Tuesday, August 25, 2009

ဘာသာရေး ပြဿနာ ( ၈၁ )

( ဘဒ္ဒန္တတိလောကသာရ ဖြေသည် )

( မေး ) ကျောင်းသူ ကျောင်းသားနှင့် ၀ိပဿနာ )
အရှင်ဘုရား တပည့်တော်တို့ အခြေခံပညာကျောင်းတွေမှာ ကျောင်းမတက်မီ နေ့တိုင်း ထွက်သက်-၀င်သက်လေ (အာနာပါန၀ိပဿနာ) ရှုမှတ်ရပါသည်။ ထိုသို့ ပြုလုပ်ခြင်းဖြင့် ရရှိနိုင်သောအကျိုးများကို တစိတ်တပိုင်း ရှင်းပြပေးတော်မူပါဘုရား။ အခြားဘာသာဝင်များရော ရှုမှတ်နိုင်ပါသလားဘုရား။ သိလိုပါ၍ ဖြေကြားပေးတော်မူပါဘုရား။
( မောင်အောင်ဇော်လွင်-အ-ထ-က ခင်ဦး )

( ဖြေ ) ကျောင်းများတွင် ကျောင်းသူ ကျောင်းသားများအား ဆရာ ဆရာမများက ထွက်သက် ၀င်သက် အာနာပါန အားထုတ်မှုကို အချိန်တချိန်ပေး၍ အားထုတ်ခိုင်းပါသည်။ ထိုသို့ အားထုတ်ခိုင်းခြင်းမှာ ကမ္မဋ္ဌာနာစရိယဆရာတော်များက ရိပ်သာတွင် စနစ်တကျ အားထုတ်စေသကဲ့သို့ ပေါက်ပေါက်ရောက်ရောက် ဖြစ်စရာ မရှိသော်လည်း ကျောင်းသူ ကျောင်းသားများ ငယ်စဉ်ကပင် ကမ္မဋ္ဌာန်းအားထုတ်ခြင်း၌ အလေ့အလာ ၀ါသနာဖြစ်သွားစရာရှိပါသည်။

ထို့အပြင် အာနာပါနရှုမှတ်ခြင်းသည် စိတ်ပိုင်း ရုပ်ပိုင်းဆိုင်ရာမျာ အားသစ်ဖြစ်ထွန်းစေခြင်း ဉာဏ်ပညာကိုလည်း ထက်မြက်စေပါသည်။ ၀ိပဿနာအားထုတ်မှုသည် ဘာသာမရွေး အားထုတ်နိုင်သဖြင့် ကောင်းသောအလေ့အကျင့်ဖြစ်၍ အားပေးရမည့်ကိစ္စဖြစ်ပါသည်။ ကျောင်းတိုင်းမှာပင် လုပ်သင့်သော သင်ခန်းစားဖြစ်သည်ဟု ဖြေကြားလိုပါသည်။
********************************************************************************

( မေး ) ( ဒါနပြုခြင်းနှင့် ပြုစေခြင်း )
အရှင်ဘုရား၊ လူတဦးသည် သူပိုင်ငွေကြေးဖြင့် အခြားသူတယောက် (သက်ရှိသူတယောက်) အတွက် အဲဒီလူ၏ နာမည်ဖြင့် လှူပေးပါက နှစ်ဦးစလုံး ကုသိုလ်ရပါသလား။ လူတဦးက သူ၏ငွေကြေးဖြင့် အခြားသူအား လှူခိုင်းပါက နှစ်ဦးစလုံး ကုသိုလ်ရပါသလား။ ဘယ်လိုရပါသလဲဆိုတာ ဖြေကြားပေးတော်မူပါဘုရား။
( အိအိသွယ်-ရန်ကုန် )

( ဖြေ ) ဒါနသည် စေတနာဒါန၊ ၀တ္ထုဒါန ဟူ၍ ရှိရာ အကျိုးပေးမှု၌ စေတနာသာ ပဓာနဖြစ်ပါသည်။ စေတနာမပါလျှင် မိမိငွေကြေးဖြင့် သူတပါးအား လှူခိုင်းသော်လည်း မိမိကောင်းစွာမရ။ လှူပေးသူသာ ရနိုင်ပါသည်။

ဘုရားလက်ထက်က ပါယာသိမြို့စားမင်းသည် မိမိက အကုန်ခံ၍ ကိုယ်တိုင်မလှူ။ တပည့် ဥတ္တရလုလင်ကိုသာ အလှူခိုင်းလေ့ရှိသည်။ နောင်အကျိုးပေးသောအခါ ပါယာသိမြို့စားမှာ ရုက္ခစိုးနတ်မျှသာဖြစ်၍ ဥတ္တရလုလင်က တာဝတိံသာနတ်ပြည်၌ နတ်မင်းကြီး ဖြစ်ရသည်ဟု ဆိုပါသည်။ ထိုအချက်ကို စဉ်းစား၍ အိအိသွယ်၏ ပြဿနာ၌ ရှင်းလင်းနိုင်စရာရှိပါသည်။
********************************************************************************

( မေး ) ( ယောက်ျားဘ၀ မိန်းမဘ၀ )
အရှင်ဘုရား၊ ထင်ရှားသော ပုဂ္ဂိုလ်တဦး၏ အဆိုအမိန့်အရ မိန်းမဘ၀မှ ယောက်ျားဘ၀သို့ ကူးပြောင်းရောက်ရှိသွားခြင်းမျိုး မရှိဟု ပြောဆိုသည်ကို ကြားသိမှတ်သားခဲ့ရပါသည်။ မိန်းမများသည် သံသရာတလျှေက်လုံးတွင် တစုံတခုသော ဘ၀မှာ ယောက်ျားဘ၀သို့ ရောက်ရှိနိုင်ပါသလား။ ယောက်ျားများသည်လည်း မိန်းမဘ၀သို့ ရောက်ရှိခဲ့ဖူးပါသလားဘုရား။ ဖော်ပြပါ သံသယကိစ္စများကို သာဓကပြ၍ ပြေလည်အောင် ရှင်းလင်းပေးတော်မူပါဘုရား။
( ကေသရ-နန္ဒရံသီကင်းရုံကျောင်းတိုက် ဂွမြို့ )

( ဖြေ )
အမျိုးသမီး(မိန်းမ)များသည် မိမိဘ၀ကို နှစ်သက်တွယ်တာလွန်းသကြဖြင့် တဘ၀ပြီးတဘ၀ မိန်းမအဖြစ်ဖြင့်သာ အဖြစ်များကြသည်။ မိမိ၏ အဆင်း စည်းစိမ် လင်သား စသည်တို့ကို ခင်တွယ်လွန်းသဖြင့် ဆုတောင်းလျှင်ပင် မိန်းမဘ၀ကိုသာ ဆုတောင်းတတ်ကြသည်။ သို့သော် သံသရာတွင် မိန်းမမှ ယောက်ျား၊ ယောက်ျားမှ မိန်းမ အပြန်ပြန် အလှန်လှန် ကျင်လည်ကြသည်။

မြတ်စွာဘုရားလက်ထက်တော်အခါက ဂေါပိကာမည်သော သာကီဝင်မင်းသမီးသည် မိန်းမဘ၀ကို စက်ဆုပ်၍ ကုသိုလ်ပြုလုပ်သဖြင့် တာဝတိံသာနတ်ပြည်တွင် ဂေါပကနတ်သားဟူ၍ ဖြစ်ရကြောင်း သက္ကပဥှသုတ်တွင် လာသည်။

အရှင်အာနန္ဒာအလောင်းသည် ပရဒါရကံကြောင့် မိန်းမဘ၀ အကြိမ်ကြိမ်ဖြစ်ခဲ့ရသည်။ ထို့ကြောင့် မိန်းမဘ၀ ယောက်ျားဘ၀ ကုသိုလ် အကုသိုလ်ကြောင့် ရောက်နိုင်-ရနိုင်သည်ချည်း ဖြစ်သည်။ ထို့ကြောင့် ပုရိသာ ဟိ ဣတ္ထိယော ၀ါ ပုရိသာ အဘူတပုဗ္ဗာနာမ နတ္ထိ-စသည်ဖြင့် သံယုတ္တနိကာယ် အနမတဂ္ဂသုတ်အဖွင့်၌ ဆိုပါသည်။ မြတ်စွာဘုရားကိုယ်တော်တိုင်ကလည်း ယတ္ထ ဣတ္ထိန္ဒြိယံ ဥပ္ပဇ္ဇိတ္ထ၊ တတ္ထ ပုရိသိန္ဒြိယံ ဥပ္ပဇ္ဇိတ္ထာတိ အာမန္တာ။ ယဿဝါပန ပုရိသိန္ဒြိယံ ဥပ္ပဇ္ဇိတ္ထ၊ တဿ ဣတ္ထိန္ဒြိယံ ဥပ္ပဇ္ဇိတ္ထာတိ အာမန္တာ-စသည်ဖြင့် မိန်းမ ယောက်ျား အပြန်ပြန်အလှန်လှန် ဖြစ်နိုင်ကြောင်းကို ဣန္ဒြိယယမိုက်၌ ဟောတော်မူထားပေသည်။
********************************************************************************

( မေး ) ( ပိုးမွှားများ ဗြဟ္မာပြည်ရောက်-မရောက် )
အရှင်ဘုရား၊ လောက၌ ပိုးရွခြပုန်း၊ ပုရွက်၊ မှက်၊ ခြင်၊ ယင် စသည်တို့နှင့် ပိုးဟပ်၊ ကြမ်းပိုး၊ သီးနှံအမျိုးမျိုးတို့အပြင် ၀မ်းတွင်းရှိ ပိုးမျိုးရှစ်ဆယ် စသည်တို့သည် ကမ္ဘာပျက်လျှင် ၄င်းတို့ပါ ဗြဟ္မာ့ပြည်ရောက်ကြပါသလား။ ကမ္ဘာမပျက်မီကလည်း လူ့အဖြစ်ကို ရခွင့်ရှိပါသလား ဖြေကြားပေးတော်မူပါဘုရား။
( မောင်စိုးဝင်း-အလုံမြို့နယ် )

( ဖြေ )
စတုဂီရိ ဆရာတော်ဘုရားကြီး-ရေး စတုဂီရိ ရှုဖွယ်ကျမ်းတွင် ဥပေါသထ ရှုဖွယ်ကျမ်း ( ၁၂၅၉-ခုနှစ် ကျမ်းပြီး)တွင် စတုမဟာရာဇ်၊ တာဝတိံသာ၊ ယာမာ၊ တုသိတာ၊ နိမ္မာနရတီ၊ ပရိနိမ္မိတ၀သ၀တ္တီဟူသော နတ်ခြောက်ထပ်၌ မဖြစ်ဖူးသောသတ္တ၀ါမည်သည် မရှိ။ အယုတ်သဖြင့် တီ၊ မျှော့ ပက်ကျိတို့မှစ၍ သတ္တ၀ါဟူသမျှ နတ်ပြည်ခြောက်ထပ်၌ ကြိမ်ဖန်များစွာ ဖြစ်၍ ပျက်စီးခြင်းသို့ ရောက်ဖူးလှလေကုန်ပြီ-စသည်ဖြင့် ရေးသားထားသည်ကို တွေ့ရ၏။ နတ်ပြည်ခြောက်ထပ်သို့ ရောက်သည်ဆိုသဖြင့် ဗြဟ္မာပြည်သို့လည်း မရောက်နိုင်စရာမရှိ။ ရောက်နိုင်ပေတော့သည်။ ကမ္ဘာပျက်ချိန်တွင် ဤကမ္ဘာရှိ သတ္တ၀ါမှန်သမျှ သုဘကိဏ်အထက် ဘ၀ဂ်အတွင်း ဖြစ်ရခြင်းကား လောကဓမ္မတာပင် ဖြစ်ပေတာ့သည်။
********************************************************************************

( မေး ) ( ဘုန်းကြီးကျောင်းနှင့် ဝေယျာဝစ္စ )
အရှင်ဘုရား၊ ဘုန်းတော်ကြီးကျောင်းများတွင် သံဃာတော်များနှင့် သာမဏေများ၏ ပန်းကန်ခွက် ဆေးကြောခြင်း၊ သင်္ကန်းများ လျှော်ဖွပ်ပေးခြင်း၊ ကုဋီများ ဆေးကြောပေးခြင်း၊ သံဃာတော်တို့ သောက်သုံးရေအိုးများ ရေဖြည့်ပေးခြင်း၊ ကျောင်းဝင်းအတွင်းရှိ မြက်များ ရှင်းလင်းပေးခြင်းတို့သည် အပြစ်ရသည် အပြစ်ကြီးသည်ဟု လူတယောက်ကပြောပါသည်။ ၄င်းကဲ့သို့ ပြုခြင်းသည် အပြစ်ရ-မရ ဖြေကြားပေးပါဘုရား။
( ဒေါ်သန်းနွဲ့-မိုးကောင်းမြို့နယ် )

( ဖြေ )
ဗုဒ္ဓဘာသာဝင် သူတော်စင်တို့အဖို့ ဒါန၊ သီလ၊ ဘာဝနာ၊ အပစာယန၊ ဝေယျာဝစ္စ၊ ပတ္တိဒါန၊ ပတ္တာနုမောဒန၊ ဓမ္မသ၀န၊ ဓမ္မဒေသနာ၊ ဒိဋ္ဌိဇုကမ္မ၊ ဟူသော ပုညကိရိယာဝတ္ထုများမှာ နေ့စဉ်ပြုရမည့် တရားများဖြစ်ပါသည်။
လှူဒါန်းမှု-ဒါန၊
ဆောက်တည်မှု-(အနည်းဆုံး) သီလ
လက္ခဏာရေးသုံးပါးကို ဆင်ခြင်ခြင်း-ဘာဝနာ စသည်တို့ကို နေ့စဉ်ပြုနေရသကဲ့သို့
ရိုသေထိုက်သော မိဘဆရာသမား စသည်တို့ကို ရိုသေမှု-အပစာယန
ပြဿနာရှင်ဖော်ပြသော ဘုန်းတော်ကြီးကျောင်းတို့တွင် ပန်းကန်ခွက်ယောက်များ ဆေးကြောပေးခြင်း၊ ကုဋီများ၌ သန့်ရှင်းရေး ပြုလုပ်ခြင်းစသည်တို့မှာ မုချပြုလုပ်ရမည့် ဝေယျာဝစ္စ ပုညကိရိယာ ကောင်းမှုများဖြစ်ကြပါသည်။

ရှေးက ကျောင်းကန်ဘုရားများတွင် ဥပုသ်စောင့်ကြသူတိုင်း ထိုအမှုတို့ကို မပြုမနေ ပြုမိအောင် ပြုလုပ်ကြပါသည်။ ကျောင်းကန်ဘုရားသို့ရောက်လျှင် မပြုလျှင်သာ အပြစ်ရှိ၍ ပြုလျှင်ကား လွန်စွာအကျိုးရှိလှ၊ ကုသိုလ်ဖြစ်လှပါသည်။ ရန်ကုန်တွင် ကျောင်းဆရာမလေးများစု၍ အချို့တပည့်မလေးများပါ ဘုန်းတော်ကြီးကျောင်း စာသင်တိုက်များရှိ ကုဋီများကို ကျောင်းပိတ်ရက်၊ ကျောင်းအားရက်များတွင် လာ၍သန့်ရှင်းပေးနေကြသည်ကို သာဓုခေါ်ဖွယ်ရာတွေ့ရပါသည်။ ထို့ကြောင့် ထိုပုညကိရိယာဝတ္ထုတို့ကို ပြုမိအောင် ပြုလုပ်ကြစေလိုကြောင်း ပြောဆိုတိုက်တွန်းဖြေကြားပေးလိုပါသတည်း။
*********************************************************************************

( မေး ) ( စကြ၀ဠာ ကုဋေတသိန်း )
အရှင်ဘုရား၊ စကြာဝဠာ ကုဋေတသိန်းတို့သည် ဖြစ်လည်းအတူ၊ ပျက်လည်းအတူ-ဟု ဆိုပါသည်။ ထိုသို့ဆိုပါက ထိုစကြ၀ဠာတို့တွင်လည်း တပည့်တော်တို့ ဘဒ္ဒကမ္ဘာမှာကဲ့သို့ ဘုရားများပွင့်နိုင်-မပွင့်နိုင် ဖြေကြားရှင်းလင်းပြတော်မူပါဘုရား။
( မနှင်းသီရိ-သံတွဲ )

( ဖြေ ) မြတ်စွာဘုရား၏ ဇာတိခေတ်၊ အာဏာခေတ်၊ ၀ိသယခေတ် ဟူ၍ ခေတ်သုံးမျိုး ရှိရာ စကြ၀ဠာတိုက်တသောင်းသည် ဤစကြ၀ဠာနှင့်အတူ မြတ်စွာဘုရားအလောင်း ဖွားမြင်တော်မူသောအခါ စသည်တို့၌ အတူလှုပ်ရှားခြင်း၊ ထိုစကြ၀ဠာတို့မှ နတ်ဗြဟ္မာတို့ လာရောက် တရားနာယူခြင်း စသည်တို့ကြောင့် ဇာတိခေတ်ဟုဆိုရသည်။

စကြ၀ဠာကုဋေတသိန်းကား ဤစကြာဝဠာနှင့် ဖြစ်အတူ ပျက်အတူဖြစ်၍ မြတ်စွာဘုရားပရိတ်တော်၊ တရားတော်တို့၏ တန်ခိုးအာဏာ ပျံ့နှံ့ရာဖြစ်၍ အာဏာခေတ်ဟုဆိုရသည်။

စကြ၀ဠာအနန္တမှာကား မြတ်စွာဘုရား၏ ဉာဏ်တော်ကျက်စားရာဖြစ်၍ ၀ိသယခေတ်ဟု ဆိုရပါသည်။ ဘုရားပွင့်တော်မူခြင်းမှာမူ ဤစကြ၀ဠာမှ တပါး အခြားမည်သည့်စကြ၀ဠာမှာမှ ပွင့်တော်မူလေ့မရှိကြောင်း မှတ်သားထားရပါမည်။
*********************************************************************************

( မေး ) ( လောကီသီလ-လောကုတ္တရာသီလ )
အရှင်ဘုရား၊ များစွာသောသီလတို့တွင် လောကီသီလ၊ လောကုတ္တရာသီလ ဟူ၍၄င်း။
ပုထုဇဉ်သီလ-အရိယာသီလဟူ၍၄င်း။ ခြားနား၍ ရှိပါသလား။ ဤကဲ့သို့ မြတ်စွာဘုရားက ခွဲခြား၍ ဟောထားသည်များ ရှိပါသလား။ တပည့်တော်များ မှတ်သားထားနိုင်ရန် ဖြေကြားပေးတော်မူပါဘုရား။
( မောင်နှောင်း-ကနီမြို့ )

( ဖြေ )
လောကီသီလ-လောကုတ္တရာသီလဟူ၍၄င်း၊ ပုထုဇဉ်သီလ-အရိယာသီလ-ဟူ၍၄င်း အထုးခွဲခြားဟောကြားထားသည်ကား မရှိ။ သို့သော် ပုထုဇဉ်ပုဂ္ဂိုလ်များ ခံယူစောင့်ရှောက်ကြသည့် ငါးပါး၊ရှစ်ပါး၊ ဆယ်ပါး စသော သီလတို့ကို လောကီသီလများဟု ခေါ်ဆိုရ၍ သောတာပန်-စသော အရိယာပုဂ္ဂိုလ်များ စောင့်ရှောက်သောသီလကို လောကုတ္တရာ သီလဟု ခေါ်ဆိုနိုင်ပါသည်။

သရဏဂုံ၌လည်း ထိုနည်းတူပင် ပုထုဇဉ်တို့ခံယူသော သရဏဂုံကို လောကီသရဏဂုံ၊ အရိယာတို့ ခံယူသောသရဏဂုံကို လောကုတ္တရာ သရဏဂုံ-ဟု ခေါ်ဆိုနိုင်ပါသည်။ လောကီသရဏဂုံနှင့် သီလတို့မှာ ပျက်နိုင်၍ လောကုတ္တရာသရဏဂုံနှင့် အရိယာသီလတို့ကား မပျက်ပြယ်နိုင်။ သက်ဆုံးတိုင် တည်တံ့ခိုင်မြဲလေတော့သည်။
********************************************************************************

( မေး ) ( ယခင်နှင့်ယခု ကွာခြားမှု )
အရှင်ဘုရား၊ ဟိုရှေးအခါ ဗုဒ္ဓမြတ်စွာ၊ မြတ်ဓမ္မာဟောကြားလျှင်၊ နာကြားသူ မဂ်ဖိုလ်ဆိုက်၊ ထိုခေတ်၌ ၀မ်းသာဖွယ်၊ ခုကာလ ဓမ္မကထိကများတွေတို့၊ ဟောကြားသည် အခါခါပ၊ မရပါ တဖိုမဂ်၊ ဘယ်တွက်ကြောင့်ကွယ်၊ ထူးခြားမှု နှစ်ခု ထွေအပြားကို၊ ဖြေကြားပါ့ ထေရ်ရှင်ရယ်၊ အဘယ်ကြောင့်ကွာခြား၊ က၀ိဆရာက သိသာအောင် ကဗျာသွင်းလို့၊ ရှင်းပါ့ဘုရား။
( ဦးတင်သိန်း-ပလောမြို့ )

( ဖြေ )
ဟိုရှေးခါ၊ ဗုဒ္ဓမြတ်စွာက၊ ကြားနာသူ အလိုသိ၊ ကိုက်ညီ၏ ချိန်အခါ။
နာသူများ၊ ရှေးဖျားအခါညီပ၊ ပါရမီပြည့်မီခြင်း၊ ယင်းကတဖြာ။
ထိုနှစ်ဖြာ ညီပါ၍-ရ-တရား၊
ဤခေတ်ခါ၊ ရည်စစ်စရာပ၊ ဟော,အနာ-လို မသိရယ်နှင့်၊ ထိုသည့်ပါရမီတို့၊ မပါပြီ ထိုအချက်ကြောင့်၊ ဖိုလ်မဂ် မသီဝေးကို၊ တွေး၍ သိထား။
********************************************************************************

( မေး ) ( ပိုးသတ်ဆေးနှင့် လယ်သမား )
အရှင်ဘုရား၊ လယ်ယာတို့တွင် ပိုးသတ်ဆေးဖျန်းခြင်း၊ သောက်ရေတွင် ပိုးလောက်လမ်းတို့ကို ဖယ်ရှားခြင်း၊ အိပ်ရာတွင် ကြမ်းပိုးစသည်တို့ကို ရှင်းလင်းခြင်း စသည်တို့မှာ ပါဏာတိပါတကံ ဖြစ်နိုင်ပါသလား။ ဖြစ်နိုင်သည်ဆိုလျှင် တပည့်တော်တို့ ဗုဒ္ဓဘာသာဝင်တွေအနေဖြင့် သမ္မာအာဇီဝဖြစ်ရန် ခဲယဉ်းလှပါသဖြင့် မည်သို့ကျင့်သုံးမှတ်သားရမည် ဆိုသည်ကို ဖြေကြားတော်မူပါဘုရား။
( မောင်ညီလေး-ဧရာဝတီတိုင်း )

( ဖြေ )
ပိုးမွှားမျာကို သေစေရာ၌
၁။ သတ္တ၀ါလည်းဖြစ်စေ
၂။ သတ္တ၀ါဟု မှတ်ထင်သည်လည်းဖြစ်စေ
၃။ သတ်လိုစိတ်လည်း ရှိစေ
၎။ လုံ့လလည်းပြုစေ
၅။ ထိုလုံ့လဖြင့် သေသည်လည်းဖြစ်စေ
ဤအင်္ဂါငါးချက်ညီလျှင် ပါဏာတိပါတ ဖြစ်ပါသည်။

သို့သော် သတ္တ၀ါ၏ ဂုဏ်ရည်ကို လိုက်၍ အပြစ်ကြီး-သေး ရှိရာတွင် အကိုက်အဖျက် အင်းဆက်ပိုးမွှားတို့မှာ မည်သည့်ဂုဏ်ရည်မျှ မရှိ။ အဖျက်သတ္တ၀ါများသာ ဖြစ်ရာ ၄င်းတို့ကို ဖယ်ရှားရာ၌ အကျိုးနှင့်အပြစ်ကို စိစစ်၍ ဖြစ်လာမည့်အကျိုးကို မျှော်ကိုး၍ တမျိုးတဖုံ စဉ်းစားရပါမည်။

ဂုစ်ရည်ကင်းသော ရောဂါပိုးများကို ရှင်းလင်း၍ ဂုဏ်ရည်မြင့်မားသော လူပုဂ္ဂိုလ်တို့အား ကယ်တင်သော ဆရာဝန်များကဲ့သို့ လုပ်သင့်လုပ်ထိုက်သော အလုပ်ကို လုပ်ရမည်မှာ ဗုဒ္ဓဘာသာ မဟုတ်၊ လူသားတိုင်း၏ တာဝန်ပင်ဖြစ်ကြောင်း ဖြေကြားလိုက်ပါသည်။

( မြတ်မင်္ဂလာ ၂၀၀၁-ဖေဖော်ဝါရီ )

No comments: