Tuesday, May 19, 2009

ကံ ကံ၏အကျိုး ( ၅၄ )

( ကိုယ်တွေ့ ဒါနအကျိုး )

ကျွန်တော်သည် တောမြို့လေးတမြို့၌ ဘက်ထရီလုပ်ငန်းဖြင့် အသက်မွေးဝမ်းကျောင်း ပြုနေသူ ဖြစ်ပါသည်။ ဘက်ထရီအိုးများ အားသွင်းခြင်း၊ ပြုပြင်ခြင်းနှင့် အိုးသစ်များ ပြင်ဆင်ရောင်းချခြင်းတို့ကို ပြုလုပ်ပါသည်။ ဘက်ထရီအိုး အားသွင်းရာတွင် စေတနာရှေ့ထားပြီး နည်းစနစ်မှန်ကန်စွာဖြင့် အားသွင်းချိန် ပြည့်ဝစွာ သွင်းပေး သောကြောင့် ယုံကြည်စိတ်ချစွာ အပ်နှံကြပါသည်။ ရွာနီးချုပ်စပ်မှ ဘုန်းတော်ကြီးကျောင်းများအား အားသွင်းခမယူဘဲ အလင်းအလှူဒါန ပြုပါသည်။ ကျွန်တော်၏ မိသားစုအတွက် နေ့စဉ်အလှူဒါန ဖြစ်နေပါသည်။

တနေ့တွင် ကျွန်တော်သည် ဘက်ထရီအိုးပြုလုပ်နေစဉ် ခဲစတခုသည် အမှတ်မထင် ကျွန်တော်၏ညာဘက် မျက်စိထဲသို့ ၀င်သွားပါသည်။ လျင်မြန်စွာပင် ရေခွက်ထဲ ရေအပြည့်ထည့်ပြီး မျက်စိကို ရေထဲနှစ်ကာ ဖွင့်ချည် မှိတ်ချည်ဖြင့် ခဲစထွက်သွားအောင် ပြုလုပ်ပါသည်။ အစွမ်းကုန်ကြိုးစားသော်လည်း မရပါ။ မျက်စိသည် ခုလုခုလုနှင့် ကြည့်မကောင်းအောင် နီရဲနေပါသည်။ ထိုဝေဒနာကို လေးငါးရက်ခန့် ခံစားရပြီးနောက် ကျွန်တော်၏ မျက်စိသည် ဘာဆေးမှမလုပ်ဘဲ အလိုအလျောက် ခဲစထွက်၍ ပျောက်ကင်းသွားပါသည်။

ဤသို့ဖြစ်ရခြင်းမှာ ကျွန်တော်သည် ပတ်ဝန်းကျင်ရွာများမှ ဘုန်းတော်ကြီးကျောင်းများအား ဘက်ထရီအားသွင်း အလှူဒါနပြုရာ၌ မည်သည့်မျှော်လင့်ချက် တုန့်ပြန်ချက်ကိုမျှ မမျှော်ကိုးဘဲ စေတနာသန့်သန့်ဖြင့် ပြုခဲ့သော ကုသိုလ်ကြောင့် ကျွန်တော်၏မျက်စိ ပကတိအခြေအနေ ပြန်ရောက်ရသည်ဟု ဆင်ခြင်ယုံကြည်မိပါသည်။

( ဖော်ခြူးသက်-ဇရပ်လှ )
*********************************************************************************

( မိဘလုပ်ကျွေး မြွေဘေးဝေး )

ကျွန်တော်သည် ရပ်ကွက်ရုံးတခုမှ စာရေးဝန်ထမ်း တဦးဖြစ်ပါသည်။ ကျွန်တော်သည် အလုပ်ရရှိသည့်အချိန်မှ စ၍ ယနေ့အထိ မိအိုဘအိုတို့အား လုပ်ကျွေးနေသူဖြစ်ပါသည်။ လူလွတ်တယောက်ဖြစ်သောကြောင့် မိဘတို့အား တတ်နိုင်သလောက် ကြည့်ရှုစောင့်ရှောက်ပါသည်။ ငါးပါးသီလကိုလည်း တတ်နိုင်သလောက် စောင့်ထိန်းပါသည်။ ထို့ပြင် ဘုရားရှိခိုးခြင်း၊ မေတ္တာပို့ခြင်း၊ ဘုရားဂုဏ်တော် ရွတ်ဆိုခြင်းတို့ကိုလည်း တတ်အားသရွေ့ ပြုလုပ်ပါသည်။

တနေ့ ညနေဘက် ကျွန်တော်ရေခပ်သော အချိန်က ဖြစ်ပါသည်။ ကျွန်တော် ခပ်ရသောရေမှာ တဘက်ခြံဝင်းအတွင်းရှိ ရေတွင်းမှရေဖြစ်ပါသည်။ ရေဆွဲပြီး မောနေ၍ ရေပုံးကိုချကာ အိမ်ရှေ့အဆင်းအတက်၌ ခေတ္တ နားနေပါသည်။ အမောဖြေရင်းရတနာသုံးပါး ဂုဏ်တော်ကို ရွတ်ဆိုနေပါသည်။

ထိုအချိန်တွင် ကျွန်တော် ရေပုံးထားရာအနီး ပန်းပင်များကြားမှ တလှုပ်လှုပ်ဖြင့် သင်္ကာမကင်းဖွယ် တွေ့ရှိ၍ ကျွန်တော်ကြည့်လိုက်မိသည်။ ထိုအခါ ငန်းမြွေကြီးတကောင်သည် ပါးပျဉ်းထောင်လျက် ပေါက်မည့်ဟန် ပြင်နေကြောင်း တွေ့ရပါသည်။ ငန်းမြွေကြီးမှာ စိမ်းဝါရောင်ဖြစ်၍ လုံးပတ်မှာ လက်ကောက်ဝတ်ခန့် ဖြစ်ပါသည်။ ကျွန်တော်သာ အောက်သို့ဆင်း၍ ရေပုံးယူလိုက်လျှင် ငန်းမြွေကြီးကိုက်မည်မှာ မလွဲဧကန် ဖြစ်ပါသည်။ ထို့ကြောင့် ကျွန်တော်လည်း လန့်ဖျပ်ပြီး အိမ်ပေါ် တက်ပြေးပါသည်။

ထိုအခါ ငန်းမြွေကြီးလည်း ပန်းပင်များကြားမှ ထွက်ခွာသွားပါသည်။ ငန်းစောင်းမြွေကြီးများ အကိုက်ခံရပါက ဆေးမမီကြောင်း အဖေကပြောပါသည်။ အဖေသည် ဘုရားရှိခိုးသည့်အခါ ပရိတ်တရားတော်နှင့် ဘုရားဂုဏ်တော်များ ရွတ်ဆိုခြင်း၊ မေတ္တာပို့ခြင်း၊ အမျှပေးဝေခြင်းများပြုလုပ်ပါသည်။ ယခုအခါ ထိုငန်းစောင်းမြွေကြီးကို မတွေ့ရတော့ပါ။

ကျွန်တော် ထိုငန်းစောင်းမြွေကြီး ကိုက်မည့်ဘေးမှ လွတ်ခဲ့ရကြောင်းမှာ မိဘတို့အားလုပ်ကျွေးခြင်း။ ငါးပါးသီလကို အတတ်နိုင်ဆုံး စောင့်ထိန်းခြင်း။ ဘုရားဂုဏ်တော်တို့ကို ရွတ်ပွားခြင်း၊ စသော အကြောင်းများကြောင့် ဖြစ်သည်ဟု ယုံကြည်မိပါသည်။

( မောင်ထွန်း )
*********************************************************************************

( မေတ္တာရောင်ပြန် အကျိုး )

ကျွန်မတို့ ငယ်ငယ်တုန်းက အပေါင်းအသင်းများနှင့် ဆော့ကစားကြလျှင် အငြင်းသန်၍ ခဏခဏ ရန်ဖြစ်တတ် ကြပါသည်။ ကြာတော့ ကျွန်မတို့မေမေက မကစားခိုင်းတော့ဘဲ စာကိုသာ ကျက်ခိုင်းပါတော့သည်။ ပြီးတော့ မေမေက ပြောပါသေးသည်။ သမီးတို့ ကစားတာက ဒေါသတွေ တအားပါလာတာကိုး၊ တော်တော်ကြာ လူကြီးတွေပါဝင်ပြီး စကားပြောလာရရင် ဘယ်ကောင်းတော့မလဲ။ မေတ္တာပျက်ကုန်ရောပေါ့ကွယ်။

အိုး-မေမေကလဲ မေတ္တာပျက်တော့ကော ဘာဖြစ်သေးလဲ၊ သူတို့က မတရားလွန်လာတာကိုး-ဟု ကျွန်မက ကလေးပီပီ ပြန်ပြောခဲ့လေသည်။
ထိုအခါ မေမေက-မဟုတ်ဘူးလေ၊ သမီးကသာ အလျှော့ပေးကြည့် သူတို့လဲ လျှော့လာမှာပေါ့၊ သမီးက ဒေါသတကြီးနှင့် တင်းမာနေရင် သူတို့ဘက်ကလဲ တင်းမာနေမှာပေါ့၊ မှန်များလိုပေါ့၊ သူ့ကိုပြုံးရင် ပြုံးပြတယ်၊ သူ့ကို မဲ့ပြရင်လဲ ပြန်မဲ့ပြတာပေါ့-ဟု မေတ္တာ၏ ရောက်ပြန်ဟပ်မှုကို မေမေက ပြောပြခဲ့ပါသည်။

ဟုတ်ပါသည်၊ သားတွေ သမီးတွေရ၍ ကျွန်မအရွယ် အသင့်အတင့် ရှိသောအခါ မေမေပြောခဲ့သော မေတ္တာ၏ ရောင်ပြန်သဘောကို နားလည်ခဲ့ရပါသည်။ တနေ့တွင်ကျွန်မ၏ခင်ပွန်းသည် ခွင့်သွားရန်အတွက် အိပ်ရာခင်းတခုကို နောက်ဖေးရှိ ရေအင်တုံတခုတွင် ညအိပ်စိမ်ထားမိပါသည်။ မနက်မိုးလင်း၍ အိပ်ရာခင်းအား လျှော်ရန်ကြည့်သောအခါ အင်တုံထဲတွင် အိပ်ရာခင်းမရှိတော့ပါ။ ခဏအကြာတွင် တဖက်အိမ်မှ အမကြီးတယောက်က သူ မနက်၎-နာရီလောက်တွင် နိုးနေကြောင်း၊ အိမ်နှစ်အိမ် အနောက်ဘက်က အသံကြားရ၍ အပြင်ဘက်သို့ အသာချောင်းကြည့်ရာ ဘယ်သူဘယ်ဝါဖြစ်ကြောင်း-ကို ကျွန်မအား အသေအချာ ပြောပြပါသည်။

ညအိပ်ရာဝင်ချိန်တွင် ကျွန်မသည် ဘုရားအား ဖယောင်းတိုင်မီး၊ အမွှေးတိုင်မီးများ ပူဇော်၍ ငါးပါးသီလခံယူ ပါသည်။ ထို့နောက် ကျွန်မ၏ပစ္စည်းကို ခိုးယူသည်ဟူသော အမျိုးသမီးကြီးအား စိတ်အာရုံထဲတွင် ထားကာ သစ္စာဓိဋ္ဌာန် တခုကို ပြုလိုက်ပါသည်။

ဘုရားတပည့်တော်မသည် ဤအမျိုးသမီးကြီးကို ခင်မင်သိရှိရသည့် အချိန်မှစ၍ မိခင်တဦးပမာ ရိုသေလေးစားခဲ့ပါသည်။ သူ့အပေါ်တွင်လည်း မကောင်းသော အကြံအစည်များ မကြံစည်ခဲ့ပါ။ ဤမှန်ကန်သော သစ္စာစကားကြောင့် ဘုရားတပည့်တော်မ၏ ပစ္စည်း ပြန်လည် ထားရှိပေးပါစေသား-ဟူ၍ တိုင်တည်လိုက်ပါသည်။

မနက်မိုးလင်းသော် အိမ်ဘေးမှ အစောကြီးထတတ်သော အမကြီး၏ မင်္ဂလာရှိသောအသံကို ကျွန်မ ကြားရလေသည်။ ညီမရေ-ဟောသည်မှာ လာကြည့်စမ်းပါဦး၊ ငါ့ညီမ မနေ့က ပျောက်သွားတယ်ဆိုတဲ့ စောင်အခင်းလေး၊ ခေါက်ရက်သားလေး၊ ရေစင်မှာ လာတင်ထားတယ်ဟေ့။

ဟုတ်ပါသည်၊ ကျွန်မ၏ပစ္စည်းလေး ပြန်ရပါသည်။ ပြန်လာထားသည့် သတင်းသည်လည်း ချက်ချင်းပျံ့နှံ့သွားပါသည်။ ဤကဲ့သို့ ကျွန်မပစ္စည်း ပြန်လည်ရရှိခြင်းသည် မေတ္တာရောင်ပြန် အကျိုး-ဟု ယုံကြည်ယူဆမိပါသည်။

( ခိုင်-ပုသိမ် )

( မြတ်မင်္ဂလာ ၁၉၉၆-ခု သြဂုတ်လ )

No comments: