Sunday, May 31, 2009

ကံ ကံ၏အကျိုး ( ၅၉ )

( ကုသိုလ်ပြုခြင်း )

လူ့ဘ၀တနေ့တာတွင် ( ကုသိုလ်မရ၊ ပညာရ။ ပညာမရ၊ ဥစ္စာရ )-ဟူ၍ ဆိုရိုးစကားရှိသည်။
ယနေ့အဖို့ အဓိပ္ပါယ်ရှိအောင် ကြံဆောင်ရမည်ဖြစ်သည်။
ယနေ့သည် ၁-၆-၉၅ (စနေနေ့) ဖြစ်သည်။ အားလပ်နေ့ဖြစ်၍ မြိတ်မြို့ မြို့သစ်ဈေးကြီးအပြင်ဘက်ရှိ ကုန်စိမ်းတန်းသို့ သံပရာသီးဝယ်ရန် နံနက် ၁၀-နာရီခန့်တွင် ရောက်ရှိခဲ့သည်။

မြိတ်မြို့ မြို့သစ်ဈေးကြီး၏ ကုန်စိမ်းတန်း လမ်းတလျောက်တွင် အသက် ၁၀-နှစ်ခန့်မျှ ရှိမည်ဖြစ်သော ကလေးတဦးသည် လက်သီးဆုပ်နီးပါးခန့်စီရှိသော ပင်လယ်ရေငန် ကဏန်းအကောင် ၃၀-ကို လင်ပန်းတခုတွင်ထည့်ကာ ကဏန်းဝယ်ကြပါ၊ ကဏန်းဝယ်ကြပါ ကဏန်းဝယ်ကြပါ-ဟု တစာစာ အော်ရောင်းနေလေသည်။

ကဏန်း၏ကိုယ်နှင့် လက်မကြီးများကို ပလပ်စတစ်ပျော့ကြိုးဖြင့် တုပ်ချည်ထားသည်။ ဤကဲ့သို့ တုပ်မချည်ဘဲထားပါက ထိုကဏန်းများ ထွက်ပြေးကုန်ကြမည်။ ကြိုးဖြင့် မတုပ်ချည်ဘဲထားသော ကဏန်းကို သွားကိုင်မိပါက ကိုင်သူ၏လက်ကို ကဏန်းလက်မကြီးဖြင့် ညှပ်လိုက်မည်ဖြစ်သည်။ ကဏန်း၏လက်မသည် အလွန်ထက်လှသည်ဖြစ်၍ အညှပ်ခံရသူလက်မှာ သွေးများယိုစီးကျလာမည်ဖြစ်သည်။

ကျွန်တော်သည် ကလေးငယ်အား ကဏန်းအသေလား အရှင်လား-ဟုမေးသည်။
ကလေးငယ်က အားလုံးအရှင်-ဟုပြောသည်။
တကောင် ဘယ်ဈေးလဲ-ဟု မေးသည်။
၈-ကျပ်ဟု ပြောသည်။
ကျွန်တော်က ၅-ကျပ်နှင့်ဆစ်သည်။
နေမွန်းတည့်လှပြီဖြစ်၍ ကလေးငယ်က ၅-ကျပ်နှင့်ယူပါဟု ပြောသည်။
ကျွန်တော်သည် ကလေးငယ်အား ငွေ ၁၅၀-ကျပ်ကိုပေးပြီး ကဏန်းအကောင် ၃၀-ကို ပလပ်စတစ်အိတ်တလုံးဖြင့် ထည့်သည်။ မြို့သစ်ဈေးအတွင်းရှိ သူငယ်ချင်းဆေးဆိုင်တွင် အရိုးတပ် ဘလိတ်ဓားတချောင်းကို ငှားသည်။ ကဏန်းထည့်ထားသော အိတ်ကို စက်ဘီးတွင်ချိတ်ပြီး မြိတ်မြို့ မြို့သစ် ဗောတံတားကြီးသို့ စက်ဘီးကို နင်းသည်။

မြိတ်မြို့ ပင်လယ်ရေပြင်သည် ဒီရေတက်ချိန်နှင့် ကြုံကြိုက်နေ၍ ပင်လယ်ရေပြင်တခုလုံး စိမ်းညိုလျက်ရှိသည်။
ကျွန်တော်သည် မြို့သစ် ဗောတံတားကြီးပေါ်တွင် အသင့်ယူလာသော ဘလိတ်ဓားဖြင့် ကဏန်းများ၏ ကိုယ်နှင့် လက်မကြီးကို ချည်နှောင်ထားသော ပလတ်စတစ်ပျော့ကြိုးကို ဖြတ်ပေးသည်။ ထို့နောက် ကဏန်းတကောင်စီ တကောင်စီကို မြိတ်ပင်လယ်ထဲသို့ ချပေးလိုက်သည်။ ကဏန်းများသည် ဘေးလွတ်ရာသို့ ကူးသွားကြသည်။

ကျွန်တော်သည် ကဏန်းများကို မြစ်ပင်လယ်ထဲသို့ လွှတ်ပေးနေစဉ် ငါးဖမ်းသင်္ဘောကြီးပေါ်မှ နိုင်ငံခြားသားများသည် သင်္ဘောပေါ်မှ ဗောတံတားသို့ ဆင်းလာကြပြီး ကျွန်တော့အား လာရောက်ဝိုင်းအုံ ကြည့်နေကြသည်။ သူတို့ မည်သို့ထင်မြင်ကြမည်ကို ကျွန်တော်မတွေးပါ။

ယနေ့သည် သေအံ့ဆဲဆဲ ကြိုးဖြင့် တုပ်ခံထားရသော ကဏန်းအကောင် ၃၀-၏ အသက်ကို ကယ်ဆယ်လိုက်ရသည့်အတွက် အလွန်ဝမ်းသာကြည်နူးသွားပါသည်။
လူ့ဘ၀တနေ့တာတွင် ကုသိုလ်မရ၊ ပညာရ။ ပညာမရ၊ ဥစ္စာရ-ဟူသော ဆိုရိုးစကားအရ ကျွန်တော်သည် ကုသိုလ်ရလိုက်ပြီဖြစ်၍ ထိုကုသိုလ်အဖို့ကို အမျှ အမျှ အမျှ ယူတော်မူကြပါကုန်လော-ဟူ၍ အမျှပေးဝေလိုက်ပါသည်။

( ကြံတော-ဖိုးခွေး )
*********************************************************************************

( ကံထူးသော ဇနီးမောင်နှံ )

ရွှေဘိုမြို့နယ် တောင့်ကင်းကျေးရွာတွင် ကိုမောင်ဝေနှင့် သူ၏ဇနီး မမြင့်တို့ နေထိုင်ကြသည်။ သူတို့တွင် မောင်ကျော်စိုးသူ၊ မောင်ချမ်းကိုကို ဟူသော သားနှစ်ယောက်ရှိသည်။ မိသားစုအားလုံးပင် တောင်သူလုပ်ငန်းကို ကောင်းမွန်စွာ လုပ်ကိုင်စားသောက်နေကြသည်။ ထို့အပြင် သူတို့၌ရှိသော ရွှေစ, ငွေစ လေးများကို စုဆောင်း၍ မုန့်ခြောက်မျိုးစုံ၊ ဆီ,ဆန်, ဆား, ဟင်းချက်စရာ ကုန်ခြောက်မျိုးစုံဆိုင်လေး တဆိုင်ပါ ရွာတွင်း၌ ဖွင့်ထားသေး သည်။

ကိုမောင်ဝေ+မမြင့်တို့မိသားစုသည် အသက်ရွယ်အားဖြင့် ငယ်သေးသော်လည်း ဘုရား တရား အလွန်ရိုသေကြ သည်။ နှစ်စဉ်ပင် တန်ခူးလပြည့်နေ့ရောက်တိုင်း ရွာထဲမှ သက်ကြီးရွယ်အိုများကို ကန်တော့လေ့ရှိသည်။ ရံဖန်ရံခါ သံဃာတော်များအား ဆွမ်းကပ်လေ့ရှိသည်။

ရတနာမြတ်သုံးပါးကို အမြဲနှလုံးသွင်း၍ အိပ်ရာဝင် အိပ်ရာထတွင် တရားထိုင် ပုတီးစိပ်ပြီး သတ္တ၀ါအပေါင်း ကျန်းမာချမ်းသာစေကြောင်းတို့ကို အမြဲမေတ္တာပို့၊ အမျှဝေလေ့ရှိသည်။ ငါးပါးသီလကို အမြဲတမ်း ခံယူ ဆောက်တည်သည်။ ကိုမောင်ဝေသည် အိမ်ထောင်ကျပြီးကတည်းက ဇနီးသည်နှင့် ရန်ခိုက်ဒေါသ တခါမျှ မဖြစ်ဘူးကြောင်းကို နှုတ်မှခဏခဏ ပြောလေ့ရှိသည်။

အလှူအတန်း အပေးအကမ်းမှာ ရက်ရောသည်နှင့်အမျှ စီးပွားရေးမှာလည်း တနေ့တခြား တက်ခဲ့ပါသည်။ သာယာသော ဘ၀လမ်းအတွက် ပျော်ရွှင်စွာ လျှောက်လှမ်းနိုင်ကြသော ကိုမောင်ဝေနှင့် မမြင့်တို့ မောင်နှံကို မြင်ရသူတိုင်း အားကျမိကြသည်။

တနေ့တွင် ကိုမောင်ဝေတို့ မိသားစုသည် ရွှေပေါ်ကျွန်းဆရာတော်ကြီးအား သွားရောက်ဖူးမြော်ရန် ရွှေဘိုမှ ကားစီးသွားကြသည်။ စိုင်နိုင်လေးကျေးရွာအနီး အရောက်တွင် ကားသည် ရုတ်တရက် မှောက်သွားတော့သည်။ အသက်သေသူတော့ မပါပေ။ ဒဏ်ရာရသူ များလှပေသည်။ ခြေကျိုးသူ၊ လက်ကျိုးသူနှင့် ကားမှောက်သည့် နေရာမှာ ဆူညံလှုပ်ရှားသွားလေတော့သည်။

ထူးခြားသည်မှာ ကိုမောင်ဝေတို့ ဇနီးမောင်နှံသည် ကံကောင်းထောက်မစွာဖြင့် ဘာဒဏ်ရာမျှမရ။ အကောင်းပကတိအတိုင်း တွေ့ကြရသည်။ ပွန်းပဲ့ရှနာပင်မဖြစ်လိုက်ရပေ။ ထို့နောက်တွင် သူတို့ကားပြောင်း၍ စီးပြီး ရွှေပေါ်ကျွန်းသို့အရောက် သွားခဲ့ကြသည်။ ရွှေပေါ်ကျွန်းသို့ရောက်သောအခါ စည်ကားလှသော လူများထဲမှတိုး၍ ကိုမောင်ဝေ၏ ဇနီး မမြင့်သည် ဘုရားကပ်ရန် ပန်းနှင့် မီးပူဇော်ရန် ဖယောင်းတိုင်တို့ကို ၀င်၍ ၀ယ်ယူနေသည်။ လူများပြည့်လျှံနေ၍ တော်တော်နှင့် ၀ယ်မရပေ။ အချိန်အတန် ကြာသွားသည်။

ကိုမောင်ဝေသည် သူ့ဇနီး မမြင့် တော်တော်နှင့် ပြန်မလာ၍ လိုက်သွားသည်။ ပြည့်ကျပ်နေသော လူများကြားရှိ မြေပေါ်တွင် သားရေအိတ်ကပ်တလုံးကို မထင်မှတ်ဘဲ တွေ့လိုက်ရ၏။ ထိုအချိန်တွင် သူ၏ဇနီးသည် မမြင့်သည် ရေးကြီးသုတ်ပျာနှင့် ထွက်လာ၏။ ကိုမောင်ဝေနားအရောက်တွင် အကိုဝေ-ကျွန်မပိုက်ဆံအိတ် ဘယ်ကျ ကျန်ခဲ့မှန်း မသိဘူး၊ ငွေတွေအားလုံး ပါသွားတယ်။ အဲဒါ ဘယ်လိုလုပ်မလဲ-ဟု ပျာပျာသလဲမေး၏။

အေးကွ၊ မမြင့်ရေ-တို့တွေ ဘုရားက မ,တယ်လို့ ဆိုရမလားဘဲ။
ဘာဖြစ်လို့လဲ အကိုဝေရဲ့၊
ဘာဖြစ်ရမလဲကွ၊ မင်းကျကျန်ခဲ့တဲ့ ပိုက်ဆံအိတ်က ဒီမှာကွ-
ဤသို့ပြောကာ သူကောက်ရသော ပိုက်ဆံအိတ်ကို လှမ်း၍ပေးလိုက်သည်။
တိုက်တိုက်ဆိုင်ဆိုင်ပင် မမြင့်ပျောက်သွားသော ပိုက်ဆံအိတ်ကို ကိုမောင်ဝေက ကောက်ရခြင်းဖြစ်သည်။
ကိုမောင်ဝေ၏ဇနီး မမြင့်လည်း ထိုအခါကျမှ ရယ်နိုင်တော့သည်။ ဖြစ်ပုံမှာ မမြင့်သည် လူများကြားသို့တိုးဝင်ရင်း ပိုက်ဆံအိတ်ကို ချိုင်းကြားညှပ်၍ သွားမိ၏။ ထိုစဉ် သတိလက်လွတ်ဖြစ်ပြီး ပိုက်ဆံအိတ် ကျကျန်ခဲ့သည်။ လုံးဝ မသိလိုက်ရ။ ဖယောင်းတိုင်ဝယ်မှ သတိရ၍ ကြည့်လိုက်တော့ မိမိပစ္စည်း မရှိမှန်း သိရတော့သည်။

လူများပြည့်လျှံပြီး အကြာကြီးနေသည့်တိုင်အောင် ပိုက်ဆံအိတ်ကို မည်သူမျှမတွေ့။ ကိုမောင်ဝေ လိုက်သွားရာမှ မိမိတို့ပစ္စည်းအား ပြန်၍တွေ့ခြင်းဖြစ်သည်။ သူတို့မောင်နှံသည် စိတ်ချမ်းမြေ့စွာဖြင့် ရွှေပေါ်ကျွန်း ဆရာတော်ကြီးကို ဖူးခဲ့ကြသည်။ လှူဖွယ်ရာတို့ကို လှူ၍ သီလယူပြီးလျှင် နေ့ ၁း၀၀ နာရီတွင် ပြန်ထွက်ခဲ့ကြသည်။

ရွာသို့ရောက်သောအခါ မမျှော်လင့်သော ဖြစ်ရပ်ကို ကြုံတွေ့ရပြန်သည်။ သူတို့ ထီထိုးထားရာ ကျပ်ငွေ ၄၀၀၀၀- ဆု ထီပေါက်နေပြန်သည်။ သူတို့မောင်နှံသည် စာဖွဲ့လောက်အောင်ပင် ကံထူးသူများ ဖြစ်ကြသည်။ ကံထူးသည်မှာလည်း စိတ်ကောင်းရှိခြင်း၊ သူတပါးအား ပေးကမ်းထောက်ပံ့ ကူညီလှူဒါန်းခြင်း၊ ရိုးသားစွာဖြင့် စီးပွားဥစ္စာ ရှာဖွေခြင်း၊ ဘုရား တရား သံဃာ ရတနာမြတ်သုံးပါးကို ရိုသေစွာ ဆည်းကပ်ကိုးကွယ်ခြင်း စသည့် ကောင်းမှုများကို ပြုသောကြောင့် ဖြစ်ပေသည်။

( ငါးရာနဲ-မောင်မြင့်သူ )

( မြတ်မင်္ဂလာ ၁၉၉၇-ခု အောက်တိုဘာလ )

No comments: