Thursday, September 10, 2009

သား ၄-ယောက်တို့၏ ဖခင်

မြတ်စွာဘုရား သာဝတ္ထိပြည် ဇေတ၀န်ကျောင်း၌ သီတင်းသုံးနေစဉ် မဟာသာလအမည်ရှိသော ပုဏ္ဏားတယောက်သည် ဟောင်းနွမ်းစုတ်ပြတ်သည့် အ၀တ်များဖြင့် မြတ်စွာဘုရားကို ၀င်ရောက်ဖူးမြော်သည်။
ဗုဒ္ဓက အသင်ပုဏ္ဏား၊ ချမ်းသာစွာ နေရပါ၏လော-ဟု မေးရာ ပုဏ္ဏားလည်း မြတ်စွာဘုရား တပည့်တော်၏ သား ၄-ယောက်တို့သည် မိမိတို့၏ မယားများနှင့် တိုင်ပင်၍ ကျွန်ုပ်ကို သူတို့နေသောအိမ်မှ နှင်ထုတ်လိုက်ကြပါသည်ဘုရား-ဟု လျှောက်၏။

ထိုအခါ ဗုဒ္ဓသည် မဟာသာလပုဏ္ဏားအား သား ၄-ယောက်တို့ ၀င်ရောက်နေထိုင်သော မဏ္ဍပ်ထဲတွင် ရွတ်ဆိုရန် ဂါထာလေးပုဒ်ကို သင်ကြားပေးလိုက်၏။ ထိုဂါထာများ၏ အဓိပ္ပါယ်ကား-
အကြင်သားတို့ဖြင့် ငါသည် နှစ်သက်ဝမ်းမြောက်ခဲ့ရ၏။ အကြင်သားတို့၏ ကြီးပွားခြင်းကို ငါသည် အလိုရှိခဲ့၏။ ခွေးများသည် ၀က်ကို မောင်းနှင်ထုတ်သကဲ့သို့ ထိုသားတို့သည် မိမိတို့မယားများနှင့် တိုင်ပင်ကာ ငါ့ကို အိမ်မှ မောင်းထုတ်လိုက်ကြကုန်၏။

ယုတ်မာသော ရက္ခိုသ်တို့သည် သားအသွင် ဖန်ဆင်းကာ ငါ့ကို အဘ အဘ-ဟု ခေါ်ကြလေယောင်တကား။ ထိုသားတို့သည် အရွယ်လွန်သော ငါ့ကို စွန့်ပစ်ထားကြ၏။

အိုမင်း၍ အသုံးမပြုနိုင်သောမြင်းကို အစာမကျွေးဘဲ ထားသကဲ့သို့ သားမိုက်တို့၏ ပစ်ထားခြင်းခံရသော အဘအိုသည် သူတပါးအိမ်တို့၌ တောင်းစားရ၏။

ငါ၏ လက်စွဲတောင်ဝှေးကပင် မြတ်သေး၏။ ငါ့ကို ရိုသေကျိုးနွံခြင်း မရှိသော သားတို့သည် မမြတ်ကုန်။ တောင်ဝှေးသည် ကြမ်းကြုတ်သော နွားခွေးတို့ကို တားမြစ်နိုင်၏။ မှောင်ထဲ၌ ရှေ့သွားဖြစ်နိုင်၏။ ချော်လဲသည်ရှိသော် တောင်ဝှေး၏အစွမ်းအားဖြင့် ရပ်တည်နိုင်၏။

ဤသို့ ပုဏ္ဏားက ရွတ်ဆိုသောအခါ သားလေးယောက်တို့က အသီးသီးငိုကြွေးကြပြီး မိမိတို့ အမှားများကို တောင်းပန်ကြလေသည်။ သားလေးယောက်တို့သည် တလှည့်စီ ကျွေးမွေးပြုစု စောင့်ရှောက်ကြသဖြင့် မဟာသာလပုဏ္ဏားလည်း မြတ်စွာဘုရား အဆုံးအမနှင့်အညီ အသက်ထက်ဆုံး ချမ်းသာစွာ နေထိုင်သွားလေသည်။
ကျမ်းကိုး-သံယုတ္တနိကာယ်။

( အင်္ကုရ-ဘီအေ )

( မြတ်မင်္ဂလာ ၂၀၀၁-ဧပြီလ )

No comments: