Tuesday, July 7, 2009

ဘာသာရေး ပြဿနာ ( ၇၂ )

( ဘဒ္ဒန္တတိလောကသာရ ဖြေသည် )

( မေး ) ( ကိုယ်စောင့်နတ် )
အရှင်ဘုရား၊ လူတိုင်းမှာ ကိုယ်စောင့်နတ်ရှိပါသလား၊ ရှိသည်ဆိုလျှင် နတ်ပြည်ခြောက်ထပ်တွင် မည်သည့်ဘုံ၌ ပါဝင်ပါသလဲ၊ လူတဦး မွေးဖွားလာလျှင် ကိုယ်စောင့်နတ် တပါတည်း ရောက်လာပါသလား၊ ကိုယ်စောင့်နတ်က မည်သို့ကူညီစောင့်ရှောက်နိုင်ပါသလဲ၊ မေတ္တာရှေ့ထား ဖြေကြားပေးတော်မူပါဘုရား။
( ၀င်းဝင်းအေး-ပျဉ်းမနား )

( ဖြေ )
ဘုန်းကံကြီးမားသူတို့၌သာ ကိုယ်စောင့်နတ်ဟူ၍ ရှိပါသည်။ ကိုယ်စောင့်နတ်ဟူသည် နတ်ပြည်ခြောက်ထပ် နတ်များမှတပါး အခြားအမျိုးအစား သီးခြားမရှိ။ ဘုန်းကံကြီးသူတို့အား စတုမဟာရာဇ် အပါအ၀င် တန်ခိုးကြီးသော နတ်များက ကြည့်ရှုစောင်မခြင်းမျိုးသာ ဖြစ်ပါသည်။
လူတဦးတယောက် အတွက် အမြဲကြည့်ရှု စောင့်ရှောက်နေသော-နတ် မရှိ။ သူတော်ကောင်း နတ်ကောင်းမ ဆိုသကဲ့သို့ အကြောင်းအားလျော်စွာ စောင့်ရှောက်ခြင်းမျိုးဟူ၍သာ မှတ်သားသင့်ပါသည်။

ကိုယ်စောင့်နတ်ဆို၍ လူ၏ကိုယ်၌ အမြဲကပ်မှီ၍ နေသည်ဟု မမှတ်သင့်။ သူ့ကံအားလျော်စွာ ဗိမာန်သီခြား ရှိနေသည်သာ ဖြစ်ပါသည်။ ရုက္ခစိုးနတ် စသည်တို့သည်လည်း သစ်ပင်ထက်၌ နေသည်မဟုတ်။ သစ်ပင်အနီးအပါး၌ ဗိမာန်သီခြားရှိနေကြပါသည်။ သို့သော် ဗိမာန်မှာလည်း သစ်ပင်ကို အမှီပြု၍ ဖြစ်ရသဖြင့် သစ်ပင်ပျက်စီးသွားလျှင် ဗိမာန်လည်း ပျက်စီး၍သွားရသည်ဟု ဆိုပါသည်။ ကိုယ်စောင့်နတ်တို့သည်လည်း မိမိစောင့်ရှောက်အပ်သူ ပျက်စီးသွားလျှင် အခြားဘုန်းကံရှင် စောင့်ရှောက်အပ်သူအား ရွှေ့ပြောင်း၍ စောင့်ရှောက်ရသည်ဟု မှတ်သားသင့်ပါသည်။
*********************************************************************************

( မေး ) ( ဖဲကြိုးတန်း၍ လှူဒါန်းခြင်း )
အရှင်ဘုရား၊ တပည့်တော်တို့မြို့မှ မိသားစုတစုသည် နာမည်ကျော် ဓမ္မကထိကဆရာတော်ကြီး တပါးအား မော်တော်ယာဉ်တစီး လှူဒါန်းရာ သူတကာထက် ထူးခြားစွာ မော်တော်ယာဉ်၏ စီယာတိုင်အား ဖဲကြိုးဖြင့်ချည်၍ ထိုဖဲကြိုး တဖက်စွန်းကိုကိုင်ပြီး ဖဲကြိုးကို ဆရာတော်ကြီး၏ လက်ထဲသို့ထည့်၍ လှူပါသည်။ ထိုကဲ့သို့ လှူဒါန်းခြင်းမျိုးသည် ကျမ်းဂန်၌ ရှိပါသလား ဖြေကြားပေးစေလိုပါသည်ဘုရား။
( လူငယ်တဦး )

( ဖြေ )
ဒါန၀တ္ထုံ ၀ါမဟတ္ထေန ဂဟေတွာ ဒက္ခိဏေန ဟတ္ထေန ဘိင်္ကာရံ ဂဟေတွာ-စသည်ဖြင့် အဋ္ဌကထာတို့၌ ဆိုပါသည်။ မိမိလှူမည့်ဝတ္ထုကို လက်ဝဲလက်ဖြင့်ကိုင်၍ လက်ယာလက်ဖြင့် ရေစက်ခွက်ကိုကိုင်ကာ ရေစက်ချ လှူဒါန်းခြင်းမျိုးကို ဘုရားလောင်း သူတော်ကောင်းတို့ ပြုလေ့ရှိကြပါသည်။ ရှေးရှေးက ကျောင်းစသည် ရေစက်ချရာ၌ ဤသို့ပြုလေ့ရှိကြောင်းကို-ရှေးပညာရှိတို့သည် ဇရပ်၊ တန်ဆောင်း၊ ကျောင်း၊ ကန် စသော မရွှေ့ မ,မနိုင်စကောင်းသော ထာဝရ၀တ္ထုကံရပ်များကိုဖြစ်စေ၊ ဝေးသောအရပ်၌ ကိုယ်နှင့် မနီးမစပ် ထားအပ်သော ၀တ္ထုများကိုဖြစ်စေ လှူဒါန်းလိုလျှင် သာဟတ္ထိကဒါနမြောက်အောင် ကာယပဋိဗဒ္ဓဖြစ်သော အ၀တ်အထည် စသည်ဖြင့် ဆက်ကပ်သွယ်တန်း၍ ရေစက်ချ လှူဒါန်းကြသည်ဟု ပညာရှိတို့ မိန့်ဆိုတော်မူကြကုန်သည်-ဟု (ဂုဠှတ္ထ၀ိနိစ္ဆယ ပ-၂၅) သာသနာပိုင် တောင်ခွင်ဆရာတော် ရေးသားထားသည်ကို ဖတ်ရှုရပါသည်။ ကြီးသောအလှူဝတ္ထုတို့ကို ကာယင်္ဂစောပန ကာယ၀ိညတ်နှင့်တကွ သာဟတ္ထိကဒါနမြောက်အောင် လှူဒါန်းခြင်း ဖြစ်ပါသဖြင့် ကျမ်းဂန်နှင့်ညီညွတ်ပါသည်။
********************************************************************************

( မေး ) ( ရဟန်းခံနှင့် ဒကာ ဒကာမ )
အရှင်ဘုရား၊ ရဟန်းခံသောအခါ သိမ်သမုတ်ထားသည့်ကျောက်တိုင် စည်းဝိုင်းအပြင်နှင့် နှစ်တောင့်ထွာ ဟတ္ထပါသ်အကွာမှာ ဒါယကာ ဒါယိကာမတွေ နေရမည်၊ သိမ်သမုတ်ထားသော ကျောက်တိုင်အတွင်းသို့ မ၀င်ရဟု ရှေးဆရာတော်ကြီးများက မိန့်ကြားထားပါတယ်ဘုရား၊ အဲဒီ ဒါယကာ ဒါယိကာမတွေ နှစ်တောင့်ထွာ သိမ်အတွင်းသို့ ၀င်ပါက ဥပဇ္ဈာယ်နှင့် သံဃာတော်များ အပြစ်ရှိပါသလား၊ ရဟန်းလောင်းလည်း ရဟန်းမဖြစ်ဘဲ နေပါသလား ဖြေကြားပေးတော်မူပါဘုရား။
( မောင်ထွန်းစိုးအောင်-အ-လ-က တောင်ကုတ် )

( ဖြေ )
ရဟန်းခံခြင်းစသည့် သံဃာ့ကံအားလုံးမှာပင် သိမ်အတွင်း ကံပြုနေသော သံဃာများ၏ အစွန်းမှ နှစ်တောင့်ထွာ ဟတ္ထပါသ်အတွင်းသို့သာ ဒါယကာ ဒါယိကာမစသော ၀ဇ္ဇနီယပုဂ္ဂိုလ် ၂၁-ဦးတို့ မ၀င်ရ။ မလာရပါ။ သိမ်၏ကျောက်တိုင်အတွင်း (သိမ်အတွင်း)သို့ကား ကံပြုသော ရဟန်းမှတပါး အခြားရဟန်းများသာ မ၀င်ရ၊ ဒါယကာ ဒါယိကာမတို့ကား ကံပြုသံဃာ၏ ဟတ္ထပါသ်မှ လွတ်သော သိမ်အတွင်းသို့ပင် ၀င်နိုင်ပါသည်။ ယခုခေတ်တွင် ကျယ်ဝန်းသော သိမ်အတွင်း သံဃာ့ဟတ္ထပါသ် အပြင်မှနေ၍ ရဟန်းခံ ကံဆောင်နေသည်ကိုပင် ၀င်ရောက်ကြည်ညိုနိုင်ကြပါသည်။
********************************************************************************

( မေး ) ( ပါရမီရှင် ဟုတ်ပါ့မလား )
အရှင်ဘုရား၊ တပည့်တော် တရားအားထုတ်ဖူးပါသည်။ သို့သော် သမာဓိရသည့်အဆင့်အထိ မရောက်ခဲ့ပါ။ ထို့ကြောင့် နောက်တခါ အားထုတ်ရန်ပင် ကြောက်နေပါသည်။ တပည့်တော် တရားသိနိုင်သည့် ပါရမီရှိသူမှ ဟုတ်ပါမည်လားဟု တွေးမိပါသည်။ ပါရမီ ရှိ-မရှိ ဘယ်လို သိနိုင်ပါသလဲဘုရား။
( ဥမ္မာ-ပုသိမ် )

( ဖြေ )
မိမိတွင် ပါရမီ ရှိ-မရှိ တပ်အပ်သိနိုင်ဖွယ် မရှိသော်လည်း ခန့်မှန်းဆ၀ါး၍ သိနိုင်သော အနုမာနနည်း ရှိပါသည်။ ကမ္ဘာတွင် လူဦးရေ သန်းပေါင်းခြောက်ထောင်မျှ ရှိသည်ဟု ဆိုပါသည်။ ထိုတွင် ဗုဒ္ဓဘာသာ ပဋိပတ္တိသာသနာ ထွန်းကားသော မြန်မာနိုင်ငံတော်မှာ လူဦးရေ လေးဆယ့်ငါးသန်းခန့်သာရှိရာ ဗုဒ္ဓဘာသာမှာ ရာခိုင်နှုန်း ကိုးဆယ်ခန့်မျှဖြစ်ပြီး ထိုတွင်လည်း ပဋိပတ္တိသာသနာကို ကိုယ်တိုင်ချီးမြှောက် ၀င်ရောက်အားထုတ်နိုင်သူ ငါးရာခိုင်နှုန်းမျှပင် ရှိကောင်းရှိမည်။ ထိုမျှနည်းပါးလှသော အထက်ဆုံးတန်း ပဋိပတ္တိစခန်းဝင် အနည်းစုတွင် ပါဝင်နိုင်ခဲ့သူသည် ပါရမီထူးခြားသူပင်ဖြစ်ကြောင်း သိနိုင်ပါသည်။ ထို့ကြောင့် မိမိကိုယ်ကို ငါ-ပါရမီရှိသူဟု ဆုံးဖြတ်ချက်ချကာ အချိန်ရရှိသမျှ ကြိုးစား၍ ၀ိပဿနာတရားကို အားထုတ်ရန် သင့်ကြောင်း အကြံပေးလိုပါသည်။
*********************************************************************************

( မေး ) ( ဖျော်ရည် )
အရှင်ဘုရား၊ ဘုရားသားတော် သံဃာတော်များသည် မိမိတို့၏ ကျန်းမာရေးအတွက် ယခုခေတ်ပေါ် ဖျော်ရည် (ပက်ပစီ၊ ဆဲဗင်းအပ်၊ မာရင်ဒါ၊ စသည်) များကို မွန်းလွဲပိုင်း၌ ဘုဉ်းပေးသုံးဆောင် သင့်-မသင့် ဖြေကြားပေးတော်မူပါဘုရား။
( အရှင်ပညာသီရိ-မိတ္ထီလာ )

( ဖြေ )
ရဟန်းသံဃာတော်များအတွက် ယာမကာလိက (ယနေ့အရုဏ်တက်မှ နောက်နေ့ အရုဏ်တက်အတွင်း အပ်သော) အဖျော်ရည်များကို ခွင့်ပြုချက်ရှိရာ ၄င်းတို့မှာ-
သပြေ-သရက်-နွယ်သပြက်၊ ဖက်သက်-သစ်မည်စည်၊ တော အိမ် ငှက်ပျော၊ ကြာစွယ်နှော၊ မှတ်လော ရှစ်ဖျော်ရည်။
သီးသီး ခံသီး၊ ကြို့ ကြိမ်သီး၊ မန်ကျည်း ရှောက်တလီ၊ အနုလောမ ကျမ်းတွင်ပြ၊ ပါနမျိုးအမည်။ ဟူသော ၀ိနည်းမှတ်စရာ သံပေါက်လင်္ကာလာ အသီးရည်များ ဖြစ်ကြသည်။

၎င်းအသီးရည်များဖြင့် ပြုလုပ်စီမံထားသော အဖျော်ရည်များဖြစ်လျှင် အထူးစိစစ်စရာ မလိုပါ။ သောက်အပ်သည်ဟု ဆိုရပါမည်။ သို့သော် အဖျော်မအပ်သော ထန်း-အုန်း-နှစ်တွဲ၊ ပိန္နဲနှစ်စုံ၊ ဘူး ဖရုံ၊ မှတ်တုံ သုံးသခွါး၊ ၄င်းအဖျော်၊ မသင့်လျော်၊ သုံးသော် အပြစ်ပွား။ ဟူသောလင်္ကာအရ ထန်းသီး-အုန်းသီး-တောပိန္နဲ-အိမ်ပိန္နဲ-ဘူး-ဖရုံ-သခွားငပြုတ်သီး-သခွားငကြောင်သီး-သခွားငဆစ်သီးများဖြင့် ပြုလုပ်ထားသော အဖျော်ရည်များဖြစ်က မအပ်ပါ။ ထို့ကြောင့် အဖျော်ရည်များကို မည်သည့်အသီးမျိုးဖြင့် ပြုလုပ်ထားသည်ကို လေ့လာစူးစမ်း၍ သုံးဆောင်သင့်-မသင့် ဆုံးဖြတ်စေလိုပါသည်။
*********************************************************************************

( မေး ) ( ဆံတော်စေတီနှင့် ၀တ်လဲတော်စေတီ )
အရှင်ဘုရား၊ ဘုရားအလောင်းတော် သိဒ္ဓတ္ထမင်းသား၏ ဆံတော်ဖြင့် တည်ထားသော စေတီနှင့် ၀တ်လဲတော်တို့ကို ဌာပနာ၍ တည်ထားသော စေတီတို့၏ ဉာဏ်တော်အမြင့်နှင့် နေရာတို့ကို သိလိုပါသဖြင့် ဖြေကြားတော်မူပါဘုရား။
( မောင်ဆန်းဦး-သန်လျင်မြို့ )

( ဖြေ )
မဟာဗုဒ္ဓ၀င် ဒုတိယတွဲ ၂၀၃-တွင် ဘုရားအလောင်းတော်သည် မကိုဋ်နှင့်တကွ ဆံထုံးတော်ကို ကိုင်ကာ ငါသည် အကယ်စင်စစ် ဘုရားဖြစ်မည့်သူမှန်အံ့-ဟု အဓိဋ္ဌာန်ပြု၍ ကောင်းကင်သို့ မြှောက်ပစ်လိုက်ရာ ကောင်းကင်၌ ပန်းဆိုင်းကို ဆွဲထားသည့်အလား တည်ရှိလေ၏။ ထိုအခါ သိကြားမင်းသည် ဆံတော်ကို ယူပြီးလျှင် တာဝတိံသာနတ်ပြည်၌ သုံးယူဇနာ ဉာဏ်တော်အမြင့်ရှိသော စူဠာမဏိစေတီကို တည်ထားလေ၏။

ထိုအခါ ဃဋိကာရ ဗြဟ္မာကြီးသည် အလောင်းတော်၏ ၀တ်လဲတော်ကိုယူ၍ (သုဒ္ဓါဝါသ ဗြဟ္မာ့ပြည်၌) တဆယ့်နှစ်ယူဇနာရှိသော စေတီတော်ကို တည်ထား၍ ၀တ်လဲတော်ကို ဌာပနာရာ ဒုဿစေတီဟု ခေါ်ဆိုလေသည်။(ယင်း-၃၀၇)
အထက်ပါကောက်နှုတ်ချက်များကို ကြည့်၍ သိရှိနိုင်ပါသည်။
********************************************************************************

( မေး ) ( ချင်ခြင်း )
အရှင်ဘုရား၊ ရှေးက သားသမီးများ ကိုယ်ဝန်ရှိသည့်အခါ ချင်ခြင်းဖြစ်သည်ဟု ကြားဖူးပါသည်။ ဗုဒ္ဓစာပေများမှာ ရှိပါသလား၊ ထိုချင်ခြင်း ဖြစ်သည့်အတိုင်း ပြုလုပ်မပေးပါလျှင် မည်ကဲ့သို့အပြစ်များရှိ၍ ပြုလုပ်ပေးပါလျှင် မည်ကဲ့သို့အကျိုးရှိပါသနည်း။ ဖြေကြားတော်မူပါဘုရား။
( ဒေါ်တင်မြ-မန္တလေး )

( ဖြေ )
တဿာ ဧ၀ရူပေါ ဒေါဟဠော ဟောတိ-စသည်ဖြင့် ၀ိနည်းမဟာဝါပါဠိတော် (၀ိ-၃-၄၈၇) ဒီဃာဝု၀တ္ထု၌ ဟောတော်မူသဖြင့် ဘုန်းရှိသောသား ကိုယ်ဝန်ရှိလျှင် ချင်ခြင်းဖြစ်ကြောင်း ဘုရားဟောပါဠိတော်များ၌ပင် လာရှိပါသည်။
၎င်းဒီဃာဝုမင်းသားဝတ္ထု၊ ဗန္ဓုလစစ်သူကြီးဝတ္ထု၊ တိဿသာမဏေ၀တ္ထု စသည်များစွာ ရှိပါသည်။ ချင်ခြင်းအတိုင်း ပြုလုပ်မပေးလျှင် မလှပဘဲ မျက်စိစွေစောင်းသော လက်ခြေကောက်ကွေ့၍ ပုကွသော၊ ကိုယ်လက်အင်္ဂါ မပြည့်စုံသောသား စသည် မွေးဖွားတတ်ပါသည်။

ချင်ခြင်းအတိုင်း ပြုလုပ်ပေးက လှပတင့်တယ်၊ ကျက်သရေ အသွယ်သွယ်တို့ဖြင့် ပြည့်ကြွယ်စုံလင်သော ဘုန်းရှင် ကံရှင် သားကောင်း ရတနာများ ရတတ်ကြောင်း လောကီကျမ်းမျးက အကျယ်တ၀င့် ပြဆိုထားကြပါသည်။
( ဓမ္မစကြာ မဟာဋီကာကျမ်းကြီး-၂၈၁ )။


( မြတ်မင်္ဂလာ ၁၉၉၈-ခု နိုဝင်ဘာလ )

No comments: