Wednesday, October 28, 2009

စိတ်ရောဂါ ကာကွယ်ဆေး

သမီး
အတွေ့ဆိုတာ ဖဿလို့ခေါ်တယ်။
မျက်စိနဲ့ အဆင်းတွေ့တော့ မျက်စိအတွေ့၊
နားနဲ့ အသံတွေ့တော့ နားအတွေ့၊
နှာခေါင်းနဲ့ အနံ့တွေ့တော့ နှာခေါင်းအတွေ့၊
လျှာနဲ့ အရသာတွေ့တော့ လျှာအတွေ့၊
ကိုယ်နဲ့ ထိတွေ့မှုတွေ့တော့ ကာယအတွေ့-စတဲ့ အာရုံ ၅-ပါးတွေပေါ့။

ဒီလိုတွေ့ကြတော့ ဖဿ ပစ္စယာ ဝေဒနာ-အတွေ့ကြောင့် ခံစားမှုဖြစ်။
ဝေဒနာ ပစ္စယာ တဏှာ-ခံစားမှုကြောင့် သာယာစွဲလမ်းမှုဖြစ်။
တဏှာ ပစ္စယာ ဥပါဒါနာ-သာယာစွဲလမ်းမှု ဖြစ်ရာကနေပြီးတော့ အရမ်းကပ်ငြိစွဲလမ်းခြင်း ဖြစ်တော့တာပါပဲ။

အရမ်းကပ်ငြိစွဲလမ်းခြင်း ဆိုတဲ့ ဥပါဒါန်ကို ဘာနဲ့ဥပမာ ခိုင်းနှိုင်းပြထားသလဲဆိုတော့
မြွေက ဖားကို မလွတ်တမ်း ခဲထားသလိုတဲ့။
ဘင် လောက်က မစင်ကြိုက်ပြီး ဘ၀င်ခိုက်နေသလိုတဲ့။
မျောက်ဟာ မျောက်စေးနှဲနဲ့ ကပ်ငြိ မရုန်းထွက်နိုင်သလိုတဲ့။
အရူးလို့လဲ ခေါ်ဆိုကြပြန်တယ်။
ရာဂတဏှာ အားကြီး၍ ရူးသွပ်သူကို ရာဂုမ္မတ္တက-တဲ့။
ဓနဥစ္စာကို စွဲလမ်းကပ်ငြိ ရူးသွပ်သူကို ဓနုမ္မတ္တက-တဲ့။
ဒါကြောင့် အရမ်းတွယ်တာ ကပ်ငြိပြီဆိုမှဖြင့် ရူးသွပ်သွားနိုင်သည်အထိ ဖြစ်ကြရတယ်။

အရမ်းတွယ်တာ ကပ်ငြိ စွဲလမ်းခြင်းဆိုတဲ့ ဥပါဒါန် (အရူးရောဂါ) ကို ကာကွယ်တားဆီးနိုင်တဲ့ ဆေးကို သောက်သုံးထားရမယ်။ အဲဒီဆေးကတော့ သမထ, ၀ိပဿနာ ဘာဝနာဆိုတဲ့ ဆေးတွေပါပဲ။

( မောင်စန်းသော် )
(ချစ်သမီးသို့ စာအုပ်မှ)

No comments: