Saturday, June 27, 2009

ငါတို့နေရာ ဤကမ္ဘာ တဏှာအုပ်စိုးသည်

တဏှာဟူသည် ပရမတ္ထစေတသိက်တရား ၅၂-ပါးတွင် ပါဝင်သော လောဘစေတသိက်ပင် ဖြစ်သည်။ လောဘစေတသိက်သည် အာရုံခြောက်ပါးကို တပ်မက်တတ်၊ ဆာလောင်တတ်၊ တောင့်တတတ်၊ မရောင့်ရဲ၊ မတင်းတိမ်တတ်သော သဘောသတ္တိရှိလေသည်။ တဏှာသည် ဆင်းရဲခြင်း၏ အကြောင်းတရားဖြစ်၏။ လူအများတွေ့ကြုံနေရသော ဒုက္ခမျိုးစုံသည် တဏှာ၏ လက်ချက်ကြောင့်သာ ဖြစ်ပေါ်လာရသည်။ သတ္တ၀ါတို့သည် သံသရာခရီးတလျှောက်တွင် တဏှာကို အဖော်ပြုကာ ပျော်ပျော်ကြီး ခရီးနှင်လျက်ရှိကြ၏။ သတ္တ၀ါတို့အား ထိုထိုအာရုံ၌ဖြစ်စေ၊ မိမိခန္ဓာကိုယ်၌ဖြစ်စေ တွယ်တာမက်မောစေ၍ သံသရာဝဋ်ဆင်းရဲ၌ မငြီးငွေ့ရအောင် ပြုလုပ်ပေးတတ်သည်။ တဏှာစေရာကို မနေသာဘဲ တနေ့ပြီးတနေ့၊ တလပြီးတလ၊ တနှစ်ပြီးတနှစ်၊ တဘ၀ပြီး တဘ၀ ဆောင်ရွက်ပေးနေကြရသည်။

သတ္တ၀ါတို့သည် လိုချင်တပ်မက်မှု တဏှာကြောင့် မိမိတို့လိုချင်သော ပစ္စည်းဝတ္ထုအာရုံတို့ကို ရရှိအောင် အလုပ်မျိုးစုံကို ပြုလုပ်နေကြရသည်။ ယင်းအလုပ်မျိုးစုံကို အကျဉ်းချုပ်လိုက်လျှင် အပြစ်ကင်းသော ကုသိုလ် အလုပ်နှင့် အပြစ်မကင်းသော အကုသိုလ်အလုပ်ဟူ၍ နှစ်မျိုးတွေ့ရသည်။ ယင်းအလုပ်နှစ်မျိုးသည် တဏှာတည်းဟူသော ကိလေသ၀ဋ်ကြောင့် ဖြစ်ပေါ်လာသော ကမ္မ၀ဋ်ပင် ဖြစ်သည်။ ယခုလက်ရှိ ဘ၀ခန္ဓာ ပြတ်စဲသောအခါ၌ ယင်းကမ္မ၀ဋ်ကြောင့် ရုပ်သစ် နာမ်သစ် ဖြစ်လာကာ ၀ိပါက၀ဋ်တည်းဟူသော ဘ၀သစ်တခု ဖြစ်ပေါ်လာရပြန်သည်။ ဘ၀သစ်၌လည်း တဏှာသည် အတိတ်ဘ၀နည်းတူ ကုသိုလ်၊ အကုသိုလ် အလုပ်များကို လည်စေ၍ သတ္တ၀ါတို့အား သံသရာဝဋ်ဆင်းရဲတွင် ကျင်လည်စေရန် ဆောင်ရွက်ပြန်လေသည်။ ဤနည်းဖြင့် သတ္တ၀ါတို့သည် အထက်အောက် စုန်ကာ ဆန်ကာ ကျင်လည်နေရတော့သည်။

ဗုဒ္ဓမြတ်စွာသည် ဘုရားအဖြစ်သို့ရောက်သည်နှင့် တပြိုင်နက် ရှေးရှေးသော ဘုရားရှင်တို့ ကျူးရင့်မြဲဖြစ်သည့် ဥဒါန်းကို ၀မ်းမြောက်စွာ ကျူးရင့်တော်မူခဲ့လေသည်။
အဖန်တလဲလဲ ပဋိသန္ဓေနေရခြင်း (ဘ၀သစ် ဖြစ်ရခြင်း) သည် အို-နာ-သေ ဒုက္ခဘေးတို့နှင့် ရောထွေးနေသောကြောင့် ဆင်းရဲလှပေသည်။
ဤအတ္တဘောခန္ဓာအိမ်ကို အကြိမ်ကြိမ်အဖန်ဖန် ဆောက်လုပ်နေသော တရားခံလက်သမားကား တဏှာတရားတည်း။
ထိုတရားခံကိုတွေ့ရန် ငါသည် လေးသင်္ချေနှင့် ကမ္ဘာတသိန်းကြာအောင် သဲသဲမဲမဲ ရှာဖွေခဲ့ရ၏။
အို-ခန္ဓာအိမ် အတ္တဘောကို ဆောက်လုပ်တတ်သော တဏှာယောက်ျား လက်သမား၊
ယခုအခါ ငါသည် သဗ္ဗညုတဉာဏ်တော်ဖြင့် သင့်ကို တွေ့မြင်ရပြီ။
သင်သည် ငါ၏ခန္ဓာအိမ်ကို နောက်ထပ်တဖန် ဆောက်လုပ်ရတော့မည်မဟုတ်။
သင်၏ ကိလေသာတည်းဟူသော အခြင်ရနယ်အားလုံးတို့ကို ငါချိုးဖျက်လိုက်လေပြီ။
ခန္ဓာအိမ်၏ အ၀ိဇ္ဇာဟူသော အထွတ်ကိုလည်း ဖျက်ဆီးဖြုတ်ချလိုက်လေပြီ။
ငါ၏စိတ်သည် ပြုပြင်ခြင်းကင်းရာ နိဗ္ဗာန်သို့ အာရုံပြုသောအားဖြင့် ရောက်ခဲ့ပြီ။
ငါသည် သင် တဏှာမရှိရာဖြစ်သော အရဟတ္တဖိုလ်ကို ရရှိခဲ့ပြီ။

ထိုတဏှာ၏ စွမ်းဆောင်မှုကို အာရုံပြုမိရန် တောင်မြို့ မဟာဂန္ဓာရုံဆရာတော်ကြီး၏ ဆုံးမထားတော်မူခဲ့ပုံကို သတိပြုတော်မူနိုင်ကြပါစေ။
ငါတို့နေရာ ဤကမ္ဘာ တဏှာအုပ်စိုးသည်။
တဏှာစေရာ မနေသာ ဖွေရှာဆက်ရသည်။

No comments: