Tuesday, May 26, 2009

မာနကို မချုပ်တည်းနိုင်သော ရဟန်း

မစ္ဆိကာသဏ္ဏမြို့ဝယ် စိတ္တသူကြွယ်သည် ပဉ္စ၀ဂ္ဂီအဖွဲ့၏ တပါးဖြစ်သော မဟာနာမ်မထေရ်၏ တရားကို နာကြားရပြီး သောတာပတ္တိဖိုလ်၌ တည်၏။ သာသနာတော်ကို ထောက်ပံ့လိုသောဆန္ဒဖြင့် မိမိ၏ဥယျာဉ်၌ ကျောင်းဆောက်ပြီးလျှင် သုဓမ္မအမည်ရှိသော မထေရ်ကို ကျောင်းထိုင်ဘုန်းကြီးအဖြစ် ကိုးကွယ်ထားသည်။

စိတ္တသူကြွယ်၏ ဂုဏ်သတင်း ကြီးမားလှသဖြင့် အဂ္ဂသာဝကနှစ်ပါးဖြစ်သော ရှင်သာရိပုတ္တရာနှင့် ရှင်မောဂ္ဂလာန်တို့သည် ချီးမြှင့်ရန် ကြွလာပြီး တရားဟောသည်။ ထို့နောက် စိတ္တသူကြွယ် အနာဂါမိဖိုလ်သို့ ရောက်သည်။ အဂ္ဂသာဝကနှစ်ပါးကို အိမ်သို့ဆွမ်းစားကြွရန် ပင့်ဖိတ်ပြီးသော် သုဓမ္မမထေရ်အားလည်း ကြွရောက်ရန် ပင့်ဖိတ်ရာ သူ့ကိုနောက်မှ ပင့်သည်ဟု စိတ်ဆိုးပြီး ငြင်းပယ်လေသည်။

ဒါယကာက အကြိမ်ကြိမ် တောင်းပန်၍ ပင့်သော်လည်း လက်မခံပေ။ သို့သော် နောက်နေ့နံနက်တွင် စိတ္တသူကြွယ်အိမ်သို့ ကြွသွားပြီး ဘာတွေများစီမံထားသနည်းဟု လှန်လှောကြည့်၏။ လှူဖွယ်ဖွယ်တွေ စုံလင်ပါ၏။ သို့သော် နှမ်းပျစ်မုန့်တော့ လိုနေသေးတယ်-ဟု ပြော၏။ စိတ္တသူကြွယ်၏ ဆွေမျိုးတွင် မုန့်သည်ရှိသဖြင့် အမျိုးကို နှိမ့်ချပြီး ပုတ်ခတ်ပြောဆိုခြင်း ဖြစ်သည်။ ထိုမျှမက သင့်ကျောင်းတွင်လည်း ငါမနေတော့ပြီ-ဟုဆိုပြီး ထွက်သွား၏။

အကြောင်းစုံကို ဘုရားရှင် သိတော်မူရာ သင်သည် ဒါယကာ၏ သဒ္ဓါတရားကို ဖျက်ဆီး၏၊ ဒါယကာထံ သွားပြီး ကျေနပ်သည်အထိ တောင်းပန်လော့-ဟု ဆုံးမတော်မူ၏။ သုဓမ္မမထေရ်လည်း သူကြွယ်ထံသွား၍ တောင်းပန်ပြီး နှစ်ဦးနှစ်ဖက် ကျေနပ်သွားကြသည်။ ထို့နောက် အရှင်သုဓမ္မသည် စိတ်နှလုံးကြည်လင်စွာဖြင့် တရားအားထုတ်ရာ အရဟတ္တဖိုလ် ရသွားလေသည်။ ဘုရားရှင်က အောက်ပါဂါထာကို ဟောတော်မူလေသည်။

( ပါဠိဂါထာ )
အသန္တံ ဘာဝနမိစ္ဆေယျ ၊ ပုရေက္ခာရဉ္စ ဘိက္ခုသု ။
အာဝါသေသု စ ဣဿရိယံ ၊ ပူဇံ ပရကုလေသု စ ။
မမေ၀ ကတ မညန္တု ၊ ဂိဟီ ပဗ္ဗဇိတာ ဥဘော ။
မမေ၀ါတိဝသာ အဿု ၊ ကိစ္စာ ကိစ္စေသု ကိသ္မိစိ ။
ဣတိ ဗာလဿ သင်္ကပ္ပေါ ၊ ဣစ္ဆာ မာနော စ ၀ဍ္ဎတိ ။

( မြန်မာပြန် )
မလိမ္မာသောရဟန်းသည် ရဟန်းတို့အလယ်၌ မိမိတွင် မရှိသောဂုဏ်တို့ဖြင့် ချီးမွမ်းခြင်း။
မိမိအား ရှေ့ဆေင်ပြုခြင်း။ ကျောင်းတို့၌ အစိုးရခြင်း၊ တပါးသော ဒါယကာတို့ ပူဇော်ခြင်းကို အလိုရှိ၏။

ငါ့ကြောင့်သာ အမှုကြီးငယ်တို့ ပြီးစီးကြ၏-ဟု ရဟန်းရှင်လူတို့ မှတ်ယူကြစေ။
တစုံတခုသောကိစ္စ ဆောင်ရွက်သောအခါ ငါ့အလိုသို့ လိုက်ကြစေ-ဟု မလိမ္မာသောရဟန်းသည် ဤကဲ့သို့သော အကြံအစည်မျိုး အလိုဆန္ဒမျိုး မာန်မာနမျိုး ပွားလေ၏။

( ဆောင်ပုဒ် )
မိမိမပိုင်၊ ဂုဏ်ကိုကိုင်၍၊ အနိုင်ယူပြန်၊ ချီးမွမ်းခံလျက်၊ ခြံရံလိုလား၊ ရှေ့ဆောင်သွားချင်၊
ပစ္စည်းမြင်လျှင်၊ လိုချင်တောင်းခေါ်၊ ဆွေမတော်ဘဲ၊ ပူဇော်ခံလို၊ လောဘပို၏။
ငါ့ကိုအားထား၊ ငါ့စွမ်းအားကြောင့်၊ ထွေပြားကိစ္စ၊ ပြီးမြောက်ရဟု၊ နှစ်ဝလူရှင်၊ ထင်စေချင်၏။
များဖြင်ကိစ္စ၊ ဆောင်ရွက်ကြလျှင်၊ ငါ့အလိုသာ၊ လိုက်ကြရာဟု၊ မာန်မာနမျိုး၊ ရဟန်းဆိုးတွင်၊ အမြဲယှဉ်၏။

( ဗာလ၀ဂ် စိတ္တဂဟပတိဝတ္ထု )

No comments: