Monday, July 6, 2009

ဘာသာရေး ပြဿနာ ( ၇၁ )

( ဘဒ္ဒန္တတိလောကသာရ ဖြေသည် )

( မေး ) ( ပစ္စည်းလေးပါး တောင်းခံခြင်း )

အရှင်ဘုရား၊ ဆွေမျိုးလည်း မတော်၊ ဖိတ်ကြား၍လည်း မထားသော ဒါယကာ ဒါယိကာမများအား ပစ္စည်းလေးပါးကို မတောင်းကောင်းဟု သိရပါသည်။ ပစ္စည်းလေးပါးလုံးကိုပင် မတောင်းကောင်းပါသလား၊ ဆေးပစ္စည်းလည်း မတောင်းရသည့်အထဲမှာ ပါပါသလားဘုရား။


( အရှင်ကောသလ္လ-တောင်ကြီး )

( ဖြေ )

ပစ္စည်းလေးပါး တောင်းခံခြင်းတွင် ၀ိညတ်၊ နိမိတ်၊ သြဘာသ၊ ပရိကထာ ဟူ၍ လေးမျိုးရှိပါသည်။
ဝစီဝိညတ်ဖြင့် ထုတ်ဖော်၍ တောင်းခံခြင်း၊ လှူစေလိုသော နိမိတ်ပြ၍ တောင်းခံခြင်း၊ အရိပ်အရောင်ပြ၍ တောင်းခံခြင်း၊ လှည့်ပတ်ရစ်ဝဲ၍ ပြောဆိုတောင်းခံခြင်း-ဟူ၍ ဖြစ်ရာ ဆွမ်းနှင့်သင်္ကန်းကို ဤလေးမျိုးလုံးဖြင့်ပင် မတောင်းခံရပါ။



ကျောင်းမှာ ၀ိညတ်တခုသာ မအပ်။ ကျန်သုံးပါးဖြင့် တောင်းခံအပ်ပါသည်။
ဆေးပစ္စည်းမှာကား လေးမျိုးလုံးဖြင့်ပင် တောင်းခံအပ်သည်ဟု ဆိုပါသည်။
၎င်းကို ပါရာဇိကဏ် အဋ္ဌကထာ ကုဋီကာရ သိက္ခာပုဒ် အဖွင့်တွင် ဆိုပါသည်။
အကျဉ်းမှတ်ရန်မှာ-
ဝိညတ်-နိမိတ်-သြဘာ-ပရိကထာ-ဤလေးဖြာ-ပိဏ္ဍာစီဝရ-မအပ်ကြ။
ကျောင်းပစ္စည်းမှာ-၀ိညတ်သာ-မှတ်ပါ မအပ်ပြ။
ဆေးပစ္စည်းတွင်-လေးပါးပင်-ပြုလျှင်အပ်ကြောင်းပြ။


********************************************************************************

( မေး ) ( မြတ်စွာဘုရားသည် ဟိန္ဒူ လူမျိုးလား )

အရှင်ဘုရား၊ တပည့်တော်တို့ ဂေါတမမြတ်စွာဘုရားကို ဟိန္ဒူဘာသာဝင် တဦးက ဂေါတမဘုရားလည်း ဟိန္ဒူဘာသာမှ မွေးဖွားသည်ဟု ပြောဆိုပါသည်။ တပည့်တော်တို့ သင်ကြားနေသော အဘိဓာန်ကျမ်း၌ အမျိုးလေးမျိုးသာ ရှိ၏။ ထိုအမျိုးလေးပါးတို့တွင် ဟိန္ဒူလူမျိုးဟု မပါပါဘုရား။
ထိုစကားနှစ်ရပ်ကို နှီးနှောပေးပါဘုရား။ ဂေါတမမြတ်စွာဘုရားသည် အဘယ်အမျိုးမှ ဆင်းသက်လာသည်ကို ဖြေကြားပေးတော်မူပါ ဘုရား။


( သောတုဇနများ-ကြာနီကန်စာသင်တိုက်-တောင်ငူမြို့ )

( ဖြေ )

အဘိဓာန်ကျမ်းလာ အမျိုးလေးပါးမှာ-
(၁) ခတ္တိယမျိုး
(၂) ဗြာဟ္မဏမျိုး
(၃) ဝေဿမျိုး
(၄) သုဒ္ဒမျိုး ဟူ၍ ဖြစ်ရာ နံပါတ်(၂) ဗြာဟ္မဏမျိုးများကို နောက်တွင် ဟိန္ဒူဟူ၍၄င်း၊ ပုဏ္ဏားဟူ၍၄င်း ခေါ်ပါသည်။
အိန္ဒိယနိုင်ငံတွင် အများစုမှာ ဗြာဟ္မဏပုဏ္ဏား, ဟိန္ဒူများဖြစ်၍ ဇာတိဝါဒအရ သူတို့လူမျိုးသည် အမြတ်ဆုံး ဖြစ်သည်ဟု ယူဆကြသည်။
ခတ္တိယမျိုးများမှာ အုပ်ချုပ်သူ အတန်းအစား မင်းများဖြစ်၍ ဗြာဟ္မဏ ပုဏ္ဏားများသည် သူတို့သာ ပညာတတ်ဖြစ်ပြီး ဗြာဟ္မာမင်းနှင့် တိုက်ရိုက်ဆက်ဆံ၍ အမြတ်ဆုံး။



မင်းများမှာ အုပ်ချုပ်သူ လူတန်းစား ဖြစ်သော်လည်း သူတို့လောက် မမြတ်ဟု ယူဆခဲ့သည်။ ဒီဃနိကာယ် အမ္ဗဋ္ဌသုတ်တွင် မြတ်စွာဘုရားက ခတ္တိယမင်းမျိုးက အရှင်သခင်ဖြစ်၍ ဗြာဟ္မဏပုဏ္ဏားမျိုးက ကျွန်ဖြစ်ကြောင်း သမိုင်းကို ထုတ်ဖော်၍ ဟောကြားတော်မူမှ အရှုံးပေးသွားသည်ကို တွေ့ရသည်။



ယင်းအမ္ဗဋ္ဌသုတ်အရ ဂေါတမမြတ်စွာဘုရားသည် ဗြာဟ္မဏပုဏ္ဏား, ဟိန္ဒူလူမျိုး မဟုတ်၊ ခတ္တိယမျိုး ဖြစ်ကြောင်း ဖော်ပြထားသည်။ ၄င်းခတ္တိယမျိုးမှပင် သီးခြားထွက်၍ စင်ကြယ်သော သာကီယဇာတ် မြတ်သောအမျိုး ဖြစ်ကြောင်း ရာဇ၀င်ထင်ရှားပါသည်။ ယင်းသာကီဝင် အနွယ်တွင် မြန်မာလူမျိုးများလည်း ပါဝင်ကြောင်း ဂုဏ်ယူဖွယ်ရာ မှတ်သားထားသင့်ပါသည်။


********************************************************************************

( မေး ) (လက်ညှိုးကိုဖြတ်၍ ဘုရားလှူခြင်း )

အရှင်ဘုရား၊ တပည့်တော် ကျိုက်ထီးရိုး ဘုရားဖူးသွားရာ ရဟန်းတော်တပါးသည် ကျိုက်ထီးရိုးဘုရားအား လက်ညှိုးကိုဖြတ်၍ မီးပူဇော်လှူဒါန်းနေသည်ကို တွေ့ရပါသည်။ ထိုကဲ့သုိ့ လက်ညှိုးကိုဖြတ်၍ လှူဒါန်းခြင်း စသည်တို့ကို ရဟန်းတို့ ပြုလုပ်အပ်ပါသလော။ ၀ိနည်းကျမ်းဂန်အရ ဖြေကြားတော်မူပါဘုရား။



( ဖြေ )

ဘုရားအား နား-နှာခေါင်း-လက်ချောင်း စသည်တို့ကို ဖြတ်၍လှူခြင်းကို မပြုအပ်ကြောင်း အဋ္ဌကထာတို့တွင် ဆိုထားပါသည်။ အညံ ပန ကဏ္ဏနာသအင်္ဂုလိအာဒိံ ယံကိဉ္စိ ဆိန္ဒန္တဿ တာဒိသံဝါ ဒုက္ခံ ဥပ္ပါဒေန္တဿ ဒုက္ကဋံ (၀ိ-ဌ ၄-၄၆) အရ နား-နှာခေါင်း-လက်ချောင်း စသည်ကို ဖြတ်၍လှူဒါန်းသော ရဟန်းအား၎င်း၊ ထိုကဲ့သို့ သဘောရှိသော ဆင်းရင်းကိုဖြစ်စေသော ရဟန်းအား၎င်း ဒုက္ကဋ်အာပတ်သင့်ပါသည်။


အချို့ ဗဟုသုတနည်းပါးသော ရဟန်းများသည် အင်္ဂါကြီးငယ်ကို လှူဒါန်းဖြင်းမှာ ဒါနဥပပါရမီ ဖြစ်သည်ဟု ဆိုကြသည်။ မိမိကိုယ်ကို ပါရမီရှင် အလောင်းတော်ဟုလည်း ဆိုကြပါသည်။ ထိုသို့ဆိုပြီး လက်ချောင်းတို့ကို ဖြတ်၍ လှူဒါန်းတတ်ကြပါသည်။ ဖော်ပြပါ ၀ိနည်းအဋ္ဌကထာစကားအရ လုံးဝ မပြုလုပ်အပ်ဟူ၍ မှတ်သားစေလိုပါသည်။


********************************************************************************

( မေး ) ( ကြွေးကိစ္စ )

အရှင်ဘုရား၊ သူတပါးထံမှ အကြွေးရရန်ရှိသူ တဦးသည် အကြွေးတောင်းရာ မရနိုင်သဖြင့် ကြွေးရှင်က-သည်တခါ အလှူပေးလျှင် ရောပြီး ရေစက်ချပစ်လိုက်မည်ဟု ပြောရာ ကြွေးယူသူက-သည်လိုတော့ မလုပ်လိုက်ပါနဲ့၊ ဆပ်ပါမည်ဟုပြောကာ ကြွေးဆပ်ပါသည်။ ကြွေးယူသူသည် ရေစက်ချပစ်မည် ဆိုသောစကားကို မည်သည့်အဓိပ္ပါယ်ကြောင့် ကြောက်ရွံ့ပြီး ကြွေးဆပ်ပါသနည်းဘုရား။ ကြွေးဆုံးသဖြင့် ဘုရားအားရည်စူး ရေစက်ချပါက ကြွေးယူသူတွင် မည်သို့ ထိခိုက်နိုင်၍ ရေစက်ချသူတွင် မည်သို့ အကျိုးထူးနိုင်ကြောင်း ဖြေကြားပေးပါရန် လေးစားစွာ လျှောက်ထားအပ်ပါသည်ဘုရား။


( အေးအေးမြင့်-ကျောင်းအုပ်ဆရာမကြီး,မန္တလေးမြို့ )
( ဖြေ )

ကြွေးရှင်သည် ကြွေးယူသွားသူက ပြန်မဆပ်သဖြင့် ငါ့ငွေတော့ ဆုံးပြီ-ဟု ၀န်ချ (စိတ်ကိုလျှော့ချလိုက်) လျှင် ခိုးခြင်း ၂၅-ပါး အပါအ၀င် သာဟတ္ထိကပဉ္စက၌ ၀င်သွားသဖြင့် ခိုးရာရောက်သည်ဟု ဆိုနိုင်ပါသည်။ အလှူလုပ်လျှင် ရောပြီး ရေစက်ချလိုက်မည်ဟု ကြွေးရှင်(ငွေရှင်)က ပြောသောစကားမှာ လှူဒါန်းလိုသော စေတနာဖြင့် ပြောသောစကားမဟုတ်။


ငါ့ငွေဆုံးပြီ-ဟု ၀န်ချလိုက်ခြင်း (စိတ်ကိုလျှော့ချလိုက်ခြင်း)ပင်ဖြစ်၍ ထိုသို့ဝန်ချကြောင်း မှတ်ယူကြောင်းကို ကြွေးယူသူသိအောင် ကြေညာခြင်းမျှသာဖြစ်သည်။ ကြွေးပြန်မပေးလျှင် ခိုးသည်နှင့် အတူတူ-ဟု ပြောခြင်းမျိုးပင် ဖြစ်သည်။ ကြွေးယူသူကလည်း မိမိ သူခိုး မဖြစ်စေရန် အမြန် ပြန်ဆပ်ခြင်းပင် ဖြစ်သည်။ ထို့ကြောင့် ရေစက်ချမည်ဆိုသူ ကြွေးရှင်အဖို့ ကုသိုလ်ကျိုးရှိမည်မဟုတ်။


ကြွေးယူသူအဖို့ကား ထိုအချိန်အထိ ပြန်မပေးလျှင် (ပေးလိုစိတ် မရှိလျှင်) သူခိုးလုံးလုံးဖြစ်၍ အဒိန္နာဒါန သိက္ခာပုဒ်အရ အပြစ်ရှိတော့မည်ဖြစ်ကြောင်း မှတ်သားနိုင်ပါသည်။


********************************************************************************

( မေး )( သိမ်နှင့် မီးကြိုး )

အရှင်ဘုရား၊ ခဏ္ဍသိမ်အတွင်း၌ ဥပသမ္ပဒကံပြုရာ ၄င်းသိမ်နှင့် ဆက်သွယ်လျက်ရှိသော မီးကြိုး-ဖုန်းကြိုး-တကြိုးကြိုး မဖြုတ်ဘဲ ကံဆောင်ပါက ၄င်းဥပသမ္ပဒကံ မြောက်-မမြောက် သိလိုပါ၍ ဖြေကြားပေးတော်မူပါဘုရား။


( မာလာ-မြောက်ရေကြည်-ကေတုမတီ )

( ဖြေ )

ကံပြုရာ ခဏ္ဍသိမ်တွင်းသို့ ဆက်သွယ်ထားသော မီးကြိုး-ဖုန်းကြိုးများသည် အခြားသော ခဏ္ဍသိမ် တခုခုနှင့် ဆက်သွယ်နေသော် ထိုကြိုးဆက်သွယ်နေသော သိမ်အတွင်း၌လည်း ရဟန်းတပါးပါး ရှိနေသော် သိမ်ချင်းစပ်နေသည်။ ဤသို့စပ်နေသည်ဖြစ်၍ ဤသိမ်ရှိ သံဃာနှင့် အခြားသောသိမ်ရှိ သံဃာတို့ ၂-စုဖြစ်နေသဖြင့် ၀ဂ္ဂဖြစ်၍ ကံပျက်နိုင်သည်။ ထို့ကြောင့် သံသယကင်းရန် ကံတခုခုပြုရာ၌ သိမ်နှင့် ဆက်သွယ်နေသော မီးကြိုး-ဖုန်းကြိုးများကို ဖြုတ်ကြရပါသည်။


********************************************************************************

( မေး )( ကြက်ဥ )

သက်သတ်လွတ်တွင် ကြက်ဥသည် ပါဝင်၏။ မပါဝင်၏-ဟု ငြင်းခုန်ပြောဆိုနေသည်။ ပါဝင်-မပါဝင် ဖြေကြားတော်မူပါ ဆရာတော်။ ထို့ပြင် ဘုရားလက်ထက်က သက်သတ်လွတ် ရှိ-မရှိကိုလည်း ဖြေကြားပေးတော်မူပါဘုရား။


( ဌေးမြင့်ကြည်-မိုးကုတ် )

( ဖြေ )

ကြက်ဥသည် သဘာဝ ကြက်ဥပင်ဖြစ်စေ၊ ဓာတ်ဖြင့် ဖောက်သော ကြက်ဥပင်ဖြစ်စေ ကြက်မ (မိခင်)၀မ်း၌ သန္ဓေတည်ရသဖြင့် သက်သတ်လွတ် မဖြစ်နိုင်ပေ။
ဒေ၀ဒတ်သည် မြတ်စွာဘုရားအား ရဟန်းတော်များ ခြိုးခြံစွာကျင့်သုံးရေးအတွက် အချက်ငါးချက် လျှောက်ထားရာ ရာသက်ပန် သက်သတ်လွတ်စားရန် ပါရှိသဖြင့် မြတ်စွာဘုရား လက်ထက်ကပင် သက်သတ်လွတ်စား အယူဝါဒရှိကြောင်း သိနိုင်၏။
သို့သော် ဆွမ်းခံစားရသော ရဟန်းတော်များအဖို့ ရသမျှကိုစားခြင်းသာ သန္တောသ-သန္တုဋ္ဌိ ဖြစ်နိုင်သဖြင့် မြတ်စွာဘုရားက အားမပေးခဲ့ပါ။


********************************************************************************

( မေး ) ( ဦးပဉ္ဇင်းငယ် တပါးနှင့် အမျိုးသမီး တဦး )

အရှင်ဘုရား၊ ဦးပဉ္ဇင်းငယ်နှင့် အမျိုးသမီးတဦးသို့ နှစ်ဦးနှစ်ဖက် စကားအပြန်အလှန် ပြောကြရာမှ အမျိုးသမီး၏ အပြောကို မခံနိုင်၍ ဦးပဉ္ဇင်းငယ်က အမျိုးသမီးကို ထိုင်ပြီး ဦးချ (ရှိခိုး)ပါသည်။ ဦးဇင်းအပေါ်မည်သည့်အပြစ်ရှိ၍ အမျိုးသမီးမှာ မည်သည့်အပြစ်များ ရှိပါမည်နည်း။ မည်သို့ပြုမှ အပြစ်များ ပြေပျောက်နိုင်ပါသနည်း။ ဖြေကြားတော်မူပါဘုရား။


( သောတုဇန-သင်္ဃန်းကျွန်း )
( ဖြေ )

ဦးပဉ္ဇင်းမှာ ရဟန်းသံဃာတော်တို့ ရှိမခိုးကောင်းသူတို့တွင် ပါဝင်သည့် မာတုဂါမအား ရှိခိုးသဖြင့် ဒုက္ကဋ်အာပတ်သင့်ပါသည်။ ထိုဒုက္ကဋ်အာပတ်ကို ရဟန်းတပါးပါးထံ၌ ထင်စွာပြု (ဒေသနာကြား) မှ ပြေပျောက်ပါမည်။
အမျိုးသမီးမှာ ရဟန်းသံဃာအား ၀စီကံဖြင့် စော်ကားခြင်း၊ ရှိခိုးခံခြင်းတို့ကြောင့် သံဃာ့ဂိုဏ်းသင့်၍ အန္တရာယ်အမျိုးမျိုး တွေ့ကြခြင်း၊ စီပွားမဖြစ်ထွန်းခြင်း စသော ဘေးများကို ကြုံတွေ့နိုင်သည်။ ထို့ကြောင့် ဤသို့ ကာယကံမှု ၀စီကံမှု မနောကံမှုတို့ဖြင့် ပြစ်မှားမိသည်ကို သနားသောအားဖြင့် သည်းခံခွင့်လွှတ်တော်မူပါ-ဟူ၍ ဦးပဉ္ဇင်အား ကန်တော့ရန် လိုအပ်ပါသည်။
ဦးပဉ္ဇင်းကလည်း ကျေနပ်သည်းခံပါသည်-ဟု ခွင့်လွှတ်ရန် လိုအပ်ပါသည်။ ဤသို့ ကန်တော့ခြင်းကို နှစ်ဦးချင်း ကန်တော့ချင်းမပြုလုပ်ဘဲ ပရိသတ်ရှေ့ (သို့မဟုတ်) အနည်းဆုံး လူကြီးမိဘရှေ့၌ ကန်တော့ဝန်ချသင့်ပါသည်။



( မြတ်မင်္ဂလာ ၁၉၉၈-ဇွန်လ )

No comments: