Monday, May 25, 2009

ပတ္တာနုမောဒန ကုသိုလ် ယူတော်မူကြပါ

ဒါန, သီလ, ဘာဝနာ, အပစာယန, ဝေယျာဝစ္စ, ပတ္တိဒါန, ပတ္တာနုမောဒန, ဓမ္မဿဝန, ဓမ္မဒေသနာ, ဒိဋ္ဌိဇုကမ္မ-ဟူသော ပုညကြိယာဝတ္ထု ဆယ်ပါးကို ဗုဒ္ဓဘာသာ အမျိုးသား အမျိုးသမီးတိုင်း သိကြပြီးဖြစ်ပါသည်။ သိသည့်အတိုင်းလည်း စွမ်းအားရှိသမျှ ကျင့်သုံးနေကြသည်။ ဤဆယ်ပါးတွင် ပစ္စည်းဝတ္ထုသော်၎င်း၊ အားအင်စိုက်ထုတ်မှုသော်၎င်း၊ မပါဝင်ဘဲ ကောင်းကျိုးခံစားရသော ကိုသိုလ်မှုတခုကို ညွှန်ပြတိုက်တွန်းလိုပေသည်။

ယင်းမှာ-ပတ္တာနုမောဒန ဖြစ်သည်။ ပတ္တာနုမောဒန ဟူသည်မှာ သူတပါးတို့၏ ကုသိုလ်ကောင်းမှုကို မြင်လျှင်သော်၎င်း၊ ကြားလျှင်သော်၎င်း၊ အမျှပေးဝေလျှင်သော်၎င်း၊ နှစ်သက်ဝမ်းမြောက်စွာ အားပေးခြင်းပင် ဖြစ်သည်။ ၀ါ-သာဓုအနုမောဒနာပြုခြင်း ဖြစ်သည်။

ဤနေရာတွင် ရှင်တော်ဗုဒ္ဓ လက်ထက်တော်က ပေဿနဒီကောသလမင်းကြီးနှင့် မလ္လိကာမိဖုရားကြီးတို့၏ မဟာအသဒိသဒါန အလှူတော်ကြီးကို ရည်ညွှန်းလိုပေသည်။ မင်းကြီးနှင့် မိဖုရားကြီးတို့သည် အကြိမ်ကြိမ် အလှူဒါနများ ပြုလုပ်သည်။ တိုင်းသူပြည်သားများကလည်း မင်းမိဖုရားတို့၏ အလှူထက်သာအောင် ကြိုးစား၍ အလှူပေးကြသည်။ ခြောက်ကြိမ်လှူဒါန်းရာတွင် တိုင်းသူပြည်သားများတို့၏အလှူကို မမီနိုင် ဖြစ်နေသည်။ ၇-ကြိမ်မြောက်အလှူ၌မူ နေရာတကာတွင် တိုင်းသူပြည်သားများ လိုက်၍မမီနိုင်အောင် လုပ်ဆောင်ကြရာ ဤအကြိမ်တွင် မင်းမိဖုရားတို့က အနိုင်ရသွားလေသည်။

ဤမျှကြီးကျယ်သော အလှူတော်ကြီးကို ပေးလှူရာတွင် ဇုဏှမည်သော အမတ်သည် အလွန်အားကျ ၀မ်းသာကာ မင်းမိဖုရားတို့သည် စေတနာသဒ္ဓါတရား ထက်သန်ကြပါပေသည်၊ ကောင်းလေစွ၊ ကောင်းလေစွ- ဟု ကျေနပ်နှစ်သက်စွာ ကောင်းချီးပေး သာဓုအကြိမ်ကြိမ် ခေါ်သည်။
ကာဠမည်သောအမတ်ကား များပြားလှစွာသော ဘဏ္ဍာများကို မလိုအပ်ဘဲ အလဟဿ ဖြုန်းတီးပစ်သည်၊ တိုင်းကျိုးပြည်ပြု ကိစ္စများတွင် သုံးလျှင် အားလုံးအကျိုးရှိနိုင်သည်။ မှားလေစွ၊ မိုက်မဲလေစွ-ဟု ပြစ်တင်ရှုတ်ချသည်။

အလှူတော်အတွက် အနုမောဒနာတရား ဟောရာတွင် ရှင်တော်ဘုရားသည် ဂါထာတပုဒ်မျှသာ ဟောပြီး ပြန်ကြွတော်မူလေသည်။ မင်းကြီးသည် ကျောင်းတော်သို့ လိုက်သွားကာ ဤမျှလောက်သော အလှူကြီးကို ဂါထာတပုဒ်သာ ဟောကြား၍ မကျေနပ်ကြောင်း လျှောက်ထားသည်။ ဤတွင် ဘုရားရှင်က အမတ်နှစ်ယောက်၏ စိတ်ဖြစ်နေပုံများကို ပြောပြသည်။

အကယ်၍ အနုမောဒနာတရား အကျယ်ဟောလျှင် ကာဠအမတ်သည် ပိုမိုဒေါသစိတ် ပြစ်မှားစိတ်ဖြစ်ပြီး ကြီးမားသော အပါယ်ဆင်းရဲ ကျရောက်မည်ဖြစ်ကြောင်း ဖြေရှင်းပြတော်မူသည်။
ကောသလမင်းကြီးသည် နန်းတော်သို့ရောက်သောအခါ ဇုဏှအမတ်အား ဆုလာဘ်များစွာပေးပြီး ရာထူး တိုးတက်ချီးမြှောက်သည်။
ကာဠအမတ်ကိုမူ ဤသို့ စိတ်ယုတ်မာရှိသူသည် နန်းတွင်းနှင့်မတန်-ဟု ပြောဆိုပြီး တိုင်းပြည်မှ နှင်ထုတ်လိုက်လေသည်။

ယခုအခါ နေရာအရပ်ရပ်တွင် ကုသိုလ်ကောင်းမှုများ အမျိုးစုံ ပြုလုပ်နေကြရာ လွန်စွာဝမ်းမြောက် အားရဖွယ်များ ဖြစ်ပါသည်။ ကြီးကျယ်ခမ်းနားစွာ ပြုလုပ်နိုင်ကြပါပေသည်။ များပြားစွာ လှူဒါန်းနိုင်ကြ ပါပေသည်။ ခဲယဉ်းစွာ ကြိုးစားတည်ဆောက်နိုင်ကြပါပေသည်-ဟူသော စေတနာ သမ္မာဆန္ဒစိတ်ထားဖြင့် ၀မ်းမြောက်ဝမ်းသာ သာဓုခေါ်၍ ပတ္တာနုမောဒနကုသိုလ် ယူတော်မူကြပါ-ဟု တိုက်တွန်းနှိုးဆော်လိုက်ရပါသည်။

No comments: