Monday, August 10, 2009

ဒါန နှင့် သစ္စာ

လွန်ခဲ့သော ၁၀-နှစ်ကျော်ကျော်ကာလက ဖြစ်သည်။ ကျွန်တော်တို့ရွာတွင် ဖိုးကောင်းဟူသော လူပျိုးကြီးတဦး ရှိသည်။ သူသည် ဘာသာတရား ရိုသေကိုင်းရှိုင်းသကဲ့သို့ သနားကျင်နာစိတ် ရှိသူလည်းဖြစ်သည်။
ကျွန်တော်တို့ရွာ၏ အနောက်ဘက်တွင် လမ်းဆုံလမ်းခွ တခုရှိပါသည်။ ထိုလမ်းဆုံတွင် ဖိုးကောင်းသည် မည်သူမျှ အကူမခေါ်ဘဲ ၀ါးရေအိုးစင်တစင် ဆောက်သည်။ နေ့စဉ်လည်း ရေဖြည့်လေ့ရှိသည်။

ထိုရေအိုးစင်နှင့် မနီးမဝေးတွင် ဦးထောင်+ဒေါ်လှသီတို့ ဇနီးမောင်နှံ နေထိုင်ကြသည်။ သူတို့တွင် သားသမီး ၄-ယောက်ထွန်းကားသည်၊ သားသမီး ၄-ယောက်တွင် ဒုတိယမြောက် သမီးဖြစ်သူ သန်းလှမှာ အလှူဒါန ၀ါသနာပါသည်။ ဖိုးကောင်း ရေအိုးစင်ဆောက်သည့်နေ့ကစ၍ နံနက်တိုင်းပင် သူလည်း ရေဖြည့်ပေးလေ့ရှိသည်။

တခါတွင် ဦးထောင်တို့မိသားစု စီးပွားရေးအကျဉ်းအကျပ်နှင့် ကြုံရသည်။ မိသားစုအားလုံးလည်း တယောက်တလှည့် ဖျားနာကြသည်။ တနေ့လုပ်မှ တနေ့စားရသော မိသားစုဖြစ်၍ ဒုက္ခတွေ့ပါတော့သည်။
သန်းလှသည် ထီထိုးရန် ၀ါသနာပါသူမဟုတ်ပေ။ သို့သော် ထိုအချိန်တွင် ထီမဖွင့်မီ ၁-ရက်အလို၌ ထီးထိုးလိုစိတ် ပြင်းထန်စွာ ဖြစ်လာသည်။ ထို့ကြောင့် မိမိစုထားသော ငွေ ၁၀-ဖြင့် ထီထိုးရန် ဆုံးဖြတ်လိုက်သည်။ ထီမထိုးမီ ဘုရားတွင် ဆုတောင်းအဓိဋ္ဌာန်ပြု၍ ထီထိုးမည် ပြုသည်။

သန်းလှသည် ငါးပါးသီလ ခံယူ၊ ဘုရားရှိခိုးပြီး အောက်ပါအတိုင်း သစ္စာပြုလေသည်။
ကျွန်မသည် သိတတ်သည့်အရွယ်ကစ၍ ရတနာသုံးပါးကို ဆည်းကပ်ကိုးကွယ်ခဲ့ပါသည်။ ဖိုးကောင်း ဆောက်လုပ်ထားသော ရေအိုးစင်တွင်လည်း စေတနာသန့်သန့်ဖြင့် ရေလှူခဲ့ပါသည်။ ဤမှန်သောသစ္စာစကားကြောင့် ထီပေါက်ပါစေသား။

ထို့နောက် ထီတစောင်ထိုးလိုက်ရာ ထီပေါက်လေသည်။ ထီဆုငွေ ၁၀၀၀၀-ရလေသည်။ ထိုကာလက ငွေတသောင်းဆိုသည်မှာ ဆင်းရဲသားမိသားစုအဖို့ တန်ဖိုးရှိလှသည်။ ထိုငွေဖြင့် အိမ်ဆိုင်ကလေးတဆိုင် ဖွင့်ကာ တဖက်တလမ်းက ၀င်ငွေရှာခဲ့သည်မှာ ယနေ့ထိပင် ဖြစ်ပါတော့သည်။

( ဇော်မင်းဦး-အင်းလေး )
********************************************************************************

( နုပျိုနေသော ဦးသိန်းလွင် )

ဓာတ်ပုံဆရာကြီး ဦးသိန်းလွင်သည် ရန်ကုန်တိုင်း ဗဟန်းမြို့နယ်ရှိ မဟာစည်သာသနာ့ရိပ်သာကြီးသို့ မကြာခဏ သွားရောက်လေ့ရှိ၏။ ဓာတ်ပုံလှလှလေးတွေ ရိုက်ပေးတတ်သူ၊ မှတ်တမ်းဓာတ်ပုံလေးတွေ ရိုက်ပေးလေ့ရှိသူမို့လည်း သူ့ကို ခင်မင်လေးစားကြ၏။ သူကလည်း လူတိုင်းအပေါ် စေတနာထားသူတဦး ဖြစ်၏။ မဟာစည်သာသနာနုဂ္ဂဟ အဖွဲ့ချုပ် ရာသက်ပန် အဖွဲ့ဝင်လည်း ဖြစ်၏။

မဟာစည်သာသနာ့ ရိပ်သာကြီးတွင် ကြုံသလို လုပ်အားပေးခဲ့သည်မှာ နှစ်ပေါင်း ၂၀-ကျော်ခန့်ရှိပြီ။ တံမြက်လှည်းခြင်းစသော သန့်ရှင်းရေး လုပ်စရာရှိလျှင်လည်း ၀င်လုပ်ဖို့ ၀န်မလေး။ ပန်းကန်ဆေးစရာ ရှိလျှင်လည်း ၀င်ဆေး၏။ ဧည့်ခံကျွေးမွေးရေးဘက်တွင် လုပ်အားပေး လိုအပ်နေပါကလည်း ကြည့်မနေတတ်။ ပန်းကန်ချစရာရှိလျှင် ချပေး၏။ ထမင်းတို့ ဟင်းတို့ လိုက်စရာရှိလျှင်လည်း ပေါ့ပေါ့ပါးပါးနှင့်ထပြီး ထည့်ပေး လိုက်ပေးလေ့ ရှိ၏။

သူကား မဟာစည်သို့ရောက်လျှင် ကုသိုလ်တခုမဟုတ် တခု ရအောင် ၀င်လုပ်တတ်၏။ ထို့ကြောင့် သူသည် လုပ်အားဒါနရှင်တဦး ဖြစ်၏။ တနေ့တွင် မဟာစည်သာသနာနုဂ္ဂဟ အဖွဲ့ချုပ် အမှုဆောင်အစည်းအဝေးသို့ စာရေးသူ တက်ရောက်စဉ် သူနှင့်တွေ့ဆုံသည်။ ထိုအခါ သူက-
ဆရာ ဦးစိုးဝင်း ကျွန်တော်ကိုယ်တွေ့လေး ပြောချင်တယ်၊ ကျွန်တော်အသက် အခု ၆၉-နှစ်ထဲရောက်ပြီ။ ပြီးခဲ့တဲ့ ၄-နှစ်လောက်က ကျွန်တော်နေထိုင်မကောင်း ဖြစ်တယ်၊ ခြေဖမိုး လက်ဖမိုးတွေ ရောင်ပြီး ၆-လလောက်ကို လဲနေတယ်။ ဟိုဆေး ဒီဆေး ၀ယ်လိမ်းတယ်။ မပျောက်ဘူး။ အဲဒီတော့ နောက်ဆုံး ဘုရားကိုပဲ အားကိုးရတာပေါ့၊ ကျွန်တော် ပရိတ်ကြီး ၁၁-သုတ် နေ့စဉ်ရွတ်တယ်။ တရားထိုင်တယ်။ ဂုဏ်တော် ၉-ပါး ပုတီးစိပ်တယ်။

ဟုတ်ကဲ့-တယ်ကြိုးစားပါလား ၀မ်းသာစရာပဲပေါ့။
အဲဒီအချိန်က ကျွန်တော့်အိမ်ရှေ့ ပေ ၂၀၀-လောက်ရှည်တဲ့လမ်းမှာ ရွှံ့ဗွက်ဖြစ်ပြီး လမ်းပျက်နေတယ်။ အဲဒါ မိတ်ဆွေတဦးဆီက ဘိလပ်မြေအချပ် အကျိုးအပဲ့ အုတ်ကျိုး အုတ်ပဲ့တွေနဲ့ လမ်းထဲက ကလေးတွေ စည်းရုံးပြီး ကျွန်တော်ပါ ခင်းကြတယ်။ ကျွန်တော်လဲ ဖြစ်ချင်ရာဖြစ်ဆိုပြီး ချွေးဒီးဒီးကျအောင် လုပ်လိုက်တာ လမ်းကောင်းသွားတယ်။ ကျွန်တော့်ကို လူတိုင်းက သေမယ်ထင်နေကြတာ မသေဘဲ နေကောင်းလာတော့ ၀မ်းသာအံ့သြဖြစ်ကြတာပေါ့။

ဦးသိန်းလွင်သည် အသက် ၇၀-နီးပါးရှိသော်လည်း မအိုစာဘဲ ၆၀-ခန့်ဟု ထင်ရသည်။ နုပျိုလန်းဆန်းလျက် ရှိသည်။ သူသည် အမှတ် ၅၄၊ နိဗ္ဗာန်လမ်း ဆရာစံမြောက် အနောက်ရပ်ကွက် ဗဟန်းမြို့နယ် ရန်ကုန်တိုင်းတွင် နေထိုင်လျက် ရှိသည်။ ကောင်းသောကံကြောင့် ကောင်းသောအကျိုးပေးသည်ဟု ယုံကြည်ယူဆရပါသည်။

( တက္ကသိုလ် စိုးယဉ် )

( မြတ်မင်္ဂလာ ၁၉၉၉-ခု မေလ )

No comments: