Monday, August 10, 2009

ဘာသာရေး ပြဿနာ ( ၇၈ )

( ဘဒ္ဒန္တတိလောကသာရ ဖြေသည် )

(မေး ) ( မြတ်စွာဘုရားနှင့် ဆုပေးခြင်း )
အရှင်ဘုရား၊ မြတ်စွာဘုရားတို့မည်သည် ဆုပေးခြင်းမှ လွန်မြောက်ကုန်ပြီ-ဟူ၍ ကျမ်းစာတို့၌ ဖတ်ရှုကြည်ညိုဖူးသလို အချို့ကျမ်းစာတို့၌မူ မြတ်စွာဘုရား ဆုပေးတော်မူသည်ကို ဖတ်ရှုရပြန်ပါသည်။ ထိုကိစ္စနှင့် ပတ်သက်၍ ဘုရားတပည့်တော်များ သဘောမပေါက်ပါ၍ ရှင်းပြပေးစေလိုပါသည်ဘုရား။
( မောင်မြင့်ကြည်-မိတ္ထီလာမြို့ )

( ဖြေ )
လောကုတ္တရာဆိုင်ရာဆုပေးခြင်း၊ အကြောင်းအားလျော်စွာ ဆုပေးခြင်းများ ရှိပါသည်။ ထိုသို့ ရှိသော်လည်း မြတ်စွာဘုရားတို့သည် အဓိပ္ပါယ်မဲ့သော ဆုပေးခြင်းမျိုးကို ပေးတော်မူလေ့ မရှိပါ။ သာဓကအားဖြင့် တစုံတယောက် ချေဆတ်ရာ၌ ဇီဝတု-အသက်တရာ အနာမရှိ ဖြစ်ပါစေ-ဟူ၍ ( ယခုအခါ၌ ကလေးများ ချေဆတ်ရာတွင် ဇိတ်ဖွား-အသက်တရာ အနာမရှိ ဖြစ်ပါစေ-ဟု ဆိုလေ့ရှိသည်။ ဇီဝတု-မှ ကာလကြာ၍ ဇိတ်ဖွား-ဆိတ်ဖွား ဖြစ်လာသည်။) ဆုပေး ဆုတောင်း ပြုလေ့ရှိသည်။

ဘုရားလက်ထက်က ပုဏ္ဏားတို့ ဤသို့ဆိုလေ့ရှိရာ မြတ်စွာဘုရားက မဆို၍ ကဲ့ရဲ့သည်ကို ငါဘုရားတို့သည် (ယင်းကဲ့သို့) အဓိပ္ပါယ်မဲ့သော ဆုပေး ဆုတောင်းမှုမျိုးမှ လွန်မြောက်ကုန်ပြီ-ဟု မိန့်တော်မူပါသည်။ ရဟန်းတို့ ဤသို့ အချင်းချင်းဆိုကာ ဆုတောင်းကြလျှင် အာပတ်ပင် သင့်ပါသည်။
********************************************************************************

( မေး ) ( လူဝင်စား )
လစဉ်ထုတ် ဘာသာရေးမဂ္ဂဇင်း စာစောင်တွင် လူဝင်စားများအကြောင်း မကြာခဏ ဖတ်ရှုရပါသည်။ သို့ပါ၍ လူဝင်စားဆိုသည်မှာ ဟုတ်-မဟုတ် ဖြစ်နိုင်-မဖြစ်နိုင် ရှင်းလင်းဖြေကြားပေးပါရန် ရိုသေစွာ လျှောက်ထားအပ်ပါသည်ဘုရား။
( မောင်ထွန်းမြင့်-မဲတီးရွာ ကျောက်ပန်းတောင်းမြို့နယ် )

( ဖြေ )
ကျမ်းဂန်များတွင် ဇာတိဿရဉာဏ်ဟု ရှိသည်။ နောက်ဘ၀ အဆက်ဆက် ပြန်၍ သိနိုင်သောဉာဏ်မျိုး ဖြစ်သည်။ တဘ၀သာမဟုတ်၊ ဘ၀များစွာကိုပင် မြင်နိုင်သည်။ ဘုရားလောင်း တေမိမင်းသားသည် ထီးဖြူတော်အောက်တွင် အိပ်စက်နေရာမှ ထီးဖြူတော်ကိုမြင်၍ တတိယဘ၀က ဤတိုင်းပြည်၌ အနှစ် ၂၀-မင်းဖြစ်ခဲ့သည်ကို၎င်း။ ထိုမှနောက် ဒုတိယ ဘ၀၌ ငရဲတွင် အနှစ် ၂၀၀၀၀-ခံခဲ့ရသည်ကို၎င်း၊ ထိုငရဲဘ၀မှ ဤဘ၀သို့ ရောက်လာရသည်ကို၎င်း ဇာတိဿရဉာဏ်ဖြင့် မြင်သည်။

ထိုသို့မြင်သဖြင့် မင်းဖြစ်ရန် ကြောက်ရွံ့၍ စကားမပြောဘဲ ဆွံ့အသကဲ့သို့ နေကြောင်း တေမိဇာတ်တွင် ဆိုသည်။ ၄င်းကဲ့သို့ ဇာတိဿရာဉာဏ်ရှင်များမှာ ဘုန်းတန်ခိုးကြီးသူများသာ ဖြစ်သည်။ ဤခေတ်တွင် အနည်းအပါး ရှိသည်။ နောက်ဘ၀ကို ပြန်၍သိသူများမှာ ယခင်ဘ၀ ကွယ်လွန်ခါနီး၌ ရောဂါဝေဒနာဒဏ် အလွန်မခံရဘဲ တွေဝေမှု နည်းပါးစွာဖြင့် ကွယ်လွန်၍ လူ့ဘ၀၌ ပြန်လည်ဖြစ်လာသူများသာ ဖြစ်လေ့ရှိသည်။

ဝေဒနာဒဏ်မခံရဘဲ ရုတ်တရက် ကွယ်လွန်ကြသူများသည် လူဝင်စားခေါ် ဘ၀ဟောင်းကို ပြန်ပြောနိုင်ကြသည်ဟု လယ်တီဆရာတော် ရေးသားခဲ့ဖူးသည်။ လူဝင်စားအတုများလည်း ရှိသည်။ ၄င်းတို့မှာ ကိုယ်ဝန်ရှိသောမိခင်သည် မိမိရှေ့၌ ကြောက်လန့်ဖွယ်ရာ အသွင်ဖြင့် တစုံတဦး သေဆုံးသွားသည်ကို တွေ့ရ၍ စွဲစွဲလမ်းလမ်း ထင်မြင်နေစဉ် ထိုမိခင် ကလေးမွေးဖွားသော် ထိုကလေးသည် မိခင်စိတ်ဓာတ် ကူးစက်၍ စကားပြောတတ်စ၌ ထိုသေဆုံးသူပင်ဖြစ်ကြောင်း ပြောလေသည်။

သို့သော် ထိုကလေးမျိုးများမှာ ငယ်စဉ်ကသာ ပြော၍ ကြီးသောအခါ မေ့လျော့သွားလေသည်။ ၄င်းကို လူဝင်စားဟု ပြောသော်လည်း မိခင် စိတ်စွဲထင်မှုကြောင့် ဖြစ်လေရာ အစစ်မဟုတ်ပေ။ ဇာတိဿရဉာဏ် ရသူလည်း ရှိတတ်ရာ ယင်းတို့ကား လူဝင်စားအစစ်များဖြစ်၍ တသက်လုံးပင် အသေးစိတ် ပြောတတ်ကြသည်ဟု ဆိုပါသည်။
********************************************************************************

( မေး ) ( သူခိုးကြီးနေ့ )
အရှင်ဘုရား၊ တပည့်တော်တို့ ငယ်စဉ်အခါကစ၍ နှစ်စဉ်တန်ဆောင်မုန်းလပြည့်နေ့တိုင်း ဗုဒ္ဓဘာသာဝင်အပေါင်းတို့သည် ကောင်းမှုကုသိုလ် အထူးထူးတို့ကို ပြုလုပ်ကြပါသည်။ ထို့အတူ ယင်းနေ့တွင် ကုသိုလ်၏ဆန့်ကျင်ဘက်ဖြစ်သော သူခိုးကြီးနေ့ ဟူ၍လည်း ကြားသိရပါသည်။ ထိုသူခိုးကြီးနေ့သည် အမှန်တကယ် ရှိ-မရှိ ဖြေကြားပေးတော်မူပါဘုရား။
( ဦးစိန်ထွန်း-ဆင်တဲ၊ ပြည် )

( ဖြေ )
တန်ဆောင်မုန်းလပြည့်နေ့သည် ကြတ္တိကာနက္ခတ်နှင့် စန်းယှဉ်သည်။ ကြတ္တိကာနက္ခတ်ဟူသည် စောရနက္ခတ် သူခိုးနက္ခတ်ဖြစ်၍ ထိုနက္ခတ်နှင့်ယှဉ်၍ မွေးဖွားလာသူသည် သူခိုးဖြစ်တတ်သည်။ ထို့ကြောင့် ယတြာချေသော အနေဖြင့် လူငယ် လူရွယ်တို့သည် ထိုနေ့နက္ခတ်စန်းယှဉ်ချိန်တွင် တစုံတရာကို ခိုးဝှက်ခြင်းဖြင့် ကျိန်းကျေသည်ဆိုကာ ကျီးမနိုးပွဲကျင်းပသည်ဟု ပြောစဉ်ရှိသည်။ ဗုဒ္ဓဘာသာတရားနှင့် ဆန့်ကျင်သော ကိစ္စများဖြစ်၍ ဗုဒ္ဓဘာသာက ယင်းကျီးမနိုးပွဲ သူခိုးကြီးနေ့ပွဲကို အားမပေးပါ။ အစိုးရကလည်း အားမပေးဘဲ ဥပဒေဖြင့်ပင် ပယ်ဖျက်ခဲ့သဖြင့် ယခုခေတ်တွင် ပျောက်ကွယ်သွားခဲ့ပါသည်။
*********************************************************************************

( မေး ) ( ဥမှ ပေါက်သောလူသား )
အရှင်ဘုရား၊ လူသည် ပဋိသန္ဓေလေးပါးလုံးမှ ဖြစ်နိုင်သည်ဟုဆိုပါသည်။ ဇလာဗုဇ၊ သံသေဒဇ၊ သြပပါတိက-တို့မှာ ဘုရားလက်ထက်က ထင်ရှားသော်လည်း အဏ္ဍဇ-ဥမှပေါက်သောလူသားမှာ မထင်ရှားပါ၊ စာလာ ပေလာ မတွေ့ရပါ။ ထို့ကြောင့် အဏ္ဍဇပဋိသန္ဓေ စာပေထင်ရှားရှိပါက ညွှန်ပြပေးစေလိုပါသည်ဘုရား။
( တပည့်တော်-နန္ဒ၀ံသ၊ ထားဝယ်မြို့ )

( ဖြေ ) လူ၏ ပဋိသန္ဓေလေးပါးအကြောင်း စာလာ ပေလာ ရှိသော်လည်း အဏ္ဍဇပဋိသန္ဓေဆိုင်ရာ သာဓကအနေဖြင့် သာရတ္ထသင်္ဂဟ (မြန်မာအခေါ်)၊ သာရသင်္ဂဟ (သီရိလင်္ကာအခေါ်) ကျမ်း (သီရီလင်္ကာ အက္ခရာမှ မြန်မာပြန် ရိုက်နှိပ်ထားသော သာရသင်္ဂဟ (နှာ-၁၉၀) ယောနိဝိဘာဝနကထာ) တွင်-အဏ္ဍဇာပိ ဟောန္တိ ကုန္တပုတ္တာ ဒွေဘာတိက ထေရာဝိယ-ဟု ဖော်ပြထားပါသည်။

သာသနာနှစ် ၂၀၀-ကျော် ပါဋလိပုတ်ပြည် အသောကမင်းလက်ထက်က တောမုဆိုးတဦးသည် ဟိမ၀န္တာတောစပ်မှ ကိန္နရာမ တဦးကို ဖမ်းယူခေါ်ဆောင်လာ၍ ပေါင်းသင်းနေထိုင်သည်။ ထိုကိန္နရာမသည် မုဆိုးကို အစွဲပြု၍ ဥမှ သားနှစ်ယောက် ပေါက်ဖွားကြောင်း၊ ၄င်းသားနှစ်ယောက် အရွယ်ရောက်သော် ၀ရုဏရဟန္တာ အရှင်မြတ်ထံ၌ ရဟန်းပြု၍ ရဟန္တာများ ဖြစ်ကြကြောင်း ဆိုပါသည်။

တဆက်တည်း ဖော်ပြလိုသည်မှာ ဇလာဗုဇ-အမိဝမ်းမှ ပေါက်ဖွားမှုမှာ ထင်ရှားလှပါသည်။
သံသေဒဇ-အညှိမှ ပေါက်ဖွားသည့် သာဓကများမှာ ပဒုမ္မာကြာပန်းမှ ပဒုမ၀တီ စသည်။ မြန်မာတွင် မယ်လမု-လမုပင်မှ ပေါက်ဖွားသူ။ ဝေဠုဝတီ-၀ါးမှပေါက်ဖွားသူများဖြင့် သိသာပါသည်။
သြပပါတိက-ကိုယ်ထင်ရှားဖြစ်သူမှာ ဘုရားလက်ထက်က အမ္ဗပါလိ ဖြစ်ပါသည်။ ယင်းမှာ ကိုယ်ထင်ရှား ၁၆-နှစ်အရွယ် ဖြစ်လာသည်။ ဥယျာဉ်အတွင်း သရက်ပင်အနီးတွင်ဖြစ်၍ ဥယျာဉ်စောင့်က အမ္ဗပါလိ-ဟု အမည်ပေးပြီး ခေါ်ယူမွေးမြူထားကြောင်း နောင်တွင် ရဟန္တာမ ဖြစ်သွားကြောင်း ထေရီအပါဒါန်တွင် ပါရှိပါသည်။
*********************************************************************************

( မေး ) ( ပဋ္ဌာန်းနှင့် အကြားအမြင်ဆရာများ )
အရှင်ဘုရား၊ ယခုခေတ်အခါ၌ ပေါ်ပေါက်ခေတ်စားနေသော ဗေဒင်၊ လက္ခဏာဟောသူ၊ အကြားအမြင်နှင့် နတ်ဟောစားသူတို့က နေအိမ်များတွင် ပဋ္ဌာန်းဒေသနာတော်ကို ရွတ်ဖတ်ပူဇော်ခြင်း မပြုရန် တိုက်တွန်းဟောပြောနေကြပါသည်ဘုရား။ တပည့်တော်တို့အနေဖြင့် ပဋ္ဌာန်းဒေသနာတော်ကို နေအိမ်တွင် ရွတ်ဖတ်ပူဇော်ရန် သင့်-မသင့်နှင့် ခရီးသွားလာသောအခါ အရေးကြီးသော အကြောင်းကိစ္စရပ်များနှင့် ရင်ဆိုင်ကြုံတွေ့ရသော အခါများတွင် ရွတ်ဖတ်ရန် သင့်-မသင့်ကို ဖြေကြားပေးတော်မူပါဘုရား။
( မောင်စိန်လှအောင်(ခ) မောင်မိုးဟိန်းကျော်၊ ပုသိမ်မြို့ )

( ဖြေ )
မြတ်စွာဘုရား၏ ပရိတ်တော်များနှင့် ပဋ္ဌာန်း စသော တရားဒေသနာတော်များကို ရွတ်ပွားခြင်းဖြင့် ဗေဒင်၊ လက္ခဏာနှင့် ဆေးဝါးဓာတ်စာများ ပိုမိုထက်မြက် အစွမ်းထက်ကြသည်ဟုသာ ဆိုပါသည်။ စာပေများတွင် မြတ်စွာဘုရား ပွင့်တော်မူ၍ ဓမ္မစကြာ-စသော တရားဒေသနာများ ဟောကြားတော်မူလျှင် ထိုအချိန်က ရှိကြသော စူဠဂန္ဓာရီ ဆရာ၊ အကြားအမြင် နတ်ဆရားများ လုံးဝအစွမ်းမထက်ပဲ တန်ခိုးအာနုဘော်များ ပျောက်ပျက်ကုန်ကြောင်း ပါရှိပါသည်။

ဗုဒ္ဓဘာသာ သမ္မာနွယ်ဝင် သူတော်စင်များအနေဖြင့် နေအိမ်မှာ ဖြစ်စေ၊ ခရီးသွားလာသောအခါမှာဖြစ်စေ၊ အရေးကြီးသောအကြောင်းကိစ္စရပ်များနှင့် ရင်ဆိုင်တွေ့ကြုံရသောအခါများတွင် ဖြစ်စေ၊ ပဋ္ဌာန်းဒေသနာ၊ ဓမ္မစကြာနှင့် ပရိတ်တရားတော်များကို များများရွတ်ဆိုရန် သင့်ကြောင်း ပြောလိုပါသည်။
********************************************************************************

( မေး ) ( ကုသလာ ကုသလံ ဇဟံ )
အရှင်ဘုရား၊ ကုသလာ ကုသလံ ဇဟံ-ဘုရား ရဟန္တာတို့သည် ကုသိုလ် အကုသိုလ်ကံတို့ကို စွန့်၏။ မပြုလုပ်တော့ဟု ဆိုကြပါသည်။ ကုသိုလ်မပြုလုပ်တော့-ဟူသော အဆိုကို တပည်တော် မရှင်းလင်းပါဘုရား။
ဗုဒ္ဓသည် လောကတခွင် မည်သူမျှမရှည်နိုင်သည့် ကောင်းမှုကြီးကို ၄၅-၀ါပတ်လုံး ဆောင်ရွက်ခဲ့ပါသည်။ သို့သော် ယင်းကောင်းမှု ကုသိုလ်၏ အကျိုးကိုကား တဏှာကင်းသော အတ္တမရှိတော့သော ဗုဒ္ဓအတွက် အကျိုးပေးရန် နေရာနှင့် အချိန်တို့သည် မရှိတော့ပါ။ ထို့ကြောင့် ထိုကံတို့သည် စွန့်ပစ်ခြင်းခံရသည်ဟု ယူဆမိပါသည်။ တပည့်တော် ဉာဏ်မမီ၍ အယူအဆ မှားယွင်းနေပါလျှင် သနားသောအားဖြင့် ပြုပြင်ပေးပါရန် ရိုသေစွာ လျှောက်ထားအပ်ပါသည် အရှင်ဘုရား။
( ဦးဆိုင်မြင့်-လယ်ဦးစုရွာ၊ လေးမျက်နှာမြို့ )

( ဖြေ )
ကုသလာ ကုသလံ ဇဟံ-၀ဋ်ဆင်းရဲ၏ မူလဖြစ်သည့် အ၀ိဇ္ဇာ တဏှာ စသော ကိလေသာတို့ကို အရဟတ္တမဂ်ဉာဏ်ဖြင့် စွန့်ပယ်လိုက်ခြင်း ဖြစ်သည်။ ထိုသို့ စွန့်ပယ်လိုက်သဖြင့် လောကီကုသိုလ်ဖြစ်ခြင်း၏ မူလဖြစ်သော အ၀ိဇ္ဇာ၊ တဏှာတို့ ကင်းရှင်းသွားသည်။ ထို့ကြောင့် ပုညာဘိသင်္ခါရသည် သံသရာ၌ တဖန် ပဋိသန္ဓေဖြစ်ခြင်းကို မစွမ်းနိုင်။ ထိုသို့ ၀ဋ်ဆင်းးရဲ၏ မူလဖြစ်သော ကိလေသာတို့ကို စွန့်ခြင်းသည်ပင် ဖလူပစာရ (အကျိုး၏အမည်ကို အကြောင်း၌ တင်စား၍) ကုသိုလ်ကို စွန့်သည် မည်၏။(နမက္ကာရ ဋီ-၇) ဟု ဋီကာတို့က ဖွင့်ဆို၏။

ဘုရား ရဟန္တာတို့သည် အဘိသမာစာရိက၀တ် အကျင့်တို့ကို ပြုခြင်းဖြင့် ကောင်းမှုတို့ကို အမြဲပင် ပြုပါ၏။ သို့သော် ၀ဋ်မြစ်ပြတ်ပြီးဖြစ်၍ ကောင်းကျိုးပေးဖွယ် မလိုအပ်တော့၍ ကုသိုလ်ကို စွန့်ပယ်သည်ဟု ဆိုရပါသည်။ အကုသိုလ်ကိုကား အထူးဆိုဖွယ် မလိုတော့ချေ။
*********************************************************************************

( မေး ) ( ပရိတ်နှင့် အမျှဝေ )
အရှင်ဘုရား၊
၁။ ကွယ်လွန်သူများအတွက် သပိတ်သွပ်ပေးရာတွင် ပရိတ်ရွတ်ပြီးမှ အမျှဝေလျှင် ပရိတ်၏စွမ်းအားကြောင့် ကွယ်လွန်သူများ မလာရောက်နိုင်။ အမျှဝေပြီး ပရိတ်ရွတ်မှသာလျှင် တမလွန်ဘ၀မှ လာရောက်နိုင်သည်ဟု ဆိုသည်မှာ ဟုတ်ပါသလား။
၂။ ဘုန်းတော်ကြီးများထံမှ ၈-ပါးသီလခံယူခြင်း မပြုဘဲ မိမိအိမ်ရှိ ဘုရားရှေ့၌ မိမိအလိုလို သီလခံယူ၍ ရနိုင်ပါသလား။ ဖြေကြားပေးတော်မူပါဘုရား။
( သေန့်ရှင်း-အ-ထ-က က၀မြို့ )

( ဖြေ )
၁။ ရက်လည်ဆွမ်းသွတ်ခြင်း စသည်၌ ငါးပါးသီလခံ၊ ပရိတ်ရွတ်ပြီးမှ ရေစက်ချ အမျှဝေရခြင်းမှာ သဘာဝပင်ဖြစ်ပါသည်။ ဆွမ်းစသည် လှူဒါန်းခြင်းသည် ဒါနဖြစ်၍ သရဏဂုံနှင့် ငါးပါးသီလ ခံယူခြင်းသည် သီလဖြစ်သည်။ ပရိတ်စသည် နာကြားခြင်းးသည် ဘာဝနာဖြစ်သည်။

မိမိတို့၏ ဒါန သီလ ဘာဝနာမှုတို့ကို တမလွန်သို့ ရောက်ရှိနေသူအား အမျှဝေခြင်းဖြစ်၍ အနီးသို့လာရောက်နိုင်သည် ဖြစ်စေ၊ မလာရောက်နိုင်သည်ဖြစ်စေ၊ တမလွန်ဘ၀ ရောက်နေသူ (သို့မဟုတ်) ပရဒတ္တူပဇီဝိက ပြိတ္တာဖြစ်နေသူသည် အမျှဝေသည်နှင့် တပြိုင်နက် ၀မ်းမြောက်ဝမ်းသာ သာဓုခေါ်နိုင်လျှင် ပြိတ္တာဘ၀မှ ကျွတ်လွတ်နိုင်ပါသည်။

လှူဒါန်းမှု သီလခံယူမှု ပရိတ်နာယူမှုတို့သည် တမလွန်ဘ၀ရောက်နေသူ၏ ကိစ္စမဟုတ်၊ အိမ်ရှိလူတို့၏ ကိစ္စသာ ဖြစ်သည်။ အိမ်ရှိလူတို့က မိမိတို့၏ ကိုသိုလ်အဖို့ကို အမျှဝေ၍ တမလွန်ရောက်နေသူက သာဓုခေါ်နိုင်ဖို့သာ လိုပါသည်။

၂။ မိမိကိုယ်တိုင် သီလခံယူနိုင်ကြောင်းကို ဤကဏ္ဍတွင် ဖြေဆိုခဲ့သည်မှာ များလှပါပြီ။ သို့သော် ဘုန်းတော်ကြီးများ အနီးတွင်ရှိလျက် ဘုန်းတော်ကြီးထံ သီလမခံယူဘဲ ဘုရားထံကိုယ်တိုင် ခံယူရန်ကား မသင့်ပါ။ ကျောင်းသို့မသွားနိုင်၍ ကျောင်းဝေး၍ အကြောင်းမညီညွတ်၍ သီလခံယူခြင်းမျိုးအတွက် ဘုရားရှေ့တွင် အသံထွက်၍ သီလခံယူရန် သင့်ပါသည်။
********************************************************************************

( မေး ) ( ကြက်ပျံမကျ )
အရှင်ဘုရား၊ ယခုခေတ် စာနယ်ဇင်းများတွင် ပရိသတ်များ ကြက်ပျံမကျ စည်ကားသည်ဟု ရေးသားလေ့ရှိပါသည်။ တပည့်တော် မှတ်သားရဖူးသည်မှာ ကြက်ပျံမကျကို မြို့ရွာစည်ကားခြင်း၌သာ သုံးနှုန်းရသည်ဟူ၍ ဖြစ်ပါသည်။ အရင်းအမြစ်နှင့်တကွ ဖြေကြားပေးတော်မူစေလိုပါသည်ဘုရား။
( ပညာသီရိ-သံဖို-မန္တလေး )

( ဖြေ ) ကြက်ပျံမကျ မူရင်းမှာ ကုက္ကုဋသမ္ပာတိက၊ ကုက္ကုဋသမ္ပာဒိက ဖြစ်သည်။ ယင်း၏အဖွင့်ကို ပါထိက၀ဂ္ဂ အဋ္ဌကထာ (ဒီ-ဋ္ဌ ၃-၃၉) တွင် ကြည့်နိုင်ပါသည်။
ဆိုလိုရင်းမှာ ကြက်သည် ရွာတရွာ၏ အစွန်အိမ်အမိုးထက်မှ ပျံ၍ အခြားရွာ၏ အစွန်အိမ်အမိုးထက်သို့ ပျံကျနိုင်လောက်အောင် ရွာချင်းနီးစပ်နေသည်။ (သို့မဟုတ်)
ရွာတရွာ၏ အစွန် (စည်းရိုး)မှ အခြား တရွာ၏ အစွန် (စည်းရိုး) သို့ ကြက်၏ခြေဖြင့် သွားလာနိုင်လောက်အောင် ရွာချင်းနီးသည်ဟု ဆိုလိုသည်။

ကြက်သတ္တ၀ါသည် ဝေးဝေးလည်း မပျံနိုင်၊ ဝေးဝေးလည်း မသွားနိုင်၍ ကြက်၏ပျံခြင်း သွားခြင်းမျှလောက်သာ ရွာချင်းဝေးသည်။(၀ါ) ရွာချင်းဆက်မျှ စည်ကားသည်ဟု ဆိုလိုပါသည်။ လူစည်ကားသည်ကို မဆိုလိုပါ။ လူပရိသတ် စည်ကားသည်ကို တိုးမပေါက်အောင် စည်သည်။ ကြိတ်ကြိတ်တိုး စည်ကားသည်ဟုသာ သုံးနှုန်းလေ့ရှိပါသည်။ ထို့ကြောင့် ကြက်ပျံမကျ ဟူသော ဝေါဟာရမှာ မြို့ရွာစည်ကားသည်ကိုသာ သုံးစွဲရိုး ရှိပါသည်။
ပျို့ကဗျာများတွင်-ပြည့်ကြွယ်နိုင်ငံ၊ ချမ်းသာခံ၍၊ ကြက်ပျံမကျ၊ အနန္တတိ၊ (ဓမ္မပါလ-၄၅)၊
ရွာချင်းဆက်မျှ၊ ကြက်ပျံမကျ၊ သာမောလှသား၊ မြို့ပြကျေးရွာ၊ (ဥမ္မာဒန္တီ-၈)။
ကြက်ပျံမကျ၊ ဘုရားဘုန်းမြိုက်၊ သိမ်းပိုက်တော်မူ။ (နေမိရကန်-၂၁) စသည်စပ်ဆိုကြသည်ကို တွေ့နိုင်ပါသည်။

( မြတ်မင်္ဂလာ ၁၉၉၉-ခု ဇွန်လ )

No comments: