Wednesday, May 27, 2009

အုတ်ဖိုဆရာတော်ကြီး ဘဒ္ဒန္တဥက္ကံဝံသမာလာ

အုတ်ဖိုဆရာတော်ဘုရားကြီး ဘဒ္ဒန္တဥက္ကံဝံသမာလာသည် ဒွါရဂိုဏ်း (၀ါ) ဒွါရသာသနာကို စတင်ခဲ့သော အရှင်မြတ်ကြီးဖြစ်သည်။ ဆရာတော်ကြီးသည် ၀ိနည်းသိက္ခာပုဒ်တော်များကို တင်းတင်းကျပ်ကျပ် လိုက်နာ၍ အသက်နှင့်ထပ်တူ စောင့်စည်းတော်မူသည်။

ဆရာကြီးသည် ၁၁၇၉-ခုနှစ် တပေါင်းလဆန်း ၅-ရက် တနင်္ဂနွေနေ့၌ ဟင်္သာတခရိုင် သာရဝေါမြို့ကလေးမှ ၂-မိုင်ကွာသော ရွာကလေး၌ ဖွားမြင်တော်မူသည်။ ခမည်းတော် ဦးရွှေပန်း+မယ်တော် ဒေါ်လေးတို့ ဖြစ်ကြသည်။

ဟင်္သာတမြို့ ရန်ကုန်မြို့တို့ရှိ ဆရာတော်ကြီးများထံမှသာမက အမရပူရ ဗားကရာဆရာတော်ကြီး အင်းဝမြသိန်းတန်ဆရာတော်ကြီး၊ စစ်ကိုင်း ထူပါရုံဆရာတော်ကြီးများထံတွင် ပရိယတ္တိစာပေများ သင်ယူခဲ့သည်။ မြန်မာ ပါဠိဘာသာတို့သာမက သက္ကတဘာသာကိုပါ ကောင်းစွာ တတ်ကျွမ်းသည်။ မင်းတုန်းမင်းကြီးက မန္တလေးမြို့တွင် သီတင်းသုံးရန် ပန်ကြားသော်လည်း လက်မခံခဲ့။ ထိုစဉ်က အောက်မြန်မာနိုင်ငံကို နယ်ချဲ့အင်္ဂလိပ်တို့ သိမ်းပိုက်ထားရာ သာသနာရောင် မှေးမှိန်သော အောက်ပြည်အောက်ရွာသို့ ကြွ၍ ကြိုးစားပမ်းစားပင် သာသနာပြုတော်မူခဲ့သည်။ အုတ်ဖို ( ယခုအင်္ဂပူမြို့ ) သို့ ပြောင်းရွှေ့ သီတင်းသုံးသည်မှစ၍ အုတ်ဖိုဆရာတော်ဟု ထင်ရှားခဲ့သည်။

ဆရာတော်ကြီးသည် ၁၂၄၂-ခုနှစ်တွင် အိန္ဒိယနိုင်ငံ ဗုဒ္ဓဂယာသို့၎င်း။
၁၂၄၉-ခုနှစ်တွင် သီရိလင်္ကာသို့၎င်း။ ဘုရားဖူးကြွရောက်တော်မူခဲ့သည်။
ဆရာတော်ကြီးသည် ကျမ်းပေါင်း ၁၀၀-ကျော် ပြုစုခဲ့သည်။ မေတ္တာစာအမျိုးမျိုး၊ ရတုကဗျာ အမျိုးမျိုးတို့ကိုလည်း ရေးသားပြုစုတော်မူခဲ့သည်။
ဆရာတော်ကြီးသည် ၁၂၆၇-ခုနှစ် တပေါင်းလဆုတ် ၂-ရက်နေ့ သက်တော် ၈၈-နှစ်တွင် ပျံလွန်တော်မူခဲ့သည်။

No comments: