Friday, August 7, 2009

မေတ္တာ အကျိုး

ကျွန်မသည် မူလတန်းပြ ဆရာမတဦး ဖြစ်သည်။ ကလေးမြို့နှင့် ၇-မိုင်ခန့်ဝေးသော ရွာ၏ မူလတန်းကျောင်းသို့ စက်ဘီးဖြင့် နေ့ချင်းပြန် ကျောင်းတက်လေ့ရှိသည်။ အိမ်မှ စထွက်ကတည်းက မေတ္တသုတ်ကို ရွတ်ဆို၍ သွားပါသည်။ ယခုဆိုလျှင် လုပ်သက် ၇-နှစ် ရှိနေပေပြီ။ လမ်းတွင် ဘာအန္တရာယ်မှ မကြုံဖူး၊ မဖြစ်ဖူးခဲ့ပါ။

၁၉၉၅-၉၆ စာသင်နှစ်က ဖြစ်သည်။ ကျွန်မစာသင်သည့် မူလတန်းကျောင်း ရောက်ခါနီးတွင် လယ်ကွင်းပြင်ကြီး ရှိသည်။ ထိုလယ်ကွင်းပြင်ထဲ၌ ကျွဲကျောင်းနေသော အသက် ၆၀-ကျော် ဘကြီး တဦးကို နေ့စဉ် တွေ့ရသည်။ ဘကြီးသည် ကျွန်မကို မျက်မှန်းတမ်းမိပြီး ခင်မင်ကာ နှုတ်ဆက်လေ့ရှိသည်။ ကျွန်မကလည်း ဘကြီးတို့ ဇနီး မောင်နှံ အတွက် လက်ဖက်ခြောက်၊ သတင်းစာ (စက္ကူများကို သနပ်ဖက်ဆေးလိပ်ကဲ့သို့ ဆေးလိပ်အဖြစ် အသုံးပြုရန်) စသည်တို့ကို မကြာခဏ ပေးလေ့ရှိသည်။ ဘကြီးတို့ ဇနီးမောင်နှံသည် သားသမီး မထွန်းကားပါ။

၁၉၉၆-၉၇ စာသင်နှစ်သို့ ရောက်သောအခါ တနေ့တွင် ကျွန်မစက်ဘီးဖြင့် ဘကြီးတို့တဲရှေ့မှ ဖြတ်ကျော်သွားမိသည်။ ထိုစဉ် ကျွန်မက-ဘကြီး နေကောင်းလား၊ ဒီနှစ် ကျွဲ မကျောင်းတော့ဘူးလား-ဟု မေးမိသည်။

မနှစ်က သူကျောင်းနေသော ကျွဲများသည် သူ၏ကျွဲများ မဟုတ်ပါ။ ရွာနီးချင်း ရွာကြီးတရွာမှ ကိုမောင်မောင်၏ ကျွဲများဖြစ်ကြောင်း တနှစ်လုံး ကျွဲကျောင်းပေးပါက ကျွဲကျောင်းခအဖြစ် စပါးတင်း ၂၀-ပေးမည်ဟု စာချုပ်ချုပ်ခဲ့ကြောင်း လက်တွေ့တွင်မူ လုံးဝမပေးသေးကြောင်း ဘကြီးက ပြောပြပါသည်။

ကျွန်မကလည်း ကိုမောင်မောင်နေသောရွာက ဥက္ကဋ္ဌကို အကူအညီတောင်းရန် ကိုမောင်မောင်ကိုလည်း နေ့စဉ်မေတ္တာပို့ရန် ဘကြီးကို အကြံပေးလိုက်ပါသည်။
ဤကဲ့သို့ ပြောပြီး ၇-ရက်ခန့်ကြာသောအခါ ဘကြီးနှင့် ကျွန်မတွေ့ဆုံကြသည်။ ထိုအခါ ဘကြီးက ကျုပ်လေ-ဆရာမပြောတဲ့အတိုင်း ဆောင်ရွက်ပါတယ်။ ငွေ ၅၀၀၀-ကျပ် ဥက္ကဋ္ဌဆီကနေ တဆင့် ရခဲ့တယ်။ ဒါနဲ့ပဲ ဘကြီးကျေနပ်လိုက်တယ်။

ကျွန်မအထင်တော့ ဘကြီး၏မေတ္တာအကျိုးကြောင့် ဆုံးပြီဟု ယူဆထားသော စပါးအစား ငွေ ၅၀၀၀-ကျပ် ရရှိခဲ့သည်-ဟု ယုံကြည်မိပါသည်။

( သင်းသင်းပျံ့-ကလေးမြို့ )
********************************************************************************

( ကားကြိတ်ခြင်းမှ ကင်းလွတ်သူ )

ရန်ကုန်တိုင်း တောင်ဥက္ကလာပမြို့နယ် ၁၁-ရပ်ကွက် ရတနာလမ်း အမှတ် ၃၁၈ (က) တွင် နေထိုင်လျက်ရှိသော မောင်ဇေယျာထွေးသည် ရန်ကင်း အခြေခံ အထက်တန်းကျောင်း န၀မတန်းတွင် ပညာသင်ယူနေသူ ဖြစ်သည်။
သူသည် ၁၉၉၈-ခုနှစ် စက်တင်ဘာ ၁-ရက်နေ့ နံနက် ၈-နာရီခွဲခန့်တွင် ၁၆-ကွေ့မှတ်တိုင်မှ ကျောင်းသို့ ၄၂-ဟီးနိုးကားဖြင့် ထွက်လာခဲ့သည်။ ရုံး၊ ကျောင်းတက်ချိန်ဖြစ်ပြီး ခရီးသည်များ ပြည်ကျပ်နေပါသည်။

ထို ၄၂-ဟီးနိုးကားသည် အ၀ိုင်းလေးမှတ်တိုင်နှင့် ရေခံစက်မှတ်တိုင်ကြားတွင် လက်ဝဲဘက်သို့ အရှိန်ဖြင့် ကွေ့လိုက်ရာ မောင်ဇေယျာထွေးမှာ မိမိကိုယ်ကို မထိန်းနိုင်ဘဲ ကားအပြင်သို့ ထွက်ကျသွားလေတော့သည်။ ကားအောက်သို့ကျပြီး သူ၏ဒူးခေါင်းနှင့် အောက်ပိုင်းတို့မှာ ရှေ့နှင့် နောက်ဘီးနှစ်ဘီးအကြားတွင် ရောက်နေပြီး အပေါ်ပိုင်းမှာ ကားအပြင်ဘက်တွင် ရောက်နေပါသည်။

ချက်ချင်းဆိုသလိုပင် ကား၏နောက်ဘက် နှစ်ဘီးတွဲက သူ၏ဒူးနှစ်ဖက်ပေါ်ကို ဖြတ်ကြိတ်လိုက်ရာ ခြေနှစ်ဖက်ကို ရှောင်လွှဲချိန် မရလိုက်ပါ။ ကားပေါ်မှ ခရီးသည်များကလည်း ဒီကလေးတော့ ဘ၀ပျက်ပါပြီ ဒုက္ခရောက်ပါပြီ-ဟု တွေးကြရင်း ထိတ်လန့်တုန်လှုပ်နေကြပါသည်။

သို့သော်လည်း သူ၏ လက်ဝဲဘက်ဒူးပေါ်တွင် ကားဘီးတာယာ၏ ပန်းအရာများ ထင်ကျန်ရစ်ပြီး လက်ယာဘက် ဒူးမှာ ဖိကြိတ်သောအရှိန်ဖြင့် နာကျင်သောဝေဒနာ ခံစားရကြောင်း ကားနှစ်ဘီးတွဲကို တစုံတဦးက မြှောက်ပင့်လိုက်သကဲ့သို့ ကားဘီးများမှာလည်း အပေါ်သို့ မြောက်တက်သွားသည်ကို ခံစားရကြောင်း သူ ပြန်ပြော၍ သိရှိရပေသည်။

ဆေးရုံကြီး အရိုးကုဌာနတွင် ဓာတ်မှန်ရိုက် စစ်ဆေးစမ်းသပ်သောအခါ ဒူုးဆံများ ကွဲအက်ခြင်း၊ ကြေသွားခြင်း၊ ဒးရိုး၊ ပေါင်ရိုးကျိုးခြင်း လုံးဝမဖြစ်ကြောင်း သိရပါသည်။ လက်ဝဲဘက်ခြေဖနောင့် အရွတ်ကျေဒဏ်ရာရပြီး လက်ယာဘက်ဒူးနှင့် ပေါင်မှာ ထိခိုက်နာကျင်မှုသာ ဖြစ်၍ ဆေးလိမ်း ဆေးစည်းခြင်းဖြင့် သက်သာကောင်းမွန်ခဲ့ပါသည်။

မောင်ဇေယျာထွေးသည် မရမ်းကုန်းမြို့နယ် ရှစ်မိုင် အရှင်သုမိတ္တာဘိဝံသ (စေတိယင်္ဂဏနှင့် အစိုးရ ဓမ္မာစရိယ)၏ ပေါက်စေတီကျောင်းတွင် ရှင်သာမဏေ၀တ်ခြင်း၊ ၁၀-ရက် တရားစခန်းဝင်ခြင်းဖြင့် ဗုဒ္ဓ၏ အဆုံးအမကို ခံယူခဲ့သူ ဖြစ်ပါသည်။ ဘီးလင်းမြို့နယ် တောင်စွန်းတောရ ဓမ္မဒူတ ဆရာတော် အရှင်ပညာဇောတ ဦးစီးသော တရးစခန်းကိုလည်း ၃-ကြိမ် ၀င်ခဲ့ဖူးပါသည်။ သူသည် ရန်ကင်း အ-ထ-က တွင် ပညာဆည်းပူးသည်။ ပညာထူးချွန်ပြီး အကျင့်စာရိတ္တ ကောင်းသူဖြစ်၍ လူချစ်လူခင်လည်း ပေါများသူဖြစ်သည်။

သို့ဖြစ်ပါ၍ လောကီကိစ္စတွင်မက လောကုတ္တရာတွင်လည်း ဗုဒ္ဓ၏ ဆုံးမသြ၀ါဒတရားမှန်ကို လက်ခံကျင့်သုံးနေသော မောင်ဇေယျာထွေးသည် ကားနှစ်ဘီးတွဲ အကြိတ်ခံရသော်လည်း မကျိုးမပဲ့ ဘ၀မဆုံးဘဲ နှလုံးစိတ်ဝမ်း အေးချမ်းစွာဖြင့် နေထိုင်လျက်ရှိကြောင်း ထူးခြားသော ဖြစ်ရပ်မှန်ကို အတုယူစရာ တင်ပြလိုက်ရပါသည်။

( ဂယာ တင်ဝင်း-မောင်းမြ )

( မြတ်မင်္ဂလာ ၁၉၉၉-ခု ဧပြီလ )

No comments: