Sunday, May 24, 2009

ကံ ကံ၏အကျိုး ( ၅၅ )

( ဗောဇ္ဈင်ရွတ်ပွား အကျိုးတရား )

ကျွန်မ၏မိခင်ကြီးသည် အသက် ၈၀-အထိ ဒေါင်ဒေါင်မည် ကျန်းမာသူတဦး ဖြစ်ပါသည်။ အိမ်မှုကိစ္စများကို ကိုယ်တိုင်ဝင်ရောက် လုပ်ကိုင်ရမှ ကျေနပ်သူဖြစ်သည်။ သို့သော် ၈၁-နှစ်ထဲ ရောက်သည်နှင့် အသက်ရှူမ၀၊ အိပ်မပျော်၊ စားမ၀င်ဖြစ်ကာ အိပ်ရာထဲတွင်သာ အနေများနေသည်။ ထို့ကြောင့် အထူးကုဆရာဝန်ကြီးနှင့် ပြသကြည့်ရာ အဆုတ်ပွပြီး အသက်ရှူလေပြွန်လမ်းကြောင်း မကောင်းဟုသိရပါသည်။ ကြီးမားသောရောဂါ မဟုတ်သောကြောင့် စိုးရိမ်ဖွယ်မရှိကြောင်း ပြောပြီး သောက်ဆေးကိုသာ ပေးလေသည်။

သို့သော် ရောဂါမှာ သက်သာသလိုနှင့် ထူထူထောင်ထောင် မရှိသေးသဖြင့် အားရစရာ မကောင်းလှပါ။ သီတင်းကျွတ်လ တရက်တွင်မူ မိခင်၏ မောင်ဖြစ်သူက ပုဇွန်တောင်ကျောင်းတိုက်မှ သံဃာတော်သုံးပါးကို အိမ်သို့ပင့်ဆောင်ကာ အသင့်ချက်ပြုတ်လာသော ဆွမ်း ခဲဘွယ်နှင့် သင်္ကန်းတစုံကို မိခင်ကြီးအား ကပ်လှူစေပါသည်။ မိခင်ကြီးကို အမွန်မြတ်ဆုံးသော ကန်တော့နည်းဖြင့် ကန်တော့ခြင်းပင် ဖြစ်ပါသည်။

္ဆဆရာတော်ကြီးက သီလပေး တရားဟောပြီး သံဃာတော်များအားလုံး ပရိတ်ရွတ်ဆိုကြပါသည်။ အထူးသဖြင့် မိခင်ကြီးအတွက် မေတ္တသုတ်နှင့် ဗောဇ္ဈင်သုတ်ကို ရွတ်ဆိုပြီးနောက် ဗောဇ္ဈင် ၇-ပါး တရားတော်ကို ရွတ်ဆိုရာ မိခင်၏မွေးနေ့နှင့် အမည်ကို ၁၀-ကြိမ်ခန့်ပင် ထည့်သွင်း ရွတ်ဆိုသည်ကို နာကြားရပါသည်။ ဆရာတော်ကြီးသည် ဦးလေးနှင့် ဆရာရင်း ဒကာရင်း ဖြစ်ရာ မိခင်ကြီးအား အထူးဆုတောင်း မေတ္တာပို့သနေမည် ဖြစ်ကြောင်း အားပေးစကား ပြောကြားတော်မူသွားပါသည်။

ဤသို့ဖြင့် သံဃာတော်များအား သဒ္ဓါဆွမ်းဆက်ကပ်၍ သင်္ကန်းကပ်လှူပြီးသည့်နောက်ပိုင်း မိခင်ကြီးမှာ တနေ့တခြား လန်းဆန်းထူထောင်လာပြီး စားဝင် အိပ်ပျော်လာပါသည်။ ပရိတ်ကြီး ၁၁-သုတ်ကို ကိုယ်တိုင် ရွတ်ဆိုလာနိုင်ရုံသာမက သတင်းစာကိုပင် ဖတ်ရှုလာနိုင်သည်အထိ နေကောင်းလာပါသည်။ ဆရာတော်ဘုရားကြီး ပို့သသောမေတ္တာနှင့် ပရိတ်ရွတ်ဆိုခြင်း အထူးသဖြင့် ဗောဇ္ဈင်သုတ်နှင့် ဗောဇ္ဈင် ၇-ပါး တရားတော်ရွတ်ဆိုမှု၏ တန်ခိုးတော်ကြောင့်ပင် ဖြစ်ပေမည်။

ဗောဇ္ဈင်တရား၏ အနှစ်တရားကိုယ် ၇-ပါးမှာ
မဂ်ဉာဏ်၏အကြောင်းဖြစ်သော ဆင်ခြင်အောက်မေ့မှု (သတိ)၊
ဉာဏ်(ပညာ၊
အားထုတ်မှု(၀ီရိယ)၊
နှစ်သက်ကြည်နူးမှု(ပီတိ)၊
ငြိမ်းချမ်းမှု(ပဿဒ္ဓိ)၊
တည်ကြည်မှု(သမာဓိ) နှင့်
အလယ်အလတ်တည့်မတ်မှု(ဥပေက္ခာ)တို့ပင်ဖြစ်ပြီး
ထိုတရားများ မပါဝင်လျှင် ဘယ်အရာမျှမပြီးစီး မအောင်မြင်နိုင်။

ပညာရေး စီးပွားရေး ကျန်းမာရေး-စသော လောကအရေးအရာများတွင် ထိုဗောဇ္ဈင်တရားတို့ ကင်းမဲ့လျှင် ဆုတ်ယုတ်ပျက်စီးတတ်ကြောင်း ဖတ်ရှုဆင်ခြင်မိသည့်နောက်ဝယ် ကျွန်မသည် မိခင်ကြီး၏ ကျန်းမာရေး ကောင်းသည်ထက် ကောင်းလာစေရန် ဗောဇ္ဈင်သုတ်နှင့် ဗောဇ္ဈင် ၇-ပါး တရားတော်တို့ကို မိခင်၏မွေးနေ့နှင့် အမည် ထည့်သွင်း၍ နဘေးတွင်ထိုင်ကာ နေ့စဉ်မပျက် ယုံကြည်လေးနက်စွာ ရွတ်ဆိုပေးမိပါတော့သည်။

( ရည်မျိုးဆက် )
*********************************************************************************

( ကံကြီးထိုက်သူ )

အချိန်ကား ၁၉၇၀-ခုနှစ်က ဖြစ်ပါသည်။ ကျွန်တော်သည် အူရောင်ငန်းဖျားရောဂါဖြင့် မြင်းခြံပြည်သူ့ဆေးရုံတွင် ဆေးကုသနေသောအချိန်ဖြစ်သည်။ ထိုအချိန်က ဆေးကုသနေကြသော လူနာများ အလွန်များနေ၍ ကျွန်တော့အား လူသွားစင်္ကြံလမ်းပေါ်တွင် နေရာချထားပေးခဲ့ကြပါသည်။ စင်္ကြံ၏ ထိပ်တဘက်စွန်းတွင် အချုပ်သားများအတွက် သံတိုင်များဖြင့် သီးသန့်ကာရံထားသော အခန်းငယ်တခု ရှိပါသည်။

တနေ့တွင် အရေးပေါ်လူနာတဦး အချုပ်ကားဖြင့် ရောက်လာသည်။ ထိုသူမှာ ဦးခေါင်းမှလွဲ၍ တကိုယ်လုံး ရေနွေးပူလောင်ထားသည့် ထောင်သားတဦးဖြစ်ကြောင်း သိရပါသည်။ ထောင်သားများအတွက် ချက်ထားသည့်ထမင်းအိုး ဟင်းအိုးများကို လူနှစ်ယောက် ၀ါးထမ်းပိုးဖြင့် ရှေ့နောက်ထမ်း၍ အလှည့်ကျ သယ်ဆောင်ကြရ၏။ ထိုနေ့က အဆိုပါ ထောင်သား၏ အလှည့်ဖြစ်သည်။

မီးဖိုပေါ်မှ အလွန်လေးလံသော ထမင်းအိုးကြီးကို သံကြိုးချိတ်ဖြင့် ချိတ်၍ ရှေ့နောက်ထမ်း မ,ကြသည်။ အိုးကြီးကား ကြွတက်မလာပါ။ သူနှင့်တွဲဘက် အထမ်းသမားသည် သူ့ထက် ပိုပြီးအားသန်သူဖြစ်သည်။ ဒုတိယအကြိမ် အားစိုက်ပြီး ထမ်းမ,လိုက်ကြသောအခါတွင် အိုးသည် ကြွမလာဘဲ ၀ါးထမ်းပိုးသည် ချာချာလည်ပြီး ထိုသူအား ဘေးဘက်သို့ တွန်းလှဲပစ်လိုက်တော့သည်။

အနီးတွင် ရေများဆူပွက်နေသည့် အဖုံးမရှိသော ဒယ်အိုးကြီးတလုံး ရှိသည်။ ထိုဒယ်အိုးကြီးထဲသို့ တိုက်ရိုက် ကျသွားသည်။ ထိုအခါ ဦးခေါင်းမှလွဲပြီး တကိုယ်လုံး နစ်မြုပ်သွားသည်-ဟု သူ့အား လိုက်ပို့သော အစောင့်ရဲသားက ပြောပြသည်။ ထိုအခါ ကြားရသူအားလုံးသည် ထိုသူ့အပေါ်၌ သနားကြင်နာစိတ်များ ဖြစ်ပေါ်နေကြသည်။

ထို့ကြောင့် လူအများစုပြုံရောက်လာပြီး ထိုသူ့အကြောင်းကို ဆက်လက်မေးမြန်းကြသည်။ ထိုလူမှာ ပခုက္ကူမြို့၏ အနောက်ဘက်နယ်အတွင်းရှိ ရွာတရွာမှ လူငယ်တဦးဖြစ်ကြောင်း၊ ဖခင်အရင်းအား ဓားနှင့်ထိုးသတ်သော အမှုဖြင့် မြင်းခြံထောင်တွင် ကျခံနေသူဖြစ်ကြောင်း ရဲသားက ပြောပြသောအခါ ပရိသတ်များမှာ ဟင်-ဟု သံပြိုင်ငြီးလိုက်ကြပြီး မျက်နှာများ ရှုံ့မဲ့သွားကြသည်။ ယခင်က သူ့အပေါ်ထားခဲ့သော သနားကြင်နာစိတ်များ ပျက်ပြယ်သွားကြဟန် တူပါသည်။

ထိုသူ့အတွက် လိုအပ်သော ကုသမှုများ ပြုလုပ်ပေးပြီးသောအခါ သူ့အား အချုပ်သားများထားသော အခန်းတွင်းသို့ ပို့ထားခဲ့သည်။ နံနက်လင်းသောအခါ ထိုသူ့အား ကျွန်တော်၏ခုတင်ပေါ်မှ လှမ်း၍မြင်တွေ့ နေပါသည်။ အ၀တ်အားလုံး ချွတ်ထားပြီး ခရမ်းရောင်လိမ်းဆေးများ လူးပေးထားသဖြင့် တိရိစ္ဆာန်တကောင်နှင့် တူနေပါသည်။

ခန္ဓာကိုယ်တခုလုံး အနားများ အပြည့်ဖြစ်နေ၍ ဆေးထိုးရန် အခက်တွေ့ရသည်ဟု ဆရာမက ပြောသွားသည်။ လူနာအား လာရောက်ပြုစုသူ၍ တဦးမှမတွေ့ရပါ။ အခန်းအတွင်း၌လည်း အဖော်မရှိ၊ သူတဦးတည်းသာ ရှိသည်၊ သံတံခါး၏ အပြင်ဘက်၌ ရဲသားတဦးက စောင့်နေသည်။ ညတိုင်း ကောင်းကောင်းမအိပ်နိုင်၊ ကြောက်ရွံ့ထိတ်လန့်သော အသံဆိုးများဖြင့် မကြာမကြာ ဟစ်အော်နေသည်။ ၄-ရက်ခန့်ကြာသောအခါ ရူးသွား၏။

သူ့အတွက် အသုံးပြုရန် ပေးထားသည့် ၀မ်းသွားအိုးနှင့် ဆီးအိုးထဲမှ သူသွားထားသော မစင်များကို ဇွန်းဖြင့် ကော်ပြီးစားနေသည်။ တဖန် ဆီးများကိုလည်း အားရပါးရ သောက်ပြန်သည်။ တပတ်ခန့်ကြာသောအခါ သေဆုံးသွား၏။
ဖခင်အား သတ်ခဲ့သူမှာ အထက်ပါအတိုင်း မကောင်းသော ဖြစ်ရပ်များ ဆက်ကာဆက်ကာ တွေ့ပြီး ဘ၀ဆုံးခဲ့သည့်အဖြစ်အပျက်ကို အသေးစိတ်သိကြသော ဆရာဝန်၊ ဆရာမများ ထောင်အမှုထမ်းများ ယနေ့အထိ ရှိကြပါသည်။

( ဦးဘိုးကြီး )

( မြတ်မင်္ဂလာ ၁၉၉၆-ခု စက်တင်ဘာလ )

No comments: