Monday, August 17, 2009

ကိုယ်ပြုသည့်ကံ ကိုယ့်ထံပြန်

လွန်ခဲ့သောနှစ်ပေါင်း ၂၀-ခန့်က မုံရွာမြို့နယ် ကျောက်္ကာရွာနေ ကို---ဆိုသူသည် အရပ်လည်း ပု၊ ၀လည်းဝ၏။ မျက်စိတဖက် တိမ်ရှိသည့်အပြင် ခေါင်းက စုတ်ချွန်းချွန်းဖြင့် လွန်စွာ အကျည်းတန် အရုပ်ဆိုးလွန်းသည်။ ချိုးထောင်၊ ခါထောင်၊ ပုတတ်လိုက်၊ ယုန်လိုက်၊ ငါးဖမ်း စသည်ဖြင့် လုပ်ကိုင်၍ အသက်မွေး၏။

တနေ့သ၌ မိုးကြီး သဲသဲမဲမဲ ရွာချသောကြောင့် ရွာ၏တောင်ဘက်တွင် စီးဆင်းသွားသော ထန်းဇလုပ်ချောင်းကြီးသည် အသံမြည်ဟီး၍ ကြောက်မက်ဖွယ်စီးဆင်းနေသည်။ ချောင်းရေကျလာသောအခါ ချောင်း တောင်ဘက်ကမ်းစပ်ရှိ လက်ပံပင်အောက်၌ ချောင်းထဲတွင် မျောပါလာသော စပါးကြီးမြွေသည် တင်ကျန်ရစ်ပြီး အခွေလိုက်ခွေလျက် နေသည်။

ရွာသူရွာသားများသည် ဤမြွေကြီးနားသို့ မကပ်ရဲကြ၊ မုဆိုး ကို---ကမူ ခွေနေသော မြွေကြီးအနီး၌ ရပ်လျက် မြွေကြီး၏ ခေါင်းတည့်တည့်သို့ လှံဖြင့် တအားထိုးသတ်လိုက်သည်။ ကို---သည် ၄င်းမြွေသေကြီးကို အိမ်သို့ယူဆောင်၍ ခုတ်၊ ဖျက်၊ တုံးတစ်ပြီး ချက်ပြုတ်ပါတော့သည်။ ထို့နောက် သူငယ်ချင်း အပေါင်းအသင်းများနှင့် တပျော်တပါး မူးယစ်သောက်စားကြသည်။

ကို---သည် မြွေကြီးကို သတ်ဖြတ်၊ ချက်ပြုတ် စားသောက်ပြီးကတည်းက တဖြည်းဖြည်း အတင့်ရဲကာ လူမိုက်လုပ်လာသည်။ မူးလာလျှင် မိုက်စကားပြော၍ မိုက်ရိုင်းလာသည်။ အထူးသဖြင့် ယာကူလီ သူရင်းငှားလုပ်စားသူ လူရိုးကြီး ကိုမောင်ခွေးကို ညနေအရက်မူးတိုင်း ရန်ပြုတတ်သည်။

တနေ့၌ လူရိုးကြီးကိုမောင်ခွေးသည် ကို---၏ မူးသံ၊ ဆူသံကြားသဖြင့် မိမိတဲအိမ်ထဲ ပြေးဝင်သွား၏။ ထုံးစံအတိုင်း ကို---က ကိုမောင်ခွေးကို ရန်စရုံမက အရက်မူးလာ၍ ဟေ့ ငခွေး၊ မင်းဘယ်မှာလဲ၊ ခုမင်းကို ငါသတ်မလို့ကွ-ဟု ကြုံးဝါး၍ ကိုမောင်ခွေး၏ တဲအိမ်တွင်းသို့ ဓားရှည်ကိုင်ကာ ၀င်သွားသည်။ ထိုအခါ မိမိခံရမည်ကို အကြောက်ကြီးကြောက်နေသော ကိုမောင်ခွေးသည် မိမိဆုပ်ကိုင်ထားသောလှံဖြင့် ကို---၏ ရင်ဝကို တအားထိုးစိုက်လိုက်ပါသည်။ သူ၏ ဒုစရိုက်က သူ့ကို စီရင်သွားလေပြီ။ အလွန်ရိုးသားလှပါသည်ဆိုသော ကိုမောင်ခွေးမှာလည်း တရားဥပဒေအရ လူသတ်မှုဖြင့် အဖမ်းခံရလေသည်။

( သန်းရွှေဦး-ကလေး )
*********************************************************************************
( ကိုယ်ချင်းမစာသူ၏ ကံ )

ကျွန်မနှင့် အတူ တာဝန်ကျသူ ဆရာမနှစ်ယောက်တို့သည် ရုံးကိစ္စတခုအတွက် ၁၅-၉-၉၈ နေ့တွင် တာဝန်ကျရွာမှ မိမိနေအိမ်သို့ ခဏပြန်လာခဲ့ကြသည်။
တာဝန်ကျရွာမှ တဆင့် ရထားဆိုက်ရာ ဘူတာရုံသို့ ၅-မိုင်ဝေးသောခရီးကို ခြေကျင်လျှောက်လာခဲ့ကြသည်။ ထိုဘူတာမှတဆင့် အစုန်ရထားစီးပါမှ အိမ်သို့ရောက်ကြပေမည်။ ကျွန်မတို့အဖွဲ့ ဘူတာရောက်ပြီး တနာရီခန့်အကြာတွင် ရထားသည် ဥသြရှည်သံဆွဲကာ ဘူတာရုံအတွင်းသို့ ၀င်ရောက်လာသည်။

ရထားရပ်သည်နှင့်တပြိုင်နက် ဘူတာတွင်းရှိ ခရီးသည်များ အားလုံး ပျားပန်းခပ်မျှ လှုပ်ရှားနေကြသည်။ မိမိတို့ လိုရာခရီးသို့ ရောက်အောင် ရထားပေါ်တက်ရောက် နေရာယူကြသည်။ ဆင်းသူဆင်း၊ တက်သူတက်နှင့် ရထားတွဲမှာ ဆူညံနေပေသည်။ ကျွန်မတို့အဖွဲ့သည်လည်း တတိယမြောက်တွဲပေါ် တက်လိုက်ကြသည်။ ရထားပေါက်ဝတွင် ကုန်ပစ္စည်းများ ပြည့်နှက်နေသဖြင့် အတွင်းသို့ တိုးဝင်ခဲ့ကြသည်။ သို့သော် ထိုင်စရာ နေရာပင် မရရှိကြပေ။ သို့နှင့် ကျွန်မတို့လည်း မတ်တတ်ရပ်ကာ ရထားအထွက်ကိုသာ မျှော်နေမိတော့သည်။

ထိုစဉ် ရထားပေါ်သို့ တာဝန်ရှိသူများ တက်လာကာ-
ဒီတွဲမှာရှိတဲ့ ခရီးသည်တွေအားလုံးချင်ဗျား၊ ခုံပေါ်မှာ တင်ထားကြတဲ့ ပစ္စည်းတွေကို အောက်ချပေးကြပါ။ ဒါမှ မတ်တတ်ရပ်နေတဲ့သူတွေ ထိုင်လို့ရမှာ-ဟု ချိုသာယဉ်ကျေးစွာ ပြောလာပါသည်။
ပစ္စည်းပိုင်ရှင် အားလုံးလိုလိုပင် မိမိတို့ပိုင် ပစ္စည်းများကို ခုံအောက်သို့ ချလိုက်ကြသည်။ သို့သော် မိန်းမကြီးတဦးသည် မသိကျိုးနွံပြုကာ မျက်နှာလွဲနေလိုက်သည်။ တာဝန်ရှိသူများက ပထမအကြိမ် တောင်းပန်သည်။ မရ။ ဒုတိယအကြိမ် တောင်းပန်သည်။ ဂရုမစိုက်။ တတိယအကြိမ်တွင် တာဝန်ကျ မီးရထားရဲများက ရောက်လာကာ ထိုမိန်းမကြီး၏ ပစ္စည်းများကို ဆွဲချထားလိုက်ကြသည်။

ပစ္စည်းများ အောက်သို့ရောက်သွားပြီး ဖြစ်သဖြင့် စောစောက ပစ္စည်းများနေရာတွင် လူများအစားဝင်ထိုင်လိုက်ကြသည်။ သည်လိုနှင့် ကျွန်မတို့လည်း နေရာရလိုက်ကြသည်။ ကျွန်မတို့နည်းတူ မတ်တတ်ရပ် ခရီးသည်အားလုံး ၀မ်းသာကြသည်။

ကျေးဇူးတင်လိုက်တာ သားတို့ရယ်။ နို့မို့ရင် အဘွားတော့ မရပ်နိုင်၊ ရပ်နိုင် ရပ်စီးရတော့မှာ။ သားတို့တတွေ ဘေးမသီရန်မခဘဲ လိုရာဆန္ဒ ပြည့်ဝကြပါစေ-စသည်ဖြင့် တုန်တုန်ယင်ယင်နှင့် ဆုပေးနေသော အဘွားကြီးသည် အသက် ၈၀-နီးပါးခန့် ရှိနေပေပြီ။

ကြီးသူကို ရိုသေခြင်းမရှိ၊ ရွယ်တူကို လေးစားခြင်း မပြု၊ ငယ်သူကို သနားညှာတာမှု မရှိသောမိန်းမကြီးသည် သူ့စေတနာနှင့်သူ အကျိုးပေးလေပြီ။ ခရီးသည် အချင်းချင်း စာနာထောက်ထားမှု လုံးဝမရှိသော မိန်းမကြီးသည် ထိုရထားနှင့် မလိုက်ရတော့ဘဲ ဘူတာတွင် ကျန်ရစ်ခဲ့လေသည်။

( ညိုညိုသိမ့်-၀န်းသို )

( မြတ်မင်္ဂလာ ၁၉၉၉-ခု စက်တင်ဘာလ )

No comments: