Wednesday, October 21, 2009

မန္တလေး ကျောက်တော်ကြီးဘုရား

မန္တလေးမြို့ရှိ ကျောက်တော်ကြီးဘုရားသည် မင်းတုန်းမင်းတရားကြီး၏ ကောင်းမှုတော်ဖြစ်သည်။ မန္တလေးမြို့ မန္တလေးတောင်ခြေရင်း သုဓမ္မာဇရပ်များအနီးတွင် တည်ရှိသည်။ ကျောက်တော်ကြီးဘုရားမှာ ထက်ဝယ်ဖွဲ့ခွေ နေတော်မူသည့်ရုပ်ပွားတော်ဖြစ်သည်။ မဟာသကျ မာရဇိန်-ဟုဘွဲ့တော်ရှိသည်။ သို့သော် စကျင်တောင်မှရသော ကျောက်ကို အစွဲပြုသဖြင့် ကျောက်တော်ကြီးဘုရား-ဟု လူအများက ခေါ်ဝေါ်သမုတ်ကြသည်။

၁၂၂၆-ခုနှစ် ၀ါခေါင်လ (၁၈၆၄-ခုနှစ် သြဂုတ်) တွင် မန္တလေးမြို့၏ မြောက်ဘက် မိုင် ၂၀-ခန့်ဝေးကွာသော စကျင်တောင်မှ ထိုရုပ်ပွားတော် ထုလုပ်မည့်ကျောက်ကို တူးဖော်ရရှိ်သည်။ ရှေးဦးစွာ ကျောက်ကို ရုပ်ပွားတော်သဏ္ဌာန် အကြမ်းဆတ် ထုလုပ်သည်။ ထို့နောက် ဖောင်ဖွဲ့ထားသောသမ္ဗန်တော်ကြီး ၂-စင်းပေါ်၌တင်၍ မန္တလေးနေပြည်တော်သို့ ပင့်ဆောင်ကြသည်။ ခရီးစတင်မထွက်မီ မန္တလေးနန်းမြုိ့ရှိ ရွေးတော်ယူတံခါးတိုင် ကြားရသော အမြောက်သံ ပစ်ဖောက်အချက်ပေးသည်။ ရေလမ်းတလျှောက် သမ္ဗန်တော်တွင် အတီးအမှုတ်၊ အကအခုန်တို့ဖြင့် ပွဲသဘင်ဆင်ယင်ကျင်းပလျက် ပင့်ဆောင်သည်။ မြွေရွာမြစ်ဝသို့ရောက်လျှင် သုဓမ္မာဆရာတော်ကြီးတို့က ခတ်လှေတော်နှင့် ကြိုယူပင့်ဆောင်ကြသည်။

ဝါခေါင်လပြည့်ကျော် ၂-ရက်နေ့ (သြဂုတ်လ ၂-ရက်)တွင် ဖောင်တော်ကို မြနန်းစကြာမီးသင်္ဘောဖြင့်ဆွဲယူ၍ မန္တလေးအနောက်ပြင် အီကင်းရွာဆိပ်သို့ ရောက်သည်အထိ ပင့်ဆောင်ကြသည်။ ထိုမှ ခံကုန်းရွာမြောက်၊ ရွှေတချောင်းမြောင်းကို ချိုး၍ မြောင်းတွင်းသို့ သွင်းဆောင်ခဲ့ကြသည်။ ထို့နောက် ကျောက်တော်ကြီးရုပ်ပွားတော်ကို ဖောင်တော်မှ ကုန်းပေါ်သို့ တင်ကြသည်။ ကုန်းပေါ်သို့ရောက်သော် ရုပ်ပွားတော်ကို စွတ်ဖားပေါ်သို့ တင်ကြသည်။ စွတ်ဖားလမ်းလုပ်၍ တလိမ့်တုံးများခံကာ ကြိုးလွန်များဖြင့် ဆွဲယူကြသည်။ အစုအမှုထမ်းပေါင်း ၁၂၀၀၀-ကျော်တို့ကို အိမ်ရှေ့မင်း (ကနောင်မင်းသားကြီး)၊ ၀န်ကြီး၊ အတွင်းဝန် စသော ပုဂ္ဂိုလ်များက ကြပ်မတ်၍ မန္တလေးတောင်ခြေအရောက် ပင့်ဆောင်ကြသည်။ ထိုနှစ် တန်ဆောင်မုန်းလဆန်း ၂-ရက် (အောက်တိုဘာလ ၃၁-ရက်) နေ့တွင် ပလ္လင်ပေါ်သို့ ရုပ်ပွားတော် ရောက်ရှိလေသည်။

ကျောက်တော်ကြီးရုပ်ပွားတော်ကို ကျောက်ဆတ်ပညာသည်အကျော်တို့က ဆက်လက်၍ အချောထုလုပ်ကြသည်။ မျက်နှာတော်ကို ထုလုပ်စဉ် မင်းတုန်းမင်းကြီး ကိုယ်တော်တိုင် ကြည့်ရှုညွှန်ပြသည်။
၁၂၂၇-ခုနှစ် ကဆုန်လတွင် အလုံးစုံ ထုလုပ်ပြီးမြောက်သည်။ ပြီးမြောက်အောင်မြင်သည့်အခမ်းအနား ကျင်းပရန် ကဆုန်လပြည့်ကျော် ၇-ရက် (၁၈၆၅-ခုနှစ် မေလ ၁၆-ရက်) နေ့တွင် မင်းတုန်းမင်းကြီးသည် မိဖုရားခေါင်ကြီးနှင့်အတူ ဦးဆောင်၍ စစ်မြင်းရထား၊ စစ်အင်္ဂါလေးပါး၊ တပ်ဝန်းအခမ်းအနား အကြီးအကျယ် ဆင်ယင်ကျင်းပတော်မူလျက် ထွက်တော်မူသည်။ မင်းတုန်းမင်းတရားကြီး ကိုယ်တော်တိုင် ကျောက်တော်ကြီးဘုရား၏ မျက်ခုံးတော်၊ မျက်ရေးတော်စသော လက္ခဏာတော်များကို ရွှေစုပ်တော်ကို အသုံးပြု၍ ရွှေမင်ဖြင့်ရေးကာ မျက်နှာတော်ဖွင့်လှစ်သည်။

မဟာသကျမာရဇိန် ကျောက်တော်ကြီးဘုရား၏ အရွယ်ပမာဏမှာ ထက်ဝယ်တော်အပြန့် ၁၂-တောင်၊
အ၀န်း ၂၈-တောင်၊ ၂-မိုက်၊ ၄-သစ်။
ခါးတော်အ၀န်း ၁၀-တောင်၊ ၂-မိုက်၊ ၄-သစ်။
ရင့်ပွင့်တော် ပုခုံးစွန်းဝဲယာ အကျယ် ၈-တောင်၊ အ၀န်း အတောင် ၂၀။
ဦးခေါင်းတော်အ၀န်း ၁၃-တောင်။
စမ္မခဏ်မှ ရောင်လျှံတော်ဖျားအထိ ဉာဏ်တော်အမြင့် ၁၇-တောင်၊ ၁-မိုက်၊ ၄-သစ်။
(၂၆-ပေ၊ ၃-လက်မ)။ ဖြစ်လေသည်။

ထိုကျောက်တော်ကြီး မဟာရံတံတိုင်းအတွင်း ပတ်လည်၌ အုတ်ဂူပြသာဒ် ၈၀-တည်ဆောက်၍ ဧတဒဂ်ရ ရဟန္တာရုပ်ပွားတော် ၈၀-ကို ပူဇော်ထားရှိသည်။ ထိုရုပ်ပွားတော် ၈၀-ကို ရုပ်ပွားတော်မြတ်ရှိရာသို့ အသီးသီးမျက်နှာမူလျက်ရှိအောင် တည်ထားသည်။ မင်းမှူးမတ်တို့က ကျောက်တော်ကြီးဘုရား မဟာရံတံတ်ိုင်းပြင်ပတွင် ဇရပ်ပေါင်း ၃၃-ဆောင်ကို ဆောက်လုပ်လှူဒါန်းကြသည်။ ထိုမဟာရံပြင်တံတိုင်းအတွင်း အရှေ့မြောက်ထောင့်နှင့် အနောက်မြောက်ထောင့်တို့၌ မဇ္ဈိမဒေသ ဗောဓိပင်တော်မှ ပင့်ဆောင်ခဲ့သော ဗောဓိပင်များကို မင်းတုန်းမင်းတရားကြီးကိုယ်တော်တိုင် စိုက်ပျိုးတော်မူထားပေသည်။
အကိုး။ (၁) အနှစ် ၁၀၀-ပြည့် မန္တလေး။
(၂) မြန်မာ့စွယ်စုံကျမ်း အတွဲ ၂။

No comments: