Saturday, June 20, 2009

၁-ပါးသော တရားများ

( ဗုဒ္ဓဘာသာဆိုင်ရာ ဗဟုသုတ အဖြာဖြာ )

၁။ ဒုက္ခခပ်သိမ်း ကင်းငြိမ်းရာအရပ်သည် ( နိဗ္ဗာန်တရား ) ၁-ပါးသာ ရှိ၏။ ( ဧကက အင်္ဂုတ္တိုရ် )
၂။ သာရကမ္ဘာ၌ ( ဘုရား ) ၁-ဆူသာလျှင် ပွင့်တော်မူ၏။ ( ဧကက-အံ )
၃။ တလောကထဲ၌ စကြာမင်း ၂-ပါး မရှိကောင်း။ ၁-ပါးသာလျှင် ဖြစ်တော်မူ၏။ ( ဧကက-အံ )
၎။ ဧကော ဓမ္မော-တရားသည် အဓိက, တရားသည် ပဋ္ဌာန, တရားသည် သံသရာဝဋ်ဆင်းရဲမှ လွတ်မြောက်မှု
၁-ခုတည်းသာ ဖြစ်၏။ ( ဧကက-အံ )
၅။ ဧကဝေါကာရ-ရုပ်ခန္ဓာ တပါးသာရှိသော အသညသတ်ဗြဟ္မာဘုံသက်တမ်း ကမ္ဘာ ၅၀၀-ရှိ၏။ ( ဧကက-အံ )
၆။ စိတ်-စိတ်သည် လျင်မြန်စွာ ပြောင်းလဲတတ်၏။ စိတ်လောက် လျင်မြန်သောအရာသည် နောက်တခု မရှိပြီ။
၇။ ရဟန်းဝါရင့်ကုန်သော တပည့်ရဟန်းတို့တွင် အညာသိကောဏ္ဍည ၁-ပါးသာလျှင် အသာလွန်ဆုံး ဖြစ်တော်မူ၏။ ( ဧကက-အံ )
၈။ ကြီးသောပညာနှင့်ပြည့်စုံသော တပည့်ရဟန်းတို့တွင် ရှင်သာရိပုတ္တရာ ၁-ပါးသာလျှင် အသာလွန်ဆုံး။
၉။ တန်ခိုးကြီးခြင်းနှင့်ပြည့်စုံသော တပည့်ရဟန်းတို့တွင် ရှင်မောဂ္ဂလာန် ၁-ပါးသာလျှင် အသာလွန်ဆုံး။
၁၀။ ဓုတင် ၁၃-ပါးနှင့်ပြည့်စုံသော တပည့်ရဟန်းတို့တွင် ရှင်မဟာကဿပ ၁-ပါးသာလျှင် အသာလွန်ဆုံး။
၁၁။ ဒိဗ္ဗစက္ခု အဘိညာဉ်နှင့်ပြည့်စုံသော တပည့်ရဟန်းတို့တွင် အရှင်အနုရုဒ္ဓါ ၁-ပါးသာလျှင် အသာလွန်ဆုံး။
၁၂။ ကိုယ်ခန္ဓာ (ပုံတူ) များစွာ ဖန်ဆင်းတတ်သော တပည့်ရဟန်းတို့တွင် ရှင်စူဠပန် ၁-ပါးသာလျှင် အသာလွန်ဆုံး။ ( ဧကက-အံ )
၁၃။ လာဘ်လာဘများသော တပည့်ရဟန်းတို့တွင် ရှင်သီဝလိ ၁-ပါးသာလျှင် အသာလွန်ဆုံး။ (ဧကက-အံ)
၁၄။ သဒ္ဓါတရား ချစ်ခင်မှုနှင့်ပြည့်စုံသော တပည့်ရဟန်းတို့တွင် ရှင်ဝက္ကလိ ၁-ပါးသာလျှင် အသာလွန်ဆုံး။
၁၅။ လျင်စွာ မဂ်ဖိုလ်အသိဉာဏ်ရသော တပည့်ရဟန်းတို့တွင် ဗာဟိယဒါရုစိရိယ ၁-ပါးသာလျှင် အသာလွန်ဆုံး။
၁၆။ အနာရောဂါကင်းသော တပည့်ရဟန်းတို့တွင် ရှင်ဗာကုလ ၁-ပါးသာလျှင် အသာလွန်ဆုံး။(ဧကက-အံ)
၁၇။ ၀ိနည်းကိုဆောင်နိုင်သော တပည့်ရဟန်းတို့တွင် ရှင်ဥပါလိ ၁-ပါးသာလျှင် အသာလွန်ဆုံး။(ဧကက-အံ)
၁၈။ ခုနစ်နှစ်သမီးအရွယ်နှင့် ရဟန္တာမဖြစ်သော သူတို့တွင် ဧကုပေါသထ ၁-ပါးသာလျှင် အသာလွန်ဆုံး။
၁၉။ ကြီးမြတ်သောပညာနှင့်ပြည့်စုံသော တပည့်ရဟန်းမိန်းမတို့တွင် ခေမာထေရီ ၁-ပါးသာလျှင် အသာလွန်ဆုံး။
၂၀။ တန်ခိုးကြီးခြင်းနှင့်ပြည့်စုံသော တပည့်ရဟန်းမိန်းမတို့တွင် ဥပ္ပလ၀ဏ်ထေရီ ၁-ပါးသာလျှင် အသာလွန်ဆုံး။
၂၁။ ၀ိနည်းကိုဆောင်နိုင်သော တပည့်ရဟန်းမိန်းမတို့တွင် ပဋာစာရီထေရီ ၁-ပါးသာလျှင်အသာလွန်ဆုံး။
၂၂။ တရားဟောရာ၌ တတ်စွမ်းသော တပည့်ရဟန်းမိန်းမတို့တွင် ဓမ္မဒိန္နာထေရီ ၁-ပါးသာလျှင် အသာလွန်ဆုံး။
၂၃။ လှူဒါန်းမှု၌ မွေ့လျော်သော သူတို့တွင် သုဒတ္တ(ခေါ်)အနာထပိဏ်သူဋ္ဌေး ၁-ဦးသာလျှင် အသာလွန်ဆုံး။
၂၄။ ရှေးဦးစွာ သရဏဂုံတည်သော ဥပါသိကာမတို့တွင် သေနိယသူဋ္ဌေးသမီး သုဇာတာ ၁-ယောက်သာလျှင် အသာလွန်ဆုံး။
၂၅။ အလှူဖြင့်မွေ့လျော်သော ဥပါသိကာမတို့တွင် ကျောင်းအမ ၀ိသာခါ ၁-ယောက်သာလျှင် အသာလွန်ဆုံး။
၂၆။ အကြားအမြင်များသော ဥပါသိကာမတို့တွင် ခုဇ္ဇုတ္တရာ ၁-ယောက်သာလျှင် အသာလွန်ဆုံး။
၂၇။ မေတ္တာစိတ် ပွားများလေ့ရှိသော ဥပါသိကာမတို့တွင် သာမာဝတီ ၁-ယောက်သာလျှင် အသာလွန်ဆုံး။
၂၈။ သူနာကို လုပ်ကျွေးပြုစုတတ်သော ဥပါသိကာမတို့တွင် သုပ္ပိယ ၁-ယောက်သာလျှင် အသာလွန်ဆုံး။
၂၉။ မိန်းမ၏အဆင်းလောက် ယောက်ျား၏စိတ်ကို ဆွဲဆောင်နိုင်သော အခြားအဆင်းတခု မရှိပြီ။
၃၀။ မိန်းမ၏အသံလောက် ယောက်ျား၏စိတ်ကို ဆွဲဆောင်နိုင်သော အခြားအသံတခု မရှိပြီ။
၃၁။ မိန်းမ၏အနံ့လောက် ယောက်ျား၏စိတ်ကို ဆွဲဆောင်နိုင်သော အခြားအနံ့တခု မရှိပြီ။
၃၂။ မိန်းမ၏အရသာလောက် ယောက်ျား၏စိတ်ကို ဆွဲဆောင်နိုင်သော အခြားအရသာတခု မရှိပြီ။
၃၃။ မိန်းမ၏အတွေ့လောက် ယောက်ျား၏စိတ်ကို ဆွဲဆောင်နိုင်သော အခြားအတွေ့တခု မရှိပြီ။

ထို့အတူ မိန်းမ၏စိတ်ကို ဆွဲဆောင်နိုင်သော ယောက်ျား၏အဆင်း စသော ၅-ပါးလည်း ဤအတိုင်းပင်တည်း။

၃၄။ သညာ ၁-ပါး။
စားအပ်သောအစာ၌ စက်ဆုပ်ဖွယ်အဖြစ်ကို ဆင်ခြင်မှတ်သော အမှတ်သညာ။
၃၅။ ၀၀တ္ထာန် ၁-ပါး။
မိမိကိုယ်၌ရှိသော ဓာတ် ၄-ပါးကို မှတ်ခြင်းဖြင့် ရှုဆင်ခြင်၍ ဆုံးဖြတ်ခြင်း။
၃၆။ မေတ္တာသတ္တော အနန္တော။( မေတ္တာသဒ္ဒေါ အနန္တော )
မေတ္တာသတ္တော-မေတ္တာစိတ်ထားအပ်သော (ညွတ်အပ်သော) သတ္တ၀ါသည်။
အနန္တော-မည်၍မည်မျှဟူ၍ ရေတွက်၍ မရနိုင်ပါတကား။

( စိန္တာမဏိ ဦးချစ်မောင်-ရေး ဗုဒ္ဓဘာသာဆိုင်ရာ အထွေထွေဗဟုသုတ မာတိကာကျမ်းမှ )

No comments: