Thursday, August 6, 2009

ဘာသာရေး ပြဿနာ ( ၇၆ )

( ဘဒ္ဒန္တ တိလောကသာရ ဖြေသည် )

( မေး ) ပိသုဏ၀ါစာ မဂ်ပယ်ရာ
အရှင်ဘုရား၊ ဒုစရိုက် ၁၀-ပါးကို မဂ်တရားတို့ ပယ်ရှားရာ၌ နည်းတနည်းတွင် ပိသုဏ၀ါစာကို သောတာပတ္တိမဂ်က ပယ်သည်ဆို၍၊ နည်းတနည်းတွင် ပိသုဏ၀ါစာကို အနာဂါမိမဂ်က ပယ်သည်ဟို ဆိုပါသည်။ မည်သည်က မှန်ပါသနည်း ဖြေရှင်းပေးတော်မူပါဘုရား။
( အရှင်ဝိသုတာလင်္ကာရ-မန္တလေးမျြို့ )

( ဖြေ )
အင်္ဂုတ္တိုရ် အဋ္ဌကထာ၌
ကာယဒုစရိုက် ၃-ပါး၊ မုသာဝါဒ, ပိသုဏ၀ါစာ, ၀စီဒုစရိုက် ၂-ပါး၊ မိစ္ဆာဒိဋ္ဌိ မနောဒုစရိုက် ၁-ပါး၊ ပေါင်း ၆-ပါးကို သောတာပတ္တိမဂ်သည် ပယ်၏။
ဖရုသ၀ါစာ, ဗျာပါဒ ဤ ၂-ပါးကို အနာဂါမိမဂ်သည် ပယ်၏။
သမ္ဖပ္ပလာပ, အဘိဇ္ဈာ ဤ ၂-ပါးကို အရဟတ္တမဂ်သည် ပယ်၏။

ဝိသုဒ္ဓိမဂ် အဋ္ဌကထာတွင်
ပိသုဏ၀ါစာကို အနာဂါမိမဂ်ဖြင့် ပယ်သည်ဟု ဆိုသည်။
အဋ္ဌကထာ နှစ်ကျမ်းလုံးပင် အရှင်မဟာဗုဒ္ဓဃောသ ဖွင့်ဆိုသည် ဖြစ်ပါလျက် ကွဲလွဲနေခြင်းမှာ မသင့်ပါ-ဟု ဆိုငြားအံ့၊ အပါယဂါမိ ( အပါယ်လားကြောင်း ) ဖြစ်သော ပိသုဏ၀ါစာကို သောတာပတ္တိမဂ် ပယ်၍, အပါယဂါမိ မဟုတ်သော ပိသုဏ၀ါစာကို အနာဂါမိမဂ် ပယ်သည်ဟု ယူသင့်ကြောင်း ဆရာအရှင်မြတ်တို့ ဆုံးဖြတ်တော်မူကြပါသည်။
********************************************************************************

( မေး ) သင်္ကန်း ပံ့သကူ-ဆွမ်း ပံ့သကူ
ပံ့သကူ စီဝရ၊ ကောက်၍ပ ၀တ်နိုင်၊ ထို့အတူ ဆွမ်းကျောင်းဆေး၊ ကောက်ရေး ပစ်ကာထား၊ သွားကောက်ယူနိုင်။
ပစ္စယလေးခိုင်၊ ဆိုင်-မဆိုင် ဘယ်သို့၊ ပံ့သကူဝါဒများကို၊ နားလည်အောင် စာပေသွင်း၊ ရှင်းပြပါလို့။
( မန်းဘိက္ခု-သောတုဇနတပါး )

( ဖြေ ) ပံ့သကူ စီဝရ၊ ကောက်၍ပ သာယူ။
သေနာသနာကျောင်း၌၊ ညောင်စောင်းအင်းပျဉ်နှင့်၊ စောင် ခြင်ထောင် ဘုံလျှို အုံး၊ သုံးပံ့သကူ။
ဆွမ်းနှင့်ဆေးမှာတော့၊ ကပ်ပေးမှ ခံယူ၊ ပံ့သကူ မရှိ။
ဝိနည်းကျမ်း၊ လက်သန်းဝဏ္ဏနာတို့၊ ဖွင့်ဆိုကာ မှတ်ဖွယ်ပြတယ်၊ ရှင်းကြစေဘိ။( ၀ိနယာလင်္ကာရ-ဋီ ၂-၃၄၅ )
********************************************************************************

( မေး ) မုသားစကား
အရှင်ဘုရား တပည့်တော်မသည် မုသာဝါဒကံဆိုသည်မှာ တခုခုသော အရေးမပါသည့် စကားကို လိမ်ပြောမိသည်နှင့် မုသာဝါဒကံ မြောက်သည်ဟု ယူဆမိပါသည်ဘုရား၊
အသိတယောက်က ထိုစကားကို မုသာဝါဒကံ မမြောက်ဟု ပြောပါသည်ဘုရား၊ ထို့ကြောင့် ဘုရားတပည့်တော်မအား မုသာဝါဒကံမြောက်သည့်အကြောင်း ရှင်းပြပေးပါဘုရား၊ ဘယ်စကားမျိုးသည် မုသာဝါဒကံ ထိုက်ပါသနည်း ဘုရား။
( မခိုင်-ခေတ္တ ရန်ကင်း )

( ဖြေ )
မုသာဝါဒကံ ဆိုင်ရာ၌
၁။ မဟုတ်မမှန်သော ၀တ္ထုလည်းဖြစ်စေ
၂။ ချွတ်ယွင်းစေလိုသော စိတ် ရှိသည်လည်းဖြစ်စေ
၃။ ချွတ်ယွင်းခြင်းအားလျော်သောအကြောင်းကို ကိုယ်နှုတ်နှစ်ပါးတွင် တပါးပါးဖြင့် လုံ့လပြုသည်လည်းဖြစ်စေ
၎။ နားထောင်သူကား ထိုစကား၏ အဓိပ္ပါယ်ကို သိသည်လည်းဖြစ်စေ
ဤအင်္ဂါလေးပါး စုံညီလျှင် မုသာဝါဒ ကမ္မပထမြောက်၏။

အဒိဋ္ဌံ ဒိဋ္ဌန္တိ ၀ဒတိ-စသည်ဖြင့် မမြင်သည်ကို မြင်၏။ မကြားသည်ကို ကြား၏။ စသည် ပြောဆိုခြင်းမျိုး ချွတ်ယွင်းစေခြင်းကို ဖြစ်စေသမျှ အရေးပါပါ၊ မပါပါ မုသာဝါဒ ဖြစ်သည်။
အပြစ်ကြီး မကြီးကား အကျိုးပျက်မှု ကြီး-မကြီးပေါ်မှာ တည်ပါသည်။
နှုတ်၌ဖြစ်သော ၀စီကံ၌ ပါဝင်သော်လည်း ခွေးကို ရိုက်တော့မည့်ဟန်ပြု၍ လှည့်စားခြောက်လှန့်ခြင်းမျိုး၊ ကျီးကို ပစ်တော့မည်ကဲ့သို့ ခဲဖြင့်ရွယ်၍ ပျံသွားစေခြင်းမျိုး၊ ကာယ၀ိညတ်ဖြင့် လှည့်စားခြင်းမျိုးလည်း ပါဝင်ပါသည်။

ဝိနည်းတော်၌ သင့်မှာ အပြစ်ရှိလျှင် ပြောပါ-ဟု ဆိုရာ၌ အပြစ်ရှိလျက်နှင့် မပြောဘဲ မြုံနေခြင်းမျိုးလည်း မုသာဝါဒပင် ဖြစ်ကြောင်း ဆိုပါသည်။
********************************************************************************

( မေး ) ဥပုသ်စောင့်ခြင်းနှင့် ရဟန္တာရုပ်တု
အရှင်ဘုရား၊ ဥပုသ်စောင့်၍ ၈-ပါးသီလ ဆောက်တည်သည့်အခါ ၀ိကာလဘောဇနာသိက္ခာပုဒ်ကို စောင့်ထိန်းပြီး ညစာမစားရသည်မှာ မည်သည့်အဓိပ္ပါယ်ကြောင့်ပါလဲဘုရား။ မည်ကဲ့သို့ ကုသိုလ်အကျိုး ရရှိပါသလဲဆိုတာကို ဖြေကြားပေးတော်မူပါဘုရား။

နောက်တခုက ရဟန္တာရုပ်တုများကို ကိုးကွယ်ရာတွင် ရှင်သီဝလိ်၊ ရှင်ဥပဂုတ္တ ရုပ်ပွားတော်များကိုသာ ကိုးကွယ်လေ့ရှိပြီး ပို၍တန်ခိုးကြီးသည့် ရှင်သာရိပုတ္တရာ, ရှင်မဟာမောဂ္ဂလာန်တို့၏ ပုံတော်များကို မကိုးကွယ်ခြင်းမှာ အဘယ်ကြောင့်ဆိုသည်ကို ဖြေကြားပေးတော်မူပါဘုရား။
( မျိုးမြတ်စိုး-မြောက်ဥက္ကလာပမြို့ )

( ဖြေ ) အဋ္ဌင်္ဂသမ္ပန္နာဂတံ ဥပေါသထသီလံ-ဆိုသည့်အတိုင်း အင်္ဂါ ၈-ပါးနှင့်ပြည့်စုံမှ ဥပေါသထ ( ဥပုသ် ) သီလ ဖြစ်ပါသည်။
ဥပုသ်စောင့်သူသည် အရိယာ ( ရဟန္တာ ) ပုဂ္ဂိုလ်များကို အတုယူ၍ တနေ့ပတ်လုံး ကျင့်သုံးဆောက်တည်၍ နေရရာ နေ့စဉ်ကျင့်သုံးသည့် ငါးပါးသီလမှ ထူး၍ ဗြဟ္မစရိယ (မေထုန်ရှောင်) အကျင့်နှင့်
ညစာမစား ပျော်ပါးရှောင်ကြဉ်၊ ဆင်ယင်ရှောင်လတ်၊ မြင့်မြတ်နေရာ၊ ရှောင်ခွာကျင့်သုံးနိုင်ပါမှ အရိယာတို့နှင့် တူတန်နိုင်လိမ့်မယ်။

ထို့ပြင် ဥပုသ်သီလတွင် ပဓာနအကျဆုံးမှာ ဗြဟ္မစရိယ သိက္ခာပုဒ်ဖြစ်ရာ ၄င်းသိက္ခာပုဒ် လုံခြုံရေးတွင် ညစာရှောင်ကြဉ်မှုမှာ အရေးအကြီးဆုံး ဖြစ်ပါသည်။
နစ္စဂီတ စသောသိက္ခာပုဒ်၊ ဥစ္စာသယန စသောသိက္ခာပုဒ်တို့က ဗြဟ္မစရိယ သိက္ခာပုဒ်၏ ဒုတိယ တတိယ တံတိုင်းကြီးများ ဖြစ်သည်။
ဝိကာလဘောဇနသိက္ခာပုဒ်က ပထမတံတိုင်းကြီး ဖြစ်ပါသည်။ ထို့ကြောင့် လွန်စွာအရေးကြီးလှပါသည်။

၎င်းသိက္ခာပုဒ်များ လုံခြုံ၍ တနေ့တာမျှ ကောင်းမွန်စွာ ဥပုသ်သီလအောင်မြင်သွားပါက သိန်းပေါင်းများစွာ လှူဒါန်းခြင်း၊ ဥစ္စာစီးပွား သားမယားနှင့် ထူးခြားအင်္ဂါ များစွာလှူဒါန်းရခြင်းထက်ပင် အကျိုးကြီးလှပါသည်။

ရှင်သီဝလိ, ရှင်ဥပဂုတ္တ နှင့် အချို့ဘုရား အထူးအဆန်းများ ထုလုပ်ကိုးကွယ်သူတို့သည် လောကုတ္တရာအကျိုးထက် လောကီအကျိုးကို မျှော်ကိုးသူများ ဖြစ်ကြပါသည်။ လာဘ်လာဘ များစွာ ရလိုခြင်း၊ စီးပွားဥစ္စာ တိုးတက်လိုခြင်းတို့အတွက် အချို့က ရှင်သီဝလိ-အင်း၊ ရှင်ဥပဂုတ္တ-အင်း ပြုလုပ်၍ ဂါထာမန္တာန်တို့ဖြင့် အင်းဆံပြုကာ ကျူးရင့်ပြီး အင်းသက်သွင်းခြင်းများပင် ပြုကြသည်။

၎င်းတို့သည် အကျိုးထူးရသည်ထက် လောဘကို ရှေ့ထားသဖြင့် အကုသိုလ်ပွားမှုပင် ပိုပါသေးသည်။ ဗုဒ္ဓဘာသာ သမ္မာနွယ်ဝင် သူတော်စင်စစ်စစ် ဖြစ်သူတို့အဖို့ မြတ်စွာဘုရားနှင့် တရား သံဃာတော်တို့အား မတုန်မလှုပ်သက်ဝင် ယုံကြည်သော သဒ္ဓါတရားဖြင့် နေ့ညမအား ၀တ်တွားပူဇော်လျက် ဆွမ်း-ပန်း-ရေချမ်း ရွှင်လန်းကြည်စွာ လှူဒါန်းကာဖြင့် လောဘ ဒေါသ မောဟကင်းကြောင်း ဆုတောင်းပတ္ထနာ ပြုသင့်ကြပါသည်။

ဗုဒ္ဓဘာသာဟုဆိုကာ တသက်တာ ကြီးပွားရေးမျှော်တွေး၍ ဘာသာအရေခြုံလျက် တမျိုးတဖုံ ပြုမူနေကြပုံမှာ ရှက်ဖွယ်ပင် ဖြစ်ပါသည်။
********************************************************************************

( မေး ) တိပိဋကနှင့် ဧတဒဂ် )
အရှင်ဘုရား၊ ဘုရားရှင်လက်ထက်က ပညာဧတဒဂ်၊ တန်ခိုးဧတဒဂ် စသည်ဖြင့် သမုတ်ကြပါသည်။ ယခုခေတ်အခါမှာ တိပိဋကဓရ ဓမ္မဘဏ္ဍာဂါရိက ပူဇော်ပွဲပြုလုပ်၍ သာသနာ့အာဇာနည် ဆရာတော်ဟု ခေါ်ဝေါ်ကြပါသည်ဘုရား၊ ထိုသို့ မပြုလုပ်ဘဲ ပညာဧတဒဂ် ဘွဲ့နှင်းသဘင် ပူဇော်ပြွဲပုလုပ်၍ ဧတဒဂ်ဆရာတော်-ဟု အဘယ်ကြောင့် မခေါ်ကြပါသနည်းဘုရား။ ခေါ်သင့်-မခေါ်သင့်ကို စိစစ်ရှာဖွေ၍ ဖြေကြားပေးတော်မူပါ ဘုရား။
( ဖြူရတနာ-ဆိပ်ဖြူ-ဖန်ခါးမြေ )

( ဖြေ )
ပညာဧတဒဂ်ရ အရှင်သာရိပုတ္တရာသည် တသင်္ချေနှင့် ကမ္ဘာတသိန်း ပါရမီဖြည့်၍ ပညာဧတဒဂ်ရ အဂ္ဂသာဝက ဖြစ်တော်မူသည်။ မြတ်စွာဘုရားမှလွဲ၍ ပညာအရာတွင် အကြီးမြတ်ဆုံးဖြစ်ပါသည်။
တနည်းအားဖြင့်-မြတ်စွာဘုရားနီးပါး ပညာတော်ကြီးမြတ်သည်။ ကမ္ဘာတခွင်လုံး အုပ်ဖုံး၍ ရွာသွန်းသော မိုးရေမိုးပေါက်တို့ကိုပင် ရေတွက်နိုင်စွမ်းရှိသော ပညာဂုဏ်နှင့် ပြည့်စုံသည်။

ပါရမီဖြည့်နေသော ဘ၀ပေါင်းများစွာမှာပင် ပညာကြီးကျယ်ခဲ့သော ဖြစ်စဉ်ရှိခဲ့၍လည်း ဤဘ၀တွင် မြတ်စွာဘုရားက ပညာအရာတွင် အကြီးအကျယ် အမြင့်မြတ်ဆုံး ဧတဒဂ်ပေးတော်မူသည်။ ဤသို့ ဧတဒဂ်ပေးတော်မူခြင်းကိုလည်း ဘုရားမှတပါး မည်သူမျှ ပြုလုပ်ခြင်းငှါ မအပ်ပါ။

ယခုခေတ် တိပိဋကဓရမှာ သင်ရိုးပိဋက ကျမ်းပေါင်း နှစ်ဆယ်လာ ပါဠိတော်များကို ကျက်မှတ်၍ ပြန်ဆိုခြင်း၊ အဓိပ္ပါယ် ရေးဖြေခြင်းတို့ကို ၄-နှစ် ၅-နှစ်ခွဲ၍ ပြန်ဆိုဖြေကြားရပါသည်။ အရှင်သာရိပုတ္တရာတို့၏ ပါရမီဉာဏ်တွေနဲ့ များစွာ ကွာခြားလှပါသေးသည်။ ဤခေတ်တွင် တိပိဋကဓရ သာသနာ့အာဇာနည်ဘွဲ့ထူးသည်ပင် ရနိုင်ခဲမျှ လွန်စွာကြီးမြင့်လှသော ဘွဲ့ထူးဖြစ်ပါသည်။ ဤသို့ နှိုင်းယှဉ်ဝေဖန်၍ အဘယ့်ကြောင့် ဧတဒဂ်ဘွဲ့ဖြင့် မခေါ်ဝေါ်သည်ကို သိသာနိုင်လောက်ပါသည်။
********************************************************************************

( မေး ) ဓမ္မက္ခန္ဓာ ရှစ်သောင်းလေးထောင်
အရှင်ဘုရား သီလ သမာဓိ ပညာ သိက္ခာသုံးပါးကို ချဲ့လိုက်သော် မဂ္ဂင်ရှစ်ပါးဖြစ်၍၊ မဂ္ဂင်ရှစ်ပါးကိုချဲ့သော် ဗောဓိပက္ခိယတရား ၃၇-ပါးဖြစ်ပါသည်။ ဗောဓိပက္ခိယတရား ၃၇-ပါးကို ချဲ့လျှင် ပိဋကသုံးပုံဖြစ်ကာ ပိဋကသုံးပုံကို ချဲ့က ဓမ္မက္ခန္ဓာပေါင်း ရှစ်သောင်းလေးထောင် ဖြစ်လာသည်ဟု ကြားဖူးပါသည်။
ဓမ္မက္ခန္ဓာပေါင်း ရှစ်သောင်းလေးထောင်အား ရေတွက်ပြထားသည်ကို မတွေ့ရဖူးပါ။ ရေတွက်ပြပါရန် သို့မဟုတ် ရေတွက်နည်းကို ဖြေကြားပေးပါရန် လျှောက်ထားအပ်ပါသည်ဘုရား။
( သန်းထွန်း-ဓမ္မာစရိယ၊ ရွှေမြိုင် )

( ဖြေ )
ဓမ္မက္ခန္ဓာပေါင်း ရှစ်သောင်းလေးထောင်ကို ရေတွက်ပြရန် မလွယ်ပါ။ ပိဋကပညာရှင် ရဟန်းတော်များ ဂိုဏ်းပေါင်းစုံ အစည်းအဝေးကဲ့သို့ သံဃာ့အစည်းအဝေးကြီး ပြုလုပ်၍ ပိဋကကျမ်းစာ ပါဠိတော်များကို ခွဲဝေတာဝန်ယူကာ ရေတွက်ကြမည်ဆိုက ၂-နှစ်လောက်အချိန်ယူ၍ ရေတွက်လျှင် ဖြစ်နိုင်ကောင်း ဖြစ်နိုင်မည်ဟု မုံရွေးဆရာတော် မိန့်တော်မူဖူးပါသည်။

ဓမ္မက္ခန္ဓာပေါင်း ရှစ်သောင်းလေးထောင် ရေတွက်ပုံကို အမြွက်မျှ သိနိုင်လောက်သော အဋ္ဌကထာစကားမှာ တတ္ထ ဧကာနုသန္ဓိကံ သုတ္တံ ဧကောဓမ္မက္ခန္ဓော စသည်ဖြင့် ( အဘိ-ဋ္ဌ ၁-၂၇ )ဆို၍
သုတ်၌ အနုသန္ဓေတခုသည် ဓမ္မက္ခန္ဓာ တခု။ ဂါထာတို့တွင် အမေးသည် ဓမ္မက္ခန္ဓာ တခု။ အဖြေသည် ဓမ္မက္ခန္ဓာ တခု။
အဘိဓမ္မာ၌ တခု တခုသော တိက်ဒုက် ဝေဘန်ခြင်းသည် ဓမ္မက္ခန္ဓာ တခု တခု။ စိတ်အကြိမ် တခုတခုသည် ဓမ္မက္ခန္ဓာ တခုတခု။
ဝိနည်း၌ ၀တ္ထုမာတိကာ ပဒဘာဇနီ အာပတ်၊ အနာပတ်၊ အန္တရာပတ်တို့သည် ဓမ္မက္ခန္ဓာ တခုစီ ဖြစ်လေသည်။
ဤနည်းဖြင့် ဓမ္မက္ခန္ဓာတို့၏ အဖို့အစုကို သိရမည်ဟု ဆိုပါသည်။ အမှန်အားဖြင့် ပိဋကသုံးပုံ ဗောဓိပက္ခိယတရား ၃၇-ပါး၊ မဂ္ဂင် ၈-ပါး၊ သိက္ခာ ၃-ပါး၊ ကျင့်စဉ်တရားတို့ကို သိနေက ကျင့်ရန်၊ အားထုတ်ရန် လုံလောက်နေပါပြီ။
အာရုံေ၀၀ါး၍ တရားပျံ့လွင့်စရာ ဓမ္မက္ခန္ဓာ အရေအတွက်ကို ရေတွက်ရှာဖွေနေစရာ မလိုတော့ပါဟု ဖြေကြားလိုပါသည်။
********************************************************************************

( မေး ) အဂ္ဂသာဝက နှစ်ပါး၏ အသက်တော်
အရှင်ဘုရား၊ ဘုရားတပည့်တော်တို့၏ ဂေါတမမြတ်စွာဘုရားသည် သက်တော် ၈၀-ရှိ၍
ညီတော်အနန္ဒာ၊ အရှင်မဟာကဿပတို့သည် သက်တော် ၁၂၀၊
အရှင်အနုရုဒ္ဓါသည် သက်တော် ၁၅၀၊
အရှင်ဗာကုလသည် သက်တော် ၁၆၀၊ အသီးသီးရှိကြကြောင်း ဖတ်ကြားမှတ်သားရပါသည်ဘုရား၊
မြတ်စွာဘုရား၏ လက်ဝဲ လက်ယာ အဂ္ဂသာဝကများဖြစ်ကြသော အရှင်သာရိပုတ္တရာနှင့် အရှင်မဟာမောဂ္ဂလာန်တို့ မည်မျှသက်တော်ရှိကြောင်း ဘုရားတပည့်တော်နှင့် အများသိကြရန် ဖြေကြားပေးတော်မူပါ ဆရာတော်အရှင်သူမြတ်ဘုရား။
( သန်းအောင်လေး-ရွှေဘိုမြို့ )

( ဖြေ )
အဂ္ဂသာဝက နှစ်ပါး သက်တော်မည်မျှရှိကြောင်း စာပေတွင် အတိအလင်း မတွေ့ရပါ။ သို့သော် သတပဒိကပုစ္ဆာ အဖြေကျမ်းတွင် မန်လည်ဆရာတော်တို့ ခန့်မှန်းတွက်ချက်၍ ဖြေကြားထားသည်မှာ-အရှင်သာရိပုတ္တရာ၊ အရှင်မဟာမောဂ္ဂလာန်တို့ သက်တူရွယ်တူဖြစ်ကြောင်း၊ အရှင်သာရိပုတ္တရာ၏ ညီအငယ်ဆုံး ရေ၀တသူငယ်သည် အရှင်သာရိပုတ္တရာ ရဟန်းပြုသောနှစ်မှာပင် အသက် ၇-နှစ်အရွယ်တွင် သာသနာတော်သို့ ၀င်ရောက်ခဲ့ကြောင်း၊ ၄င်းအရှင်ရေ၀တ၌ အရှင်သာရိပုတ္တရာ၊ အရှင်ဥပသေန၊အရှင်စုန္ဒ ဟူ၍ အကို ၃-ပါး၊ အရှင်မ စာလာ၊ ဥပစာလာ၊ သီသူပစာလာ ဟူ၍ အမတော် ၃-ပါးရှိကြောင်း အချင်းချင်း ၃-နှစ်စီ ကွာ၍တွက်ကြည့်လျှင် အရှင်သာရိပုတ္တရာ ရဟန်းပြုသောအသက် ၂၅-နှစ်ရကြောင်း ထိုနှစ်မှာပင် အရှင်မဟာမောဂ္ဂလာန်လည်း ရဟန်းပြုကြောင်း မြတ်စွာဘုရားထက် ၂-နှစ်စော၍ ပရိနိဗ္ဗာန်ပြုကြကြောင်း ထို့ကြောင့် တွက်ကြည့်လျှင် အရှင်သာရိပုတ္တရာ အရှင်မဟာမောဂ္ဂလာန်တို့၏အသက်တော်သည် ၆၈-နှစ်ဖြစ်ကြောင်း ဖြေကြားထားပါသည်။

( မြတ်မင်္ဂလာ ၁၉၉၉-ခု ဧပြီလ )

No comments: