Wednesday, August 26, 2009

နိဗ္ဗာန်ဆော်

ရှေးအခါက လုလင်ပျိုတယောက်သည် ကုသိုလ်ကောင်းမှုပြုလုပ်ရန် ဤသို့ စဉ်းစားတွေးတော၏။ သူတပါးတို့ကို မညှဉ်းဆဲ၊ မသတ်ဖြတ်ရဘဲ ပြုရသောအမှုသည် အဘယ်အပြုအမူ ဖြစ်မည်နည်း။ ထိုအခါ ရတနာမြတ်သုံးပါးနှင့် စပ်သောအလုပ်ကို ပြုရန် နှိုးဆော်ခြင်းသည်သာ ကောင်းပေလိမ့်မည်ဟု ကြံစည်တွေးတောမိ၏။

ထိုသို့အကြံအစည်ဖြစ်ပြီးနောက် ကုသိုလ်ကောင်းမှု ပြုလုပ်ကြပါ၊ ဥပုသ်နေ့၌ ရှစ်ပါးသီလ ဆယ်ပါးသီလ ဆောက်တည်ကြပါ။ အလှူပေးကြပါ။ တရားနာကြပါ။ ရတနာမြတ်သုံးပါးကို ဆည်းကပ်ပူဇော်ကြပါ-ဟု နယ်ပေါင်းစုံသို့ ခြေကျင်လှည့်လည်၍ ဟစ်အော်ကြွေးကြော်လေ၏။
လုလင်ပျို၏ ဟစ်အော်ကြွေးကြော်သံကို ဘုရင်ကြီး ကြားသိရသောအခါ ခေါ်ယူမေးမြန်း၏။ ထိုအခါ ရတနာမြတ်သုံးပါး၏ ဂုဏ်ကျေးဇူးကို လူအပေါင်းသိစေရန်အတွက် ခြေကျင်လှည့်ကာ ဟစ်အော်ကြွေးကြော်ကြောင်း သိရှိသွား၏။ ဤတွင် ဘုရင်ကြီးက လုလင်ပျိုကို ပန်းဆိုင်းနှင့် မြင်းလိမ္မာတကောင် ချီးမြှင့်လိုက်လေသည်။

လုလင်ပျိုသည် ဘုရင်ကြီးပေးသနားသော အဆောင်အယောင်ဖြင့် မြင်းကိုစီးလျက် နိဗ္ဗာန်ဆော်လုပ်လေသည်။ ထိုကဲ့သို့ မြင်းစီးလျက် နိဗ္ဗာန်ဆော်လုပ်သည်ကို ဘုရင်ကြီး မြင်ရပြန်သောအခါ လုလင်ပျို၌ ဤမျှဖြင့် မပြည့်စုံနိုင်သေးဟု ထင်မြင်သွားသည်။
ထပ်မံ၍ သိန္ဓောမြင်းလေးကောင် ကသော ရထားကို ချီးမြှောက်ပြန်သည်။ သို့နှင့် နိဗ္ဗာန်ဆော်သည် သိန္ဓောမြင်းလေးကောင်ကသော ရထားဖြင့် နိဗ္ဗာန်ဆော်လုပ်ပြန်လေ၏။

ဤသည်ကို ဘုရင်ကြီး မြင်ပြန်သောအခါ ဤမျှနှင့် မပြည့်စုံသေးဟု မိန့်ကြားပြီး များစွာသောစည်းစိမ်ဥစ္စာ အသုံးအဆောင်တို့ကို ပေးသနားသည်။ ထို့ပြင် ဆင်တကောင်ကိုလည်း ပေးပြန်လေသည်။
နိဗ္ဗာန်ဆော်လုလင်ပျိုသည် နေ့စဉ် ၀တ်ကောင်းစားလှများကို ၀တ်ဆင်၍ ဘုရင်ကြီးပေးသနားသော ဆင်ကိုစီးလျက် နိဗ္ဗာန်ဆော်အမှုကို ပြုလေ၏။

ဤသို့သော ကောင်းမှုအကျိုးကြောင့် နိဗ္ဗာန်ဆော်လုလင်ပျို၏ ခန္ဓာကိုယ်မှာ မွှေးကြိုင်နေ၏။ ထို့ပြင် အာခံတွင်းကလည်း မွှေးကြိုင်သော ကြာပန်းရနံ့များ သင်းပျံ့လျက် ရှိလေ၏။
( ဓမ္မပဒ ဋ္ဌ-၂ )

( စံမြတ်သူ-သုံးဆယ် )

( မြတ်မင်္ဂလာ ၂၀၀၁-ဖေဖော်ဝါရီလ )

No comments: