Friday, July 10, 2009

ဘာသာရေး ပြဿနာ ( ၇၄ )

( ဘဒ္ဒန္တတိလောကသာရ ဖြေသည် )

( မေး ) ( ပါဠိစာနှင့် မြန်မာအက္ခရာ )
အရှင်ဘုရား၊ မြန်မာနိုင်ငံတွင် ရှိနေသည့် ပါဠိအက္ခရာများနှင့် မြန်မာစာလုံး အက္ခရာများ ဘာကြောင့် လုံးဝတူနေပါသနည်း။
မြန်စွာဘုရားလက်ထက်က ပါဠိအက္ခရာပုံစံနှင့် အခြားနိုင်ငံများတွင် ရေးသုံးကြသည့် ပါဠိအက္ခရာပုံစံတို့သည် အဘယ်ကဲ့သို့ ရှိပါသနည်း။
မြန်မာစာသည် ပါဠိမှဆင်းသက် တီထွင်လာရပါသလား။ ယင်းသို့ဆိုလျှင် မည်သည့်ပညာရှင်တို့ တီထွင်ခဲ့ကြပါသနည်း။
မြန်မာစာက သီးခြားရှိခဲ့သည် (ပေါ်ပေါက်ခဲ့သည်) ဆိုလျှင် ယခုလက်ရှိ ပါဠိအက္ခရာစာလုံးတို့သည် မြန်မာမှုပြုထားရာရောက်ပါသည်။ ဤသို့ကော ဖြစ်နိုင်ပါသလား ဘုရား။
မြန်မာနိုင်ငံထက် စော၍ ဗုဒ္ဓဘာသာဖြစ်သော သီရိလင်္ကာနိုင်ငံမှာကော ပါဠိဘာသာနှင့် သီရိလင်္ကာစာပေ ပုံစံခြားနားမှု ရှိပါသလားဘုရား။
( ဦးခင်မောင်ဘို-ရေဦးမြို့ )

( ဖြေ )
ပါဠိဘာသာသည် အလွန်ရှေးကျသည့် ကမ္ဘာဦးဘာသာ၊ မူလဘာသာဖြစ်၍ အက္ခရာမရှိ၊ ဘာသာစကားသာ ရှိသည်။ မည်သည့်လူမျိုး မည်သည့်ဘာသာအက္ခရာနှင့်ဖြစ်စေ အကျုံးဝင်သည်။ ထို့ကြောင့် ပါဠိကို ဟိန္ဒူ ဗြာဟ္မဏ အက္ခရာ၊ ရောမ၊ အင်္ဂလိပ်အက္ခရာ၊ ဂျာမန်အက္ခရာ၊ ပြင်သစ်အက္ခရာ၊ မည်သည့်အက္ခရာနှင့် ရေးရေး ရပါသည်။

မြန်မာနိုင်ငံတွင် ပါဠိကို မြန်မာအက္ခရာဖြင့် ရေးသည်။ ထို့ကြောင့် ပါဠိအက္ခရာ၊ ပါဠိစာဟူ၍ သီးခြားမရှိပေ။ ဤသို့ ပါဠိသည် စာအက္ခရာသီးခြား မရှိသဖြင့် ဂုဏ်မငယ်၊ ဘာသာတိုင်း လူမျိုးတိုင်း၏ အက္ခရာဖြင့် အသံပီသအောင် ရေးသားနိုင်ခြင်းသည်ပင် ပါဠိ၏ ဂုဏ်ရည်ပင်ဖြစ်သည်။

မြန်မာနိုင်ငံသို့ ပါဠိဘာသာရောက်လာစက အိန္ဒိယနိုင်ငံ တောင်ပိုင်းသုံး ကဒမ္ဗအက္ခရာဖြင့် ရေးသားခဲ့သည်ကို သရေခေတ္တရာ မောင်းကန်ရွှေပေချပ် စသည်များဖြင့် သိရပေသည်။ ပုဂံခေတ်တွင် မွန်မြန်မာ အက္ခရာဖြင့် စတင် ရေးသားခဲ့ရာ ယခုတိုင်ပင် ဖြစ်ပေသည်။
********************************************************************************

( မေး ) ( ဘုရားပုံတော်များ )
အရှင်ဘုရား၊ အိမ်ရှိဘုရားပုံတော်များ၊ ဘုန်းတော်ကြီးပုံတော်များ၊ ရုပ်ပွားတော်များ ဟောင်းနွမ်း၍ ဆေးများပျက်လာသဖြင့် စွန့်ပစ်လိုသော် မည်ကဲ့သို့ စွန့်ပစ်ရပါမည်နည်းဘုရား။
( မဆု-လမ်း ၅၀၊ ပုဇွန်တောင် )

( ဖြေ )
အိမ်ရှိဘုရားပုံတော်များ၊ ဘုန်းတော်ကြီးပုံတော်များကို မှန်ပေါင်သွင်း၍ ချိတ်ဆွဲကိုးကွယ်ထားရာ ဟောင်းနွမ်း ဆေးပျက် ပိုးကိုက်ရှိပါလျှင် စွန့်ပစ်ခြင်းမပြုဘဲ မှန်ပေါင်ကိုသုတ်သင်၍ မူလပုံဟောင်းပေါ်မှ ပုံသစ်တပုံ ထပ်မံထည့်သွင်း ပူဇော်သင့်ပါသည်။
ရုပ်ပွားတော်များ ဆိုပါလျှင် ကြေးချွတ်၍ ဆေးသစ်တင်ခြင်း၊ ရွှေချခြင်းစသည်တို့ဖြင့် ရောင်တော်ဖွင့် ကုသိုလ်ယူ၍ ပူဇော်ရန် သင့်ပါကြောင်း ဖြေကြားအပ်ပါသည်။
*********************************************************************************

( မေး ) ( လိမ္မာကြသော်လည်း )

အရှင်ဘုရား၊ တပည့်တော်တွင် အပူသောက ကြုံတွေ့နေရပါသည်၊ သားအကြီးဆုံးနှင့် အငယ်ဆုံးမှာ ၁-နှစ်နှင့် ၁-လ၊ ၁၅-ရက်ကွာ၍ ရေနစ်သေဆုံးကြရပါသည်။ အကြီးရော အငယ်ပါ ဘုရား။ နှစ်ယောက်လုံး ရတနာသုံးပါးနှင့် မိဘ ဆရာသမား ဂုဏ်ကျေးဇူးကို သိတတ်၍ လိမ္မာကြပါလျက် အဘယ်ကြောင့် ဤသို့ ဖြစ်ရသည်ကို အရှင်ဘုရား ဖြေကြားပေးစေလိုပါသည်ဘုရား။
( ဒေါ်မြကျင်-မအူပင်မြို့ )

( ဖြေ )
ဤဘ၀တွင် အသက်ရှည်ခြင်း၊ အသက်တိုခြင်း၊ ဘေးအမျိုးမျိုးနှင့် တွေ့ရခြင်း စသည်တို့မှာ အများအားဖြင့် ရှေးဘ၀က မကောင်းမှု အကျိုးပေး၊ ၀ဋ်ကြွေးများကြောင့် ဖြစ်ရတတ်ပါသည်။ ထိုမကောင်းမှု အကျိုးပေး ၀ဋ်ကြွေးများကို ဘုရားသော်မှ မကယ်နိုင်ပါ။
မြတ်စွာဘုရားသက်တော်ထင်ရှားရှိစဉ်က ဆတ္တလုလင်သည် မိမိဆရာ ပါမောက္ခကြီးအား ကန်တော့ရန် ငွေတထောင်ယူ၍ တောလမ်းခရီးဖြင့် သွားသည်။ ၄င်းအား ခိုးသူတို့သတ်၍ ငွေကိုလုယူမည့်အကြောင်းကို မြတ်စွာဘုရား သိတော်မူသဖြင့် လုလင်သွားရာလမ်းမှ စောင့်သည်။ တရားဟောပြီး ငါးပါးသီလ၌ တည်စေတော်မူပါသည်။

ဤလမ်းကို မသွားနဲ့ သွားလျှင် ခိုးသူတို့ သတ်လိမ့်မည်-ဟု သိလျက်နှင့် မြတ်စွာဘုရား မိန့်တော်မမူ။ မိန့်တော်မူ၍ လမ်းလွှဲသွားလင့်ကစား သူ့ဝဋ်ကြွေးကြောင့် တနည်းနည်းဖြင့် ခံရမည်သာဖြစ်ကြောင်း သိတော်မူ၍ ဘ၀ကူးကောင်းရန်သာ သီလပေးတော်မူပြီး ကြွသွားတော်မူပါသည်။

ဆတ္တလုလင်လည်း မြတ်စွာဘုရားနှင့် လမ်းခွဲ၍ သွားပြီးနောက် ခိုးသူများနှင့် တွေ့၍ အသတ်ခံရပါသည်။ ထို့ကြောင့် ရတနာသုံးပါး မိဘ ဆရာသမားတို့၏ ဂုဏ်ကျေးဇူးကို သိတတ်၍ လိမ္မာသူများ ဖြစ်ကြသော်လည်း သူတို့၏ ဘ၀ကံကြမ္မာ၊ ၀ဋ်ကြွေးတို့ကိုကား မရှောင်လွှဲနိုင်ကြပါ။ ထို့ကြောင့် ဤကိစ္စမျိုးကို မြတ်စွာဘုရားသော်မှ မတားမြစ်နိုင်ကြောင်း သတိပြု၍ အပူသောကကို ဖြေဖျောက်စေလိုပါသည်။
*********************************************************************************

( မေး ) ( ဗောဇ္ဈင်သုတ် ရွတ်ခြင်း )
အရှင်ဘုရား၊ သတ္တိမေ (ကဿပ) ဗောဇ္ဈင်္ဂါ မယာ ---
ကတမေ သတ္တ၊ သတိသမ္ဗောဇ္ဈင်္ဂေါ ခေါ (ကဿပ) ---
အစရှိသော ဗောဇ္ဈင်၇-ပါး တရားသုတ်တော်ကို ရွတ်ဆိုရာ၌ လူနာ အတွက် ရွတ်ဆိုသော် လူနာ၏ အမည်ကို မည်သည့်နေရာ၌ မည်သို့ ထည့်ရမည်ကို ရှင်းလင်းဖြေကြားပေးပါရန်နှင့်
သမ္မာသမ္ဗုဒ္ဓ ဗောဇ္ဈင်သုတ်သည် မြတ်စွာဘုရား ဟောကြားသောသုတ် ဖြစ်ပါသလား၊ ရွတ်ဖတ်ခြင်းအားဖြင့် မည်သည့်အကျိုး ခံစားရပါသနည်း၊ မေတ္တာရှေ့ထား၍ ဖြေကြားပေးတော်မူပါဘုရား။
( နွယ်ခေမာလှိုင်-မော်လမြိုင်မြို့ )

( ဖြေ )
ကဿပ ဗောဇ္ဈင်သုတ်တွင် လူနာအတွက် ရွတ်ဆိုလိုက လူနာအမည်ကို လက်သည်းကွင်းအတွင်း ကဿပ နေရာတွင် ထည့်၍ ရွတ်ဆိုနိုင်ပါသည်။ သို့သော် ပါဠိတော်ကြားတွင် မြန်မာလို လူနာမည်ကို ထည့်ရွတ်က အဆင်မပြေပါ။ ထို့ကြောင့် ယောက်ျား လူနာဖြစ်က ဥပါသက၊ မိန်းမလူနာဖြစ်က ဥပါသိက ဟူ၍ ရွတ်သင့်ပါသည်။

ဥပါသက-ရတနာသုံးပါးကို အားထားယုံကြည်သူ အိုဖခင်၊ အိုမိခင် စသည် အဓိပ္ပါယ်ပါရှိပါသည်။
ပါဠိတော် (မဟာဝဂ္ဂသံယုတ်) တွင် ကဿပဗောဇ္ဈင်သုတ်၊ မောဂ္ဂလ္လာနဗောဇ္ဈင်သုတ် နှင့် စုန္ဒဗောဇ္ဈင်သုတ်ဟူ၍ ဂိလာန၀ဂ်၌ ၃-သုတ်သာပြပါသည်။ သမ္မာသမ္ဗုဒ္ဓဗောဇ္ဈင်သုတ်ဟူ၍ မရှိပါ။ ဆက်၍ ပါရင်္ဂမနသုတ်ဟူ၍ကား ရှိပါသည်။

ဗောဇ္ဈင် ၇-ပါးတရားတော်တို့ဖြင့် နိဗ္ဗာန်ရောက်ကြောင်းကို ဟောသောသုတ်ဖြစ်၍ လူနာအတွက် ရွတ်ဆိုရန် မဟုတ်ပါ။ အချို့ ၀တ်ရွတ်စဉ်များက အဆန်းထွင်၍ သမ္မာသမ္ဗုဒ္ဓဗောဇ္ဈင်သုတ်ဟု အမည်တပ်၍ ဖော်ပြထားသော်လည်း လူနာအတွက် ရွတ်ဆိုရန် မလိုအပ်ပါ။

ဖော်ပြပါ ကဿပဗောဇ္ဈင်၊ မောဂ္ဂလ္လာနဗောဇ္ဈင်နှင့် စုန္ဒဗောဇ္ဈင် ၃-သုတ်ကိုသာ ရွတ်ဆိုသင့်ပါသည်။
( ပရိတ်ကြီးပါဠိတော်လာ ဗောဇ္ဈင်သုတ်၌ သံဝတ္တန္တိ အဘိညာယ-ဂါထာအဆုံးတွင် မောဂ္ဂလ္လာနသုတ်နှင့် ကဿပ ဗောဇ္ဈင်သုတ်ကို ထည့်၍ တေ စ တံ အဘိနန္ဒိတွာ-ဂါထာအဆုံးတွင် စုန္ဒဗောဇ္ဈင်သုတ်ကိုထည့်၍ ရွတ်ဆိုပါက လူနာအတွက် ပိုမို၍ အကျိုးထိရောက်ကြောင်း တိပိဋကဓရ ဆရာတော်ဘုရားကြီး ညွှန်ကြားပါသည်။ ဤအတိုင်း ရွတ်ဆို၍ အမှန်ပင် အကျိုးထူးကြောင်း ကိုယ်တွေ့သိရပါသည်။)
ထိုအတိုင်း ရွတ်ဆိုရန် အကြံပေးလိုပါသည်။
********************************************************************************

( မေး ) ( အကပ္ပိယမံသ နှင့် န၀ကမ္မ )
အရှင်ဘုရား၊
၁။ ဆွမ်းဒါယကာတဦးက ရဟန်းတို့အား မအပ်စပ် မစားကောင်းသော ခွေးသား ကျားသား စသည်တို့ကို ရဟန်းတို့စားဖြစ်အောင် စေတနာနှင့် လိမ်လည်လျှောက်ထား၍ ဆက်ကပ်လျှင် (ရဟန်းတို့က ဘုဉ်းပေးလျှင်) ဆွမ်းဒကာမှာ အကုသိုလ်ဖြစ်ပါသလား၊ ကုသိုလ်ရပါသလား။
၂။ ရဟန်းသံဃာတို့အား န၀ကမ္မလှူပါသည်ဟု လျှောက်ထား၍ ၀တ္ထုငွေ ကပ်လှူပါက ၄င်းငွေကို ဆွမ်း သင်္ကန်း ကျောင်း ဆေး အတွက်သာ သုံးကောင်းပါသလား၊ အခြား ဆောင်ရွက်ရန်များကို သုံးကောင်းပါသလား၊ ထို့ပြင် န၀ကမ္မ ဟူသော ဝေါဟာရကို တပည့်တော်များ အမှုသစ်ဟူ၍သာ နားလည်ကြပါသည်၊ အသေးစိတ် အကျယ်အဓိပ္ပါယ် ရှိပါသေးသလားဘုရား။
( ဦးအောင်သန်း-ဇော်ရေခဲစက်၊ အောင်လံမြို့ )

( ဖြေ )
ရဟန်းတို့နှင့်မအပ်သော မစားကောင်းသော စားလျှင်အာပတ်သင့်သော အကပ္ပိယမံသတို့ကို စားအောင် လိမ်လည်လှည့်ဖြား၍ လှူဒါန်းလျှင် စေတနာရင်းကပင် လှည့်ဖြားလှူဒါန်းသဖြင့် ကုသိုလ်မဖြစ်၊ အကုသိုလ် ဖြစ်ရန် သေချာနေပါသည်။
ဤအကပ္ပိယမံသတို့မှာ ပညတ်စဉ်က တောနေရဟန်းတို့အား ခြင်္သေ့၊ သစ်ကျား စသော သတ္တ၀ါတို့၏ အသားကို စားမိလျှင် ခြင်္သေ့ သစ်ကျားတို့က အန္တရာယ်ပြုတတ်သဖြင့် မစားရန် ပညတ်သည်။

သိသည်ဖြစ်စေ မသိသည်ဖြစ်စေ စားမိလျှင် အန္တရာယ်ရှိဖွယ်ဖြစ်သည်။ ထို့ကြောင့် ရှောင်ကြဉ်ရသည်။ သို့ဖြစ်လျက် စားရန်လိမ်လည်လှူဒါန်းသူအဖို့ အန္တရာယ်ဖြစ်ရန် ကြံဖန်ပြုလုပ်သည်နှင့် မခြားပါ။

န၀ကမ္မဟူသည်မှာ ရဟန်းတို့ ပြုလုပ်လတံ့သော အမှုသစ် ဆောင်ရွက်လုပ်ကိုင်မည့်ကိစ္စ မှန်သမျှကို ရသည်။ ထို့ကြောင့် န၀ကမ္မ-ပါဘုရားဟု ဆို၍ လှူဒါန်းလျှင် အပ်စပ်သော မည်သည့်အရာဝတ္ထုမျိုးကိုမဆို လဲလှယ်ဖလှယ်၍ ၀ယ်ယူကောင်းပါသည်။
တနည်းအားဖြင့် ရဟန်းတို့၏ အသုံးအဆောင် မှန်သမျှသည် ပစ္စည်းလေးပါးအတွင်း၌သာ ပါဝင်သဖြင့် ပစ္စည်းလေးပါးအမှုသစ်ဟု ဆိုလျှင်လည်း ပြည့်စုံနိုင်ပါသည်။
********************************************************************************

( မေး ) ( မုသာဝါဒ နှင့် သမ္ဖပ္ပလာပ )
အရှင်ဘုရား၊
၁။ မုသာဝါဒနှင့်ပတ်သက်၍ သူတပါးအကျိုး မပျက်စီးလျှင် ကံမမြောက်ဟု သိရပါသည်။
ဥပမာ-မိတ်ဆွေတဦးက တပည့်တော်၏ အသက်ကိုမေးရာတွင် ရှိရင်းအသက်ထက် တနှစ်လျှော့ပြောခြင်း စသောကိစ္စများ၌ မုသာဝါဒ မြောက်-မမြောက် သိလိုပါသည်။
၂။ သမ္ဖပ္ပလာဝါစာကို တိတိကျကျ သိချင်ပါသည်။ မိတ်ဆွေအပေါင်းအသင်းများနှင့် အလ္လာပသလ္လာပ စကားပြောခြင်း၊ မိမိအတွေ့အကြုံကို ရှေးဟောင်းနှောင်းဖြစ် ပြောခြင်းတို့သည်သမ္ဖပ္ပလာပ ၀ါစာ မြောက်-မမြောက် သိလိုပါသည်၊ ဖြေကြားပေးတော်မူပါဘုရား။
( မောင်ဝေဟန်-ခေတ္တ စင်ကာပူ )

( ဖြေ )
၁။ မုသာဝါဒနှင့်စပ်၍ သူတပါးအကျိုး မပျက်စီးလျှင် ကံမမြောက်သည် မဟုတ်။ ပြောဆိုရာ၌-
(၁) မဟုတ်မမှန်သော ၀တ္ထုလည်းဖြစ်စေ
(၂) ချွတ်ယွင်းစေလိုသောစိတ် ရှိသည်လည်းဖြစ်စေ
(၃( ထိုစိတ်ထားဖြင့် ပြောဆိုသည်လည်းဖြစ်စေ
(၄) နားထောင်သူက နားလည်သည်လည်းဖြစ်စေ
ဤအင်္ဂါလေးပါး စုံညီလျှင် ကံမြောက်သည်။

အကျိုးမပျက်စီးက အပြစ်ပေါ့၍, အကျိုးပျက်စီးက အပြစ်ကြီးသည်။
မုသာဝါဒကို ရှောင်ကြဉ်နိုင်မှ အခြား ၄-ပါးကို လုံခြုံနိုင်သည်။
ဗုဒ္ဓမြတ်စွာ အလောင်းတော်သည် အခြား ၄-ပါးသော ကံထက် မုသာဝါဒကို လုံခြုံစေခဲ့သည်။ ထို့ကြောင့် ငါးပါးသီလတွင် မုသာဝါဒသည် အရေးအကြီးဆုံးဖြစ်သည်။
ကုသိုလ်တရားတို့တွင် သစ္စာ-မှန်ကန်ခြင်းသည် အကျိုးအကြီးဆုံး ဖြစ်သကဲ့သို့ အကုသိုလ်တရားတို့တွင် မုသာဝါဒသည် အပြစ်အကြီးဆုံး ဖြစ်ကြောင်း ဘုရားဟောတော်မူသည်။

၂။ သမ္ဖပ္ပလာပ၀ါစာ ဟူသည် မိတ်ဆွေတို့နှင့် ရိုးရိုး အလ္လာပသလ္လာပ ပြောဆိုခြင်း အတွေ့အကြုံကို အမှန်အတိုင်း ပြောဆိုခြင်းမျိုး မဟုတ်။
အနှစ်အသားမဖက် အနက်အဓိပ္ပါယ် ကင်း၊ ပြိန်ဖျင်း၊ မမှန်ကန်၊ ဒဏ္ဍာရီဝတ္ထုမျိုးဖြစ်သည်။
ဥပမာ-ရွှေယုန် နှင့် ရွှေကျား သက်ငယ်ရိတ်သွား၊ ဒွန်းစဏ္ဍားနှင့် မင်းသမီး ညားပုံ စသည့် အချိန်ကုန် အကျိုးမရှိ၊ ပျင်းရိ အိပ်ချင်ပြေရုံလောက်ပင် အကျိုးထင်သည့် ပုံပြင်စကားမျိုး ပြောဆိုခြင်းကို ဆိုလိုပါသည်။
စကားကို တန်ဆာဆင်၍ ဥပမာတင် ပြောဆိုမှုမျိုးကား သမ္ဖပ္ပလာပ မဟုတ်ပေ။
*********************************************************************************

( မေး ) ( ဥပုသ်သီလ တည်ကာလ )
အရှင်ဘုရား၊
အဋ္ဌ န၀ သီလမှာ၊ နုရောင်စုံ အရုဏ်ကျင်းက ကင်းလွတ်သည်မှာ။
အဓိဋ္ဌာန်ရှိလျှင်လ၊ ရတ္တိအတိက္ကန္တာတဲ့၊
ဝိရောဓိဆုံးနှစ်ဖြာ၊ လုံးကာလို့ထွေး။
မှန်းဆယောင်၊ အန္ဓမောင် ဉာဏ်ထုံ၍၊ ဆယ်ဖြာစုံ ကြာငုံတိုက်၊ ဦးခိုက်၍မေး။
( သောင်းထွန်း-မြန်မာစာ-တောင်ဥက္ကလာ )

( ဖြေ )
ဋ္ဌ န၀ါ သီလ၊ ထုံးစံပ တနေ့တာ။
ထိုနေ့ကုန် အရုဏ်ကျင်း၊ ကင်းရမှန်စွာ။
ဓိဋ္ဌာန်ပြုလျှင်လ၊ စိတ်ကြံသူ့ အလိုသာ၊ ထိုကာလ တည်ဘိ။
ကာလပရိယန်၊ ပိုင်းခြားကာ တည်စေဟန်နှင့်၊ ဋ္ဌကထာ ဉာဏ်ပညာရှင်တို့၊ ထင်စွာပင် ပြဆိုဖွင့်လေတဲ့၊ သီလတော် တည်ပုံအဆင့်ကို၊ မှတ်သင့်ပါ၏။ ( ၀ိသုဒ္ဓိမဂ် ဋ္ဌ-၁၊ ၁၂ )
********************************************************************************

( မေး ) ( ဓုတင် )
အရှင်ဘုရား၊ တပည့်တော်သိလိုသည်မှာ ရှင်သာမဏေများ ဒုကုဋ်သင်္ကန်းကို အသုံးပြုက အပြစ် ရှိ-မရှိ။ ရှိပါက ရှင်သာမဏေများ တိစီဝရိတ်ဓုတင် ဆောက်တည်လျှင် မည်သို့ပြုလုပ်ရမည်နည်း။
တိစီဝရိတ်ဓုတင် ဆောက်တည်သော ရဟန်းသည် ရေချိုးပြီးသောအခါ မည်သို့ သင်းပိုင်းလဲရမည် စသည် ဖြေကြားပေးတော်မူပါဘုရား။
( ရှင်စန္ဒိမာ-ချောက်မြို့ )

( ဖြေ ) သာမဏေများ ဒုကုဋ်သင်္ကန်းကို မသုံးဆောင်ရပါ။
ထို့ကြောင့် ဓုတင် ၁၃-ပါးကို ရဟန်းတော်များသာ အပြည့်အစုံ ဆောက်တည်နိုင်ပါသည်။
သာမဏေတို့မှာ တိစီဝရိတ်ဓုတင်မှတပါး ဓုတင် ၁၂-ပါးသာ ဆောက်တည်နိုင်၏။
အကျယ်ကို ၀ိသုဒ္ဓိမဂ်တွင်ကြည့်ပါ။

ရဟန်းတော်များ ရေချိုးရာ၌ ရေချိုးအိမ် (ရေချိုးခန်း)၊ မြစ်ချောင်းရေ စသော ရေတို့ဖြင့် ညဥ့်အမှောင် ဖုံးလွှမ်းရာ၌ ရေသနုပ်မရှိဘဲ ရေချိုးနိုင်ကြောင်း၊
တိစီဝရိတ်ဓုတင်ဆောင် ပုဂ္ဂိုလ်သည် ဧကသီကို လျှော်ဖွပ်ရာ၌ ဒုကုဋ်ကို ၀တ်ရုံနိုင်ကြောင်း၊
သင်းပိုင်ကို လျှော်ဖွပ်ရာ၌ ဧကသီကို ခေါက်၍ ၀တ်ထားနိုင်ကြောင်း ထိုထိုကျမ်းဂန်တို့၌ လာရှိပါသည်။

( မြတ်မင်္ဂလာ ၁၉၉၉-ခု ဖေဖေါ်ဝါရီလ )

No comments: