးနွေးနိုင်သည်။ ဖြေရှင်းနိုင်သည်။ မိမိနှင့်သပ္ပါယဖြစ်သော လူဆရာ၊ သံဃာဆရာ တော်များထံ ချဉ်းကပ်၍ အနီးကပ် နည်းနာခံယူ ကျင့်ကြံနိုင်သည်။

၎။ သဒ္ဓါသမ္ပတ္တိ=ရတနာသုံးပါးကို ယုံကြည်ခြင်း၊ ကံ ကံ၏အကျိုးကို ယုံကြည်ခြင်း၊ သစ္စာလေးပါး၊ အကြောင်းအကျိုး ပဋိစ္စသမုပ္ပါဒ်တရား၊ မဂ္ဂင်ရှစ်ပါးတို့ကို ယုံကြည်ခြင်း သဒ္ဓါတရားများ ရှိကြသည်။

သံသရာဘ၀ အဆက်ဆက် စွဲကပ်လာခဲ့သော ကိလေသာအညစ်အကြေးများကို ဆေးကြောသုတ်သင်၍ မဂ်တရား ဖိုလ်တရားကို ကြိုးစားအားထုတ်ရန် ယခုဘ၀ထက် ကောင်းသောဘ၀ကို အချည်းနှီး လွန်မြောက်ရန် သင့်ပါမည်လား။

မစင်လူးလျှင်၊ အေးကြည်လင်သည့်၊ ရေစင်ရှိလျက်၊ မဆေးရက်၊ ရေတွက်မဟုတ်ပေ။
ရန်သူဝိုင်းထား၊ ထိုယောက်ျားကား၊ ပြေးသွားဖို့ရာ၊ လမ်းပေါက်သာလျက်၊ ပြေးမထွက်၊ လမ်းတွက်မဟုတ်ပေ။

No comments: