Friday, June 5, 2009

ကံ ကံ၏အကျိုး ( ၆၀ )

( ကျောက်စ မထိမှန်သူ )

နွေရာသီကျောင်းပိတ်ရက်တွင် ကျွန်မနှင့်အဖွဲ့သား ဆယ်ဦးတို့သည် မြန်မာပြည်အထက်ပိုင်း၊ ကျောက်စိမ်းထွက်ရာ ဒေသဖြစ်သော ဖားကန့်မြို့သို့ အလုပ်လုပ်ရန် ခရီးထွက်ခဲ့ကြသည်။
ယခင်က စာအုပ်ထဲတွင်သာ ဖတ်ဖူး တွေ့ဖူးသော ဖားကန့်ဒေသကို ယခုမိမိကိုယ်တိုင် ရောက်ဖူးခဲ့သဖြင့် မြင်မြင်သမျှကို အံ့သြမဆုံး ဖြစ်ခဲ့ရသည်။ ကျောက်စိမ်းထွက်ရာနေရာတိုင်းတွင် စက်ယန္တရားများနှင့် တမျိုး၊ လူအင်အားနှင့်တဖုံ နည်းမျိုးစုံဖြင့် ကျောက်လုပ်ငန်း လုပ်ကိုင်နေကြသည်မှာ ကြည့်၍ပင် ကောင်းနေတော့သည်။

ကျွန်မတို့အဖွဲ့သည် ဖားကန့်ကျောက်သွေးတောင်တွင် စခန်းချကာ ခေါက်စားထမ်းခြင်းအလုပ်ကို လုပ်ကိုင်ကြသည်။ နံနက် ၆-နာရီတွင် အလုပ်စဆင်း၍ ၈-နာရီခွဲတွင် ခေတ္တနားကြရသည်။ တဖန် ၉-နာရီတွင် စဆင်းပြီး ၁၁-နာရီထိုးလျှင် ထမင်းစားချိန်ရပ်နားပေးသည်။ နေ့လည် ၁-နာရီထိုးသောအခါ အလုပ်ပြန်ဆင်းရသည်။ ၂-နာရီခွဲတွင် နာရီဝက်ပြန်နားပြီး ၃-နာရီထိုးမှ ညနေ ၅-နာရီအထိ ဆက်လက်လုပ်ကိုင်ရသည်။ လုပ်အားခမှာ တနေ့ သုံးရာကျပ်ရရှိသည်။

နေ့လည် ထမင်းစားတက်ချိန်၊ အထူးသဖြင့် ကျင်းထဲ လူရှင်းချိန်တွင် ကျင်းသားများသည် အသုံးမ၀င်သော ကျောက်တုံးကြီးများကို မိုင်းခွဲဖျက်ဆီးကြရသည်။ သို့မှသာ အလွယ်တကူ ဖယ်ရှင်းနိုင်မည်ဖြစ်ပေသည်။ မိုင်းခွဲလိုက်သော ကျောက်တုံး ကျောက်စများသည် ကိုက်နှစ်ရာ သုံးရာအတွင်း လွင့်စဉ်နိုင်သဖြင့် မိုင်းခွဲခါနီးတွင် လူများ ကြိုတင်ရှောင်နိုင်ရန် ခရာမှုတ်၍ အချက်ပေးလေ့ရှိသည်။

ကျွန်မတို့အဖွဲ့ အလုပ်ဆင်း၍ ၇-ရက်ရသောနေ့၌ နေ့လည်ထမင်းစားတက်ချိန်တွင် ကျွန်မသည် ထမင်းမစားသေးဘဲ အိပ်ရာထဲတွင် လှဲအိပ်လိုက်သည်။ ခဏအကြာတွင် ကျောက်တွင်းများဆီမှ အချက်ပေးသံနှင့်အတူ မိုင်းခွဲသံကိုကြားရသည်။ ကျောက်တုံး ကျောက်စများသည် နေရာအနှံ့ လွင့်စဉ်ကျသလို ကျွန်မအိပ်ရာပေါ်တည့်တည့်ရှိ အမိုးပေါ်မှတဆင့် အောက်သို့ ပေါက်ကျလာသည်။ ကျောက်တုံးသည် ခေါင်မိုးပေါက်ကာ အပေါ်တည့်တည့်မှ ကျလာသော်လည်း ကျွန်မကို မထိပေ။ ကျွန်မနှင့် နှစ်တောင်လောက် ဝေးသော မိန်းမကြီး၏ ခြေထောက်ကို ထိသွားခဲ့သည်။ အဖွဲ့သားအားလုံး အံ့သြကြရသည်။ အကယ်၍သာ မိုင်းစသည် ကျွန်မအား ထိမှန်ခဲ့ပါက ပွဲချင်းပြီး သေဆုံးမည်မှာ သေချာသည်။

ဤအဖြစ်အပျက်သည်ကား ပဋ္ဌာန်း ၂၄-ပစ္စည်းတရားတော်က ကျွန်မအား ၀င်ကယ်လိုက်ခြင်း ဖြစ်သည်။ ကျွန်မသည် ဘယ်နေရာသွားသွား ဘယ်နေရာလာလာ အမြဲတမ်း သတိထားကာ ဘုရားစာ တရားစာများကို ရွတ်ဆိုလေ့ရှိသည်။ အထူးသဖြင့် ပဋ္ဌာန်း ၂၄-ပစ္စည်းကို နှစ်သက်မြတ်နိုးစွာ ရွတ်ဆိုမြဲဖြစ်ပါသည်။ ကျောက်မိုင်း စကျသောနေ့ကလည်း ကျွန်မသည် ပဋ္ဌာန်း ၂၄-ပစ္စည်းကို ရွတ်ဆိုကာ အိပ်ရာထဲတွင် လှဲအိပ်နေခြင်းဖြစ်ပါသည်။ ထို့ကြောင့် ကျောက်စ မမှန်ခြင်း ဖြစ်သည်ဟု ယုံကြည်မိပါသည်။

ကျောက်စမှန်သော မိန်းမကြီးသည် ဗုဒ္ဓဘာသာဝင်တဦးဖြစ်သော်လည်း ဘာသာတရားကို မကိုင်းရှိုင်း၊ ဘုရား ရှိခိုးစာပင် ကောင်းကောင်းမဆိုတတ်၊ သူ့ပါးစပ်မှ နေ့ည အချိန်ရှိသရွေ့ ဆဲသံ ဆိုသံကိုသာ ကြားရသည်။ ဘာသာရေးနှင့်ပတ်သက်သော လုပ်ငန်းများတွင် မည်သည့်အခါမှ ပါဝင်ကူညီ ဆောင်ရွက်လေ့မရှိပါ။ ဘာဘာညာညာ အကြောင်းပြကာ ရှောင်နေတတ်သည်။ ကျွန်မတို့အဖွဲ့ ကုသိုလ်ကောင်းမှုပြုလျှင် အမြဲတမ်း အပြစ်တင်လေ့ရှိသည်။ ထိုသို့သော အပြုအမူများရှိခြင်းကြောင့် ကျောက်စမှန်ခြင်းဖြစ်သည်ဟု အဖွဲ့သား အားလုံးက မှတ်ချက်ချကြပါသည်။

( သင်း-မြန်မာစာ )
********************************************************************************

( အမေ-ဟု တမိရုံမျှဖြင့် )

၁၉၆၈-ခုနှစ်၊ ဇူလိုင်လ ၂၀-ရက်နေ့တွင် ကျွန်တော်၏အဖေသည် မော်လမြိုင်မြို့တွင် ရေနစ်၍ သေဆုံးခဲ့ပါသည်။ ထိုအချိန်တွင် ကျွန်တော်၏ အမေသည် လူမမည် ကလေး ၅-ယောက်နှင့် လောကကြီးထဲတွင် မျက်စိသငယ်နှင့် ကျန်ရစ်ခဲ့ပါသည်။

ဘ၀၏လောကဓံတရားကို ကျွန်တော်တို့အမေသည် စတင်ရင်ဆိုင်ရပါသည်။ ထိုစဉ်က ကျွန်တော့အမေကို လက်ထပ်လို၍ ကမ်းလှမ်းကြသူများကို ကျွန်တော့အမေက ကျွန်တော်တို့ မောင်နှမများ မျက်နှာငယ်မှာစိုး၍ ငြင်းဆန်ခဲ့ပါသည်။ သူသာလျှင် အမိ၊ သူသာလျှင် အဖ နေရာမှ စိတ်ရောလူပါ ပင်ပန်းဆင်းရဲခံပြီး စီးပွားရှာဖွေ ကျွေးမွေးခဲ့ပါသည်။

အမေသည် ဗုဒ္ဓဘာသာ မြန်မာလူမျိုးတို့၏ ယဉ်ကျေးမှု ဓလေ့စရိုက်များကို မြန်မာပီပီ အလွန်ထိမ်းသိမ်းနိုင်သူ တယောက် ဖြစ်ပါသည်။ တလင် တမယားစနစ်ကို မြတ်နိုးပါသည်။ မိန်းကလေးများ လျှပ်ပေါ်လော်လီသော ၀တ်စားဆင်ယင်မှုကို အလွန်မုန်းတီးပါသည်။ အထူးသဖြင့် မိန်းကလေးများ ခြေသလုံးပေါ်အောင် ထဘီဝတ်ခြင်း၊ ရင်သားပေါ်အောင် လည်ဟိုက်အင်္ကျီ ၀တ်ခြင်းကို အထူးတားမြစ်ပါသည်။ ဆွေမျိုးမိတ်ဆွေများ၏ လူမှုရေး စီးပွားရေးကိစ္စများတွင် အကူအညီတောင်းပါက ကိုယ်ရောစိတ်ပါ ကူညီတတ်ပါသည်။

ကျွန်တော်သည် အမေ့ကို လေးစား ရိုသေ ချစ်ကြောက်ပါသည်။ ငယ်စဉ်မှစ၍ အဖေ့ထက် အမေ့ကို ပိုပြီး တွယ်တာမိပါသည်။ ထို့ကြောင့် ကျွန်တော်အမြဲတမ်းအမေ့စကားကို နားထောင်ခဲ့ပါသည်။ ကျွန်တော်၏ဘ၀တွင် အမေနှင့်ပတ်သက်သော မမေ့နိုင်စရာ ကိုယ်တွေ့ဖြစ်ရပ်တခုကို တင်ပြလိုပါသည်။

၁၉၈၂-ခုနှစ် အောက်တိုဘာလတွင်ဖြစ်ပါသည်။ ကျွန်တော် တာဝန်ထမ်းဆောင်သော သင်္ဘောသည် စင်္ကာပူ နိုင်ငံတွင် ကျောက်ချရပ်ထားပြီး ကုန်းပတ်များ သန့်ရှင်းရေးလုပ်နေပါသည်။ ထိုစဉ် ကျွန်တော်၏ ညာဖက်ခြေထောက်ကို ကုန်းပတ်တံခါးကြီး ညှပ်မိပြီး ဒဏ်ရာရရှိခဲ့ပါသည်။

ဖြစ်ပျက်ပုံမှာ ကျွန်တော်နှင့်အတူ ဘင်္ဂလာဒေ့ရှ် နိုင်ငံသားတယောက် ကုန်းပတ်တံခါးကို ၂-ပေကျော်ကျော်ဖွင့်၍ ကြားထဲရှိ ဘိလပ်မြေနှင့် လက်ဖက်ခြောက်မှုန့်များကို ရှင်းလင်းနေချိန်ဖြစ်ပါသည်။ ကျွန်တော်၏စိတ်ထဲတွင် တစုံတခုက နှိုးဆော်သလိုဖြစ်ပြီး ရုတ်တရက် ထိုကုန်းပတ်တံခါးကြီး ပိတ်လာသည်ဟု ခံစားရပါသည်။

ထို့ကြောင့် အဖော်ဖြစ်သူအား အပေါ်သို့တက်ရန် ဆွဲလည်းဆွဲ၊ ပြောလည်းပြောပြီး ဆွဲတင်ပါသည်။ ချက်ချင်းပင် ကျွန်တော်ထင်သည့်အတိုင်း ထိုကုန်းပတ်တံခါးကြီး ရုတ်တရက်ပိတ်သွားပြီး ကျွန်တော်နှင့်အဖော်ပါ ကုန်းပတ်တံခါးကြီးကြားတွင် ခြေထောက်များ ညပ်လျက် အရှင်လတ်လတ် ငရဲပြည်ရောက်သလို ခံစားရပါသည်။ ထိုအချိန်တွင် ကျွန်တော်၏စိတ်ထဲတွင် မိမိခံစားနေရသော ဝေဒနာထက် ကျွန်တော်တို့ကို ပိုးမွေးသလို အရိပ်တကြည့်ကြည့်နေခဲ့သော မိခင်သာတွေ့ပါလျှင် ဆိုသောအသိကြောင့် ကျွန်တော့စိတ်တွင် အမေ့ကို အလွန်သနားသွားမိခဲ့ပါသည်။ အဖော်ဖြစ်သူလည်း မခံမရပ်နိုင်လွန်း၍ တအားကုန် အော်ဟစ်နေပါသည်။ ကျွန်တော်လည်း ပါးစပ်မှ ရောင်ရမ်းပြီး အမေ့ကိုသာ မျက်စိထဲမြင်နေ၍ အမေရေ-ဟု တခွန်းတည်း အော်ဟစ်မိပါတော့သည်။

သင်္ဘောပေါ်ရှိ တခြားသူများ လာရောက်၍ ကယ်တင်ဆွဲထုတ်ကြပါသည်။ ထိုအထဲတွင် ကျွန်တော့သူငယ်ချင်း မြန်မာများလည်း ပါကြပါသည်။ အချို့သူငယ်ချင်းများက ယခုအချိန်အထိ ကျွန်တော့ကို အမေရေ-ဟု စကြ နောက်ကြပါသည်။ မည်သို့ပင်ဖြစ်စေ ထိုအဖြစ်အပျက်တွင် အမေ့အပေါ် တမ်းတမိခြင်း၊ အမေ့မေတ္တာနှင့် သူတပါးအပေါ် ကူညီသောစိတ်ကြောင့် ကျွန်တော့ခြေထောက်မှာ အံ့သြလောက်အောင် ဘာမှပြင်းပြင်းထန်ထန် ဒဏ်ရာမရခဲ့ခြင်းဖြစ်သည်ဟု ယုံကြည်ပါသည်။ အဖော်ဖြစ်သူ ဘင်္ဂလားဒေရှ် နိုင်ငံသားမူ ခြေထောက်ဖြတ်လိုက် ရပါသည်။

ကျွန်တော်သည် အမေ့ကို အမေရေ-ဟု တ,မိရုံလေးနှင့်ပင် ဒုက္ခိတဖြစ်မည့်ဘ၀မှ သီသီလေး လွတ်ခဲ့ရပါသည်။ ကျွန်တော် အလွန်ချစ်သော လေးစားမြတ်နိုးသော ကျွန်တော့အမေသည် ၁၆-၇-၉၅-နေ့တွင် ကွယ်လွန်ခဲ့ပါပြီ။ သို့သော် အမေ့မေတ္တာ၊ အမေ့ကျေးဇူးကား ကျွန်တော့တွင် ဆပ်၍မကုန်နိုင်အောင် ရှိနေပါသည်။ ယခုဤဆောင်းပါးဖြင့် ကျွန်တော့အမေ အပါအ၀င် မိခင်အားလုံးကို ဂုဏ်ပြုပါသည်။

( ညီညီနိုင် )

( မြတ်မင်္ဂလာ ၁၉၉၇-ခု နိုင်ဝင်ဘာလ )

No comments: