Monday, October 26, 2009

ပြိုင်ပွဲ

ဒကာမြှောက်တော့ ဆရာလဲ။ ဆရာမြှောက်တော့ ဒကာမွဲ-ဟူသောစကားလေးကို ငယ်စဉ်ကပင် ကြားခဲ့ဖူးပါသည်။ ဒကာမြှောက်သဖြင့် လဲသွားသောဆရာနဲ့ ဆရာမြှောက်သဖြင့် မွဲသွားသော ဒကာတို့သည် ရှေးကလည်း ရှိခဲ့ပါသည်။ ယခုလည်း ရှိနေပါသည်။ နောင်လည်း ရှိနေပါလိမ့်ဦးမည်။
လဲသွားသော ဆရာသည် မလဲခင်က သတိမ၀င်နိုင်။ မြှောက်လေ မြောက်လေ ဖြစ်နေသဖြင့် အမြောက်ထဲမှာ ယစ်မူးနေပါသည်။ နစ်မျောနေပါသည်။ မွဲသွားသော ဒကာသည်လည်း မမွဲခင်က သတိမမူနိုင်။ မြှောက်လေ မြောက်လေ ဖြစ်နေသဖြင့် အမြောက်ထဲတွင် ယစ်မူးနေပါသည်။ နစ်မျောနေပါသည်။ ဆရာလည်း လဲကျသွားခါမှ၊ ဒကာလည်း မွဲပျာကျသွားခါမှ နော်တကို ရင်ဝယ်ပိုက်ကာ နေကြရပါတော့သည်။ အမြှောက်ကြိုက်ခြင်း၏ ခါးသီးသောအရသာတို့ကို တ၀ကြီး ခံစားနေကြရပါတော့သည်။

လောကသတ္တ၀ါတို့ အမြှောက်ကြိုက်တတ်ပုံကို အောက်ပါပုံပြင်လေးက ဖော်ပြထားပါ၏။
လူတယောက်သည် အလွန်အမြှောက်ကောင်းကြောင်း နာမည်ကြီးလှပါ၏။ သူမြှောက်ပြောလိုက်တိုင်း အမြှောက်ခံရသူတို့မှာ မြောက်မြောက်သွားကြ၏။ သိသိသာသာ မြောက်သွားသည်နှင့် မသိမသာ မြောက်သွားသည်သာ ကွာခြားပါ၏။ သူ၏အမြှောက်ကို ခံရသူတိုင်း မြောက်သွားကြသည်ချည်းပင်။

ထိုလူ၏ အမြှောက်ကောင်းမှု ဂုဏ်သတင်းသည် လူ့ပြည်တွင်သာ ပျံ့သင်းနေသည် မဟုတ်ပါ။ ငရဲပြည်အထိပင် ပျံ့သင်းနေပါလေ၏။ အမြှောက်ကောင်းလှသော ထိုလူသည် သေသွားသည့်အခါ ငရဲသို့ ရောက်သွားပါလေတော့၏။ ငရဲရောက်သွားသည့်အခါ ငရဲထိန်းတို့က ငရဲသားဖြစ်သော ထိုလူကို ယမမင်းကြီးထံ အစစ်ဆေးခံဖို့ ခေါ်သွားပါလေ၏။ ထိုလူသည် ငရဲရောက်သွားသော်လည်း သူ့ဗီဇ သူ့ဝါသနာကို မဖျောက်နိုင်သဖြင့် ယမမင်းကြီးကို ဤသို့ ပြောပါလေတော့၏။

ယမမင်းကြီး၊ ကျွန်တော်မျိုး လူ့ပြည်တုန်းက ယမမင်းကြီးဆိုတာ အင်မတန် အရုပ်ဆိုးတယ်လို့ ကြားခဲ့ရပါတယ်။ အခု ယမမင်းကြီးကို ကျွန်တော်တွေ့ရတော့ လူ့ပြည်တုန်းက ကျွန်တော်ကြားဖူးထားတာနဲ့ တခြားစီဖြစ်နေပါတယ်။ လူ့ပြည်က လူတွေက ယမမင်းကြီး ရုပ်လှတာကို မနာလိုလို့ ယမမင်းကြီးကို အင်မတန် အရုပ်ဆိုးတယ်လို့ ပြောကြတာ ဖြစ်ပါလိမ့်မယ်။ ယမမင်းကြီးက လူ့ပြည်ကလူတွေ ပြောသလို ရုပ်မှမဆိုးတာ။ ယမမင်းကြီးက အရမ်းအရမ်းကို လှတာပဲ။

ထိုအခါ ဘေးမှ ငရဲထိန်းတို့က ဤလူ အလွန်မြှောက်ပြောတတ်မှန်း သိထားကြသဖြင့် ယမမင်းကြီးကို ဤသို့ သတိပေးစကား ပြောကြားကြပါ၏။
ယမမင်းကြီး၊ သတိထားပါ၊ အဲဒီလူဟာ မြှောက်ပြောတတ်တဲ့နေရာမှာ အလွန်နာမည်ကြီးတဲ့လူ ဖြစ်ပါတယ်။ ယမမင်းကြီးကို အခု အဲဒီလူက မြှောက်ပြောနေပါတယ်။

ထိုအခါ ယမမင်းကြီးက ငရဲထိန်းတို့အား ဤသို့ ပြောလိုက်ပါလေ၏။
မင်းတို့ကလဲကွာ၊ ဒီလူ မှန်တာပြောနေတာ ပြောစမ်းပါစေ။

ဤပုံပြင်လေးသည် လောကသတ္တ၀ါတို့ အမြှောက်ကြိုက်တတ်ကြသဖြင့် သရော်ကာ သတိပေးထားသည့် ပုံပြင်လေးဖြစ်ပုံရပါသည်။

ရုပ်မလှသူပင်ဖြစ်သော်လည်း သူ့ကို ရုပ်လှသည်ဟုပြောလျှင် သူ့ကိုယ်သူ ရုပ်မလှမှန်း သိလျက်နှင့်ပင် သဘောကျနေတတ်သည်။ ပေါ်ပေါ်လွင်လွင် မပြုံးသော်လည်း ရင်ထဲမှာ ကြိတ်၍ပြုံးနေတတ်ပါသည်။ အမြောက်မကြိုက်ပါဟု ကြွေးကြော်နေသူတို့ပင်လျှင် မြှောက်မှန်းမသိသာအောင် ယုတ္တိယုတ္တာ ရှာကြံကာ မြှောက်ပင့် အပြောခံလိုက်ရလျှင် ယမမင်းကြီးပြောသလို မှန်တာပြောတာ ပြောစမ်းပါစေကွာဟု ဆိုမိကြမည်ပင်။

ဘေးပတ်ဝန်းကျင်မှ မြှောက်ပင့်ပေးကြမှုတို့သည် အပြိုင်ဝါသနာပါသူတို့ကို တဦးနှင့်တဦး အပြိုင်ခိုင်းကြပါလေတော့၏။ ပြိုင်ပွဲဝင်သူတို့ ဖတ်ဖတ်မောသွားတတ်ကြပုံကို အောက်ပါပုံပြင်လေးက သတိပေးထားပြန်ပါလေ၏။

တောရွာက ကျောင်းထိုင်ဘုန်းကြီးနှစ်ပါးသည် အခြားရွာသို့ အတူသွားကြ၏။ ထိုကျောင်းထိုင် ဘုန်းကြီးနှစ်ပါးတွင် ကျောင်းသားလေးတယောက်စီ ပါလာကြ၏။ ဘုန်းကြီးနှစ်ပါးသည် စကားတပြောပြောနှင့် ရှေ့က သွားကြ၏။ ကျောင်းသားလေးနှစ်ယောက်ကား နောက်ခပ်လှမ်းလှမ်းမှ စကားပြောရင်း လိုက်လာကြ၏။ ခရီးအတော်လေး သွားလိုက်သောအခါ ကျောင်းသားတယောက်က-ငါတို့ဘုန်းကြီးက ရှေ့ကရောက်တယ်၊ မင်းတို့ဘုန်းကြီးက နောက်မှာကျန်ရစ်တယ်-ဟုဆို၏။

နောက်ကျောင်းသားတယောက်က ဟော-ကြည့်ကွ။ အခု ငါတို့ဘုန်းကြီးက ရှေ့က ရောက်သွားပြီ။ မင်းတို့ဘုန်းကြီးက နောက်ကျသွားပြီ-ဟုဆိုလိုက်သည်။
ကျောင်းသား ၂-ယောက်သည် သူ့ဘုန်းကြီး ရှေ့ရောက်တယ်။ ငါ့ဘုန်းကြီးက ရှေ့ရောက်တယ်-ဟု ငြင်းခုံနေကြ၏။ ဘုန်းကြီးနှစ်ပါးသည် ထိုငြင်းခုံသံကို နားထောင်ရင်း သူ့ထက်ငါ အမြန်ရှေ့ရောက်အောင် သွက်သွက်လက်လက် သွားကြရာမှ ဖိနပ်နှစ်ဖက်ကို ချွတ်ကာ ခြေစုံပစ် ပြေးကြသည်အထိ ရောက်သွားကြပါ၏။ ဖတ်ဖတ်မော၍ ဟောဟဲ ဟောဟဲ ဖြစ်သွားကြပါလေ၏။

ဤပြုံပင်လေးသည်လည်း ယမမင်းကြီး ပုံပြင်လိုပင် တကယ့်အဖြစ်အပျက်တော့ မဟုတ်နိုင်ပါ။ ဘေးပတ်ဝန်းကျင်၏ အမြှောက်အပင့်ခံရလျှင် အပြိုင်ဝါသနာပါသူတို့ ပြိုင်ပွဲဝင်သွားတတ်မိကြပုံကို သတိပေးထားပုံရပါသည်။ အမြှောက်အပင့် ကြိုက်ပြီး အပြိုင်ဝါသနာပါသူတို့ လောကကြီး၌ ကားပြိုင်ပွဲ၊ အိမ်ပြိုင်ပွဲ၊ ရွှေပြိုင်ပွဲ၊ ငွေပြိုင်ပွဲ၊ အ၀တ်အစားပြိုင်ပွဲ၊ သားပြိုင်ပွဲ၊ သမီးပြိုင်ပွဲ၊ ခင်ပွန်းပြိုင်ပွဲ၊ ဇနီးပြိုင်ပွဲ၊ ဆရာပြိုင်ပွဲ၊ တပည့်ပြိုင်ပွဲ၊ ရာထူးပြိုင်ပွဲ၊ ဘွဲ့ထူးပြိုင်ပွဲ၊ စသည့် ပြိုင်ပွဲပေါင်းများစွာ ပြုလုပ်ကျင်းပနေကြသည်ကို နေရာတကာမှာ မြင်တွေ့နိုင်ကြပါသည်။ အကုသိုလ်ပွားစေမည့် ပြိုင်ပွဲတို့ကို ရှောင်ရှားပြီး ကုသိုလ်ပွားစေမည့် ပြိုင်ပွဲတို့ကို ပြုလုပ်ကျင်းပနိုင်ကြပါမူ ကောင်းလေစွ။

သာမဏေကျော်

( မြတ်မင်္ဂလာ ၂၀၀၁-ခု ဒီဇင်ဘာလ )

1 comment:

nyimuyar said...

nice one, thanks for sharing