ဒေါ်ကြီးတွင် သားသမီးသုံးရှိသည်။ ခင်ပွန်းဖြစ်သူမှာ သားသမီးများ ငယ်စဉ်ကပင် ကွယ်လွန်၍ မုဆိုးမဘ၀ဖြင့် ရုန်းကန်ကျွေးမွေးခဲ့သည်။ သားသမီးများအရွယ်ရောက်လျှင် အိမ်ထောင်အသီးသီး ကျကြသည်။ ဒေါ်ကြီးမှာ သားများထက် သမီးဖြစ်သူကို ပို၍ အားကိုးသည်။ တရပ်တကျေးတွင် အိမ်ထောင်ကျသော သားများနောက်သို့ လိုက်ပါမသွားဘဲ သမီးဖြစ်သူနှင့်သာ နေသည်။
မြေးဦးလေး ရပြီးချိန်တွင် ဒေါ်ကြီးမျက်စိကွယ်ခဲ့သည်။ သားသမီးသုံးယောက်အား နေပူမိုးရွာမရှောင် ဈေးတောင်းခေါင်းပေါ်ရွက် လုပ်ကျွေးခဲ့သော ဒုက္ခက မျက်စိကို ထိခိုက်စေခဲ့သည်။ မျက်စိမမြင်သော်လည်း ဒေါ်ကြီးခမျာ အလကားမနေရ။ သက်ငယ်အငှါးပစ်၍ သမီးဖြစ်သူကို ကူညီပေးသည်။ သက်ငယ်မပစ်ရသော အချိန်များတွင် မြေးကလေးများကို ကူညီ၍ ထိန်းပေးသည်။ ဒေါ်ကြီးမှာ သမီးဖြစ်သူ၏အိမ်တွင် တ၀မ်းတခါးကို သက်သောင့်သက်သာ မစားနိုင်ခဲ့ပေ။ ထိုမျှကူညီသော်လည်း သမီးဖြစ်သူက ကြည်ဖြူခြင်းမရှိ။ ထမင်းဟင်းမှလွဲ၍ ဒေါ်ကြီးအလွန်ကြိုက်သော ဆေးလိပ်ကိုပင် အကုန်အကျများမှာစိုး၍ သောက်ခွင့်မပေးပေ။ အိမ်နီးနားချင်းများက သနားသဖြင့် လာရောက်ပေးကြ၊ ကျွေးကြသော်လည်း သမီးဖြစ်သူက ရန်တွေ့လွှတ်သည်။သူ့အရှက်ကို ခွဲရကောင်းလားဟု မိခင်ဖြစ်သူကို ရန်လုပ်သည်။
နေမကောင်း၍ သက်ငယ်မပစ်နိုင်သည့် နေ့များတွင် သမီးဖြစ်သူက ငြူစူစောင်းမြောင်းသည်။ အိမ်အောက်က ၀က်ကမှ ရောင်းစားမယ်ဆို ပိုက်ဆံရသေးတယ်။ အိမ်ပေါ်ထိုင်နေပြီး ဘာမှအသုံးမကျဘူး။ ကလေးတောင် ထိန်းဖော်မရဘူး။ သူ့အတွက်နဲ့ အလုပ်ပိုတယ်။
သမက်ဖြစ်သူက တားမြစ်သော်လည်း မရ။ တနေကုန်အောင် ဆူပူကြိမ်းမောင်းတော့သည်။ ဤသို့ဖြင့် ဒေါ်ကြီးခမျာ သမီးဖြစ်သူ၏ ငြိုငြင်မှုကို ခါးစည်းခံလျက် ကွယ်လွန်ခဲ့ရရှာသည်။ ထိုဝဋ်ကြွေးက ဘ၀ခြားသည်အထိ စောင့်ဆိုင်းမနေပေ။ သမီးဖြစ်သူမှာ သားသမီးများ အိမ်ထောင်မကျမီမှာပင် သွက်ချာပါဒ လေငန်းရောဂါဖြင့် စကားမပြောနိုင်၊ လမ်းမလျှောက်နိုင် ဖြစ်ခဲ့ရသည်။ တရွတ်ဆွဲ၍ သွားလာနေရသော်လည်း သားသမီးများက ဂရုမစိုက်ပေ။ ထမင်းစားချိန်ရောက်လျှင် ပန်းကန်တချပ်ထဲတွင် ထမင်းဟင်းများ စုပုံ၍ ရေတခွက်နှင့် ချထားပေးလိုက်သည်။ စားသည် မစားသည်ကိုပင် စောင့်ကြည့်မနေတော့။ ဖိတ်တ၀က် စဉ်တ၀က်ဖြင့် ကိုယ်တိုင်ယူစားရရှာသည်။ ခါးတွင်လည်း လုံချည်မမြဲပေ။ အလေးအပေါ့လည်း မသိ။ အနံ့အသက်ဆိုးရွား၍ မည်းမှောင်နေသော အခန်းကျဉ်းကလေးထဲတွင် တယောက်တည်း နေရသည်။
ခေါင်းတွင်လည်း သန်းများပေါလွန်း၍ ခေါင်းတုံး တုံးထားရသည်။ သတင်းမေးသူရှိလျှင် သားသမီးများက မကြိုက်၊ ကိုယ်တိုင်လည်း ပြုစုစောင့်ရှောက်ခြင်း မရှိ၊ မိဘကို ပြစ်မှားခဲ့သော အတိတ်ဆိုးကြောင့် လက်ရှိဘ၀မှာပင် ကံတူအကျိုးပေး ဖြစ်ရသည်။ အသက်ရှင်လျက်ဖြင့် သေခဲ့ရသည်။ လင်းလျက်နဲ့ အမှောင်ကျခဲ့သည်။ သံဝေဂယူဖွယ် ကောင်းလေစွ။
( သွဲ့ထားညို-သက္ကလ)
( မြတ်မင်္ဂလာ ၂၀၀၁-ခု အောက်တိုဘာလ )
Subscribe to:
Post Comments (Atom)
No comments:
Post a Comment