Thursday, May 28, 2009

စားရင်း သောက်ရင်း ကုသိုလ်စိတ်များ ပွားများရန်

လူ့လောကတွင် လူသားအားလုံး အသက်ရှင် နေထိုင်ရေးအတွက် အရေးကြီးသောအချက် သုံးချက်ရှိ၏။ ဘယ်တိုင်းပြည် ဘယ်လူမျိုး မဆို ဤသုံးချက်ကို ပစ်ပယ်ရန်မဖြစ်ပေ။ ယင်းတို့ကား-
၁။ စားရေး ၂။ ၀တ်ရေးနှင့် ၃။ နေထိုင်ရေး ဖြစ်သည်။

အပူအအေး ကာကွယ်ရန် အိမ်ရှိရမည်၊ လူ့လောကတွင် ၀င်ဆန့်ရန် သင့်လျော်သော အ၀တ်ကို ၀တ်ဆင်ရမည်။ အရေးအကြီးဆုံးကား နေ့စဉ် စားသောက်ရေးဖြစ်၏။ အသက်ရှင်ရေးအတွက် သင့်တော်သောအစာကို သင့်တော်သော အချိန်တွင် စားရမည်ဖြစ်၏။

သတ္တ၀ါအားလုံးကို ရင်ဝယ်သားကဲ့သို့ သနားကရုဏာ ထားတော်မူသော မြတ်ဗုဒ္ဓသည် စားရာတွင် တရားသဘောနှင့်ယှဉ်၍ စားရန် ဟောတော်မူခဲ့ပါသည်။ အမှတ်မဲ့ စားသူများသည် နေ့စဉ်နှင့်အမျှ လောဘ ဒေါသ အစရှိသော အကုသိုလ်များ တိုးပွားနေမည်။
မကောင်းမှု ရှောင်၊ ကောင်းမှု ဆောင်-ဟု ဆုံးမတော်မူခဲ့သော မြတ်ဗုဒ္ဓသည် စားရင်း သောက်ရင်း ကုသိုလ်စိတ်များ ပွားများရန် နည်းလမ်းကို ဟောပြခဲ့ပါ၏။
ဗုဒ္ဓနည်းကျ စားနည်းကို လိုက်နာကျင့်သုံးခြင်းဖြင့် အကုသိုလ်နည်းပါး၍ ကုသိုလ်ပွားပေလိမ့်မည်။ အမြဲသတိထား၍ စားသောက်ရန် စားနည်းသုံးမျိုးရှိ၏။

ပထမ စားနည်းမှာ-သီလ, သတိဖြင့် စားခြင်း ဖြစ်၏။
စားဖွယ် သောက်ဖွယ်မျးကို သုံးဆောင်ရာ၌ ငါသည် ဤစားသောက်ဖွယ်ကို မြူးတူး ပျော်ပါးရန် စားခြင်းမဟုတ်၊
အရေ အဆင်း လှပရန် စားခြင်းမဟုတ်၊ ချို, ချဉ်, စပ် ငန် အရသာကို ခံစားလို၍ စားခြင်းမဟုတ်၊
ကျန်းမာမျှတစေရန်, သူတော်ကောင်းတရားများ ကြိုးစားအားထုတ်နိုင်ရန်, သုံးဆောင်ခြင်းဖြစ်သည်-ဟူ၍ နှလုံးသွင်း ဆင်ခြင်ကာ စားသုံးပါ။
ပညာရှိကြီးများက လျှာကို အပူမလောင်အောင် စား-ဟု ဆုံးမသည်ကို သတိပြုပါ။

ဒုတိယ စားနည်းမှာ-သမထ ဘာဝနာဖြင့် စားခြင်းဖြစ်သည်။
ဤစားဖွယ် သောက်ဖွယ်များကို ချက်ပြုတ်ကြော်လှော်သူများ၊ ခင်းကျင်းပြင်ဆင်သူများ၊ လှူဒါန်းကျွေးမွေးသူများ ချမ်းသာကြပါစေ၊ တူညီသောအကျိုး ရကြပါစေ၊ အစာရေစာ ပေါများပြီး ကောင်းမှုကုသိုလ်များ ဆောင်ရွက်နိုင်ကြပါစေ-ဟူသော မေတ္တာ စေတနာ မုဒိတာ စိတ်ထားနှင့် စားသုံးရန် ဖြစ်သည်။
ဤနည်းဖြင့် အစာပေါ်၌ တပ်မက်သော လောဘ, မကြိုက်မနှစ်သက်သော စိတ်ကြောင့်ဖြစ်သော ဒေါသများ ကင်း၍ စားသောက်ရင်း မေတ္တာဘာဝနာ အကျိုးများ ရမည်ဖြစ်ပါသည်။

တတိယ စားနည်းမှာ-၀ိပဿနာဖြင့် စားခြင်းဖြစ်၏။
စားဖွယ် သောက်ဖွယ်များကို လှမ်းယူတိုင်း, စားရန် ပါးစပ်ပြင်တိုင်း, ၀ါးမျိုတိုင်း, သောက်သုံးတိုင်း, လှုပ်ရှားမှု အသီးသီးကို သိသိနေရန်ဖြစ်၏။
ယူတယ် ကိုင်တယ် ထိတယ် စားတယ် မျိုတယ်-ဟူ၍ စားသောအမူအရာ အဆင့်ဆင့်ကို ရှုမှတ်ပါလေ။
ဝိပဿနာကုသိုလ် အလေ့အကျင့်ရပြီး လေ့ကျင့်ဖန်များသောအခါ သမာဓိဉာဏ်များ တဖြည်းဖြည်း ရင့်သန်လာကာ ၀ိပဿနာကုသိုလ် ရနေပါလိမ့်မည် ။

အချိန်တိုင်း ကုသိုလ်စိတ် ပွားများနိုင်ကြပါစေ။

No comments: