Thursday, July 30, 2009

လေးစားကြည်ညိုခြင်း ၄-မျိုး

လောက၌ သတ္တ၀ါအများ၏ လေးစားခြင်း ကြည်ညိုခြင်း အားကိုးခြင်းခံရသူကို ဗုဒ္ဓ-ဘုရား-ဟူ၍ အသိအမှတ် ပြုကြ၏။ လေးစားကြည်ညိုရာ၌ ကြည်ညိုခံရခြင်းတွင် အကြောင်းလေးမျိုးကို ခွဲခြား၍ ဟောထား၏။ ယင်းအကြောင်းလေးမျိုးမှာ-

၁။ ရုပ်အဆင်း သပ္ပါယ်ခြင်း
၂။ ဂုဏ်သတင်း ကျော်စောခြင်း
၃။ စားဝတ်နေမှု သုံးဆောင်မှု ခြိုးခြံ ခေါင်းပါးစွာ ကျင့်ခြင်း
၎။ သီလစသော မြင့်မြတ်သော ဂုဏ်အင်္ဂါများ ရှိခြင်း-ဟူ၍ ၄-မျိုးဖြစ်သည်။

ထိုလေးမျိုးတွင် သီလစသောဂုဏ်ကို မကြည့်တတ်ဘဲ ရုပ်အဆင်းလှပတင့်တယ်ခြင်းကို ကြည့်၍ ကြည်ညိုသူသည် လူ ၁၀၀-လျှင် ၆၆-ယောက်လောက်ရှိသည်ဟု ကျမ်းဂန်များက ဖော်ပြ၏။

တရားရှိ-မရှိကို မစဉ်းစား၊ နာမည်ထင်ရှား ကျော်ကြားမှုသတင်းကို အကြောင်းပြု၍ ဆည်းကပ်ကြည်ညိုသူသည် ၁၀၀-လျှင် ၈၀-လောက် ရှိသည်ဟု သိရ၏။

တရားရှိ-မရှိကို မဝေဖန်၊ မစဉ်းစား၊ ပဓာနမထားဘဲ ခေါင်းပါးစွာ ခြိုးခြံ နေထိုင်မှု၊ စားသောက်မှုကို အကြောင်းပြု အလေးအမြတ်ပြုပြီး အထင်ကြီး၍ ကြည်ညိုသူသည် လူ ၁၀၀-လျှင် ၉၀-လောက်ရှိသည်။

သီလ သမာဓိ ဓူတင် စသော ဂုဏ်အစစ်မှန် တကယ်အရှိကို တွေ့ရှိ၊ ကြားသိ၊ မျက်မြင်သိရ၍ ကြည်ညိုတတ်သူကား လူပေါင်းတသိန်းတွင် တယောက်သာရှိသည်ဟု ခွဲခြားပြထားခြင်းရှိပါသည်။

ဤခွဲခြားချက်သည် သာမညပုဂ္ဂိုလ်များအတွက် မှန်ကန်၏။ သို့သော် မြတ်စွာဘုရားသည် ထိုလေးမျိုးလေးစားသော ပုဂ္ဂိုလ်တို့၏ စိတ်နှလုံးကို ယူကျုံးဆွဲငင်နိုင်လောက်သော ဂုဏ်အင်္ဂါကျက်သရေ၊ ကြည်ညိုဖွယ်များ၊ စုပေါင်းပိုင်ရှင်ဖြစ်တော်မူသောကြောင့် လူသုံးပါးတို့၏ ပူဇော်အထူးကို ခံတော်မူထိုက်သော သဗ္ဗညုတဉာဏ်တော်ရှင် ဖြစ်တော်မူကြောင်းကို မည်သူတစုံတယောက်မျှ မငြင်းဆိုနိုင်ပါ။

ယခုအခါ လူများသည် ပရိယတ္တိဗဟုသုတ၊ ပဋိပတ္တိ အလေ့အကျင့်များကို ထူးထူးခြားခြား လိုက်စားကျင့်ဆောင်နေကြသည်။ အလွန်စွမ်းဆောင်နိုင်သော ဓမ္မကထိက ပုဂ္ဂိုလ်ကျော်များ၊ ရှင်းလင်းပြတ်သားအောင် နည်းလမ်းညွှန်ပြနိုင်သော သံဃာတော်များ၊ လူပုဂ္ဂိုလ်များ ရှိနေကြသည်။ မြန်မာပြည်အရပ်ရပ်တွင် ကမ္မဋ္ဌာန်းရိပ်သာ ယခု ၅၀၀-ကျော်ရှိသည်။ တရားနာပုဂ္ဂိုလ်များနှင့် တရားကျင့် ယောဂီများကို အထက်ပါကျမ်းဂန် ညွှန်ပြချက်အတိုင်း ခွဲခြားပါက လူတသိန်းတွင် တယောက်သာ ရုပ်အဆင်းကို ပဓာနမထား၊ အသံကောင်း၊ မကောင်းကို မခွဲခြား၊ ခေါင်းပါးစွာ ကျင့်-မကျင့်ကို မဝေဖန်ဘဲ တရားတော်၏ အနှစ်သာရကိုသာ အာရုံစိုက်တတ်ကြသည်မှာ မှတ်ချက်ချရန် ရှိပါသည်။ ထိုသို့မူကား မဖြစ်စေဘဲ (ရာထောင်တပုံ ဓမ္မာရုံ) ဟူသော အဆိုကို အလေးပြုကာ တရားအနှစ်ကိုသာ အဓိကထား အလေးပြုသော ယောဂီများ ဖြစ်ကြပါစေ-ဟု နှိုးဆော်လိုက်ရပါသည်။

No comments: