Thursday, August 27, 2009

ဗုဒ္ဓဟောကြား သုခလေးပါး

လူတိုင်းသည် ကိုယ်စိတ်နှစ်ဖြာ ချမ်းသာမှုကို အလိုရှိကြ၏။ သတ္တ၀ါအားလုံးအပေါ်၌ မေတ္တာထားတော်မူသော ဗုဒ္ဓမြတ်စွာသည် ထိုအရေးကို မေ့လျော့ပေါ့ဆစွာ သဘောထားတော်မမူ။ တနေ့သ၌ အနာထပိဏ်သူဋ္ဌေးကြီးကို သုခလေးမျိုး ဟောတော်မူသည်။ တောင်မြို့ မဟာဂန္ဓာရုံ ဆရာတော်ကြီးသည် စတုက္က အင်္ဂုတ္တိုရ်တွင် ဟောကြားခဲ့သော ထိုသုခလေးမျိုးကို အကျယ်ညွှန်ပြတော်မူခဲ့သည်။

အတ္ထိသုခ-
ယောက်ျားတို့၏ လုံ့လ၀ီရိယအား လက်ရုံးအားကိုးဖြင့် ချွေးကျအောင် ရှာဖွေစုဆောင်းထားအပ်သော တရားသောနည်းလမ်းဖြင့် ရအပ်သော စီးပွားဥစ္စာတို့သည် ငါ့မှာရှိပေတကား-ဟု စဉ်းစားလိုက်သောအခါ ထိုစီးပွားစုပြီးဖြစ်သူမှာ စိတ်ချမ်းသာမှုတမျိုး ဖြစ်ပေါ်လာ၏။ ထိုချမ်းသာမှုကို အတ္ထိသုခ-ရှိလို့ ချမ်းသာခြင်း-ဟု ခေါ်သည်။

ဘောဂသုခ-
ထိုသို့အပင်ပန်းခံ၍ တရားသဖြင့်ရအောင် စုဆောင်းထားအပ်သော ဥစ္စာစီးပွားတို့ဖြင့် အိမ်တိုက်တည်ဆောက်ကာ ထိုက်တန်သော အသုံးအဆောင်၊ အစားအသောက်တို့ကို သုံးစွဲစားသောက်ရသောအခါနှင့် ကုသိုလ်ကောင်းမှု ပြုရသောအခါတို့၌ ငါသည်-တပင်တပန်း ရှာထားသော စီးပွားတို့ဖြင့် ချမ်းသာစွာ သုံးစွဲစားသောက်ရပေသည်။ ကုသိုလ်ကိုလည်း ပြုရပေသည်-ဟု တွေး၍ စိတ်ချမ်းသာမှု၊ ကိုယ်ချမ်းသာမှု ဖြစ်ရ၏။ ထိုချမ်းသာသည် ဘောဂသုခ-ခံစားရလို့ ချမ်းသာခြင်း-ဟု ခေါ်သည်။

အာနဏျသုခ-
ထိုသို့ ကြိုးကြိုးစားစား ရှာဖွေထားသော ဥစ္စာရှင်သည် သူတပါးအထံမှ ကြွေးမယူရသဖြင့် မည်သူမှ ကြွေးတောင်းလာဖွယ်မလို၊ ကြွေးမရှိပုံကို စဉ်စားမိသောအခါ စိတ်ချမ်းသာမှု ဖြစ်ရ၏။ ထိုချမ်းသာမှုကို အာနဏျသုခ ကြွေးမြီကင်း၍ ချမ်းသာခြင်းတမျိုး-ဟုခေါ်သည်။
( ကြွေးယူထားသူတို့သည် ထိုကြွေးအတွက် စိတ်မအေးဘဲ အမြဲပူပန်ရသည်။ မပေးတော့ဘူး-ဟု ညစ်ပြန်လျှင်လည်း နောင်သံသရာအရေးကို စဉ်းစားမိကာ ပူပန်ရမည်သာ။ ယခုဘ၀၌ ထုံပေနေသောကြောင့် မပူပန်ရစေကာမူ နောင်သံသရာ၌ကား ဧကန်ဒုက္ခတွေ့ရမည်သာ။)

အန၀ဇ္ဇသုခ-
စီးပွားဥစ္စာ ပြည့်စုံရကား ပြုလုပ်ပြောဆိုမှု ကိစ္စအစုစု၌ အကုသိုလ်ပြစ်၊ မင်းပြစ်ကင်းအောင် သန့်သန့်ရှင်းရှင်း ပြုလုပ်နိုင် ပြောဆိုနိုင်၏။ ဤသို့ပြောဆို ပြုလုပ်သည့်အတွက် အပြစ်မရှိပုံကို စဉ်းစားမိသောအခါ လွန်စွာ စိတ်ချမ်းသာ၏။ သေချိန်ရောက်၍ သေရစေကာမူ ကုသိုလ်ကောင်းမှုတွေ ပြည့်စုံနေရကား နောင်ဘ၀အတွက် ကောင်းရာဘ၀သို့ ရောက်ဖို့ရန် သေချာလျက်ရှိသောကြောင့် စိတ်ချမ်းသာ၏။ ဤချမ်းသာမှုကို အန၀ဇ္ဇသုခ အပြစ်ကင်းလို့ ချမ်းသာခြင်း-ဟုခေါ်သည်။

ဗုဒ္ဓမြတ်စွာ၏ တရားတော်များသည် သံသရာမှ လွတ်မြောက်ရေးကို အဓိကထားတော်မူ၏။ သို့သော် သတ္တ၀ါအားလုံးတို့၏ လောကီချမ်းသာရေးကို အခါအခွင့်အားလျော်စွာ ဟောတော်မူရာ ကြီးမြတ်လှသော ဗုဒ္ဓ၏ ကရုဏာတော်ကို အလေးထားကာ ကြိုးစားလိုက်နာရန် အားထုတ်ကြပါစို့။

No comments: