Wednesday, October 21, 2009

ရှင်အရဟံမထေရ် သမုတ်တော်မူခဲ့သည့် သိမ်တော်များ

မြန်မာနိုင်ငံတွင် ဗုဒ္ဓသာသနာတော် စတင်ထွန်းကားရာအချိန်သည် အေဒီ ၁-ရာစုမှ အေဒီ ၁၀-ရာစုတိုင် ထွန်းကားခဲ့သည်။ ထိုအချိန်သည် ပျူခေတ်အချိန်ဖြစ်ကြောင်း သမိုင်းများအရ သိရသည်။ ပျူလူမျိုးတို့၏ ဒေသ သရောခေတ္တရာမြို့ဟောင်းတွင် ဗုဒ္ဓသာသနိက အဆောက်အအုံများကို ယနေ့တိုင် တွေ့နိုင်သည်။ ပျူခေတ်ပျက်သုဉ်း၍ ပုဂံခေတ်ရောက်ချိန်အထိ ထိုဒေသတွင် သာသနာတော်ထွန်းကားဆဲ ဖြစ်သည်ဟု လေ့လာသိရှိရသည်။

ပုဂံခေတ် သေလည်ကြောင်မင်း လက်ထက်မှ အနော်ရထာမင်း မတိုင်မီ ကာလအထိ မင်းအဆက်ဆက်နှင့် ရဟန်းသံဃာတော်အဆင့်ဆင့်တို့ ခေတ်ကာလအဆက်ဆက် ဖြတ်သန်းဆင်းသက်လာရာမှ အကြောင်းအမျုးမျိုးကြောင့် သာသနာတော်၌ ဒေသနာကျင့်ဝတ်များအတိုင်း မလိုက်နာနိုင်ကြဘဲ ချွတ်ယွင်းအားနည်း၍ လာခဲ့သည်။

ပုဂံမင်း ၁၂-ဆက်မြောက်၊ သိုက်တိုင်မင်း (အေဒီ ၅၁၆-၅၂၃) လက်ထက်မှစ၍ ရဟန်းကောင်း၊ ရဟန်းမြတ်တို့၏ အကျင့်သီလများ ဆိတ်သုဉ်းကွယ်ပျောက်လုနီး ဖြစ်ခဲ့သည်။ သာသနာတော်၏ အသက် ပိဋကတ်တော် (ပရိယတ္တိစာပေ) လည်း မရှိသေး၍ သမထီး၊ အရည်းကြီးတို့၏ အယူဝါဒများ လွန်စွာထွန်းကားလာသည်။ ပုဂံမင်းဆက် ၂၀-မြောက်၊ ပုပ္ပါးစောရဟန်းမင်း (အေဒီ ၆၁၃-၆၄၀) လက်ထက်တွင် မင်းနှင့်ပြည်သူအားလုံး အရည်းကြီးတို့၏ အယူဝါဒကို လိုက်နာကြတော့သည်။ အရည်းကြီးတို့သည် (ထေရ၀ါဒ) ရဟန်းများကဲ့သို့ အ၀ါရောင်သင်္ကန်း (၀ိနည်းနှင့်အညီသင်္ကန်း) များကို ၀တ်ရုံခြင်းမရှိဘဲ၊ အပြာ၊ အနက်၊ အမည်း၊ အညိုရောင် စသည့် (သင်္ကန်းမမည်သည့်) အ၀တ်များကို ၀တ်ရုံကြသည်။ ဦးခေါင်းကို (ဗုဒ္ဓအလိုကျ) ဦးပြည်းရိတ်ခြင်း မပြုဘဲ ဆံပင်ကို လက်လေးသစ်၊ လက်တ၀ါးအထိ ထား၍ ဦးထုပ်များကိုလည်း ဆောင်းကြသည်။ ထိုကိုရည်၍ စလေ ဦးပုည-က ( ရှေးအတီတေ၊ ပုဂံပြည်တွင်၊ ဆံကေသာလက်လေးသစ်၊ မုတ်ဆိတ်မွေး ဗရပျစ်၊ မဲညစ်သည့်စီဝရံနှင့်၊ တာတေလံ အကျင့်ဆိုးသော၊ ရှင်သိုးတကာ့ ခေါင်ကြီး၊ ရှင်မထီး-) ဟူ၍ စပ်ဆိုခဲ့ပါသည်။

သူတို့သည် ဆင်စီး၊ မြင်းစီး၍ လက်ဝှေ့လည်းသတ်ကြသည်။ နွားများကို မွေးမြူ၍လည်း ရောင်းစားကြသည်။ ထိုအရည်းကြီးတို့သည် ခြောက်ကျိပ်ရှိကြောင်းနှင့် တပည့်ခြောက်သောင်းရှိကြောင်းကိုလည်း မှတ်တမ်းများက ဆိုသည်။ သူတို့၏ အယူဝါဒမှာ ဗုဒ္ဓမြတ်စွာ၏ ဒေသနာနှင့်ဆန့်ကျင်ဘက် မိမိသဘောအတိုင်း ကျမ်းဂန်များကို ရေး၍ လူအများကိုလှည့်ဖြား သွေးဆောင်ခြင်းဖြစ်သည်။ သူတို့၏ အဓိကတရားမှာ ဂါာထာမန္တရားများကို ရွတ်၍ မန်းမှုတ်ခြင်းဖြစ်သည်။

သူ့အသက်ကို သတ်မိသောသူသည် ပရိတ် (မန္တန်)ကို ရွတ်သော် ကမ္မပထမှ လွတ်၏။ မိဘကို သတ်မိသောသူသည် ဤပရိတ် (မန္တန်)ကို ရွတ်သော် ပြေပျောက်၏။ စသည်တို့ဖြစ်သည်။ သူတို့၏ ရွံရှာစက်ဆုပ်ဖွယ်အကောင်းဆုံး အဓမ္မ၀ါဒမှာ မင်း၊ မှူးမတ်၊ ကလန်၊ သံပျင်၊ သူဌေးသူကြွယ်၊ ပြည်သူတို့၏ သားသမီးများကို ထိမ်းမြားမင်္ဂလာပြုသောအခါ၌ ပန်းဦးလွှတ်သော အယုတ်တရားများ ဖြစ်သည်။

မြန်မာသက္ကရာဇ်-၄၀၆ (အေဒီ ၁၀၄၄) တွင် ပုဂံထီးနန်းကို စိုးစံသည့် အနော်ရထာမင်းစော၏ နန်းသက် ၉-နှစ်ကျော် ၁၀-နှစ်ခန့် အလွန်တွင် (သုဝဏ္ဏဘုမ္မိ) သထုံပြည်မှ ဓမ္မဒဿီအမည်ရှိ ရှင်အရဟံ မထေရ်သည် ပုဂံပြည်သို့ကြွလာ၍ ထေရ၀ါဒ သာသနာကို စတင်ပြန့်ပွားစေသည်။ ထိုအခါ မင်းနှင့်ပြည်သူအားလုံးတို့သည် စစ်မှန်သောထေရ၀ါဒ တရား၌သာ တည်ရုံမျှမက သထုံပြည်မှ ပိဋကတ်သုံးပုံ အစုံသုံးဆယ်နှင့် ဓာတ်တော်၊ မွေတော်များ၊ ရဟန်းသံဃာတော် အစစ်အမှန်များကို ပုဂံပြည်သို့ ပင့်စေသည်။

ရှင်အရဟံမထေရ်နှင့် အနော်ရထာမင်းတို့ ပူးပေါင်းလက်တွဲ၍ ပုဂံပြည်တွင် ပရိယတ္တိ၊ ပဋိပတ္တိ၊ ပဋိဝေဓ သာသနာတော် သုံးရပ်ကို တည်တံ့ဖွံ့ဖြိုးစေသည်။ ရှင်အရဟံမထေရ်မြတ်နှင့်အတူ အရှင်ဉာဏ၊ အရှင်အာနန္ဒာ အရှင်သီလဗုဒ္ဓ မထေရ်မြတ်တို့လည်း လက်တွဲ၍ သာသနာပြုကြသည်။ ရှင်အရဟံမထေရ်သည် သာသနာတော်၏ အသက်တခုဖြစ်သော ယခင်ကမရှိဖူးသေးသည့် သိမ်များကို ပုဂံနှင့် အနော်ရထာမင်းကြီး စိုးစံရာဒေသတို့တွင် ကျမ်းဂန်ဒေသနာတော်နှင့် လျော်ညီစွာ သမုတ်တော်မူခဲ့သည်။

အဆိုပါသိမ်များအနက် (၀ိနယာလင်္ကာရ ဋီကာ အလိုအရ) စံနမူနာ အတိုင်းအတာအဖြစ် စံပြုရမည့်သိမ်မှာ မြင်းကပါရွာ၏ အရှေ့တောင် ကုသိနာရုံဘုရားအနီးရှိ သိမ်တော်ပင်ဖြစ်သည်။ ရှင်အရဟံမထေရ်မြတ် သမုတ်ခဲ့သည့်သိမ်များမှာ (မှတ်တမ်းများအရ) ၂၇-လုံးဖြစ်သည်။ ၄င်းသိမ်တို့မှာ ပုဂံ၏အရှေ့ဘက်တွင် ၆-လုံး၊ တောင်ဘက်တွင် ၄-လုံး၊ မြောက်ဘက်တွင် ၄-လုံးတို့ဖြစ်သည်။ မိတ္ထီလာမြို့တွင် သိမ် ၉-လုံးနှင့် မန္တလေးမြို့တွင်လည်း ၄-လုံးတို့ဖြစ်ကြသည်။

ပုဂံ၏ အရှေ့ဘက်သိမ်တို့မှာ-
(၁) ရွှေစည်းခုံပရိဝုဏ်အတွင်းရှိ သိမ်ကြီး
(၂) ပုဂံနှင့် တယူဇနာ (၆-တိုင်နှင့် တာ ၄၀၀) ကွာ ငါ့သရောက်သိမ်
(၃) ဇီးကျမ်းရွာသိမ်
(၄) တစိုးမလည်ရွာသိမ်
(၅) နွားထိုးကြီးနှင့် ကျောက်ပန်းတောင်းကြားရှိ သိမ်
(၆) တောင်သာနယ်၊ ကျောက်ဆောင်သိမ်တို့ ဖြစ်သည်။

ပုဂံ၏တောင်ဘက် တယူဇနာအတွင်းရှိ သိမ်တို့မှာ-
(၁) ကွမ်းဖလားသိမ်
(၂) ကျောက်ပန်းတောင်းမြို့အနီး နှစ်ကျပ်ခွဲသိမ်
(၃) ထန်းပေါက်ကုန်းသိမ်
(၄) လယ်ယားသိမ် နှင့်

ပုဂံမြောက်ဘက် သိမ်တို့မှာ-
(၁) ညောင်ပင်လှ သိမ်
(၂) အိုင်ရေဦးစကန် သိမ်
(၃) ရေကြည် သိမ်
(၄) ကူရွာသိမ်တို့ ဖြစ်သည်။

မိတ္ထီလာမြို့ရှိ သိမ်တို့မှာ-ကန်အထက်တွင် ၄-လုံး၊ ကန်အောက် ၄-လုံး၊ မြို့လယ်တွင် ၁-လုံးတို့ဖြစ်သည်။ ၄င်းတို့မှာ-
(၁) ပဲသီတာ သိမ်
(၂) ကတ္ထုကံ သိမ်
(၃) ၀တ်ကျောက် သိမ်
(၄) ရှင်ပင်ကူ သိမ်
(၅) သားဖန်း သိမ်
(၆) ကလိန်ခြေ သိမ်
(၇) ကူဖြူ သိမ်
(၈) ကုန်းတောင်း သိမ်
(၉) ထီးသုံးဆင့် သိမ်တို့ဖြစ်သည်။

မန္တလေးမြို့နှင့် မန္တလေးမြို့ အနီးရှိ သိမ်လေးလုံးမှာ-
(၁) သန်းခေါင်ယံ သိမ် (ပြည်ကြီးတံခွန်မြို့နယ် တံခွန်တိုင်ရပ်၊ ပြည်ကျောင်းတိုက်အတွင်းတွင်ရှိသည်)
(၂) နေ၀င်သိမ် (အောင်မြေသာဇံမြို့နယ်၊ ညောင်ကွဲ ၁၁-လမ်းတွင် ရှိသည်)
(၃) နေထွက်သိမ် (ပုသိမ်ကြီးမြို့၊ အောင်ပင်လယ် ဘိုတက်ကုန်းတွင်ရှိသည်)
(၄) မွန်းတည့်သိမ် (ချမ်းအေးသာဇံ၊ ပြင်ဦးလွင်ကားလမ်း၊ အနောက်ဘက်၊ ကန်ဘောက်ရွာတွင် ရှိသည်) တို့ဖြစ်သည်။

ရဟန်းလောင်းတို့ ဥပသမ္ပဒကံ ဆောင်ရာတွင် သမ္ပတ္တိ ငါးပါးအနက် သီမာသမ္ပတ္တိ-သည် အရေးကြီးသော အချက်တခုအဖြစ် ပါဝင်သည်။ ထို့ကြောင့် ရှင်အရဟံမထေရ်သည် မရှိမဖြစ် သိမ်များကို သာသနာတော် စည်ပင်ပြန့်ပွားစေရန် သမုတ်တော်မူခဲ့သည်။
ပခုက္ကူဆရာတော် ကျမ်းတတ်အကျော် အရှင်နန္ဒ၀ံသမထေရ်မြတ်ကလည်း ရှင်အရဟံမထေရ်မြတ်သည် ရဟန္တာအစစ်ဖြစ်ကြောင်း-ကို ရွှေစည်းခုံဘုရား သမိုင်းတွင် မိန့်ကြားခဲ့ပါသည်။ အထောက်အထား အစုံအလင်နှင့် ဆိုပါသည်။

ထို့ကြောင့် ထေရ၀ါဒသာသနာတော်၏ ကျေးဇူးရှင် ရှင်အရဟံမထေရ် သမုတ်တော်မူခဲ့သည့် သိမ်တော်များကို လေ့လာမှတ်တမ်းပြု၍ ရေးသားပူဇော်လိုက်ရပါသတည်း။

ကျမ်းကိုး။
၁။ ရှင်အရဟံမထေရ်မြတ်၏ အတ္ထုပ္ပတ္တိနှင့် ရှင်အရဟံအုတ်ကျောင်း ပြုပြင်တည်ဆောက်မှု မှတ်တမ်း။ ယဉ်ကျေးမှု ၀န်ကြီးဌာန။
၂။ မြန်ာမ့စွယ်စုံကျမ်း ။ အတွဲ -၁၄။

( စလင်း-မောင်မွှေးကြိုင်)

No comments: