Sunday, June 21, 2009

ဘာသာရေး ပြဿနာ ( ၆၈ )

( ဘဒ္ဒန္တ တိလောကသာရ ဖြေသည် )

( မေး ) ( တိဟိတ်ပုဂ္ဂိုလ်အလား )
အရှင်ဘုရား-
၁။ ဒုဂ္ဂတိအဟိတ်ပုဂ္ဂိုလ်
၂။ သုဂတိအဟိတ်ပုဂ္ဂိုလ်
၃။ ဒွိဟိတ်ပုဂ္ဂိုလ်
၎။ တိဟိတ်ပုဂ္ဂိုလ်-ဟူ၍ ပုထုဇဉ်ပုဂ္ဂိုလ် လေးမျိုးရှိရာတွင် လူ့ဘုံ၌ ဒုဂ္ဂတိအဟိတ်ပုဂ္ဂိုလ်မှတပါး ကျန်ပုဂ္ဂိုလ်သုံးယောက် ရှိသည်ဟု သိရပါသည်။
တိဟိတ်ပုဂ္ဂိုလ်သည် ဉာဏ်အထက်မြက်ဆုံးဟု ထပ်ဆင့်သိရပြန်ပါသည်ဘုရား။ ယခုဘ၀တွင် သုဂတိအဟိတ်ပုဂ္ဂိုလ်၊ ဒွိဟိတ်ပုဂ္ဂိုလ်တို့အား တိဟိတ်ပုဂ္ဂိုလ်ကဲ့သို့ ဉာဏ်ထက်မြက်မှုရရှိရန် ကြိုးစားကျင့်ဆောင်က ရနိုင်-မရနိုင်၊ ရနိုင်ရန် မည်ကဲ့သို့ ကျင့်ကြံလိုက်နာရပါမည်နည်း သိလိုပါသည်ဘုရား။
( မောင်အောင်ကျော်-လှည်းကူးမြို့ )

( ဖြေ )
လူ့လောကတွင် ဈာန်မဂ်ဖိုလ် မရရှိနိုင်သော အန္တရာယ်မှာ-
၁။ ကမ္မန္တရာယ်-ပဉ္စာနန္တရိယကံ ကျူးလွန်ခဲ့မှု
၂။ ကိလေသန္တရာယ်-မိစ္ဆာဒိဋ္ဌိအယူကို ယူခဲ့မှု
၃။ ၀ိပါကန္တရာယ်-အဟိတ်-ဒွိဟိတ် ပဋိသန္ဓေနေခဲ့ရမှု
၎။ ဥပ၀ါဒန္တရာယ်-အရိယာကို ပြစ်မှားခဲ့မှု
၅။ အာဏာဝီတိက္ကမန္တရာယ်-ရဟန်းတော်များ အာပတ်တန်းလန်း ရှိနေမှု ဟူ၍ ၅-ပါးရှိရာတွင် သုဂတိအဟိတ် ပုဂ္ဂိုလ်၊ ဒွိဟိတ်ပုဂ္ဂိုလ်တို့မှာ ပဋိသန္ဓေကပင် အန္တရာယ်သင့်ခဲ့သူများဖြစ်၍ ဤဘ၀တွင် တိဟိတ်ပုဂ္ဂိုလ်ကဲ့သို့ ဈာန် မဂ် ဖိုလ် ရနိုင်သော ဉာဏ်မျိုးကို မရနိုင်တော့ပါ။ ကြိုးစားကျင့်ဆောင်နိုင်က ကောင်းရာသုဂတိဘ၀သို့ ရောက်နိုင်၍ နောက်ဘ၀တွင် ဈာန် မဂ် ဖိုလ် ရနိုင်သော တိဟိတ်ပုဂ္ဂိုလ် ဖြစ်နိုင်ပါသည်။
*********************************************************************************

( မေး ) ( သစ္စကပရိဗိုဇ် အနာဂတ်ဘ၀ )
အရှင်ဘုရား၊ သစ္စကပရိဗိုဇ်ကြီးသည် သေလွန်ပြီးနောက် နတ်ပြည်သို့ရောက်၍ မြတ်စွာဘုရား ပရိနိဗ္ဗာန် စံပြီးနောက် အနှစ် ၂၀၀-ရှိသောအခါ သီဠိုဟ်ကျွန်း (သီရိလင်္ကာ) ၌ ရဟန်းဖြစ်ပြီး ပရိနိဗ္ဗာန်ပြုသည်ဟု မှတ်သားရပါသည်။ ဤသို့ဆိုလျှင် နတ်တို့၏ သက်တမ်းနှင့် တွက်ချက်လိုက်လျှင် လူ့ပြည်အနှစ် ၂၀၀-သည် နတ်ပြည်တွင် သစ္စကပရိဗိုဇ်၏ သက်တမ်း အလွန်တိုတောင်း မနေပါလားဘုရား။ တပည့်တော် မရှင်းလင်းပါ သဖြင့် ဖြေကြားပေးတော်မူပါဘုရား။
( ကိုအောင်မြတ်သူ-စွမ်းအင်ဝန်ကြီးဌာန )

( ဖြေ
ဘုရားအလောင်းတော်များ ရဟန္တာအလောင်းများသည် နတ်ပြည်သို့ရောက်ရသော် (နတ်ပြည်တွင် ပါရမီဖြည့်ကျင့်ရန် မဖြစ်နိုင်၍) နတ်သက်ပြည့်အောင် မနေကြဘဲ လူ့ပြည်တွင် ပါရမီဖြည့်ရန်နှင့် ကျွတ်တမ်း ၀င်နိုင်ရန် အဓိမုတ္တိစုတေခြင်းဟူသော မိမိကိုယ်ကို စုတေရန် အဓိဋ္ဌာန်ပြု၍ နတ်သက်ချွေလျက် လူ့ပြည်တွင် ဖြစ်စေကြသည်ဟု ဆိုပါသည်။

သစ္စကနတ်သားသည်လည်း ထိုစုတေခြင်းမျိုးဖြင့် စုတေခဲ့၍ သာသနာနှစ် ၂၀၀-ကျော်အချိန် သီဟိုဠ်ကျွန်း (သီရိလင်္ကာ) တွင် ကာဠဗုဒ္ဓရက္ခိတမထေရ် အဖြစ်ဖြင့် ရဟန္တာဖြစ်ခဲ့ကြောင်း (မ-ဋ္ဌ ၂-၁၉၄) ၌ ပါရှိပါသည်။
*********************************************************************************

( မေး ) ( မော်တော်ကား လှူခြင်း )
အရှင်ဘုရား၊ သံဃာအား ကား-စသည် လှူကြသည်။
လေးပါးပစ္စယာ၌ မည်သည်မှာ ဤသည့်ကား ထားရပါမည်နာ်း။
ယောနိသော သဘော၌ပိုက်တည် ဆင်ခြင်မည်ဤကား
သိလိုပါ များသူငါ ဉာဏ်ဝယ်လင်းအောင် ရှင်းပြစေသား။
( ဖိုးဉာဏ်-မန္တလေး )

( ဖြေ )
သံဃာအား ကားစသည် လှူကြသည်။
လေးပါးပစ္စယာ၌ သေနာသနာ-ကျောင်းမှာ ပေါင်းထည့်သင့်သည်။
ခရီးသွားရဟန်းသည် လှည်း-လှေ ဤအဖို့
ဝါဆိုအချိန်အခါကျလျှင်၊ လှည်းလှေမှာ အာလယ၊ ဂါဟ-စိတ်ဝယ်မှတ်လို့၊ ကပ်ရသည်သို့။(၀ိ-ဋ္ဌ ၃-၃၅၃)။
*********************************************************************************

( မေး ) ( ပဋ္ဌာန်းအနက်နှင့် ဘုရားဘွဲ့တော် )
အရှင်ဘုရား၊
၁။ ၂၄-ပစ္စည်း ပဋ္ဌာန်းဒေသနာတော်၏ အနက်အဓိပ္ပါယ်ကို စာအုပ်များ၌ ဖတ်ရှုရာတွင် သဘောမပေါက်နိုင် ဖြစ်နေပါသည်။ သို့ပါ၍ တပည့်တော်ကဲ့သို့ အလွယ်တကူ နားမလည်နိုင်သူများအတွက် အနက်အဓိပ္ပါယ်အကျဉ်းကို အချုပ်မျှ ဖော်ပြပေးပါရန် တောင်းပန် လျှောက်ထားအပ်ပါသည်ဘုရား။

၂။ ဂေါတမမြတ်စွာဘုရားဟု ခေါ်ဝေါ်နေသည်မှာ မြတ်စွာဘုရား၏ ဘွဲ့တော်၊ (သို့တည်းမဟုတ်) အမည်နာမတော်လော-ဆိုသည်ကို ဖော်ပြပေးပါရန် လျှောက်ထားအပ်ပါသည်။
အလားတူ ကကုသန်, ကောဏာဂုမ်, ကဿပ စသည်များမှာလည်း မြတ်စွာဘုရားတို့၏ ဘွဲ့တော်များလော-ဟု နားမလည်ပါသဖြင့် ဖြေကြားပေးစေလိုပါသည်ဘုရား။
( မယဉ်ယဉ်မေ-ရန်ကင်း )

( ဖြေ )
၁။ ၂၄-ပစ္စည်းပဋ္ဌာန်း ဒေသနာတော်၏ အနက်အဓိပ္ပါယ်ကို ကုသိုလ်ဖြစ်လှူဒါန်းသော စာအုပ်များ၌ အနက်ကျဉ်းဖြင့် ဖော်ပြထားသည်မှာ အလွယ်ဆုံး၊ အကျဉ်းဆုံး ဖော်ပြထားခြင်းသာ ဖြစ်ပါသည်။
ပဋ္ဌာန်းပစ္စည်းများ၏ အနက်အဓိပ္ပါယ်ကို နားလည်သဘောပေါက်ရန်ကား လေ့လာသင်ကြားမှသာ ဖြစ်နိုင်ပါသဖြင့် နီးစပ်ရာ သင်တန်းတခုခုမှာ တက်ရောက်သင်ကြားရန် တိုက်တွန်းလိုပါသည်။

၂။ ဂေါတမ မြတ်စွာဘုရား ဟူသည်မှာ-အနွယ်တော်၏ အမည် ဖြစ်ပါသည်။
ငယ်မည်တော်မှာ သိဒ္ဓတ္ထဖြစ်သော်လည်း ဘုရားအဖြစ်သို့ ရောက်သောအခါ ထိုငယ်မည်အတိုင်း ခေါ်လျှင် မရိုသေရာကျသဖြင့် ဂေါတမအနွယ်တော်ဖြစ်၍ အနွယ်အမည်ဖြင့် ဂေါတမမြတ်စွာဘုရားဟု ခေါ်ရပါသည်။

ကကုသန်, ကောဏာဂုမ်, ကဿပ စသည့် မြတ်စွာဘုရားတို့၌လည်း ထိုနည်းတူပင် ဖြစ်ပါသည်။
********************************************************************************

( မေး ) ( ပဋ္ဌာန်းရွတ်ခြင်း )
အရှင်ဘုရား၊ တပည့်တော်အား ဘာသာရေးလိုက်စားနေသော မိတ်ဆွေတဦးက ပဋ္ဌာန်းအကျယ် ပစ္စယနိဒ္ဒေသကို အိမ်မှာ မရွတ်ကောင်းဘူး။ ဓမ္မာရုံ(သို့) ဘုရားများမှာမှ ရွတ်ကောင်းကြောင်း။
အိမ်မှာရွတ်ရင် မနာခံဝံ့သော နတ်သေးနတ်မွှားလေးတွေက ပင်လယ်ဝသို့ ထွက်ပြေးပြီး ဆုံးမှ ပြန်လာရကြောင်း။ အဲဒီလို ခဏခဏ ထွက်ပြေးနေရတော့ စိတ်ဆိုးပြီး ရွတ်သောသူကို ဒုက္ခအမျိုးမျိုး ရောက်အောင် ကျိန်ဆဲတတ်ကြောင်း ပြောပါသည်။
အဲဒါ ဟုတ်-မဟုတ်၊ တကယ်လို့ ဟုတ်ခဲ့လျှင် မည်သို့တောင်းပန်ပြီး ရွတ်ရမည်၊ ဒါမှမဟုတ် မရွတ်ရဘူး-ဟု ကွဲပြားအောင် ဖြေရှင်းပေးပါရန် လျှောက်ထားပါသည်ဘုရား။
( သန်းသန်း-ရန်ကုန် )

( ဖြေ )
ပရိတ်ကြီး ၁၁-သုတ်၊ ဓမ္မစကြာ၊ အနတ္တလက္ခဏသုတ်၊ ပဋ္ဌာန်းစသည်တို့မှာ ဗုဒ္ဓ၏ နှုတ်တော်ထွက် ဒေသနာမြတ်များ ဖြစ်ပါသည်။ ကျက်သရေမင်္ဂလာတိုး၍ အန္တရာယ်အမျိုးမျိုးမှ ကင်းဝေးအောင် အစဉ်အမြဲ ရွတ်ဆိုနေသင့်သော တရားတော်များ ဖြစ်ပါသည်။ ၄င်းတို့ကို ရွတ်ဆို၍ ထွက်ပြေးရသူတို့မှာ နတ်ကောင်း နတ်မြတ်များ မဟုတ်။ နတ်ဆိုး နတ်ဝါးများသာ ဖြစ်ပါလိမ့်မည်။

နတ်ကောင်း နတ်မြတ်တို့သည် ထိုကဲ့သို့သော ဒေသနာတော်များကို နာကြားလို၍ အစဉ်အမြဲ ရှာဖွေသွားလာ၍ နေကြကြောင်း၊ ရွတ်ဆိုသံကြားလျှင် လာရောက်နာယူ၍ ရွတ်ဆိုသူအား စောင်မစောင့်ရှောက်ကြကြောင်း ကျမ်းဂန်လာရှိပါသည်။
နတ်ဆိုး နတ်သေး နတ်မွှားများ ထွက်ပြေးရခြင်းမှာ ရွတ်ဆိုသံကြောင့်မဟုတ်။ နတ်ကောင်း နတ်မြတ်များ လာ၍ မနေ၀ံ့ကာ ထွက်ပြေးရခြင်း ဖြစ်ဟန်တူပါသည်။ ထိုနတ်ဆိုးများ ပြန်မလာဝံ့အောင် နေ့စဉ်ရွတ်ဆို၍ နေသင့်ပါသည်။

ပဋ္ဌာန်းဆို၍ ပြောရဦးမည်။ ပဋ္ဌာန်း ၂၄-ပစ္စည်း ပစ္စယုဒ္ဒေသကို အိမ်တနင်္ဂနွေထောင့်မှစ၍ ၃-ပစ္စည်းစီ တတန်းတည်းရေးကာ (အထက်အောက် မရေးရ) တနင်္လာ၊ အင်္ဂါ -မှ ပတ်၍ သောကြာ (မြောက်အရပ်) အထိ ၃-ပစ္စည်းစီရေး၍ ကပ်ထားလျှင် ဘေးရန်ဟူသမျှ ကင်းဝေးရကြောင်း ရှေးဆရာမြတ်တို့ မိန့်ကြားပါသည်။

ထိုသို့ရေး၍ ကပ်ထားသောအိမ်များ တိုက်များ ရှိပါသည်။ (အချို့တိုက်များတွင် ဆောက်လုပ်စကပင် လက်သမားကို စာလုံးဖော်၍ လုပ်ခိုင်းထားသည်ကို တွေ့ဖူးပါသည်) ထို့ကြောင့် ပဋ္ဌာန်းတရားတော်မှာ အန္တရာယ် ဟူသမျှကို ကင်းငြိမ်းစေနိုင်၍ အစဉ်ရွတ်ဖတ်သင့်ကြောင်း ဖြေကြားလိုပါသည်။
*********************************************************************************

( မေး ) ( ကာလနဂါး အအိပ်ကြီးသလား )
အရှင်ဘုရား၊ အအိပ်ကြီးလိုက်တာ၊ ကာလနဂါးကျနေတာပဲ-ဟု လူတို့ပြောလေ့ပြောထ ရှိပါသည်။ ဘုရားတဆူနှင့်တဆူအကြား ကာလပတ်လု့း အိပ်ပျော်နေသည်ဟုလည်း ကြားဖူးပါသည်။ ကာလနဂါး တကယ်ပဲ အအိပ်ကြီးပါသလား ဘုရား။ ဖြေကြားတော်မူပါရန် တောင်းပန်ပါသည်ဘုရား။
( ဦးထွန်းထွန်းလွင်-သံဖြူဇရပ်မြို့ )

( ဖြေ )
ကာလနဂါးသည် အအိပ်ကြီးသည်မဟုတ်။ ၄င်းမှာ တကမ္ဘာပတ်လုံး အသက်ရှည်သောနဂါးဖြစ်၍ ယခင်ဘုရားသုံးဆူ ပွင့်ခဲ့သည်ကိုလည်း သိသည်။ ယခု ဂေါတမမြတ်စွာဘုရား ပွင့်သည်ကိုလည်း ရွှေခွက်ရောက်လာ၍ သိသည်။ နောက်ပွင့်လတံ့သော အရိမေတ္တေယျဘုရား ပွင့်လျှင်လည်း သိဦးမည်။

ဘုရား တဆူနှင့်တဆူအကြား (ဗုဒ္ဓန္တရခေတ်တခု) သည် မြေကြီး တယူဇနာနှင့် သုံးဂါဝုတ် (၁၅မိုင်နီးပါး) တက်သည့်တိုင်အောင် ကာလခြားကွာလျက်ရှိရာ ယမန်နေ့ကပင် ဘုရားတဆူပွင့်ခဲ့၍ ယနေ့ တဆူပွင့်ပြန်ပြီ-ဟု ကာလနဂါးကြီး ဆိုခြင်းမှာ အိပ်ရာမှနိုး၍ တနေ့ကူးသောကြောင့် ဆိုခြင်း မဟုတ်။ တကမ္ဘာပတ်လုံး ၄င်း၏ကုသိုလ်ကံကြောင့် ရရှိသော ကာမဂုဏ်စည်းစိမ်တို့ကို ခံစားမွေ့လျော်၍ နေသောကြောင့် အိပ်ပျော်နေခြင်းနှင့် တူသဖြင့် ရွှေခွက်ချင်း ထိခိုက်သံကြားမှ သတိရ၍ဆိုခြင်းဖြစ်သည်။ မြတ်စွာဘုရားအထံ နတ်ဗြဟ္မာများနှင့် အတူ လာရောက်၍ ဂါထာများရွတ်ဆိုလျက် ချီးကျူးကြောင်း၊ အသောကမင်း လက်ထက်၌ လာရောက်၍ ဘုရားအသွင် ဖန်ဆင်းပြကြောင်းများကို ထောက်၍ အိပ်ပျော်မနေကြောင်း သိနိုင်ပါသည်။
( သာရတ္ထသင်္ဂဟ-ဋ္ဌ ၂၂၇ )။

( မြတ်မင်္ဂလာ ၁၉၉၈-ခု ဖေဖေါ်ဝါရီလ )

No comments: