Wednesday, October 28, 2009

ဒေါသမီး

သမီး
ဒေါသဆိုတာ အဂ္ဂိ-မီးနဲ့တူတယ်။ သလ္လ-ငြောင့်နဲ့တူတယ်။ ဒေါသဆိုတဲ့မီးဟာ မိမိကိုယ်မှာ ဦးစွာလောင်ပြီးမှ သူတပါးကို ပူလောင်စေတတ်တယ်။ ဒေါသဖြစ်နေတဲ့သူဟာ မီးလောင်ခံနေရတဲ့ သူပဲ။ အမြဲ ပူလောင်နေတယ်။ ဒေါသဖြစ်နေတဲ့သူဟာ ငြောင့်ကြီး စူးဝင်ခံနေရတဲ့ သူပဲ။ အမြဲဒေါသရဲ့ နှိပ်စက်တဲ့ ဒဏ်ချက်ကို ခံနေရတဲ့သူပဲ။
မြတ်စွာဘုရားက ကိလေသာ-အညစ်အကြေးရှိသူတို့၌ ဒေါသရှိကြောင်း၊ ဆွမ်းခံဝင်ရာ၌ ရှေ့မှသွားသော ရဟန်းအား နောက်မှလိုက်သော ရဟန်းက အမျက်ထွက်ကြောင်း၊ အရှင်သာရိပုတ္တရာ အမှူးပြုသော သံဃာတော်တို့အား ဟောပြခဲ့ပါတယ်။

ဒေါသရဲ့ အပြစ်တွေကိုလဲ ဘုရားရှင်က ဒီလို ဟောပြထားတယ်။ ဒေါသဖြစ်နေတဲ့သူဟာ-
၁။ အရုပ်ဆိုးတယ်
၂။ ပြစ်မှု ကျူးလွန်တတ်တယ်
၃။ အကျိုးမဲ့ ဖြစ်တတ်တယ်၊ ဘ၀ပျက်တတ်တယ်
၎။ မကောင်းသတင်း ထွက်တယ်
၅။ မိတ်ဆွေများ ရွံ့ကြောက် ဖယ်ခွါကြတယ်
၆။ ဆင်းရဲစွာ အိပ်စက်လဲလျောင်းရတယ်
၇။ ဆင်းရဲစွာနဲ့ သေဆုံးရတယ်

ဒါကြောင့် ဒေါသကို သည်းခံခြင်း-ခန္တီဖြင့်၎င်း၊ အဒေါသ-မေတ္တာပို့သခြင်းဖြင့်၎င်း ပယ်ဖျောက်ပါ။

မောင်စန်းသော်

( ချစ်သမီးသို့ စာအုပ်မှ)

No comments: