Tuesday, May 5, 2009

ဘာသာရေး ပြဿနာ ( ၅၆ )

( ဘဒ္ဒန္တ တိလောကသာရ ဖြေသည် )

( မေး ) ( ပုဏ္ဏက နတ်ဘီလူး )
ဆရာတော်ဘုရား၊ ပုဏ္ဏကနတ်ဘီလူးသည် ဝေဿ၀ဏ်နတ်မင်းကြီး၏ တူတော်သည်-ဟု ဇာတ်တော်တွင် ဆိုပါသည်။
၁။ မည်ကဲ့သို့ တူတော်စပ်ပါသနည်း။
၂။ ပုဏ္ဏကသည် အင်္ဂုလိမာလအလောင်းဟု ဆိုရာ အင်္ဂုလိမာလမှာ ရဟန္တာဖြစ်ပြီး ပရိနိဗ္ဗာန်စံသွားပြီးဖြစ်၍ ဆေးသမားများအလို ပုဏ္ဏက၊ ပေါရိသာဒ၊ စေးနှဲဘီလူးတို့ ယခု ရှိနိုင်-မရှိနိုင် ဖော်ပြပေးတော်မူစေလိုပါသည်
ဘုရား။
( ဦးညိုဝင်း-ကသာမြို့ )

( ဖြေ )
ဝိဓုရဇာတ်တော်တွင် ပုဏ္ဏကသည် ဝေဿ၀ဏ်နတ်မင်းကြီး၏ ဘာဂိနေယျ-တူတော်သူ-ဟု ဆိုပါသည်။
ဘာဂိနေယျ-ဟူသည်မှာ ဘဂိနိယာ အာပစ္စံ ဘာဂိနေယျော-ဟု အဘိဓာန်ဋီကာ ဖွင့်ဆိုပြသဖြင့် နှမ၏ သား-
တူ-ဟု မှတ်သားရပါသည်။

ပုဏ္ဏကတို့သည် ဤမြတ်စွာဘုရား လက်ထက်၌ အင်္ဂုလိမာလ ရဟန္တာဖြစ်၍ ပရိနိဗ္ဗာန်ဝင်စံတော်မူကြပြီး ဖြစ်သဖြင့် ဤခေတ် ဆေးလောကရှိ ပုဏ္ဏက စသည်တို့မှာ ယခင် ပုဏ္ဏကတို့၏ အဆက်အနွယ် ပုဏ္ဏကများသာ ဖြစ်ဖွယ်ရှိပါသည်။
*********************************************************************************

( မေး ) ( သက္ကရာဇ် )
ဆရာတော်ဘုရား၊ တပည့်တော်တို့ မြန်မာနိုင်ငံတွင် သုံးနေသော မြန်မာသက္ကရာဇ်၊ ကောဇာသက္ကရာဇ်၊ မဟာသက္ကရာဇ်နှင့် သာသနာသက္ကရာဇ်များအကြောင်းကို သိလိုပါသဖြင့် ဖြေကြားပေးတော်မူပါ အရှင်ဘုရား။
( ကျော်ကျော်ဦး-ပြည်မြို့ )

( ဖြေ )
မဟာသက္ကရာဇ် ဟူသည်မှာ မြတ်စွာဘုရား သက်တော်ထင်ရှား ရှိစဉ်က သုံးသော သက္ကရာဇ် ဖြစ်ပါသည်။
၎င်းမှာ မြတ်စွာဘုရား၏ ဘိုးတော် အဉ္စနမင်းကြီးက ဒိဗ္ဗစက္ခု အဘိညာဉ်ရ ဒေ၀ီလရသေ့နှင့် တိုင်ပင်၍ ရှေးရှေးသက္ကရာဇ် ၈၆၄၇-နှစ်မှ ၈၆၄၅-ကို ဖြို၍ ၂-ခုကြွင်းထားခဲ့သော သက္ကရာဇ်ဖြစ်၏။
ယင်း မဟာသက္ကရာဇ် ၆၈-တွင် ဘုရားအလောင်း သိဒ္ဓတ္ထ မင်းသားကို ဖွားတော်မူ၍ ဘုရားဖြစ်ပြီးနောက် မဟာသက္ကရာဇ် ၁၄၈-နှစ်တွင် ပရိနိဗ္ဗာန် စံတော်မူသည်။

ယင်းမဟာသက္ကရာဇ်က မြတ်စွာဘုရား ပရိနိဗ္ဗာန်စံတော်မူပြီးနောက် ပထမသံဂါယနာတင်၍ သာသနာနှစ်အဖြစ် ပြုရန် မဟာသက္ကရာဇ်ကို ဖျက်၍ (ဖြို)၍ သာသနာနှစ် တနှစ်မှစ၍ အသုံးပြုခဲ့သည်။ ယင်း သာသနာနှစ် ၆၂၄-သို့ရောက်သောအခါ မြန်မာနိုင်ငံ သရေခေတ္တရာပြည် သုမုန္ဒရီမင်း လက်ထက် ဒေါဒေါရသ ၆၂၂-ကို ဖြို၍ ၂-ခုကြွင်း ထားခဲ့သည်။ ယင်းကို ကောဇာသက္ကရာဇ် ဟု ဆိုသည်။

ယင်းမှတိုးပွားလာသောနှစ် ၅၆၂-သို့ ရောက်သောအခါ ပုဂံပြည် ပုပ္ပါးစောရဟန်းမင်း လက်ထက် ခန်းဆပဉ္စ (၅၆၀)ကို ဖြို၍ ၂-ခုကြွင်းထားလျက် သုံးစွဲခဲ့လေသည်။ ထိုခေတ် ၂-ခုမှ တိုးတက်လာသော ဤယနေ့ ၁၃၅၇-ခုနှစ်အထိ သက္ကရာဇ်မှာ ကျော်ကျော်ဦး သိလိုသော မြန်မာသက္ကရာဇ်ပင် ဖြစ်ပါသည်။

မြန်မာနိုင်ငံ နှစ်ကြိမ်ဖြို ၆၂၂-နှင့်၊ ၅၆၀-ကို ပေါင်းကြည့်လျှင် ၁၁၈၂-ဖြစ်သည်။ ၄င်းနှင့် ယခုရောက်ဆဲ ၁၃၅၇-ကို ပေါင်းသော် ၂၅၃၉-ဖြစ်သည်။ သာသနာနှစ်ဖြစ်၏။ ထို့ကြောင့် တစ်တစ်ရှစ်နှစ်၊ သက္ကရာဇ်၊ ပေါင်းလစ် သာသနာ-ဟူသော ဆောင်ပုဒ်ဖြင့် သာသနာတော်နှစ်ကို အလွယ်တကူ သိနိုင်ပေသည်။
*********************************************************************************

( မေး ) ( သင်္ကာ-မသင်္ကာ )
ဆရာတော်ဘုရား၊ ဘာသာရေးပြဿနာဟူ၍ကား မဆိုနိုင်ပါ၊ သို့သော်လည်း ပါဠိစာ အသုံးအနှုန်း၊ ပါဠိဗုဒ္ဓစာပေဖြစ်၍ မေးလိုပါသည်။ သတင်းစာများတွင် မသင်္ကာဖွယ် လူတယောက်၊ မသင်္ကာဖွယ် တွေ့ရ၍ စသည် ရေးပါသည်။ တပည့်တော်မ သိသည်မှာ သင်္ကာ-ပါဠိကပင် တွေးတောယုံမှားဖွယ် ဖြစ်၍ မသင်္ကာ ဆိုလျှင် တွေးတော်ယုံမှားဖွယ် မရှိဟု ဆန့်ကျင်ဘက်အဓိပ္ပါယ် ထွက်ပါလိမ့်မည်။ ဖြေရှင်းပြတော်မူပါဘုရား။
( အငယ်လေးခေါ် ခင်မြမြလွင်-မြန်မာစာ၊ ရန်ကုန်တက္ကသိုလ် )

( ဖြေ )
သင်္ကာ ပါဠိကပင် ယုံမှားခြင်းအနက်ရှိသဖြင့် မသင်္ကာဟု သုံးစွဲရေးသားခြင်းမှာ အမှားပင်ဖြစ်ပါသည်။
ပျို့ ကဗျာတို့တွင်-နောင်မင်းမသိ၊ သင်္ကာရှိဟု၊ ဒိဋ္ဌိဝါဒ၊ ( ဘူပေါင်း-၅၁ )၊
မရွံမရှာ၊ ခဲရာရာ၌၊ သင်္ကာလည်းကင်း၊ ( ဆု-၂၆ )၊
သူ့မယားနှင့်၊ ၀ိုးဝါးသင်္ကာ၊ ရှိဖူးပါလျက်၊ ( အိမ်မှု-၂၊ ၁၃ )
ကထံကထိ၊ သင်္ကာရှိသား၊ စွန်းညိညှီစော်၊ ( ပါရမီ-၉၅ )
စသည် အများအပြား သင်္ကာ-ဟု ယုံမှားခြင်း၌ မှန်ကန်စွာ သုံးနှုန်းကြပါသည်။

ထို့ကြောင့် သင်္ကာမကင်းဖွယ်၊ သင်္ကာရှိဖွယ်၊ ယုံမှားသင်္ကာ ရှိစရာ စသည် မှန်ကန်စွာ သုံးနှုန်းရန် လိုအပ်ပါသည်။ ရန်ကုန်တက္ကသိုလ်များ စာအုပ်ပြုစုထုတ်ဝေရေး ကော်မတီက စာစဉ် ၃၁-ဖြင့် ထုတ်ဝေထားသည့် ဦးထွန်းမြင့်၏ ပါဠိသက် ဝေါဟာရ အဘိဓာန် (စာမျက်နှာ-၃၄၃) တွင် ဤအကြောင်းကို အကျယ်ဆွေးနွေးထားသည်ကို ဖတ်ရှုသင့်ပါသည်။
********************************************************************************

( မေး ) ( ရန်သူမျိုး ငါးပါး ကျမ်းစကား )
ဆရာတော်အရှင်သူမြတ်ဘုရား၊ သြကာသ အစချီ ကန်တော့ခန်းတွင် ပယ်ဆုအဖြစ် ရန်သူမျိုး ငါးပါး ပါဝင်ပါသည်။ ယင်းပယ်ဆုခြောက်ပါးတွင် ရန်သူမျိုးငါးပါးမှအပ အခြားပယ်ဆုများကို ပါဠိနှင့်တကွ အနက်ပါ ကျမ်းလာနှင့်တကွ သိရပါသော်လည်း ရန်သူမျိုးငါးပါး ပါဠိ အနက်တွဲ၍ မသိရပါ၊ ၄င်းရန်သူမျိုး ငါးပါး ပါဠိတော်ကို ကျမ်းရင်းလာအတိုင်း သိလိုပါသည်ဘုရား။
( အောင်သန်း-အောင်လံမြို့ )

( ဖြေ )
ရန်သူမျိုး ငါးပါးမှာ ၁။ ရေ ၂။ မီး ၃။မင်း ၄။ ခိုးသူနှင့် ၅။ အမွေခံဆိုး စသော မချစ်မနှစ်သက်သူတို့ ဖြစ်ပါသည်။
ပါဠိတော်အနေဖြင့် ထေရာပဒါန ပါဠိ ရာဇဂ္ဂိ စောရ ဥဒကပ္ပိယေဟိ၊ သာဓာရဏာ ကာမာ ဗဟုသပတ္တာ (ခု-၂၊ ၄၃၃ ) ဖြစ်၍ ၄င်းအဋ္ဌကထာ ရာဇူဟိ စ အဂ္ဂိ စ စောရေဟိ စ ဥဒကေန စ ဒါယာဒါဒိ အပ္ပိယေဟိ စ ရာဇဂ္ဂိ စောရ ဥဒကပ္ပိယေဟိ သာဓာရဏတော တေသွေဝေါပမာဝုတ္တာ။( ထေရီ ဋ္ဌ-၂၉၆ )ဖြစ်ပါသည်။

အထူးမှတ်ရန်မှာ မချစ်မနှစ်သက်သူ၊ မုန်းသူဟုသာ မဆိုဘဲ အမွေခံဆိုး-စသည် ဟူသော ဒါယာဒါဒိ ပါဠိကို ထည့်သွင်းထားရသည်မှာ အခြားမချစ်မနှစ်သက်သူ မုန်းသူများကား အဝေးနေများဖြစ်၍ ရန်သူစာရင်းတွင် ပါဝင်သော်လည်း မိမိအား အခါခပ်သိမ်း မနှိပ်စက်နိုင်။ အမွေခံဆိုးများကား သားသမီး မောင်နှမ စသည် အနီးကပ် နေကြသူများဖြစ်၍ အမြဲ အကျိုးမဲ့ကိုသာ ပြုနေကြသူများ ဖြစ်ကြောင်း မှတ်သားသင့်ပါသည်။
*********************************************************************************

( မေး ) ( အဘိဓမ္မာပိဋကတ် )
ဆရာတော်အရှင်ဘုရား၊ အဘိဓမ္မာပိဋကတ်သည် တတိယသင်္ဂါယနာတင်သော အခါမှ ထည့်သွင်းခဲ့သည်ဟု သိရပါသည်ဘုရား။ ထို့ကြောင့် အဘိဓမ္မာ ပိဋကတ်သည် ဘုရားဟော ဟုတ်-မဟုတ် ဖြေကြားပေးတော်မူပါ အရှင်ဘုရား။
( ပညာသီရိ-မိတ္ထီလာ )

( ဖြေ )
အဘိဓမ္မာပိဋကတ်၌ လာရှိသော ပဉ္စမကျမ်းစာ ဖြစ်သည့် ကထာဝတ္ထုကျမ်းကို တတိယသင်္ဂါယနာတွင် အရှင်မဟာမောဂ္ဂလိ ပုတ္တတိဿ ရဟန္တာမထေရ်မြတ်က မူလမြတ်စွာဘုရား ဟောတော်မူသည့် ကထာဝတ္ထု အကျဉ်းကိုမူတည်၍ အကျယ်ဟောတော်မူခဲ့သည်။

ထိုအရှင်မဟာမောဂ္ဂလိ ပုတ္တတိဿ-၏ ကထာဝတ္ထုကျမ်းအကျယ်ကို အဘိဓမ္မာ ၇-ကျမ်း၌ ပဉ္စမမြောက် ကျမ်းစာ အဖြစ် ထည့်သွင်းခဲ့သည်ကို စွဲ၍ အဘိဓမ္မာကို တတိယသင်္ဂါယနာကျမှ ထည့်သွင်းသည်ဟု ဆိုကြဟန်တူပါသည်။ အမှန်မှာ အဘိဓမ္မာကို မြတ်စွာဘုရား တာဝတိံသာနတ်ပြည်၌ ဟောတော်မူ၍ ပထမသင်္ဂါယနာတွင် အရှင်သာရိပုတ္တရာ၏ တပည့်အဆက်ဆက် စောင့်ရှောက်ခဲ့ကြောင်း----သာရိပုတ္တတ္ထေရော, ဘဒ္ဒဇိ, သောဘိတော, ပိယဇာလီ, ပိယပါလော,---ပ---သောဏကော, ရေ၀တော စသည်ဖြင့် တတိယသင်္ဂါယနာအထိ ဆရာစဉ်ဆက် အမည်များကို အဋ္ဌကထာ (အဘိ ဋ္ဌ ၁-၃၂ ) တွင် ပါရှိပါသည်။ ထို့ကြောင့် အဘိဓမ္မာသည် ဘုရားဟော အစစ်ဖြစ်ကြောင်း သန္ဒိန်ကျ မှတ်သားသင့်ပါသည်။
*********************************************************************************

( မေး ) ( ဖဲကစားခြင်း )
ဆရာတော်အရှင်သူမြတ်ဘုရား၊ တပည့်တော်တို့ မြို့မှ ကျောင်းဆရာတဦးမှာ ဖဲရိုက် အလွန်ဝါသနာပါပါသည်။ ဖဲကစားခြင်းသည် ဒုစရိုက် ၁၀-ပါးတွင် မပါ၊ ငါးပါးသီလတွင်လည်း မပါဘဲ ကံပြိုင်ခြင်းသာ ဖြစ်သည်-ဟု ပြောလေ့ရှိပါသည်။ ထိုအယူအဆ ဟုတ်-မဟုတ် ဖြေရှင်းပေးတော်မူပါဘုရား။
( ဖြိုး-ဒါးကမြို့၊ ပုသိမ်အရှေ့မြို့နယ် )

( ဖြေ )
လောင်းကစားခြင်းမှာ ဒုစရိုက်တွင် မပါ၊ ငါးပါးသီလတွင် မပါ-ဟု ဆိုသော်လည်း မြတ်စွာဘုရား ဟောကြားတော်မူသော ပရာဘ၀သုတ်လာ ပျက်စီးကြောင်းတရား အပါအ၀င်ဖြစ်ပါသည်။
ပရာဘ၀ဂါထာ ၈-တွင် ကာမဂုဏ်အပျော်အပါး လိုက်စားခြင်း၊ အရက်သေစာ မူးယစ် ဆေးဝါး သုံးစွဲခြင်းနှင့် လောင်းကစားခြင်းသည် ဆုတ်ယုတ်ပျက်စီးခြင်း အကြောင်းဖြစ်သည်-ဟု ဟောတော်မူပါသည်။

သိင်္ဂါလသုတ်တွင် လောင်းကစားမှု၏ အပြစ်များကို-
အောင်သူရန်ပွား၊ ရှုံးသားစိုးရိမ်၊ စည်းစိမ်လျော့ပါး၊ တရားသဘင်၊ မ၀င်သက်သေ၊ မိတ်ဆွေနှိမ့်ဆို၊ မလိုထိမ်းမြား၊ ဤခြောက်ပါးကား၊ ပျော်ပါးကြွေအန် အပြစ်တည်း။
( လောင်းကစားသူ အပြစ်တည်း )ဟု ရှေးဆရာများ ဆောင်ပုဒ် ပြုခဲ့ပါသည်။

မြတ်စွာဘုရားလက်ထက်က မဟာဓနသူဋ္ဌေးသားသည် ၁၆-ကုဋေကြွယ်ဝသည်။ မိဘများ ကွယ်လွန်သွားပြီးနောက် ဤစည်းစိမ်သည် မိမိတသက် မကုန်ခန်းနိုင်ဟု သဘောထားကာ အပေါင်းအဖော်များနှင့် မူးယစ်သောက်စား လောင်းကစား၍ ပျော်ပါးနေလေရာ ပစ္စည်းအားလုံး ကုန်ခန်း၍ တောင်းရမ်းစားရသည်အထိ ကြုံရပြီး ဇရပ်တွင် သေရကြောင်း၊ လူ့ဘ၀ဖြင့် အရောင်းအ၀ယ် ပြုလျှင် ပထမတန်း သူဌေးကြီး ဖြစ်နိုင်ပြီး၊ ရဟန်းဘ၀ဖြင့် တရားအားထုတ်လျှင် ရဟန္တာဖြစ်နိုင်သော ကံ ပါရမီ ရှိသော်လည်း အလောင်းအစား အပျော်အပါးနှင့် အချိန်ကုန်၍ ဘ၀ပျက်ရကြောင်း ထင်ရှားရှိပေသည်။ ထို့ကြောင့် မိမိက လမ်းညွှန်ရှေ့သွား ဆရာသမား ဖြစ်နေကြသူများ အဖို့ အလောင်းအစား အပျော်အပါးကို ရှေ့သွားစံပြပြုကာ ရှောင်ကြဉ်ကြရာသည်။

( မြတ်မင်္ဂလာ ၁၉၉၆-ခု မေလ )

No comments: