Monday, October 26, 2009

ထေရ၀ါဒ ဗုဒ္ဓဘာသာ နှင့် မဟာယာန ဗုဒ္ဓဘာသာ နှိုင်းယှဉ်ဝေဖန်ချက် ( ၁၃ )

( ယခင်လမှ အဆက် )

သဒ္ဓါဆိုတာကို အဘိဓမ္မာကျမ်းများမှာ စကြာမင်းကြီးရဲ့ ပတ္တမြားကဲ့သို့ သတ္တိရှိတယ်လို့ဆိုတယ်။ လေးကျွန်းလုံးကို အစိုးရတဲ့ စကြာမင်းမှာ ရတနာ ၇-ပါးရှိရာမှာ ပတ္တမြားရတနာဟာ တခုပါဝင်တယ်။ ပတ္တမြားရတနာရဲ့ စွမ်းရည်က ဘာဖြစ်သလဲဆိုရင် နွေခေါင်ခေါင် လမ်းဘေး မြောင်းထဲကရေအိုးခပ် အဲဒီ ပတ္တမြားကို ဒီရေအိုးထဲထည့်လိုက်။ ထည့်လိုက်ရင်
နံပါတ်(၁) ရေအိုးထဲမှာရှိတဲ့ အနည်အမှုန်၊ ရွှံ့နှစ်အားလုံး အောက်မှာ ထိုင်သွားတယ်။
နံပါတ်(၂) ရေမျက်နှာပြင် အပေါ်ယံမှာ ဖုံးနေတဲ့ မြူတွေ၊ အနည်တွေ၊ ဖုန်တွေ အကုန်လုံး ဘေးဖယ်ပြီး ကြည်နေတယ်။
ပြီးတော့ နံပါတ်(၃) ပူနေတဲ့ရေဟာ အေးသွားတယ်။
အနည်ထိုင်တာရယ်၊ မြူမှုန်တွေ ရှင်းသွားတာရယ်။ ပူနွေးနေတဲ့သဘောက အေးတဲ့သဘော ပြောင်းသွားတာရယ်။ အဲဒါတွေအားလုံး ပြုလုပ်နိုင်တာ စကြာမင်းကြီးရဲ့ ပတ္တမြားပဲ။

အဲဒါမျိုးပဲတဲ့။ ဗုဒ္ဓအကြောင်း ကြားလို့၊ သိလို့။ ဓမ္မအကြောင်း ကြားလို့၊ သိလို့။ သံဃာအကြောင်း ကြားလို့၊ သိလို့ သဒ္ဓါဖြစ်ပြီဆိုရင် ဒကာ ဒကာမတွေ နှလုံးသားထဲမှာ ဝေဒနာဝင်လာရင် ခုတင်က ရေနောက်အိုးထဲမှာ ပတ္တမြားထည့်လိုက်သလို
(၁) ကိလေသာတွေအားလုံး ထိုင်ပြီး ငြိမ်သွားတယ်။
(၂) စိတ်အပေါ်မှာ ဖုံးနေတဲ့ နီဝရဏတွေ ဖယ်ပြီးတော့ စိတ်ကြည်လာတယ်။
(၃) ပူနေတဲ့ စိတ်တွေဟာ အေးသွားတယ်။
ရေလိုပဲ၊ အဲဒါကြောင့် ကိလေသာတွေကို အနည်ထိုင်စေတယ်။ နီဝရဏတွေကို ခွါပစ်စေတယ်။ ပူလောင်တဲ့ စိတ်ကို အေးချမ်းစေတယ်။ အဲဒီလို ကြည်ညိုတဲ့သဒ္ဓါရှိရင် အားလုံးသော သူတော်ကောင်းတွေ မျက်မှောက်ဘ၀မှာ ဒီအကျိုး ၃-မျိုး ရရှိတယ်။

ဗုဒ္ဓအပေါ် ဓမ္မအပေါ် သံဃာတော်များအပေါ်မှာ သဒ္ဓါတရား ပျက်သွားပြီဆိုလို့ရှိရင် ကိုယ့်မှာ အဲဒီအကျိုး ၃-မျိုး ဆုံးရှုံးသွားတယ်။ ဒီ ၃-မျိုးမရှိတော့ဘူးဆိုရင် ဘ၀မှာ ဘယ်နေလို့ကောင်းတော့မလဲ။ ဒါကြောင့် ရတနာ ၃-ပါးအပေါ်မှာ သဒ္ဓါတရား ရောက်ကြစမ်းပါ။ ရောက်ရင် အကျိုး ၃-မျိုး လက်ငင်းရပါတယ်။ ခုတော့ ဘုရားအပေါ်မှာ သဒ္ဓါတရားက မရောက်နိုင်ကြဘူး။ ဥပမာ-ဘုရားတော်နောက်က လိုက်နေပြီးတော့ အလုပ်အကျွေးပြုတဲ့ ရဟန်း ၇-ပါးထဲက တပါးသောရဟန်း သုနက္ခတ္တ-တဲ့။ အဲဒီရဟန်းက ပုထုဇဉ်ပဲ ရှိသေးတယ်။ သူက ဘုရားနောက်က လိုက်သွားရင်းနဲ့ လမ်းမှာ ဂျိန်း-ဘုန်းကြီးတွေ သွားတွေ့တယ်။ ဂျိန်း-ဘုန်းကြီးဆိုတာ အ၀တ်မရှိဘူး။ ကိုယ်တုံးလုံးကြီးနဲ့။ မြေကြီးမှာ အိပ်တယ်။ မြေကြီးမှာ စားတယ်။ အဲဒီ ဂျိန်း-ဘုန်းကြီးတွေလဲ တွေ့လိုက်ရော သူကစဉ်းစားတယ်။ ဟာ-လောဘများ ကုန်နေလိုက်ကြတာ။ အဆောက်အဦး လက်မခံဘူး။ စားစရာခွက်တွေ ဘာတွေလဲ လက်မခံဘူး။ အ၀တ်အထည်လဲ လက်မခံဘူး။ လောဘကုန်နေလို့ ဖြစ်မယ်-တဲ့။ ဒီကိုယ်တုံးလုံး ဆရာကြီးတွေက ပစ္စည်း ၄-ပါးကို အကုန်ပယ်ပစ်တော်မူတယ်။ လက်မခံဘူး-ပေါ့။

မြတ်စွာဘုရားကတော့ ဒီပစ္စည်း ၄-ပါးက မှီခိုရာ ပစ္စည်း ၄-ပါးလို့ ဟောပြတယ်။ ဂေါတမဗုဒ္ဓကတော့ သူသီတင်းသုံးဖို့အတွက် အနာထပိဏ်ဆောက်တဲ့ကျောင်း ၅၄-ကုဋေတောင် ကုန်တယ်။ ဒီလောက် ကြီးကျယ်တာကြီးတွေတောင် လက်ခံတယ်။ ဟောဒီ ဂျိန်းကိုယ်တော်ကြီးတွေကတော့ သစ်ပင်ရိပ် မြက်ခြောက်ခင်းပြီး အိပ်တာပဲ။ ဒီကိုယ်တော်တွေကမှ လောဘကုန်တာ။ သိဒ္ဓတ္ထဂေါတမက လှူသမျှလက်ခံ၊ လောဘမကုန်သေးဘူး-ဆိုပြီးတော့ ကိုယ်တုံးလုံး ဂျိန်းဆရာတွေ တွေ့လာတဲ့ရဟန်း ၁-ပါးက ဘုရားအပေါ်မှာ သဒ္ဓါတရား ပျက်တယ်။

အဲဒီလို ဘုရား တရား သံဃာအပေါ်မှာ အတွေးခေါင်သွားတယ်။ ကိုယ်တုံးလုံးနဲ့ နေတဲ့သူကို ကိလေသာကုန်တယ်။ ပစ္စည်း ၄-ပါးနဲ့ သပ်သပ်ရပ်ရပ်နေသူကို ကိလေသာမကုန်ဘူးလို့ ထင်ရင် အဲဒါ စဏ္ဍာလဥပါသကာ ဖြစ်တယ်။ ရတနာ ၃-ပါးကို ဆည်းကပ်တော့ ဆည်းကပ်တယ်။ ဒါပေမဲ့ စဏ္ဍာလ ဖြစ်သွားတယ်။ စိတ်ကြမ်းသွားပြီလေ။ သဒ္ဓါတရား မရှိရင် ဒါကြမ်းသွားတယ်။ နောက်တမျိုးက စက်ဆုပ်ဖွယ်ကောင်းတဲ့ ဗုဒ္ဓဘာသာမျိုး ဖြစ်သွားတယ်။ နောက်တမျိုးက ညစ်ညူးတဲ့ အညစ်အကြေးတွေ စုပုံနေတဲ့ ဗုဒ္ဓဘာသာမျိုး ဖြစ်သွားတယ်။

နောက်တခါ ချစ်သားတို့ ကိုယ်ကျင့်တရား ပျက်ပြားလာတဲ့ ပုဂ္ဂိုလ်မျိုးဟာလဲပဲ ဥပါသကာစဏ္ဍာလ ဖြစ်နိုင်တယ်။ ကိုယ်ကျင့်သီလ ပျက်လာပြီဆိုရင် အခြေခံစောင့်ထိန်းရမယ့် ၅-ပါးသီလ ပျက်စီးရင် ဒါဟာ စဏ္ဍာလဥပါသကာပဲ။ အဲဒီနေရာမှာလဲ ပျက်စီးပုံက နှစ်မျိုးရှိတယ်။ သီလနဲ့ သီလရဲ့စွမ်းရည်သတ္တိကို ယုံတယ်။ လက်ခံတယ်။ ကျင့်သုံးတယ်။ ဒါပေမဲ့ မထိန်းသိမ်းနိုင်လို့ သတိအားနည်းလို့ ပျက်တာတမျိုး။
နောက်တမျိုးက ပါဏာတိပါတာ-သတ္တ၀ါတွေအသက်ကို သတ်ဖြတ်တယ်။ ဖျက်ဆီးတယ်။ အဲဒါ အကုသိုလ်ဖြစ်သလား။ ဘာမှ အကုသိုလ်မဖြစ်ဘူး။ အကုသိုလ်ဆိုတာ မရှိဘူး။ အဲဒီလို ခံယူချက်မျိုးတွေကို ခံယူပြီးတော့မှ သီလပျက်တယ်။ အဲဒါ ပိုဆိုးတယ်။

နောက်တခါ စဏ္ဍာလဥပါသကာဆိုတဲ့ ပုဂ္ဂိုလ်မျိုးဟာ ကောတုဟလဆိုတဲ့ မင်္ဂလာကို လက်ခံ၏-တဲ့။ မြတ်ဗုဒ္ဓက မင်္ဂတရား ၃၈-ပါး ဟောထားတာ ဘုန်းကြီးတို့ ရှင်းလင်းစရာမလိုဘူး။ မင်္ဂလာရဲ့ အဓိပ္ပါယ်က မကောင်းတဲ့ စရိုက်ဆိုးတွေကို ဖယ်ရှားပစ်ခြင်း-တဲ့။ ဒါကြောင့် အချက်ကောင်းတွေ ပြုစုပျိုးထောင်နေကြသမျှ တိုင်းပြည်နဲ့လူမျိုးမင်္ဂလာရှိတယ်။ မကောင်းတဲအကျင့်တွေ ဖယ်ရှားနေသမျှ ကာလပတ်လုံး တိုင်းပြည်နဲ့လူမျိုးမှာ အစဉ်အမြဲ မင်္ဂလာရှိနေမှာပဲ။ သဗ္ဗပါပဿ ၀ိနာသနံ၊ သဗ္ဗလောက ဟိတတ္ထာယ-လို့ ရွတ်ဖတ်နေကြတယ်။ ဒါပေမဲ့ ရွတ်ဖတ်နေရုံနဲ့မပြီးဘူး။ တကယ်ကျင့်ဖို့လဲ အရေးကြီးတယ်။ မင်္ဂလာရဲ့အဓိပ္ပါယ်ကို လူသားတွေ တကယ်နားလည်ပြီး ကျင့်သုံးကြမယ်ဆိုရင် ရှေးဦးစွာမင်္ဂလာရဲ့ အဓိပ္ပါယ်ကို နားလည်အောင် လုပ်ရမယ်။ နားလည်ပြီးမှ မကောင်းမှုက်ို ပယ်ရှား။ ကောင်းမှုကို ပွားများကြရမယ်။ ဘယ်လိုကျင့်သုံးကြမလဲ ဆိုတော့ မကောင်းမှုကို ကျင့်သုံးနေတဲ့ သတ္တ၀ါကို ဝေးဝေးရှောင်တာလဲပါတယ်။

၃၈-ဖြာမင်္ဂလာကို အကုန်လုံးအစီအစဉ်အတိုင်း နားလည်ကြပါ၏။ သို့သော် အဲဒီ မင်္ဂလာတွေ ရှိနေပါလျက်နဲ့ မနက်ခင်း အိပ်ရာကထ-ဟို ရွှေပြည်စိုးငှက်ကလေး တွန်သံကြားရင် မင်္ဂလာရှိလိုက်လေ။ ဒါ-သုတမင်္ဂလာ။ ဪ-ရှေ့ဝန်းထဲက လပြည့်ဝန်းကြီး ထွက်လာတာ ကြည့်ရတာ မင်္ဂလာရှိလိုက်လေ။ ဟာ-လငပုပ် မဲသွားပြီဟေ့။ ဒါ မင်္ဂလာမရှိဘူး။ အဲဒါတွေ ဘာခေါ်သလဲ ဒိဋ္ဌမင်္ဂလာ၊ သုတမင်္ဂလာမျိုးတွေပဲ။ ဟာ-ငါ မင်္ဂလာဆောင်သွားမလို့လုပ်တုန်း ပုပ်စော်နံလိုက်တာ။ မင်္ဂလာမရှိဘူး။ ဟာ-စံပယ်ပန်းရနံ့ ရသဟေ့၊ မွှေးတယ်။ မင်္ဂလာရှိတယ်။ ဒီလိုဟာတွေဟာ ဒိဋ္ဌမင်္ဂလာ၊ သုတမင်္ဂလာ၊ မုတမင်္ဂလာပဲ။ လူတွေက ဒါတွေကို အတိတ်နိမိတ်တွေ ကောက်ပြီးတော့ လုပ်နေကြတာ လောကမှာ အများကြီးပဲ။ အထူးသဖြင့် ဘုန်းကြီးတို့ အာရှကလူတွေ ပိုများတယ်။ ဗုဒ္ဓဘာသာထဲက လူတွေ ပိုများတယ်။

ဥပမာ-ဘုန်းကြီးက ကရင်ပြည်နယ်မှာ တရားသွားဟောတယ်။ မြတ်စွာဘုရားရဲ့ သာသနာတော်ထဲက ပစ္စည်း ၄-ပါးအကြောင်း ဟောတယ်။ ပစ္စည်း ၄-ပါးထဲကမှ ဆေးပစ္စည်းအကြောင်းကို ခွဲပြောတယ်။ အဲဒီဆေးပစ္စည်းထဲက စတုမဓူအကြောင်းကို ပြောတယ်။ စတုမဓူထဲမှာ ထောပတ်တွေ မများစေနဲ့၊ အန္တရာယ်ရှိတယ်။ ဆီတွေမများစေနဲ့၊ မများရင် ကောင်းတယ်။ ထောပတ်နဲ့ဆီကို အတတ်နိုင်ဆုံး နည်းအောင်လုပ်။ ပျားရည်ကတော့ ဆေးတကာ့ဆေးထဲ အကောင်းဆုံးဆေးဖြစ်လို့ သူ့ကိုအများဆုံးထား။ ဒုတိယအများဆုံးက တင်လဲ။ တတိယနေရာမှာကတော့ နှမ်းဆီ။ စတုတ္ထအနည်းဆုံးထားရမှာက ထောပတ်။ ထောပတ်က Cholesterol အားပေးတယ်။ နှလုံးသွေးကြောပိတ်စေတယ်။ အဲဒါကြောင့် စတုမဓူစား အားရှိတယ်ဆိုပေမယ့် ထောပတ်နဲ့ ပျားရည်ကို ဆတူစပ်ထားတဲ့ စတုမဓူမျိုးဟာ သွေးကြောတွေပိတ်၊ ဦးနှောက်သွေးကြောတွေပိတ်၊ အဆီတွေပိတ်ပြီး ဒုက္ခများတတ်တယ်။ ဘာညာ ပြောတယ်။ ဘုရားဆေးပေမယ့် စနစ်တကျ ဖော်စပ်ဖို့ အဲဒါကို အချို့က ဘယ်လိုစပ်ရင် ကောင်းမလဲ။ ပျားရည်က ၄-ဆ၊ တင်လဲက ၂-ဆ၊ နှမ်းဆီက ၁-ဆ၊ ထောပတ်က အနည်းဆုံး ၁-ဆစပ်။ အဲဒီလို စပ်ဖို့ပြောတာကို သီတဂူဘုန်းကြီး ထီထိုးဖို့ အတိတ်ပေးသွားတယ်-လို့ပြောကြတယ်။

အဲဒါမျိုးကို ကောတုဟလမင်္ဂလာ၊ မိမိရဲ့ ကံတို့ ဉာဏ်တို့ ၀ီရိယတို့ကို အားမကိုးတော့ဘူး။ ဒီလိုအရိပ်နိမိတ်တွေ လိုက်ပြီးတော့ အားကိုးလာတယ်။ အဲဒီလို ဗုဒ္ဓဘာသာတွေဟာ စဏ္ဍာလဗုဒ္ဓဘာသာလို့ ခေါ်တယ်။ အညစ်အကြေးတွေ စုပုံလာတဲ့ ဗုဒ္ဓဘာသာလို့ ခေါ်တယ်။ အဲဒါကို မြတ်စွာဘုရားက ရဟန်းတို့-၃၈-ဖြာမင်္ဂလာ ရှိပါလျက်ကနဲ့ အဲဒီမင်္ဂလာကို မယုံကြည်နိုင်ကြတော့ဘဲ မကျင့်သုံးနိုင်ကြတော့ဘဲ ကြားတာ မြင်တာတွေနောက် လိုက်ပြီး နိမိတ်ကောက်လုပ်တတ်တဲ့ ကောတုဟလ မင်္ဂလာမျိုးကို ယုံကြည်လက်ခံ ကျင့်သုံးလာကြပြီဆိုရင် အဲဒီလို ဗုဒ္ဓဘာသာမျိုးဟာ စဏ္ဍာလဥပါသကာ ညစ်ညူးတဲ့ ဥပါသကာ။ စက်ဆုပ်ဖွယ်ကောင်းတဲ့ ဗုဒ္ဓဘာသာမျိုး ဖြစ်တယ်လို့ ကောင်းစွာမသွေ ဟောကြားတော်မူခဲ့ပါပေသတည်း။( ရှေ့လ ဆက်ရန် )

သီတဂူ ဆရာတော်

( မြတ်မင်္ဂလာ ၂၀၀၁-ခု ဒီဇင်ဘာလ )

No comments: