Tuesday, June 23, 2009

ယုတ်ညံ့သူ

မြတ်စွာဘုရားရှင် သာဝတ္ထိပြည် ဇေတ၀န်ကျောင်းတော်၌ သီတင်းသုံးတော်မူစဉ်က ဖြစ်သည်။ တနေ့တွင် မြတ်စွာဘုရားရှင်သည် သာဝတ္ထိပြည်တွင်းသို့ ဆွမ်းခံကြွတော်မူသည်။ သာဝတ္ထိပြည်တွင်း တနေရာတွင် ဗြဟ္မဏပုဏ္ဏားတယောက်သည် ဗြဟ္မာအားရည်မှန်းကာ မီးပူဇော်လျက်ရှိသည်။ မြတ်စွာဘုရားရှင်လည်း ထိုဗြဟ္မဏပုဏ္ဏား၏ အနီးတွင် ဆွမ်းအလို့ငှါ ရပ်တော်မူလေသည်။

ထိုအခါတွင် ဗြာဟ္မဏပုဏ္ဏားသည် မြတ်စွာဘုရားရှင်အား မြင်တွေ့ပြီး စိတ်ဆိုးကာ-ဟဲ့ ယုတ်ညံ့သူ၊ သွားလော့၊ ငါသည် ဗြာဟ္မာမင်းအား မီးပူဇော်လျက်ရှိသည်။ မနှောင့်ယှက်ပါနဲ့-ဟူ၍ ရိုင်းပျစွာ ပြောဆိုလေသည်။
မြတ်စွာဘုရားရှင်က ခွင့်လွှတ်သည်းခံတော်မူလျက်-အို ပုဏ္ဏား၊ အဘယ်သူကို ယုတ်ညံ့သူ-ဟု ခေါ်ဆိုရသနည်း-ဟု မိန့်တော်မူသည်။ ထိုနောက် ယုတ်ညံ့သူ၏ အဓိပ္ပါယ်ကို ကြင်နာစွာ ရှင်းပြတော်မူလေသည်။

အို-ပုဏ္ဏား ဒေါသ ခက်ထန်ကြမ်းတမ်းသူကို ယုတ်ညံ့သူ-ဟု ခေါ်ဆိုသည်။
ကောက်ကျစ်စဉ်းလဲသောသူကို ယုတ်ညံ့သူ-ဟု ခေါ်ဆိုသည်။
မာန်မာနကြီးမားသူကို ယုတ်ညံ့သူ-ဟု ခေါ်ဆိုသည်။

သူတပါးကြီးပွားတိုးတက်သည်ကို မနာလိုသူ၊
မကောင်းမှု ဒုစရိုက်တို့ကို မရှက်မကြောက်ပြုသူ။ မတရားလောဘကြီးသူ။
အားငယ်သူများကို အနိုင်ကျင့်သူ။
လူအများအား ဒုက္ခပေးပြီး မိမိချမ်းသာမှုကို ရှာဖွေသူများကို ယုတ်ညံ့သူ-ဟု ခေါ်ဆိုသည်။

ဇာတိမျိုးနွယ်ကြောင့် ယုတ်ညံ့သူ။ မြင့်မြတ်သူ ဖြစ်ရသည် မဟုတ်။ ကိုယ်တိုင်ပြုလုပ်သော ကောင်းမှု မကောင်းမှု အလုပ်များကြောင့်သာ ယုတ်ညံ့သူ၊ မြင့်မြတ်သူ ဖြစ်ရသည်။
ဗြာဟ္မဏပုဏ္ဏားလည်း မြတ်စွာဘုရား၏ တရားတော်ကို ကြားနာရသောအခါ အသိအမြင်မှန် ရသွားသည်။ ဘုရားရှင်အား အလွန်ကြည်ညိုသွားသည်။ ဘုရားရှင်အား ဆွမ်းဘောဇဉ်များ လောင်းလူပူဇော်သည်။ ဘုရားရှင်၏ အဆုံးအမကို အသက်ထက်ဆုံး လိုက်နာကျင့်သုံးလေတော့သည်။

( မောင်ကျော်သန်း-ရွှေတောင်အင်း )

( မြတ်မင်္ဂလာ ၁၉၉၈-ခု ဖေဖော်ဝါရီလ )

No comments: