Thursday, August 13, 2009

ကာယကံ မမြောက်သေးသော သွေးလှူဒါန်းမှု အကျိုး

ကျွန်မတို့ မြို့လေးသည် ဧရာဝတီမြစ်ကမ်း နံဘေးတွင် ရှိပြီး သင်္ဘောဆိပ်၊ မီသတ်ဌာန၊ ရုံးပေါင်းစုံ ကျောင်းပေါင်းစုံနှင့် ဆေးရုံကြီးပါရှိ်သည်။ နေစရာ အလွန်ကောင်းသော မြို့ကလေးတမြို့ပင် ဖြစ်ပါသည်။ မြို့သူ မြို့သားများတွင် အလွန်ချစ်စရာကောင်းသော အကျင့်စရိုက်ကောင်းလေး များစွာရှိသည့်အနက်မှ တန်ဘိုးမဖြတ်နိုင်သော စရိုက်ကောင်းတခုကို တင်ပြလိုပါသည်။

ထိုစရိုက်လေးမှာ ကျွန်မတို့မြို့ပေါ်တွင် ဆေးရုံတက်လာသည့် လူနာများထဲတွင် သွေးအထူးလိုအပ်နေသည့် လူနာရှိလာပါက မီးသတ်ဌာန၊ ရုံးပေါင်းစုံ၊ ကျောင်းပေါင်းစုံ၊ သင်္ဘောဆိပ်ကမ်း အလုပ်သမားများထံသို့ အကူအညီတောင်းသည့်အခါ သူ့ထက်ငါ အလုအယက် ကူညီတတ်ကြသည်။ အလုပ်မအားသည့်ကြားက မည်သည့်တုန်ပြန်မှုကိုမှ မမျှော်မှန်းကြဘဲ ဆေးရုံသို့ အလျင်အမြန်သွားကြသည်။ မိမိထံမှ သွေးလှူဒါန်းနိုင်ခွင့် အခြေအနေ ပေ-မပေး လူနာလိုအပ်နေသည့် သွေးအမျိုးအစား ဟုတ်-မဟုတ် အစမ်းသပ်ခံယူပြီး မိမိတို့ခန္ဓာကိုယ်မှ သွေးကို ရက်ရက်ရောရော ပေးလှူကြတော့သည်။ လူမျိုးမရွေး၊ ဘာသာမရွေး၊ ဆင်းရဲချမ်းသာ မရွေး၊ လှူဒါန်းကြသည်။

ထိုသို့ သွေးလှူဒါန်းမှုနှင့် ပတ်သက်၍ ကျွန်မ မှတ်မှတ်ရရ ဖြစ်နေရသည့် ဖြစ်ရပ်ကလေးတခုကို တင်ပြလိုပေသည်။ ကျွန် ၁၀-တန်းကျောင်းသူ ဘ၀တုန်းကပင် ဖြစ်သည်။ တနေ့ ကျွန်မတို့ အတန်းပိုင် ဆရာမ ဒေါ်ကျင်စောဦး-သည် အတန်းရှေ့တွင်ရပ်ပြီး တပည့်တို့-ဆရာမပြောတာ သေသေချာချာ နားထောင်ကြပါကွယ်။ အခု ဆေးရုံမှာ-အို,သွေး အမျိုးအစား အရေးတကြီး လိုအပ်နေတဲ့ လူနာ ရှိနေတယ်တဲ့။ ကျောင်းအုပ်ဆရာကြီးကို ဆေးရုံက ဖုန်းဆက်အကြောင်းကြားတယ်။ တပည့်တို့ တတွေထဲက အို,သွေးရှင်ဖြစ်ပြီး သွေးလှူချင်ပါတယ် ဆိုရင် ဆရာမကို မတ်တတ်ရပ်ပြပါကွယ်။

ကျွန်မလည်း ဆရာမစကား၊ ကြားကြားချင်း မတ်တတ်ရပ်ပြလိုက်သည်။ လိုအပ်နေတာက အို,သွေး၊ မိမိကလည်း အို,သွေးဆိုတော့ ဘာမှ စဉ်းစားနေချိန်မရ။ ကူညီချင်စိတ် လှူဒါန်းချင်စိတ်ကို ရှေ့တန်းတင်ပြီး မဆိုင်းမတွ မိမိထိုင်နေသည့်ခုံက မတ်တတ်ရပ်ပြလိုက်ခြင်းဖြစ်သည်။

ထိုအခါ နောက်တန်းက ကျောင်းသားအချို့၏ လှောင်ရယ်သံကို ကြားလိုက်ရသည်။ ဒီတော့မှ မိမိကိုယ်မိမိ သတိထားလိုက်မိသည်။ အရေးကြီးလှသော ၁၀-တန်းကို ဖြေဆိုရမည်မှာ လက်တကမ်းအလိုသာ ရှိတော့သည်။ စာမေးကြီးကို ဖြေဆိုနိုင်ရန် နေ့မနား ညမနား ကြိုးစားပြီး စာတွေ ကျက်မှတ်နေရတော့ အအိပ်ပျက် အစားပျက်ဖြစ်ကာ အရိုးပေါ် အရေတင်နေသော ကျွန်မ၏ ခန္ဓာကိုယ်ကို ကြည့်ပြီး ပြက်ရယ်ပြုကြခြင်းပင် ဖြစ်သည်။

သို့သော် ကျွန်မ၏စိတ်ဓာတ်နှင့် စေတနာကို လေးစားဂုဏ်ယူမိပါသည်ဟု ပြောနေသယောင်ယောင် ရှိသော ဆရာမ၏ မျက်လုံးအစုံကိုကြည့်ပြီး အားတက်သွားခဲ့ရသည်။
ဆရာမက တပည့်၏ စေတနာနှင့် စိတ်ဓာတ်ကို အရမ်းလေးစားဂုဏ်ယူပါတယ်ကွယ်။ ဒါပေမဲ့ တပည့်က စာမေးပွဲကြီး နွှဲနိုင်အောင် အားမွေးဖို့ လိုအပ်နေသူတယောက် ဖြစ်လို့ ပြန်ထိုင်နော်-ဟု ဖျောင်းဖျပြောဆိုသည်။ ထို့နောက် ကျွန်မတို့အတန်းထဲမှ ကျောင်းသားသုံးယောက်နှင့် ကျောင်းသူ တယောက်၊ ဆရာမနှင့်အတူ အတန်းထဲက ထွက်ခွါသွားကြသည်။ ကျွန်မမျက်စိတဆုံး ကြည့်နေလိုက်မိသည်။ သူတို့တတွေ ဆေးရုံက ပြန်လာတော့ လူနာအတွက် လိုအပ်နေသည့် အို,သွေးကို ဆိပ်ကမ်းအလုပ်သမားတဦးထံက ရရှိကြောင်း သိရပါသည်။ ကာယကံမြောက် မလှူခဲ့ရသော်လည်း စေတနာထက်ထက်သန်သန်နှင့် လှူဒါန်းချင်ခဲ့သောကျွန်မ၏ မနောကံ သွေးလှူဒါန်းချင်စိတ်ကလေးသည် အချည်းနှီးမဖြစ်ခဲ့ပါ။ ကျွန်မကို လက်တွေ့အကျိုးထူး ပြခဲ့ပါသည်။

ကျွန်အိမ်ထောင်ကျပြီး အိမ်ထောင်သက်တမ်း သုံးနှစ်မြောက်မှာ အမှတ်မထင် ၅-လဖြင့် ကိုယ်ဝန်ပျက်၍ အရေးပေါ်သွေးလိုအပ်နေသော လူနာအဖြစ် ဆေးရုံတွင် ရောက်ရှိခဲ့ရသည်။ ထိုစဉ် လိုအပ်နေသော အို,သွေး လှူဒါန်းမည့်သူ ချက်ချင်းပေါ်ပေါက်ခဲ့သည်။ ထိုသွေးလှူရှင်ထံမှ သွေးထုတ်ယူရန် အခြေအနေအရပ်ရပ် တိုက်ဆိုင်နေ၍ သွေးအစားသွင်းခဲ့ပြီး ကျွန်မကျန်းမာလာခဲ့သည်။ ထိုသွေးအလှူရှင်အတွက် ကျွန်မ၏ခင်ပွန်းဖြစ်သူက ကြက်ဥများပေးသည်ကိုပင် မယူရှာ၊ ကျွန်မအတွက် ပြန်ပေးထားခဲ့သေးသည်။

ထိုသွေးအလှူရှင်၏အမည်မှာ ကိုစိုးညီ ဖြစ်သည်။ ကျွန်မအသက်ရှင်နေသမျှ ကာလပတ်လုံး ထိုသွေးလှူရှင် ကိုစိုးညီကို မေတ္တာများပို့၍ ဆုမွန်ကောင်းများ တောင်းပေးနေဦးမည် ဖြစ်ပါသည်။
( မြန်မပြည် အရပ်ရပ်ရှိ သွေးလှူရှင်များနှင့် ကျွန်မအတွက် လိုအပ်နေသည့်သွေးကို လှူဒါန်းပေးခဲ့ဖူးသည့် ကိုစိုးညီကို ဤဆောင်းပါးဖြင့် ဂုဏ်ပြုမှတ်တမ်းတင်လိုက်ရပါသည်။ )

( ရွှေမြန်မာ-ကသာ )
*******************************************************************************

( စေတနာမှန်သော ကံတရား )

ငါန်းဇွန်မြို့၏ မြို့စွန်ချောင်းကမ်းနဖူး၌ ဆင်းရဲသော ဦးလူလှနှင့်ဒေါ်တင်မြတို့ ဇနီးမောင်နှံ နေထိုင်ကြသည်။ ဦးလူလှမှာ ထင်းပေါက် ထင်းခွဲခြင်း ရေနံချေးသုတ်ခြင်း၊ အိမ်သာကျင်းတူခြင်းနှင့် ကူလီအငှါး ထမ်းပိုးခြင်း စသော ကြုံသလို လုပ်ငန်းဖြင့်သာ အသက်မွေးဝမ်းကျောင်း ပြုသူဖြစ်၏။ ဒေါ်တင်မြမှာမူ မီးယပ်ရောဂါသည်ဖြစ်၍ ဘာမှ မလုပ်ကိုင်နိုင်ပေ။ ဦးလူလှ ရှာဖွေရသမျှ ငွေကြေးဖြင့်သာ တနေ့စာတနေ့ ခြိုးခြံစားသောက်နေရသောကြောင့် ပိုလျှံမှုမရှိကြချေ။

ဦးလူလှနှင့် ဒေါ်တင်မြတို့၌ အရွယ်ရောက်နေပြီဖြစ်သော သားတယာက်ရှိရာ မိဘနှစ်ပါးစလုံးက သားကို ရှင်ပြုပေးချင်ကြသည်။ သို့သော်လည်း ငွေကြေးမတတ်နိုင်သဖြင့် ရှင်ပြုမပေးနိုင် ဖြစ်နေသည်။
တနေ့တွင် ဦးလူလှသည် မြို့ထဲရှိ အိမ်တအိမ်၌ ထင်းခွဲပေးရသည်။ လုပ်ငန်းရှင်က ဦးလူလှကို ထမင်းကျွေးပြီး လုပ်အားခအဖြစ် ငွေ ၅၀-ကျပ်နှင့် ထင်း (အသားပကာခြမ်း) များကို ပေးလိုက်သည်။

ယင်း-ထင်းအသားပကာခြမ်းများကို ထမ်း၍ အိမ်ပြန်လာစဉ် လမ်ခရီးရှိ သစ်သားတံတားပေါ်တွင် ဖြတ်သန်းသွားသည်။ ထိုတံတားမှာ ဟောင်းနွမ်း၍ ကြမ်းခင်းများ ဖရိုဖရဲနှင့် ပေါက်ပြဲကာ ပျက်စီးနေသည်ကို တွေ့ရသည်။ ထိုအခါ ဦးလူလှသည် သူ့တွင်ပါလာသော ထင်းပကာခြမ်းဖြင့် ဖာထေးပြုပြင်လေသည်။ တံတားကြမ်းခြင်းအပြည့် (နေရာလွတ် မရှိအောင်) ဖာထေးပြုပြင်ပြီးချိန်တွင် သူရရှိခဲ့သော ပကာခြမ်းများမှာ ကုန်သွားလေသည်။

ထိုနေ့က သူ၏လုပ်ဆောင်ချက်ကို ဇနီးဖြစ်သူ ဒေါ်တင်မြကို ၀မ်းသာအားရ ပြောပြသည်။ ဒေါ်တင်မြကလည်း ရွှင်လန်းဝမ်းမြောက်စွာ သာဓုခေါ်သည်။ နောက်တနေ့၌ ဦးလူလှတို့အိမ်သို့ လူကြီး ၃-ဦး ရောက်လာသည်။ ၄င်းတို့သည် ဦးလူလှပြုပြင်ခဲ့သော တံတားပျက်ရှိရာ ရပ်ကွက်မှ ဖြစ်ကြောင်း၊ ထိုတံတားကို ပြုပြင်ရန် အလှူငွေကောက်ခံနေကြကြောင်း၊ မနေ့က ဦးလူလှ တဦးတည်း စေတနာဝန်ထမ်း တံတားပြင်သွားသဖြင့် ၄င်းတို့ ကောက်ခံရရှိသော အလှူငွေ ၅၀၀၀-ကျပ်ကို ဦးလူလှအား စံပြတာဝန်သိ လုပ်သားကောင်းအဖြစ် ချီးမြှင့်ကြောင်း ပြောဆိုကာ ပေးအပ်သွားကြလေသည်။

ဦးလူလှနှင့် ဒေါ်တင်မြတို့သည် ၄င်းတို့ရရှိသော ငွေ ၅၀၀၀-ကျပ်ဖြင့် သားကလေး မောင်ကြာညိုကို သာသနာ့ဘောင်သို့ သွတ်သွင်းပေးနိုင်ခဲ့ကြသည်။ စေတနာနှင့် အသိတရား၏ အကျိုးကား နောက်ဘ၀သို့ မဆိုင်း၊ ယခုဘ၀မှာပင် ပိုင်ဆိုင်ဆွတ်ခူးနိုင်သည်ကို ဦးလူလှတို့ မိသားစု ကောင်းမှုက ထင်ထင်ရှားရှား သာဓကပြခဲ့လေပြီ။

( ငါန်းဇွန်-မောင်လွမ်းမွန် )

( မြတ်မင်္ဂလာ ၁၉၉၉-ခု ဇွန်လ )

No comments: