Tuesday, September 29, 2009

ထေရဝါဒ ဗုဒ္ဓဘာသာနှင့် မဟာယာန ဗုဒ္ဓဘာသာ နှိုင်းယှဉ်ဝေဖန်ချက် ( ၄ )

( ယခင်လမှ အဆက် )

ငါဘုရားပရိနိဗ္ဗာန်စံပြီးသည့်နောက် တယောက်သောပုဂ္ဂိုလ်က အယူအဆသစ် တင်သွင်းလာတော့မယ်ဆိုရင် အဲဒီဝါဒကို ပိဋကတ်သုံးပုံထဲမှာ ထည့်ကြည့်လိုက်ပါ။ ညှိကြည့်လိုက်ပါ။ သုတ္တန်တွေထဲ ထည့်ကြည့်၊ ကိုက်ညီတယ်၊ ဝင်သွားတယ်ဆိုရင် ဒါ လက်ခံနိုင်တယ်။ သုတ္တန်မှာ မဝင်ရင် ဝိနည်းမှာထည့်ကြည့်ပါ၊ ဝိနည်းထဲ ဝင်သွားသလား၊ ဒါဆိုရင် ကောင်းတယ်၊ မဝင်ဘူးဆိုရင် အဘိဓမ္မာထဲမှာ ထည့်ကြည့်ပါ။ အဲဒါ အံဝင်ခွင်ကျ ဝင်သွားရင်ကောင်းတယ်၊ သုတ္တန် ဝိနည်း အဘိဓမ္မာ ဘယ်မှာမှမဝင်ဘူးဆိုရင် အဋ္ဌကထာမှာထည့်ကြည့် ၊ အဋ္ဌကထာထဲဝင်သွားတယ်၊ ညီညွတ်တယ်ဆိုရင် ကောင်းတယ်၊ အဋ္ဌကထာထဲမှာ မဝင်ဘူးဆိုရင် ဋီကာထဲမှာ ထည့်ကြည့်ပါ။ ဝင်သွားရင်ကောင်းတယ်၊ ဘယ်မှာမှ ထည့်လို့မရရင် အာစရိယဝါဒနှင့် ညှိကြည့်ပါ၊ အာစရိယဝါဒဆိုတာ အရှင်မဟာကဿပ၊ အရှင်အာနန္ဒာ၊ အရှင်ဥပါလိတို့လို ပုဂ္ဂိုလ်များကို ပြောတာ။ အာစရိယဝါဒထဲ ဝင်သွားတယ်ဆိုရင်လဲ တော်ပါသေးတယ်။ အဲဒီလေးမျိုးနှင့် ညှိလို့မရတဲ့ အယူအဆဝါဒမျိုးဆိုရင် ပစ်ပယ်လိုက်။ အဲဒါ မဟာပဒေသလေးပါးပဲ။

ပါဠိတော်ရယ်၊ အဋ္ဌကထာရယ်၊ ဋီကာရယ်၊ အာစရိယဝါဒရယ် အားလုံးလေးပါးပေါ့။ အဲဒီ အားကိုးအားထားပြုရမဲ့ အာစရိယဆိုတာက မဟာပဒေသလေးပါးကို လိုက်နာကျင့်ဆောင်တဲ့ ပုဂ္ဂိုလ်မျိုး ဖြစ်ရမယ်။
လက်မခံတဲ့ဆရာမျိုးနဲ့ဆိုရင် မဖြစ်ပြန်ဘူး။ ပါဠိတော် အဋ္ဌကထာ ဋီကာတွေကို ကျွမ်းကျင်တဲ့ပုဂ္ဂိုလ် ဖြစ်ဖို့လိုတယ်။ ဒါကြောင့် ပေါ်ပေါက်လာတဲ့ ဝါဒကွဲများကို မဟာပဒေသနှင့်သွင်းညှိပြီး ကိုက်ညီဖို့ အရေးကြီးတယ်ဆိုတာ။ ဒါဟာ သာသနာကို ကြည့်ညိုတဲ့ပုဂ္ဂိုလ်တွေ အကျေအလည်သိထားဖို့ လိုအပ်တယ်။ နောက်ပြီး တန်ခိုးကိစ္စနဲ့ပတ်သက်ပြီး ပြောစရာတွေရှိတယ်။ အဲဒါနဲ့ပတ်သက်ပြီး ကေဝဋသုတ် ဟောတဲ့အခါကျမှ ဟောပြမယ်။ အခုတော့ ဝါဒဆိုင်ရာကိစ္စနှင့် ပတ်သက်ပြီး ဒါလောက်ပဲ မှတ်ထားဦး။

( မြတ်ဗုဒ္ဓရုပ်ကလာပ် မီးရှို့၍ မလောင်)
မြတ်စွာဘုရားပျံလွန်ပြီး ရုပ်ကလာပ်တော်ကို ကုသိနာရုံအရှေ့ဘက် နံ့သာထင်းပုံပေါ်မှာ တင်ပြီး မီးပူဇော်ကြဖို့ ဆောင်ရွက်ကြတယ်။ အဲဒီအခါမှာ မလ္လာမင်းများက မီးရှို့ဖို့ ပြင်ဆင်ကြတာ။ မီးက ရှို့လို့မလောင်ဘူး။ အရှင်အနုရုဒ္ဓါက ကြည့်နေတယ်။ ထင်းပုံကြီးက မီးမစွဲနိုင်ဘူး။ နောက်တော့ နတ်တွေက အရှင်အနုရုဒ္ဓါကို လာလျှောက်ကြတယ်။ အခုအခါမှာ အင်မတန်အရေးကြီးပုဂ္ဂိုလ် မရောက်လာသေးလို့ မီးမလောင်တာပါ။ လာမည့် သာသနာတော်တရပ်လုံး ပခုံးပေါ်လွဲပြောင်းတဲ့ ပုဂ္ဂိုလ်ကြီး ရောက်အောင်စောင့်ပါဦး၊ အလောင်းတော်ကို ဖူးမြော်ခွင့်ပေးပါဦး။ မီးသင်္ဂြိုဟ် မစောပါနဲ့။ သာသနာတော်ကို ဆက်လက်ထမ်းဆောင်မည့်ပုဂ္ဂိုလ်က လာနေတုန်းရှိပါသေးတယ်။ ရောက်အောင်စောင့်ပါဦး။ သာသနာတော်ကြီးတရပ်လုံးကို အရှင်အာနန္ဒာလဲ မထမ်းဆောင်နိုင်ဘူး။ အရှင်အနုရုဒ္ဓါ၊ အရှင်ဥပါလိတို့လဲ မထမ်းဆောင်နိုင်ဘူး။ ထမ်းဆောင်ဖို့ ပခုံးလွှဲပြောင်းပေးထားတဲ့ ပုဂ္ဂိုလ်က အရှင်မဟာကဿပသာ ဖြစ်ပါတယ်။

( အရှင်မဟာကဿပ တာဝန် )
အရှင်မဟာကဿပရဲ့ ဂုဏ်စွမ်းရည်ကို သိမြင်ပြီး ဘဒ္ဒိယတိုင်းပြည်က အရှင်မဟာကဿပအလောင်း လူဝတ်နဲ့ ရာဇဂြိုဟ်ပြည်ကို ကြွလာတဲ့အချိန်မှာ မြတ်စွာဘုရားက ခြောက်မိုင်လောက်သွားကြိုပြီး စောင့်နေခဲ့ဖူးပါတယ်။ အရှင်မဟာကဿပ ရဟန်းမဖြစ်မီ လူ့ဘ၀ကစပြီး ကြိုဆိုတာဟာ-ဒီပုဂ္ဂိုလ်ဟာ ငါဘုရားမရှိတဲ့နောက် သာသနာကို ထိန်းသိမ်းမယ့်ပုဂ္ဂိုလ် ဖြစ်လာမယ်ဆိုတာ ကြိုတင်မြင်တော်မူလို့-ဖြစ်ပါတယ်။ ဆရာသမားတွေက ချီးမြောက်တဲ့နေရာမှာ ဒီလိုကြိုတင်မြော်မြင်ပြီး မြင်ကြတာဟာ အလွန်အံ့ကြချီးကျူးစရာ ကောင်းတယ်။ ဒီအရည်အချင်းကို ဧကဒဿီလို့ ခေါ်ရမှာပေါ့။ အနာဂတ်ရှည် ဝေးစွာသောကာလကို မျှော်ပြီး မြင်တတ်တဲ့ပုဂ္ဂိုလ်မြတ်တွေပဲ။ ဒီလိုပုဂ္ဂိုလ်မျိုးကို လောကစက္ခု (လောကမျက်လုံး) လို့လဲခေါ်ရတယ်။ ရှင်မဟာကဿပက ဆွေမျိုးတွေလဲ အလွန်ပေါတယ်။ သူဌေးမျိုးဖြစ်တဲ့ ရှင်မဟာကဿပကို ဆွေမျိုးတွေက အလွန်နူးညံ့ပြီး ချောမွတ်နေတဲ့ ကာသိတိုင်းဖြစ်အဝတ်ကို နှစ်ထပ်သင်္ကန်းကြီး ချုပ်ပြီး လှူလိုက်ကြတာကို အရှင်မဟာကဿပက ပခုံးပေါ်တင်လာတယ်။ ဘုရားရှင်အနီးရောက်လို့ ရှိခိုးဦးချတဲ့အခါ ဘုရားရှင်က အဲဒီသင်္ကန်းကို ကိုင်ကြည့်ပြီးတော့ ချောမွေ့လိုက်တာ၊ နူးညံ့လိုက်တာ ဆိုပြီး ချီးမွမ်းစကား ပြောတယ်။ ဒီတော့ ကဿပအရှင်က မြတ်စွာဘုရား နှစ်သက်တယ်ဆိုပြီး သူ့ပခုံးပေါ်က သင်္ကန်းကြီးကို ကပ်လှူလိုက်တယ်။ ဘုရားကိုယ်တော်က ရှင်မဟာကဿပ တိစီဝရိတ်ဓုတင် ဆောင်တော်မူတာ သိတယ်။ အမြဲ တောမှာနေတယ်။ ဓုတင် ၁၃-ပါးကို အမြဲဆောင်တော်မူတယ်။ ဓုတင်ပုဂ္ဂိုလ်ဖြစ်တော့ တနေ့လုံးမှာ တထပ်တည်း တထိုင်တည်းသာ ဘုဉ်းပေးတော်မူတယ်။ ဒီလိုပုဂ္ဂိုလ်မြတ်မျိုး သာသနာတော်မှာ ခေါင်းဆောင်ဖြစ်စေတော်မူဖို့ အထူးရွေးချယ်တော်မူတာ။ တိစီဝရိတ်ဆောင် သံဃာတော်က သူ့သင်္ကန်းကြီး ဘုရားလှူလိုက်တော့ သူ့မှာ သင်္ကန်းနှစ်ထည်သာ ကျန်တော့တယ်။ မြတ်စွာဘုရားက သူကိုယ်တိုင် ဆောင်ထားတဲ့ နှစ်ထပ်သင်္ကန်း ကြမ်းကြမ်းထူထူကြီးကို အရှင်မဟာကဿပ ပခုံးပေါ် တင်ပေးလိုက်တယ်။ နောင်လာမည့် သာသနာတော်ကို ပခုံးလွှဲပေးလိုက်တာ ဖြစ်တယ်။

( လောက်အပြည့်နဲ့ အဝတ် လျှော်ဖွပ်ယူသော မြတ်ဗုဒ္ဓ)
ဘုရားရှင်ရဲ့ ပံ့သကူသင်္ကန်းကလဲ အလွန်မွန်မြတ်တဲ့ သင်္ကန်း။ ဘုရားကိုယ်တော်တိုင် သုဿာန်သွားပြီး ပုဏ္ဏာဆိုတဲ့ ကျွန်မတယောက် အလောင်းက ခွါယူလာခဲ့တာ။ ပုဏ္ဏာကျွန်မအလောင်းကို ပိတ်တွေနဲ့တင်းကျပ်အောင်စည်းပြီး သင်္ချိုင်းမှာ သွားတွေ့တော့ မြတ်စွာဘုရားက ပုပ်ပွနေတဲ့ အလောင်းကောင်ပေါ်ကအဝတ်ကို ခွါယူတယ်။ အသားတွေပါ ကပ်ပါလာပြီး တရှဲရှဲမြည်အောင် ခွါယူလိုက်တော့ လောက်တွေ တဖွားဖွားတက်နေတာကို ဝါးခြမ်းပြားနဲ့ ခြစ်ထုတ်ရတာ။ တပြည်လောက်ရတယ်။ အဲဒီအသားပုပ်တွေ ကပ်နေတဲ့အဝတ်ကို အလောင်းကောင်က ခဲခဲယဉ်းယဉ်း ခွါယူပြီး အစိရဝတီမြစ်ထဲမှာ ရေလျှော်တော်မူတယ်။ ဒီအခါမှာ မဟာပထဝီမြေကြီး ပြင်းစွာလှုပ်သွားတယ်။ အဲဒီအဝတ်စကို သင်္ကန်းချုပ်၊ အညိုရောင်ဆိုးပြီးတော့ ဘုရားသုံးဆောင်တော်မူတာ။ အဲဒီလိုပံ့သကူ သင်္ကန်းဟာ မြတ်လွန်းလို့ ဥက္ကဋ္ဌပံ့သကူလို့ ခေါ်တယ်။ ဒီထက်ညံ့တဲ့ ပံ့သကူမျိုးကိုတော့ သြမက ပံ့သကူလို့ခေါ်တယ်။

အခုခေတ်မှာလဲ ပံ့သကူပစ်တာ ရှိကြပါတယ်။ ခုခေတ်မှာတော့ ဆိုင်ပေါ်က အကောင်းဆုံးသင်္ကန်း ဝယ်ယူပြီး စင်စင်ကြယ်ကြယ် လုံလုံခြုံခြုံထုပ်ပြီး ဖုန်မတင်အောင် ဖုံးဖိပြီး ထားတတ်ကြတယ်။ ပြီးတော့မှ ဆရာတော်များ ကြွလာမည့်လမ်းမှာ ချထားပြီး ဘယ်ဆရာတော် ကောက်ယူသွားသလဲဆိုတာ ကွယ်ရာက ချောင်းကြည့်လေ့ရှိတယ်။ ပံ့သကူဆိုတာ မြေမှုန်အထပ်ထပ် ပေကပ်နေပြီး မြေပေါ်ပစ်ထားတာ။ အခုတော့ မြေမလိမ်း၊ ရွှံ့မတင်၊ ဖုန်မဝင်အောင် အပေါ်ကအဝတ်အထည်တွေဖုံးပြီး ထားလေ့ရှိကြတယ်။ ဘုန်းကြီး သပိတ်အိုင်မှာနေတုန်းက ကိုယ်တိုင်ကောက်ယူပြီး သုံးဖူးတာ။ ကိုယ်တွေ့ပြောပြနေတာ။ အဲဒီပုဏ္ဏာအလောင်းက ခွါယူထားတဲ့သင်္ကန်းကို ဘုရားရှင်က ရှင်မဟာကဿပ ပခုံးပေါ် တင်ပေးလိုက်တယ်။ ဒီသာသနာတခုလုံးကို ထိန်းသိမ်းစောင့်ရှောက်ဖို့ တာဝန်ကို ငါ့အပ်လိုက်တာပဲဆိုတာ အရှင်ကလဲ နားလည်တော်မူတယ်။ ဘုရားမရှိတဲ့နောက် သာသနာတော်ကို ငါစောင့်ရှောက်ရမယ်။ ငါ့ပခုံးပေါ် သာသနာတခုလုံး ရောက်သွားပြီ။ အဲဒါ ဘုရားရှင်ကိုယ်တော်တိုင် သာသနာ့တာဝန်ကို လွှဲအပ်ခဲ့ပုံ ထေရဝါဒပုံစံပဲ။ မဟာယာနခေါင်းဆောင်ရွေးပုံက တမျိုး။ ဒါနောက်ပိုင်း ပြောပြမယ်။

( ကိုယ်တုံးလုံး တက္ကတွန်းက နတ်ပန်းပွင့် ထီးဆောင်းလာပုံ )
မြတ်စွာဘုရား ပရိနိဗ္ဗာန်စံပြီးပြီ။ ခုနစ်ရက်မြောက် လွန်ပြီးပြီ။ ပခုံးပြောင်းတာဝန် ပေးအပ်ခြင်းခံရတဲ့ ရှင်မဟာကဿပက အဝေးရောက်နေသေးတယ်။ ရှင်မဟာကဿပနှင့် တပည့်သံဃာတော်များက ကုသိနာရုံကိုလာဆဲ။ လမ်းမှာရှိသေးတယ်။ လမ်းခုလတ်မှာ အာဇီဝက တက္ကတွန်းကြီးတယောက်နဲ့ တွေ့တယ်။ အာဇီဝက တက္ကတွန်းက နိဂဏ္ဍနာဋပုတ္တရဲ့ ဂိုဏ်းအဖွဲ့ထဲကလူ။ သူတို့ဂိုဏ်းက အဝတ်မဝတ်ဘူး။ ဝတ်လစ်စလစ် ကျင့်တဲ့ဂိုဏ်း။ တုံးလုံကြီးနေတယ်။ ကဆုန်လ ပူတဲ့ရာသီဆိုတော့ အဝတ်မပါတဲ့ တက္ကတွန်းကြီးက ကြီးမားလှပတဲ့ ပန်းကြီးကို အလယ်က အရိုးတပ်ပြီး ထီးအဖြစ် ဆောင်းလာတယ်။ အဲဒီထဲက မြတ်စွာဘုရား ပရိနိဗ္ဗာန်စံတော့ နတ်များက ပန်းမိုးရွာချတာ။ ဒူးအထိမြုပ်အောင် ဖုံးလွှမ်းနေတာ။ ဒါကို ကောက်ယူပြီး ထီးလုပ်လာတာ။ ဒီထီးဟာ သာမညမဟုတ်။ နတ်ပန်းကို အရိုးတပ်လာတာဆိုတာ ရှင်မဟာကဿပက သိတယ်။ ကိုယ်တုံးလုံးကောင်ကြီးက နတ်ပန်းကို ထီးလုပ်ဆောင်းလာတာ။ ဘယ်လိုကြည်ညိုဖွယ်ကောင်းမလဲဆိုတာ ပရိသတ်များ မျှော်မှန်းကြည့်လိုက်ပေတော့။

မန္ဒာရဝနတ်ပန်းဆိုတာ ဘုရားပွင့်တော်မူတဲ့နေ့နဲ့ ပရိနိဗ္ဗာန်စံတော်မူတဲ့နေ့မှာ နတ်များ ပူဇော်ကြဲချကြတာ။ ဒီပန်းကိုမြင်တော့ ရှင်မဟာကဿပက မြတ်စွာဘုရား ပရိနိဗ္ဗာန်စံတော်မူပြီထင်တယ်ဆိုတာ တွေးတောစိတ်လေးနေတယ်။ တက္ကတွန်းအနားရောက်တော့ သင်-ဘယ်ကလာတာလဲ-လို့မေးတယ်။ ကျွန်ုပ် ကုသိနာရုံက လာခဲ့ပါတယ်-လို့ ပြောတယ်။ ဒါနဲ့ တို့များရဲ့ ဆရာဖြစ်တဲ့ ဂေါတမဗုဒ္ဓဘုရားနဲ့ တွေ့မြင်ခဲ့ရဲ့လား။ ဘာသတင်းများ ကြားခဲ့လဲ-လို့ မေးတော့ တက္ကတွန်းက ကြားတာပေါ့-အခု ကွယ်လွန်တာတောင် ခုနစ်ရက်ရှိသွားပြီ-လို့ ပြောတယ်။

( ငိုကြွေးမဆုံးသော ရဟန်းတော်များ )
ဒီသတင်းလဲကြားရော အရှင်မဟာကဿပ နောက်တော်ကပါလာကြတဲ့ ရဟန်းငါးရာထဲက ပုထုဇဉ်ရဟန်းတွေရယ်၊ သောတာပန်ရဟန်းတွေရယ်၊ သကဒါဂါမ်ရဟန်းတွေရယ်၊ သုံးမျိုးသောပုဂ္ဂိုလ်တွေက ဖြေမဆည်နိုင်ဘဲ အပြင်းအထန် ငိုကြွေးကုန်ကြတယ်။ အနာဂါမ် ရဟန္တာတွေကတော့ သောကကင်းနေပြီး တရားသဘောနဲ့ပဲ ဆင်ခြင်တယ်။ မငိုတော့ဘူး။ ဒီအချက်ကို ပရိသတ်များ သတိပြုပါ။ ရဟန္တာပုဂ္ဂိုလ်များ ရာဂနဲ့ဒေါသ ငြိမ်းနေပြီ။ သောကဆိုတာ ရာဂနဲ့ဒေါသရဲ့ အကျိုးဖြစ်တယ်။

ရဟန်းတော်တွေဟာ အပြင်းအထန် ငိုကြွေးကြပြီး ပရိနိဗ္ဗာန်စံတာ စောလှချည်လား။ လောကမှာ မျက်လုံးကွယ်သွားပြီ။ လောကသားတွေ အကန်းဖြစ်ကုန်ပြီ။ ရဟန်းတော်များဟာ တပါးတည်း မရပ်တည်နိုင်ဘဲ နှစ်ပါးတွဲနေရတယ်။ နှစ်ပါးတွဲလို့လဲ ထောက်တည်ရာမရနိုင်လို့ ငါးပါးတွဲပြီး ငိုကြတာ။ အကုန် ယိုင်လဲကုန်ကြတယ်။

သီတဂူဆရာတော်

( မြတ်မင်္ဂလာ ၂ဝဝ၁-ခု မတ်လ )


No comments: