Saturday, May 9, 2009

ကံ ကံ၏အကျိုး ( ၅၃ )

( ရတနာသုံးပါး ဂုဏ်ကျေးဇူး )

ကျွန်တော်သည် သိတတ်သည့်အရွယ်မှစ၍ ရတနာသုံးပါးကို ယုံယုံကြည်ကြည် ကိုးကွယ်အားထားခဲ့ပါသည်။ ပဲခူးမြို့ မဟာစည်သာသနာ့ရိပ်သာတွင်လည်း တရားထိုင်ခဲ့ပါသည်။ ငယ်စဉ်ကစ၍ သရဏဂုံသုံးပါးကို ပုတီးစိပ်၍ အိပ်ပါသည်။ ကျွန်တော်၏ အဘွား ဘုရားရှိခိုးရာတွင် ရွတ်ဆိုသော သမ္ဗုဒ္ဓေဂါထာနှင့် ဘုရားဂုဏ်တော်၊ တရား ဂုဏ်တော်၊ သံဃာ့ဂုဏ်တော်များကိုလည်း အလွတ်ရခဲ့ပါသည်။ အလုပ်ခွင်သို့ ရောက်သောအခါ တောင်တန်းသာသနာပြု ဆရာတော်ကြီး ဦးဥတ္တမသာရ၏ တရားတိပ်ခွေကို နာကြားခဲ့ရပြီး နတ်များပင့်ဖိတ်ခြင်း၊ နတ်များနှင့်တကွ သုံးဆယ့်တဘုံသားတို့အား မေတ္တာပို့ အမျှပေးဝေခြင်း၊ ပရိတ်ကြီး ဆယ့်တသုတ် ရွတ်ဆိုခြင်းတို့ကို ပြုလုပ်ခဲ့ပါသည်။

၁၉၉၁-ခု ဇွန်လတွင် ကျွန်တော့အား ဖြူးမြို့ အလယ်တန်းကျောင်းအုပ်မှ ချင်းပြည်နယ် မတူပီမြို့နယ် ရေဇွာကျေးရွာ အထက်တန်းကျောင်းအုပ်အဖြစ် ရာထူးတိုးမြင့်ခန့်ထားခြင်း ခံရပါသည်။ အဆိုပါကျောင်းသို့ တာဝန်ထမ်းဆောင်ရန်အတွက် ဖြူးမြို့မှ မန္တလေးမြို့သို့ အမြန်ရထားဖြင့် ထွက်ခွါခဲ့ပါသည်။ ထို့နောက် မန္တလေးမှ မုံရွာသို့၎င်း၊ မုံရွာမှ ခုက္ကူသို့၎င်း၊ ပခုက္ကူမှ မင်းတပ်မြို့သို့၎င်း ရောက်ရှိခဲ့ပါသည်။

၁၂-၇-၉၁-နေ့တွင် မင်းတပ်မှ ကားဖြင့် ဆက်လက်ထွက်ခွာလာရာ မိုင် ၄၀-တွင် ညအိပ်ကြရပါသည်။ ထွက်ခွာလာရာ လမ်းတလျောက်တွင် ကျွန်တော်သည် သရဏဂုံသုံးပါးဂုဏ်ကို ရွတ်ဆိုခြင်း၊ အရပ်ရှစ်မျက်နှာရှိ နတ်-လူ-သတ္တ၀ါအားလုံးတို့အား မေတ္တာပို့ခြင်းတို့ကို အစဉ်မပြတ် ပြုလုပ်ခဲ့ပါသည်။

ထို့နောက် ဆက်လက်၍ ၁၃-၇-၉၁-နေ့တွင် ခရီးဆက်ကြပါသည်။ မင်းတပ်မှ ၇၂-မိုင်ကွာသော နေရာသို့ ရောက်လျှင် ကားလမ်းမှ မြေကြီးပဲ့ကျ၍ ကားမှာ ချောက်ထဲသို့ ကျသွားပါသည်။ သို့သော် ကားမှာ အထက်အောက် ပြောင်းပြန်ဖြစ်ပြီး သစ်ပင်ကြီးတပင်ကြောင့် ချောက်ထဲသို့ ဆက်မကျတော့ပါ။

ကားပေါ်တွင်ပါလာသော ခရီးသည်အချို့ ဒဏ်ရာပြင်းထန်စွာ ရရှိကြပါသည်။
သို့သော် ကျွန်တော်သည် အသက်အန္တရာယ်ဖြစ်ဖို့ဝေးစွ၊ တစုံတရာ ထိခိုက်ဒဏ်ရာပင် မရရှိခဲ့ပါ။ ဤကဲ့သို့ အန္တရာယ်ကင်းခဲ့ခြင်းမှာ ရတနာသုံးပါး ဂုဏ်ကျေးဇူးကြောင့်ဟု ယုံကြည်ယူဆမိပါသည်။

( တင်အေး )
*********************************************************************************

( ကိုယ်တွေ့ မြတ်မင်္ဂလာ အကျိုး )

ကျွန်တော်သည် ဘွဲ့ရအလယ်တန်းပြ ဆရာတဦးဖြစ်ပါသည်။ သာမန်အားဖြင့် ကျောင်းဆရာဘ၀သည် အေးချမ်းလှပါသည်။ ကျွန်တော်မှာမူ အထက်တန်းကျောင်း တကျောင်းလုံး၏ ဝေယျာဝစ္စကို ထမ်းဆောင်ရသော မိဘဆရာအသင်း အတွင်းရေးမှူး ဖြစ်နေသောကြောင့် မအေးချမ်းလှပါ။ မိဘဆရာအသင်း၏ ရန်ပုံငွေ ကောက်ခံမှုမှာလည်း ပါဝင်ရသည်။

ကျောင်းသုံး ခုံကျိုး ခုံပျက်ပြင်ခြင်း၊ ၀င်းခြံခတ်ခြင်း၊ အိမ်သာကျင်းတူးခြင်း၊ တည်ဆောက်ခြင်းများကို တပည့်များ၏လုပ်အားနှင့် ကိုယ်ထူကိုယ်ထ အပင်ပန်းခံ လုပ်ဆောင်မှုတို့တွင်လည်း ပါဝင်ရသည်။

တဖန် ကျောင်းစစ်စာမေးပွဲများ၊ အတန်းတင်စာမေးပွဲများတွင်လည်း စာစစ်ရုံးအဖွဲ့မှူးအဖြစ် စာမေးပွဲများ အောင်မြင်စွာ ပြီးမြောက်ရေးကို ဆရာကြီးနှင့်အတူ တာဝန်ထမ်းဆောင်ရသည်၊ စာမေးပွဲများ မကျင်းပမီ တလအလိုမှာပင် စာစစ်လုပ်ငန်းအတွက် စာရေးကိရိယာဝယ်ယူခြင်း၊ စုဆောင်းခြင်းများ ပြုရပါသည်။

လွန်ခဲ့သော ၁၉၉၅-ခု ဇန်န၀ါရီလ ၂၅-ရက်နေ့က ကျွန်တော်သည် အတန်းတင်စာမေးပွဲအတွက် မေးခွန်းနှင့် အဖြေလွှာစာရွက်များ ပြုလုပ်ရန် ပန်းတောင်းမြို့မှ ဧရာဝတီမြစ်တဖက်ကမ်း ပြည်မြို့ အစိုးရစာရေးကိရိယာ လက္ကားဖြန့်ဖြူးရေးဆိုင်သို့ စာရွက်ထုတ် သွားခဲ့ပါသည်။ ခရီးသွားချိန်တွင် ကားစီးရင်း ပဲ့ထောင်စီးရင်း ဖတ်နိုင်ရန် ဆရာမဒေါ်မြင့်မြင့်ဌေးနှစ်ထံမှ မြတ်မင်္ဂလာစာစောင်များ၊ ဓမ္မဗျူဟာစာစောင်များ ယူလာခဲ့ပါသည်။

ပန်းတောင်းမြို့မှ ဆင်တဲကူးတို့ဆိပ်ကမ်းသို့ ကားစီးရပါသည်။ ဆင်တဲဆိပ်ကမ်းမှ ပဲ့ထောင်မှာ ကျွန်တော်လည်းရောက်၊ လူလည်းပြည့်၍ ထွက်ပါသည်။ ပဲ့ထောင်သည် အပေါ်ဖောင်းရစ် မြုပ်သည်အထိ ခရီးသည်အပြည့် တင်ထားသည်။ ဈေးဝယ် ဈေးသည် များကြသည်။ ထိုင်စရာ ခုံတန်းမရှိသဖြင့် ပါလာသော ဂုံနီအိတ်ထုပ်ကိုချကာ ထိုင်ပါသည်။ ပဲ့ထောင်လည်း စထွက်ပြီဖြစ်သည်။

ကျွန်တော်သည် မြတ်မင်္ဂလာစာစောင် အတွဲ ၁၀၊ အမှတ်-၆၊ ၁၉၉၄-ခု ဒီဇင်ဘာလထုတ်ကို အဆုံးမှအစဘက် ပြန်ဖတ်လာခဲ့သည်။ စာအုပ်တ၀က်ဖြစ်သော စာမျက်နှာ ၂၆-တွင် မင်းလှမြတ်ထွေးရေးသည့် ကိုးတောင်ဆရာတော်ကြီးပေးသော ဂါထာဆောင်းပါးကို စိတ်ဝင်စားစွာ ဖတ်နေမိသည်။ ဆောင်းပါး၏ အချုပ်ဖြစ်သော ဆရာတော်ကြီးမှာကြားသည့်---
အဲဒီဂါထာရွတ်မယ်ဆိုရင် အံကိုကြိတ်ထားပါ၊ ညာဘက် ခြေဖနောင့်နှင့် ကြမ်းပြင်ကို ဆောင့်လိုက်ပြီး
သုနက္ခတ္တံ သုမင်္ဂလံ ၊ သုပ္ပဘာတံ သုဟုဋ္ဌိတံ ။ လို့ ပါဠိတော်ကို ၃-ကြိမ်ရွတ်ဆိုပါ။ ပြီးတော့ မိမိနှုတ်က ဆက်ပြီး အနက်အဓိပ္ပါယ်ကို ဆိုပါ။

ယခုငါသွားမည့်ခရီးသည် ကောင်းသောနက္ခတ်နှင့် ယှဉ်ခြင်း၊ ကောင်းသောမင်္ဂလာဖြစ်ခြင်း၊ ကောင်းသော နိုးကြားခြင်း၊ ကောင်းသော ပွားစီးခြင်းဖြစ်သည်-လို့ ၃-ကြိမ်ဆိုပါ။
ပင်လယ်ပြင်ကြီး ဒေါမန်ထ၍ လှိုင်းလေတွေ ကြွချင်တိုင်းကြွ၊ ကြီးချင်တိုင်း ကြီးနေကြပေမယ့် မြတ်ဗုဒ္ဓ၏ အင်္ဂုတ္တိုရ်လာ ဂါထာအစွမ်းကား ဘေးဘယာမသန်းရအောင် ကာကွယ်နိုင်ကြောင်း သိရလိမ့်မယ်။

ကျွန်တော်သည် စာပါအတိုင်း လိုက်နာကာ ထိုင်ရင်းမှ အာရုံပြုလျက် မိမိညာခြေထောက်ကို အသာဖိနင်းပြီး ၃-ကြိမ် စိတ်ထဲမှ ကြိတ်၍ရွတ်ဆိုမိပါသည်။
ဟယ်-ကံကောင်းလို့ဟေ့၊ သီသီလေးလွတ်တယ်။
တော်တော်မိုက်ရိုင်းတဲ့ကောင်တွေ၊
မိုက်မိုက်ကန်းကန်း ရှေ့ကဖြတ်ကူးတယ်၊ တိုက်မိဖို့ နည်းနည်းလေး လိုတော့တယ်၊ နစ်လိုက်ရရင် ရေလယ်ခေါင်မှာ အကုန်ကြွပဲ။

လှိုင်းဒဏ်ကြောင့် ပဲ့ထောင်လူးသွားသဖြင့် ကျွန်တော်ပင် ရှေ့သို့စိုက်ကျသွားခဲ့ပါသည်။ တအံ့တသြနှင့် တယောက်တပေါက် အသံများကြားသဖြင့် ပဲ့ထောင်ရှေ့သို့ ကျွန်တော်ကြည့်လိုက်သောအခါ ဧရာဝတီမြစ်ကူးတံတား တည်ဆောက်ရေးအတွက် အလုပ်သမားများ တင်လာသောပဲ့ထောင်မှာ ပြည်မြို့သို့ ရောက်ချင်ဇောနှင့် ရှေ့မှ ဖြတ်မောင်းသွားသောကြောင့် ကျွန်တော်တို့ ပဲ့ထောင်ဦးထိပ်နှင့် လက်မ၀က်ခန့် သီသီလေး လွတ်ထွက်သွားကြောင်း သိလိုက်ရပါသည်။

ရေကြောင်းခရီးတွင် စက်တပ်ပဲ့ထောင်ယာဉ်များ၏ မဆင်မခြင် လုပ်ရပ်များကြောင့် အမှားအယွင်းဖြစ်ကာ ရင်နင့်စရာသတင်းဆိုးများ မကြာခဏ ကြားသိရပါသည်။ ယခုလည်း မြတ်မင်္ဂလာ စာစောင်ပါ ကိုးတောင် ဆရာတော်ကြီးပေးခဲ့သော ဂါထာက ဤသတင်းဆိုးကို ဖယ်ရှားခဲ့ပြီဟု လေးလေးနက်နက် ယုံကြည်မိပါသည်။ ဘာသာရေးစာစောင်များ၏ အကျိုးကျေးဇူးကြီးမားပုံကိုလည်း ကျွန်တော်လက်ခံယုံကြည်သွားပါတော့သည်။

( မောင်ကြူဆွေ )

( မြတ်မင်္ဂလာ ၁၉၉၆-ခု ဇူလိုင်လ )

No comments: