Sunday, June 21, 2009

ကံ ကံ၏အကျိုး ( ၆၂ )

( ယနေ့ အကြွေးမပေး )

ကျွန်တော့်ဆိုင်နှင့် မျက်စောင်းထိုးနေရာတွင် လက်ဖက်ရည်ဆိုင်တဆိုင် ရှိပါသည်။ တနေ့တွင် ဆိုင်ပိတ်၍ အခန်းရှင်းကြပါသည်။ သူတို့သည် ပိုးဟပ် ကြွက်တို့မှအစ ပိုးမွှား တိရစ္ဆာန်လေးများ ပွက်ပွက်ဆူနေသော ရေနွေးများဖြင့် ရက်စက်စွာ လောင်း၍ သတ်နေသည်ကို စိတ်မကောင်းစွာ မြင်တွေ့နေရပါသည်။

အမှန်ဆိုပါက အခြားတနေရာသို့ စွန့်ပစ်လျှင် ရပါလျက် အငြိုးကြီးစွာ ပြုလုပ်နေကြသည့် လုပ်ရပ်မှာ မကြည့်ရက်၊ မမြင်ရက်စရာ ဖြစ်နေပါသည်။ တချို့ ကြွက်ကလေးများမှာ မွေးပေါက်စ နီနီတွတ်တွတ်ကလေးများသာ ဖြစ်ပါသည်။ ထိုကြွက်ကလေးများကို စုပုံပြီး ရေနွေးလောင်း၍ သတ်ကြရင်း အောင်ပွဲခံ ရယ်မောနေကြ ပါသေးသည်။

ထိုသူတို့သည် ရေနွေးခွက်ကိုယ်စီဖြင့် သင်္ကြန်ရေပက်ထွက်သူများလား အောက်မေ့ရပါသည်။
ထိုသို့ပြုလုပ်နေကြရင်းမှ-
အောင်မယ်လေး၊ သေပါပြီဗျ၊ ကယ်ကြပါဦး-ဟု အော်သံကြားရပါသည်။
ခဏအကြာတွင် လူများ စုပြုံရောက်ရှိလာပါသည်။ ထို့နောက် လူနာနှစ်ယောက်ကို ဆေးခန်းပို့လိုက်ကြရသည်။

အဖြစ်မှန်ကို သေချာစုံစမ်းကြည့်သောအခါ-
ဆိုင်ခန်းရှင်းနေကြသော အလုပ်သမားနှစ်ယောက်သည် ပြေးထွက်လာသောကြွက်ကို နီးရာလူက ခြေထောက်ဖြင့် ဖိနင်းကာ လှမ်းအသတ်၊ တခါ ထိုကြွက်ကိုပင် ကျန်တယောက်က ရေနွေးဖြင့် လှမ်းအပက်၊ နှစ်ယောက်တိုက်ဆိုင်ပြီး ရေနွေးပူ လောင်းမိသွားသည်။

ထိုအခါ ခံရသူက လွှတ်ခနဲ ဒေါသထွက်ပြီး ပြန်လှမ်းပက်လိုက်ရာ နှစ်ယောက်စလုံး ဆေးခန်းပို့ရသည်ဟု သိရပါသည်။ အခြားသောသူများကတော့ မည်သို့ဝေဖန် ဆုံးဖြတ်ကြမည်ကို မသိကြသော်လည်း ဖြစ်စဉ် ဇာတ်လမ်းအစအဆုံးကို သိရသူ ကျွန်တော့်အနေဖြင့် သုံးသပ်ဆုံးဖြတ်ရလျှင်-

ထိုလဖက်ရည်ဆိုင်အတွင်းမှာ ရေးသားချိတ်ဆွဲထားသည့် -ယနေ့ အကြွေးမပေး-ဆိုသော ဆိုင်းဘုတ်ကိုကြည့်ပြီး အတွေးတစ ၀င်ခဲ့သည်။ သူတို့ရဲ့ မကောင်းမှု အကုသိုလ်ကံဟာ သူတို့အပေါ်မှာလဲ သူတို့ဆိုင်လိုပဲ အကြွေးမပေး၊ အကြွေးမထားဘဲ လက်ငင်း တောင်းသွားတာပဲ-ဟု သုံးသပ်ဆုံးဖြတ်မိပါသည်။

ဤအဖြစ်အပျက်ကို သံဝေဂယူမိရင်းမှ ကျွန်တော့်နားထဲသို့ တစိမ့်စိမ့် ရိုက်ခတ်စီးဝင်လာသည်များကတော့-
စေတနာ ကောင်းလျှင်-ကံကောင်းမည်။
စေတနာ ဆိုးလျှင်-ကံဆိုးမည်-စသည့် ဆရာတော်ကြီးများ၏ ဆုံးမသြ၀ါဒများပင် ဖြစ်ပါတော့သည်။

( ငှက်ပြာ )
*********************************************************************************

( ကိုယ်တွေ့ ကောင်းမှုကျိုး )

ကျွန်မ၏သမီး ဒသမတန်းကျောင်းသူဘ၀က အလွန်စိတ်အားငယ်တတ်ခဲ့သည်။ သမီးသည် ဉာဏ်လည်း ကောင်းသည်၊ ၀ီရိယလည်း ရှိပါသည်။ လုံ့လကိုလည်း မလျှော့ပါ။ သို့သော် သူမကို အမြဲ စိတ်ဒုက္ခရောက်အောင် ဖန်တီးနေသည်မှာ သူမ၏ စိတ်အားငယ်တတ်မှုပင် ဖြစ်သည်။ စာမေးပွဲဖြေဆိုတိုင်း အားငယ်စိတ်၊ ကြောက်စိတ်တို့၏ ဒုက္ခပေးမှုကြောင့် ဖြေနိုင်သလောက် မဖြေခဲ့ရပါ။ စိတ်ကလည်း စိုးတရွံ့ရွံ့ဖြင့် သူတပါးတို့ကို မယှဉ်ရဲသလို မ၀ံ့ရဲသလိုနဲ့ ဖြစ်ခဲ့သောကြောင့် ရသင့်သည့် အမှတ်များ မရခဲ့ပါ။ သူမ ပညာသင်ယူနေသော ဒသမတန်း (က)တွင် ရသည့်အဆင့်မှာ ၁၀-၏နောက် တော်တော်ဝေးသည့် နေရာမှာ ရှိနေပါသည်။

ပထမအစမ်း ဖြေပြီးသည့်နောက် အမှတ်များထွက်လာသောအခါ သမီးကိုကြည့်ရသည်မှာ ရှေးကထက် ပိုမိုအားလျော့လာသည်ဟု ထင်မိပါသည်။ အမှတ်များ သိပ်မကောင်းလှပါ။ သို့ဖြစ်၍ သမီး၏ ငယ်ဆရာမ တဦးကို အကျိုးအကြောင်း ပြောပြကာ တိုင်ပင်မိပါသည်။ ဆရာမက သမီးကို တရားရှုမှတ်ရန် အချိန်ရလျှင်ရသလို သမ္ဗုဒ္ဓေဂါထာတော်ကြီး၊ အရဟံ ဂုဏ်တော်တို့ကို ရွတ်ဆိုရန် အကြံပြုပါသည်။ မိခင်ဖြစ်သူ ကျွန်မကိုလည်း ဆင်းရဲချို့ငဲ့သည့် ကလေးများအား ပညာဒါန အလှူပေးရန် တိုက်တွန်းပါသည်။ ကျွန်မတို့ သားအမိသည် ဆရာမပြောသည့်အတိုင်း လိုက်နာခဲ့ပါသည်။

ပညာသင်ယူစဉ်ကာလတွင် ငွေကြေးချို့တဲ့နွမ်းပါး၍ ကျောင်းစရိတ် လိုအပ်နေသော ကျောင်းသူလေးတဦးအား ဆရာမမှတဆင့် ငွေငါးရာကျပ်ကို ပညာသင်စရိတ် လှူဒါန်းလိုက်သည်။ ဆောင်းရာသီဖြစ်၍ အနွေးထည် မရှိရာသော သူမအား အနွေးထည်များ၊ ကျောင်းဝတ်စုံများပင် လှူဒါန်းခဲ့ပါသည်။ ထိုကလေးမကဲ့သို့ပင် ဒသမတန်းစာမေးပွဲ နီးသောအခါ ထုတ်ဝေသည့် ဘာသာရပ်ဆိုင်ရာ ဂျာနယ်စာအုပ်များ ၀ယ်၍ပေးလိုက်၏။ ထိုကျောင်းသူလေး၏ ၀မ်းမြောက်ဝမ်းသာ ဖြစ်သွားပုံမှာ ယနေ့ထက်တိုင် မမေ့နိုင်ပါ။ သူမ ပျော်ရသလို ကျွန်မသမီးလေးလည်း ပျော်ရပါလို၏-ဟု စိတ်တွင် ဆုတောင်းနေမိပါသည်။

ကျွန်မတို့မြို့တွင်ရှိသော ပရဟိတကျောင်းမှ မိဘမဲ့ကလေးများသို့ သမီး၏ဆရာမနှင့် သူ၏တပည့်များက စာရေးကိရိယာများ လှူဒါန်းကြရာတွင်လည်း ကျွန်မပါဝင်လှူဒါန်းခဲ့ပါသည်။ ပရဟိတ ဆရာတော်အား နှစ်စဉ်လှူဒါန်းသည့် စောင်အလှူပွဲတွင်လည်း ပါဝင်လှူဒါန်းခဲ့ပါသည်။

ွှဤအတောအတွင်း ကျွန်မရော သမီးပါ သက်သတ်လွတ်စားခြင်း။ ဥပုသ်စောင့်ခြင်း၊ တရားထိုင်ခြင်းတို့ကိုလည်း အားထုတ်ခဲ့ကြပြန်ပါသည်။ အားလပ်သည့်အချိန်တိုင်းမှာလည်း ဘုရားဂုဏ်တော်နှင့် သမ္ဗုဒ္ဓေဂါထာတော်ကြီးကို ရွတ်ဆို ပူဇော်ခဲ့ကြလေသည်။

စာမေးပွဲလည်း တဖြည်းဖြည်း နီးကပ်လာခဲ့ပါပြီ။ ကျွန်မသမီးတွင် ယခင်ကကဲ့သို့ ကြောက်ရွံ့အားငယ်စိတ်များ မရှိတော့ပါ။ ဆရာမ၏ အားပေးမှုနှင့် ဘုရား တရား သံဃာ ရတနာသုံးပါးကို ကိုးကွယ်ယုံကြည်မှုသည် သမီး၏စိတ်ကို ပြောင်းလဲစေခဲ့ပြီဖြစ်ပါသည်။

သို့နှင့် ဒသမတန်း စာမေးပွဲကြီးသို့ ရောက်ခဲ့လေပြီ။ ကျွန်မသည် ကျွန်မပြုခဲ့သည့် ကုသိုလ်တို့ကို တိုင်တည်ကာ သစ္စာပြုခဲ့ပါသည်။ကျွန်မပြုခဲ့သော ကုသိုလ်တို့နှင့် ပညာရေး ဒါနအလှူတို့သည် သမီးကို ကောင်းစွာထောက်ပံ့ နိုင်ပါစေ-ဟူ၍ပင် ဖြစ်သည်။

အလွန်ကြောက်ရွံ့အားငယ်တတ်သော ကျွန်မ၏သမီးသည် စာမေးပွဲကို အေးဆေးတည်ငြိမ်စွာ ရင်ဆိုင်နိုင်ခဲ့သည်။ ဘာသာရပ်အားလုံးကို ကောင်းမွန်စွာ ဖြေဆိုနိုင်ခဲ့ပါသည်။ ဒသမတန်း အောင်စာရင်း ထွက်သောအခါ သမီးသည် ၃-ဘာသာဂုဏ်ထူးဖြင့် အောင်မြင်ခဲ့ပါသည်။ အမှတ်စာရင်းထွက်သောအခါ ဂုဏ်ထူးမထွက်သော ဘာသာများမှာလည်း ဂုဏ်ထူးမှတ်နီးပါး ရသည်ကို တွေ့ရပါသည်။ ထို့ပြင် သမီးသည် တကျောင်းလုံးတွင် အမှတ်အကောင်းဆုံးဖြင့် အောင်မြင်ကြောင်းကိုလည်း အံ့သြ၀မ်းသာစွာ သိလိုက်ရပါသည်။

သမီး၏ အမှတ်စုစုပေါင်းမှာ ၄၁၁-မှတ်ဖြစ်၍ သမီး အလွန်ဝါသနာပါသည့် ဆေးတက္ကသိုလ်သို့ ဦးစားပေးလျှောက်ထားခဲ့ရာ ယခုအခါတွင် ကျွန်မ၏သမီးမှာ ဆေးတက္ကသိုလ် ပထမနှစ်တွင် တက်ရောက်သင်ကြားလျက် ရှိနေပေပြီ။

ကျွန်မ၏သမီးကဲ့သို့ အားငယ်စိုးရွံ့ကြသည့် ကျောင်းသား ကျောင်းသူများကို အားကျအတုယူပြီး ကြိုးစားစေလိုသောဆန္ဒဖြင့် ရေးသားတင်ပြလိုက်ရပါသည်။

( ခင်-မုံရွာ )

( မြတ်မင်္ဂလာ ၁၉၉၈-ခု ဇန်န၀ါရီလ )

No comments: