Thursday, August 27, 2009

မေတ္တသုတ်အကျိုး ခံစားရသူ

လွန်ခဲ့သော သုံးနှစ်ခန့်က ဖြစ်ပါသည်။ ကျောင်းကပွဲတခုတွင် ကျွန်မကို လိုက်နှောင့်ယှက်နေသည့် သူငယ်လေးတဦးကို ကျွန်မသည် ဒေါသအလျောက် ရိုက်ခဲ့မိသည်။ ဒေါသဟူသည် ဆင်ခြင်ဉာဏ်ကို ကင်းမဲ့စေတတ်သည် မဟုတ်ပါလော။ လျှပ်တပြက် ဒေါသကြောင့် ပြုခဲ့မိသည့် အမှားတခုသည် ကျွန်မအသက်ကိုပင် ခြိမ်းခြောက်လာပါတော့သည်။ ကျွန်မတို့မြို့နယ်တွင် အချို့မှာ ထောင်မကြောက်၊ တန်းမကြောက်၊ ပြဿနာဖြစ်လာလျှင် ဓားနှင့်သာ ဖြေရှင်းတတ်သည်။

ထို့ကြောင့် ကျွန်မသာမက ကျွန်မ၏ မိသားစုနှင့် ခင်မင်သူတို့မှာလည်း စိုးရွံ့ထိတ်လန့်နေကြသည်။ သည်အတိုင်းထိုင်၍ ကြောက်နေလျှင် ကျွန်မအသက် ဓားတွင် ပါသွားနိုင်ပါသည်။ နောက်ဆုံး ကြံရာမရသည့်အဆုံး ကျွန်မသည် ဘုရားစင်ရှေ့တွင် နံနက်တခါ ညတခါ ငါးပါးသီလယူပြီး မေတ္တသုတ် ကိုးခေါက်စီရွတ်၍ မေတ္တာပို့ အမျှဝေသည့်အလုပ်ကို နေ့စဉ် ပြုလုပ်ပါသည်။

မေတ္တသုတ်ရွတ်သည့်အခါတိုင်း ထိုသူငယ်လေး၏ မျက်နှာကိုမြင်အောင် အာရုံစိုက်ပြီး ရွတ်ပါသည်။ ဘုရားရှင်ကို ရည်စူး၍လည်း ကျွန်မ၏ခန္ဓာနှင့် အသက်ကို နေ့စဉ်လှူပါသည်။
ဘုရားရှင်၏ တန်ခိုး မေတ္တာ၏ တန်ခိုးတို့ကြောင့် ကျွန်မ အကျိုးထူး ခံစားရပါသည်။ အကြောင်းမှာ ကျွန်မကို အခဲမကျေဖြစ်နေသော သူငယ်လေးသည် အမြင်မှန်ရပြီး သူ့မိဘနှင့်အတူ ကျွန်မအိမ်သို့လာပြီး တောင်းပန်သောကြောင့်ပင်။

ကျွန်မတို့မြို့တွင် သည်လိုကိစ္စမျိုး မရှိခဲ့ဘူးပါ။ ထို့ကြောင့် လူတိုင်း အံ့သြကြသည်။ ကျွန်မကို ကံကောင်းသည်ဟု ပြောကြပါသည်။ အမှန်မှာ ဘုရားရှိခိုးသည့်အကျိုး မေတ္တသုတ် ရွတ်ဖတ်ရသည့်အကျိုးများ ဖြစ်ပါသည်။ ဤအဖြစ်ကလေးကို ကျွန်မ တသက်မမေ့နိုင်ပါ။

( နိုမီကို )

( မြတ်မင်္ဂလာ ၂၀၀၁-ဖေဖော်ဝါရီလ )

No comments: