Tuesday, June 9, 2009

ကံ ကံ၏အကျိုး ( ၆၁ )

( ကံတူ အကျိုးပေး )

ဦးကျည်းတန်သည် နာမည်နှင့်လိုက်အောင် ရုပ်ဆိုးသကဲ့သို့ စရိုက်လည်းဆိုးသူ ဖြစ်သည်။ အရက်သေစာ သောက်စားတတ်သူ တဦးလည်းဖြစ်ပြီး ပတ်ဝန်းကျင်ကိုလည်း မူးလာတိုင်း ရန်လုပ်တတ်သည်။ ရပ်ကွက်ထဲရှိ ကလေးများ ငိုယိုနေလျှင် ဦးကျည်းတန်ကြီး လာပြီဆိုရုံမျှဖြင့် ကြောက်ရွံ့ကာ အငိုရပ်သွားကြသည်။

တနေ့တွင် ဦးကျည်းတန်သည် အရက်နှင့်မြည်းရန် အမဲခြောက်တချောင်းကို ဖုတ်၍ ပန်းကန်ထဲတွင် ထည့်ပြီး ထားခဲ့သည်။ ထို့နောက် အနီးရှိ အရက်ဆိုင်သို့ အရက်ဝယ် ထွက်သွားပါသည်။ ဦးကျည်းတန် ပြန်လာသောအခါ ပန်းကန်ထဲမှ အမဲခြောက်ဖုတ်ကို ကြောင်တကောင် စားနေသည်ကို မြင်ရသဖြင့် ဒေါသထွက်ပြီး ကြောင်ကို ဟိန်းဟောက်လိုက်ရာ ကြောင်မှာ ထွက်ပြေးသွားသည်။ ထိုအခါ လေးခွကို ယူ၍ လိုက်ထုနေပါသည်။

တနေရာအရောက်တွင် ကြောင်ကြီး၏မျက်နှာကို လောက်စာလုံး ထိမှန်၍ မျက်လုံးတဖက် ထွက်ကျကာ တန်းလန်းကြီး ဖြစ်နေသည်။ ကြောင်ကြီးမှာ နာကျင်လွန်း၍ အော်ဟစ်လူးလွန့်နေသည်ကို မြင်ရသူအပေါင်း စိတ်မချမ်းသာ ဖြစ်ကြသည်။ သို့သော်လည်း ဦးကျည်းတန်ကို မပြောဝံ့ကြပါ။ သူ့ကို အကြင်နာတရား မရှိသူဟု ရွံရှာမုန်းတီးကြသည်။ ကြောင်ကြီးမှာ မသေသော်လည်း ဒဏ်ရာကို ပြင်းထန်စွာ ခံစားလိုက်ရရှာသည်။

ထိုအဖြစ်အပျက်များ မေ့မေ့ပျောက်ပျောက် ဖြစ်ချိန်တွင် ရပ်ကွက်အတွင်း သတင်းဆိုးတခုကို ကြားရသည်။ ထိုသတင်းမှာ ဦးကျည်းတန်တယောက် သစ်ပင်ပေါ်မှ လိမ့်ကျရာ ဒဏ်ရာပြင်းထန်သည်-ဟူသော သတင်းဖြစ်သည်။

ဖြစ်ပုံမှာ ဦးကျည်းတန်သည် အိမ်အနီးရှိ သရက်ပင်မှ သရက်သီးနုနုလေးများကို အရက်အမြည်းလုပ်ရန် သရက်ပင်ပေါ်တက်ပြီး ခူးရာမှ ခြေချော်ကျသွားသည်။ သရက်ပင်ပေါ်မှ လိမ့်ကျပြီး သရက်ပင်ဘေးရှိ ၀င်းထရံမှ ၀ါးချွန်နှင့်မျက်လုံးကိုထိုးမိရာ မျက်လုံးပေါက်ထွက်သွားသည်။ အိမ်နီးချင်းများက ၀ိုင်းဝန်း၍ ဆေးရုံပို့ပေး သော်လည်း မျက်လုံးကိုတော့ ထုတ်ပစ်လိုက်ရပါသည်။

အံ့သြစရာကောင်းသည်မှာ ဦးကျည်းတန်၏ မျက်လုံး ထွက်သွားသည့်ဘက်မှာ ကြောင်ကြီး၏မျက်လုံး ထွက်သွားသည့်ဘက်နှင့် ညာဘက်ချင်း တူညီကြပုံကို တွေ့ရ၍ မြင်ရသူတိုင်း သံဝေဂ-ရကြပါသည်။

( ချယ်ရီ-ရွှေခြံ )
********************************************************************************

( စိတ်ကောင်းရှိ၍ ကံကောင်းသော မောင်နှံနှစ်ဦး )

ကျွန်မတွင် အကိုငါးယောက်ရှိရာ စတုတ္ထမြောက် အကိုမှာ ကိုမြင့်ဖေဖြစ်ပါသည်။ ကျွန်မ၏အကိုလေးသည် ရတနာသုံးပါးကို ရိုသေကိုင်းရှိုင်းပြီး မိဘ ဆရာသမားကျေးဇူးကိုလည်း အထူးသိနားလည်သူဖြစ်ပါသည်။ မိဘများ စိတ်ချမ်းသာရေးအတွက် မိမိကိုယ်မိမိ အနစ်နာခံကာ လုပ်ဆောင်ပေးလေ့ရှိသူ ဖြစ်ပါသည်။ ကျွန်မ၏အကိုသည် လွန်ခဲ့သော ဆယ့်ငါးနှစ်ခန့်က အလုပ်လုပ်ကိုင်ရာတွင် သူ၏ချွေးနှဲစာဖြစ်သော လစာအားလုံး တပြားမကျန် မိခင်(မေမေ)ကို အကုန်အပ်ပါသည်။

ကျွန်မ၏ အကိုလေးသည် အသက် ၂၇-နှစ် အရွယ်တွင် ကချင်ပြည်နယ်မှ ရှမ်းဗမာ အမျိုးသမီးလေးနှင့် အိမ်ထောင်ကျပါသည်။ ယင်းအမျိုးသမီးမှာလည်း အကိုလေးနည်းတူ စိတ်ရင်းစိတ်ထား ကောင်းလှသည်။ ရတနာသုံးပါးကို ကြည်ညိုဆည်းကပ်သည်။ နှစ်ဖက်မိဘများကို မိဘအရင်းသဖွယ် သဘောထားသည်။ အကိုလေးသည် ယင်းအမျိုးသမီးနှင့် လက်ထပ်ပြီးနောက် အလုပ်မှထွက်ကာ ကချင်ပြည်နယ်သို့ ပြောင်းရွှေ့ပြီး လယ်ယာလုပ်ကိုင်နေပါသည်။

ကျွန်မ၏အကိုလေးတို့ ဇနီးမောင်နှံသည် ကံ ကံ၏အကျိုးတရားကို ယုံကြည်ခြင်း။ ရတနာသုံးပါးကို ယုံကြည်ဆည်းကပ် ကိုးကွယ်ခြင်း၊ မိဘ ဆရာသမားများအပေါ် ကျေးဇူးသိတတ်ခြင်း၊ ရိုးသား၍ ကြိုစားကြခြင်း စသော အကြောင်းတရားတို့ကြောင့် လုပ်ငန်း ကိုင်ငန်းများ အဆင်ပြေချောမွေ့နေခဲ့ပါသည်။

ကျွန်မအကိုလေး၏ ဇနီးသည် ကလေးသုံးယောက် မိခင်ဖြစ်သော်လည်း ဘုရားဆွမ်းတော်၊ ရေချမ်းတော်များ နံနက်တိုင်း ကပ်လှူခြင်း၊ ဘုရားပန်း မညှိုးရအောင် ဂရုတစိုက် လဲပေးခြင်း၊ အလှူခံမှန်သမျှ သဒ္ဓါတရား ထက်သန်စွာ လှူဒါန်းခြင်း၊ ညစဉ် ဘုရားရှင်အား ဆီမီး ရေချမ်း ပန်းများ ကပ်လှူခြင်းတို့ကို ၀တ်မပျက် ပြုမူလေ့ ရှိသည်။ ထို့ပြင် ဓမ္မစကြာဝတ်အသင်းတွင် ပါဝင်ပြီး မိမိတို့ ဓမ္မစကြာဝတ်အသင်းအား ပင့်ဖိတ်သောအိမ်များသို့ သွားရောက်ကာ ဓမ္မစကြာတရားတော်များကို ရွတ်ဆိုပူဇော်ပေးလေ့ရှိပါသည်။

တောင်သူလယ်သမား ပီပီ နေ့လယ်နေ့ခင်း အိပ်စက်အနားယူဖို့ အချိန်မရသော်လည်း အိမ်ထောင့်တာဝန် ကျေပွန်ရုံမျှမက ရပ်ရွာတာဝန်နှင့် ဘာသာရေး ကျင့်ဝတ်များကို မပျက်မကွက် ထမ်းဆောင်လျက် ရှိပါသည်။

ယင်းအကိုလေးတို့ ဇနီးမောင်နှံသည် နှစ်ဖက် မိဘများကို ကိုယ့်မိဘအရင်းများသဖွယ် မခွဲမခြား ဆက်ဆံလေ့ရှိပါသည်။ ကျွန်မ၏အကိုလေးက ဘာမျှမပြောရခင်မှာပင် ကျွန်မ၏ ယောက်မသည် ယောက္ခမများထံ ငွေများကို လူကြုံဖြင့် ပေးပို့ပါသည်။ စားသောက်ဖွယ်ရာများ ပေးပို့ပါသည်။

ဤသို့ စိတ်ရင်းစိတ်ထားကောင်းသော အကိုလေးတို့ ဇနီးမောင်နှံသည် လုပ်ငန်း ကိုင်ငန်းများ အထူးပြေလည်တိုးတက်လာခဲ့ပါသည်။ ထို့ပြင် ကျွန်မ၏ ယောက်မတွင် ထူးခြားချက်တခုကို အံ့သြဖွယ်တွေ့ခဲ့ရပါသည်။ ယင်းမှာ အခြားမဟုတ်။ သူမသည် ဘုရားရှိခိုး အမျှဝေပြီးတိုင်း သူမ၏မိဘနှစ်ပါးနှင့် အမရင်းများကိုသာမက သူမ၏ ယောက္ခမ (ကျွန်မ၏ဖခင်) ကျန်းမာ ချမ်းသာစေရန် မေတ္တာပို့ခြင်း၊ ကျွန်မတို့ မောင်နှမများဖြစ်ကြသော အခြားရွာနေ သူမ၏ခဲအို ယောက်မကြီး၊ မတ်၊ ယောက်မလေးများကို တယောက်စီ နာမည်ရွတ်ဆိုကာ ကျန်းမာချမ်းသာ ရွှင်လန်းစေကြောင်း ဆုတောင်းမေတ္တာပို့သခြင်း ပြုလေ့ရှိသည်။

ကျွန်မ၏မိခင် (ကွယ်လွန်သူ) အတွက်လည်း ပြုပြုသမျှ ကုသိုလ်ကောင်းမှုများကို အမျှပေးဝေခြင်း ပြုလေ့ရှိပါသည်။ အတုယူဖွယ် မိန်းမမြတ်ပင် ဖြစ်သည်။ သူတို့မောင်နှံသည် စိတ်ကောင်းရှိ၍ စေတနာ မှန်ကြသဖြင့်လည်း ကံကောင်းလျက် ရှိကြသည်ကို တွေ့ရပါသည်။

( ညီမထွေး )

( မြတ်မင်္ဂလာ ၁၉၉၇-ခု ဒီဇင်ဘာလ )

No comments: