Wednesday, November 4, 2009

ထေရဝါဒဗုဒ္ဓဘာသာ နှင့် မဟာယာနဗုဒ္ဓဘာသာ နှိုင်းယှဉ်ဝေဖန်ချက် ( ၁၅ )

( ယခင်လမှ အဆက် )

ဒီကနေ့ ဘုန်းကြီးဟောကြားမဲ့ ဓမ္မအစီအစဉ်မှာ ဗုဒ္ဓသာသနာမှာ ကြည်ညိုလို့ မှီခိုနေကြတဲ့ ဒကာ ဒကာမတွေ ထေရဝါဒဗုဒ္ဓဘာသာ ပီပီသသ ဖြစ်ကြရေးအတွက် အင်္ဂုတ္တရနိကာယ် ပါဠိတော်မှာ လာရှိတဲ့ ဥပါသကာသုတ္တန်၊ သို့မဟုတ် စဏ္ဍာလသုတ္တန်ဆိုတဲ့ ထိုသုတ်ကို အခြေခံပြီးတော့ ထေရဝါဒဗုဒ္ဓသာသနာအကြောင်းကို ဒီကနေ့ ပြောသွားမှာပါ။

ဥပါသကာ-လို့ဆိုလိုက်ရင် အချို့အရပ်များကျတော့ ဘာသိလဲဆိုတော့ ပိတ်ဖြူကလေးတွေ တောင်းကလေးတွေနဲ့ ခေါင်းမှာ ခမောက်ကလေးတွေ ခပ်ကုပ်ကုပ် ဆောင်းပြီး အရပ်ထဲကို အလှူခံတဲ့လူတွေကို ဒါဥပါသကာ လှည့်လည်တယ်လို့ ဒီလိုခေါ်တာလဲ တချို့အရပ်မှာရှိတယ်။ အဲဒါ ဥပါသကာ အရပ်ထဲ ဆွမ်းဆန် လှည့်ပြီးတော့ အလှူခံကြ။ ဟိုဟိုဒီဒီ လှည့်ပြီးတော့ အလှူခံကြ။ ဒီမှာ ဥပါသကာလို့ ဆိုတာကျတော့ ဘုန်းကြီးတို့ ဘုရား တရား သံဃာကို မကြည်ညိုဖူးသေးတဲ့ ပုဂ္ဂိုလ်တယောက်ယောက်အား မြတ်စွာဘုရားကိုယ်တော်မြတ်က တရားတပုဒ်ကို ဟောထုတ်တယ်။ ဟောထုတ်လို့ အဲဒီတရား ဆုံးပြီလို့ဆိုလို့ရှိရင် ထိုဗုဒ္ဓဘာသာမဟုတ်သေးတဲ့ ထိုသူတယောက်ယောက်က ဗုဒ္ဓဘာသာအဖြစ်သို့ ပြောင်းပြီးတော့ ဝင်လာတဲ့အခါ ဘာသာပြောင်းတဲ့အခါမှာ သူကိုယ်တိုင် လျှောက်သွားတဲ့စကား၊ ဗုဒ္ဓဘာသာ မဟုတ်ကြတဲ့သူတွေက ဗုဒ္ဓဘာသာအဖြစ်ကို ပြောင်းလဲပြီဆိုတဲ့အကြောင်းကို လျှောက်သွားတဲ့ အကြောင်းကိုပြောတာ။

အဲဒီသုတ္တန်တွေရဲ့ အဆုံး၊ အဆုံးမှာ အတော်များများပါတယ်။ ဂရုတစိုက် မှတ်သားလိုက်တဲ့ပုဂ္ဂိုလ်တွေဆိုလိုရှိရင် မှတ်မိကောင်း မှတ်မိမှာပါ-စကားက
တပည့်တော်သည် ဤနေ့မှစ၍ အသက်ရှင်သမျှကာလပတ်လုံး ဘုရား တရား သံဃာကို ယုံကြည်ဆည်းကပ် သိမှတ်ကိုးကွယ်ပါ၏။ ဒါက တပိုင်း။
ယုံကြည် သိမှတ် ဆည်းကပ်ကိုးကွယ်ပါ၏-လို့ လျှောက်ထားလဲပြီးရော အဲဒီရတနာသုံးပါးကို ကြည်ညိုပြီး ဆည်းကပ်သွားသူရဲ့ စကားက ဥပါသကာ မံ ဘန္တေ ဘဂ၀ါ ဓာရေတု အဇ္ဇတဂ္ဂေ ပါဏုပေတံ-ဒါ ပါလာတယ်။
ဘန္တေ ဘဂ၀ါ-ဘုန်းတော်ကြီးသော မြတ်စွာဘုရားရှင်သည်။ မံ-တပည့်တော်ကို။ အဇ္ဇတဂ္ဂေ ပါဏုပေတံ-ဒီကနေ့မှစ၍ အသက်ရှင်သမျှ ကာလပတ်လုံး။ ရတနတ္တယံ-ရတနာတို့၏ ၃-ပါးသောအပေါင်းကို။ သရဏံ ဂတံ-ကိုးကွယ်ခြင်းသို့ ရောက်၍နေသော။ ဥပသကန္တိ-ဥပါသကာဟူ၍။ ဒီကနေ့မှစ၍ တပည့်တော်ကို ရတနသုံးပါးကို ကိုးကွယ်ခြင်းသို့ ရောက်နေသော ဥပါသကာဟူ၍။ ဓာရေတု-မှတ်သားပါ။ အသိအမှတ်ပြုသွားပါ။ ဗုဒ္ဓဘာသာထဲကို ၀င်ရောက်လာကြတဲ့ ပုဂ္ဂိုလ်တွေ ဘုရားရှင်ရဲ့ တရားတော်ကို နာကြားလို့ အဆုံး အဆုံးမှာ သရဏဂုံသီလ ခံယူတဲ့အခါ ဒီအတိုင်း လျှောက်လျှောက်သွားတယ်။ အဲဒါကို အဋ္ဌကထာများမှာ မှတ်ချက်ပေးတော့ ဥပါသကာဖြစ်ကြောင်းကို သူကြေညာတာ။ သူဗုဒ္ဓဘာသာဖြစ်တဲ့အကြောင်းကို ကြေညာတာ။

အဲဒီတော့ ဥပါသကာဆိုတဲ့စကားဟာ တကယ်တော့ အဲဓီသုတ္တန်တွေရဲ့ အဆုံးမှာ သူတို့ခံယူချက် ကြေညာချက်ကို ထောက်ထောက်ပြီးတော့ ကြည့်လိုက်လို့ရှိရင်၊ မြတ်စွာဘုရား ကိုယ်တော်တိုင်ကစပြီးတော့ ဟေ့-မင်း ဥပါသကာလုပ်-လို့ ပြောလိုက်ရတာ မဟုတ်ဘဲနဲ့ ကိုယ့်ခံယူချက်နဲ့ ကိုယ့်ဟာကိုယ် လျှောက်ရင်း လျှောက်ရင်းနဲ့ ဒီစကားလုံးဟာ သာသနာမှာ တွင်ကျယ်သွားတာ။ ဗုဒ္ဓဘာသာခံယူတဲ့ ပုဂ္ဂိုလ်တွေရဲ့ ကြေညာချက်မို့လို့ ဒါ သာသနာမှာ ဥပါသကာဆိုပြီးတော့ တွင်ကျယ်သွားတာ။

အဇ္ဇတဂ္ဂေ ပါဏုပေတံ-ဒီစကားက အာမခံ သိပ်ကောင်းတယ်။ ဒီနေ့ကစပြီးတော့ အသက်နှင့် ခန္ဓာ မြဲနေသမျှ ရဲရဲတင်းတင်း အပြောင်းအလဲ မလုပ်ဘူး။ အသက်နှင့်ခန္ဓာမြဲနေသမျှ ဘုရား တရား သံဃာ ဆည်းကပ်ပါ၏။ အဲဒါကြောင့် ရတနာ ၃-ပါးကို ဆည်းကပ်သူတပည့်တော်၊ တပည့်တော်မကို မြတ်စွာဘုရားက ဥပါသကာလို့ အသိအမှတ်ပြုသွားပါဘုရား-လို့ ဗုဒ္ဓဘာသာအဖြစ် ခံယူသူကိုယ်တိုင်က ကိုယ့်ဟာကိုယ် ကြေညာတဲ့စကားပဲ။ အဲဒီစကားကို အခြေပြုပြီးတော့မှ မြတ်စွာဘုရားက ဥပါသကာတို့ ကျင့်အပ်သော ကျင့်ဝတ်လို့ဆိုတဲ့ သုတ္တန်တွေကို ဆက်ဟောသွားတာ။

ဒီကနေ့ ဘုန်းကြီးတို့ အမျိုးကောင်းသား အမျိုးကောင်းသမီးတွေ မြတ်စွာဘုရား တရား သံဃာ ရတနာသုံးပါး ကိုးကွယ်ပါ၏။ ဆည်းကပ်ပါ၏။ သရဏံ ဂစ္ဆာမိ-လို့ ဆိုနေကြတယ်။ ဥပါသကာ မံ ဘန္တေ ဘဂ၀ါ ဓာရေတု အဇ္ဇတဂ္ဂေ ပါဏုပေတံ။ ဒါကိုတော့ ဆိုဖူးကြမယ်မထင်ဘူး။ ဒီပါဠိက တပည့်တော် တပည့်တော်မတို့ အသက်နှင့်ခန္ဓာ မြဲသမျှကာလပတ်လုံး ဥပါသကာဟူ၍ ဥပါသိကာဟူ၍ အသိအမှတ်ပြုတော်မူပါဘုရားဆိုတဲ့ လျှောက်ထားချက်ကို လျှောက်ထားတာ ဖြစ်တယ်။ ဘုန်းကြီးတို့တော့ ဒီကနေ့ မြန်မာနိုင်ငံ ထေရ၀ါဒအစဉ်အလာမှာ မကြားဖူးသေးဘူး။

မြတ်စွာဘုရား သက်တော်ထင်ရှားရှိစဉ်ကာလတုန်းကတော့ ဒီလိုချည်း လျှောက်လျှောက်သွားကြတာ။ ဒါထက်ပိုပြီးတော့ လေးလေးနက်နက် လျှောက်ထာလဲရှိသေးတယ်။ ဥပမာ-ကဿပ သတို့သား၊ ဘုရားဆိုတဲ့သတင်း ကြားတာနဲ့ ဘတ္တိယမြို့ကနေ ထွက်တယ်။ အဲဒီအချိန် ဘုရားက ရာဇဂြိုဟ်မှာရှိနေတယ်။ အဲဒီတော့ ဘယ်လိုကြွေးကြော်ပြီးတော့ ထွက်လာသလဲဆိုရင်-သူသည် တယောက်ယောက်သောသူ၏ တပည့်ခံရမယ်ဆိုရင် မြတ်ဗုဒ္ဓ၏ တပည့်ပဲ ခံတော့မယ်။ တခြားပုဂ္ဂိုလ်၏ တပည့်မလုပ်တော့ဘူး။ ဒါ သရဏဂုံတည်သွားတာ။

ပြီးတော့ ကဿပသတို့သား၊ ငယ်စဉ်က ခေါ်တော့ ပိပ္ပလိလုလင်တဲ့၊ နောင်သောအခါ ပထမသင်္ဂါယနာတင်ပွဲကြီးမှာ သံဃာ့ဦးသျှောင်ဖြစ်လာတဲ့ ရှင်မဟာကဿပ၊ သူထွက်လာတာ ဘုရားကိုယ်တော်မြတ်က သိနေတယ်။ ဪ-ထွက်လာပြီ၊ သာသနာ့ဦးသျှောင်၊ သံဃာ့ခေါင်းဆောင်ဖြစ်တဲ့ ပုဂ္ဂိုလ် ထွက်လာပြီဆိုပြီး ဘုရားရှင်က ဝေဠုဝန်ကထွက်ပြီးတော့ ၃-ယူဇနာကနေ ကြိုနေတာ။ ဘုရားရှင်ကိုယ်တော်မြတ်ကို တွေ့တာနဲ့တပြိုင်နက် လက်အုပ်ချီ ရှိခိုး၊ ခြေဦးပေါ်မှာ နဖူးတင်ပြီးတော့ ဘန္တေ ဘဂ၀ါ-ဘုန်းတော်ကြီးသော မြတ်စွာဘုရား။ အဟံ ခေါ ပိပ္ပလိ-တပည့်တော် ပိပ္ပလိ လုလင်ပါဘုရား။ ဗုဒ္ဓဿ အန္တေ၀ါသိကော-ဘုရားရှင်ကိုယ်တော်မြတ်၏ တပည့်ပါဘုရား။ အဲဒီလို တန်းလျှောက်တယ်။ ဦးခေါင်းညွတ်ကျိုးပြီး ဘုရားရှင်ကိုယ်တော်မြတ်ကို ရွှေနားတော်ကြားအောင် သူလျှောက်ထားတယ်။

တပည့်တော် ပိပ္ပလိလုလင်၊ ဗုဒ္ဓအန္တေ၀ါသိက တပည့်ပါဘုရားလို့ ကြေညာလိုက်တယ်။ ဒါ သရဏဂုံဆောက်တည်တာပဲ။ သရဏဂုံ မြဲသွားပြီတဲ့။ ဗုဒ္ဓဘာသာဖြစ်သွားပြီ။ ဥပါသကာဖြစ်သွားပြီ။ အဲဒီတော့ ဗုဒ္ဓရှင်တော်၏ တပည့်ပါဘုရားလို့ ကြေညာပြီးရင် သာသနာပြင်ဘက်က ဆရာကြီးတွေထဲမှာ သူသွားပြီးတော့ တပည့်မခံတော့ဘူး။ သူ့ရဲ့စိတ်ဓာတ်က ခိုင်ခိုင်မြဲမြဲ ဒီလိုဆုံးဖြတ်ချက်ချထားတယ်။ အဲဒါ ဥပါသကာရဲ့ စိတ်နေသဘောထားဟာ ဒီအတိုင်းပဲ ရှိရမယ်။ ရတနာ ၃-ပါးရဲ့ တပည့်ပါပဲလို့ ခံယူပြီးလို့ရှိရင် တခြားဘာသာတို့ထံ တပည့်ခံစရာ မလိုတော့ဘူး။ တခြားဘာသာသို့ထံ တပည့်ခံစရာ ရှိသေးတယ်ဆိုရင် ဒီဘက်က သရဏဂုံ ညစ်သွားမယ်။ ပျက်သွားမယ်။

ထေရ၀ါဒမှာ တခြားဘာသာကို တပည့်ခံစရာ မလိုဘူး။ ရှိခိုးစရာလဲ မလိုဘူး။ မဟာယာနကျတော့ ဘုန်းကြီးတွေကိုယ်တိုင်ကပင်လျှင် နတ်မင်းကြီးများကိုလဲ ရှိခိုးရတယ်။ ဘုရားရဲ့ ကျေးဇူးရှင် ဘုရားရဲ့ မယ်တော်ကိုလဲ ရှိခိုးရသေးတယ်။ ပိဋကတ်သုံးပုံစောင့်တဲ့ သူရဿတီကိုလဲ ဘုန်းကြီးက ရှိခိုးရသေးတယ်။ ဘုန်းကြီးတို့ ထေရ၀ါဒကတော့ ပီပီသသပဲ။ မြတ်စွာဘုရားမှတပါး အခြားကို ရှိခိုးစရာ မလိုတော့ဘူး။ အဲဒါ ရှင်မဟာကဿပတို့ ဆောက်တည်သွားတဲ့ သရဏဂုံဟာ ဒီအတိုင်းပဲ။ နောက်ပြောရရင် အာဠာဝကဆိုတဲ့ ဘီလူးကြီးများ ဗုဒ္ဓဘာသာအဖြစ် ပြောင်းပြီးတဲ့နောက်ပိုင်းမှာ သာသနာတော်ကို ကြည်ညိုပြီးတဲ့နောက်ပိုင်းမှာ အာဠာဝကကလဲ ဘာကြေညာသလဲဆိုတော့ လောကမှာ သူသည် နဖူးနဲ့ ဒူးနဲ့ တံတောင်နဲ့ ရှိခိုးရမယ်ဆိုလို့ရှိရင် ဗုဒ္ဓရှင်တော်ကိုသာ ရှိခိုးတော့မယ်။ အခြား ဘယ်သူ့ကိုမှ ရှိမခိုးတော့ဘူး။ အာဠာဝကဘီလူးတောင် အဲဒီလိုစိတ်မျိုးရှိတယ်။ ခုတော့ ဘုန်းကြီးတို့ ပရိသတ်က ဘုရားရှိခိုးပြီးရင် ဟိုဘက်မှာ ဘီလူးရော နတ်ရော ၃၇-မင်းရော အကုန် ကုန်းပြီးတော့ ရှိခိုးနေကြတာ တွေ့ရတယ်။

အဲဒီလိုဆိုတော့ ဘုရားလဲပဲ ရှိခိုးတယ်။ ဟိုဘက်လဲပဲ ရှိခိုးတယ်။ ဘုရားနဲ့ သာသနာပ သတ္တ၀ါတွေကို တန်းတူထားရင် ဘုရားတန်ဖိုးက ကျသွားမယ်။ အဲဒါကို မသိကြတော့ ကိုယ့်သရဏဂုံကို ကိုယ်နှိမ့်ချသလို ဖြစ်သွားတယ်။ ဒါကြောင့် အာဠာဝကရဲ့ စိတ်ထားမျိုး မွေးဖို့လိုတယ်လို့ တိုက်တွန်းချင်တယ်။ အာဠာဝကတို့လို စိတ်ထဲက ဆုံးဖြတ်ချက်နဲ့ ပြတ်ပြတ်သားသား မြတ်စွာဘုရားအပေါ်မှာ ကြည်ညိုပြီးတော့နေတဲ့ ဆည်းကပ်ပြီး အသိအမှတ်ပြုလို့နေတဲ့ အမျိုးကောင်းသား အမျိုးကောင်းသမီးတွေကို ဥပါသကာ ဥပါသိကာလို့ ခေါ်ပါတယ်။

ဗြဟ္မာယုဆိုတဲ့ ပုဏ္ဏား၊ ဝေဒကျမ်း တဖက်ကမ်းတတ်ပြီးတော့ တပည့်တွေ ရာပေါင်းများစွာကို ဝေဒအတတ်ကျမ်းတွေ သင်ပေးနေတဲ့ဆရာကြီး၊ ဒိသာပါမောက္ခဆရာကြီး၊ စိတ်ကောင်းရှိတယ်။ နှလုံးကောင်းရှိတယ်။ မြတ်စွာဘုရားရဲ့ ဂုဏ်တော်တွေကို အဝေးကကြားပြီး ကြည်ညိုတယ်။ ကြည်ညိုတော့ တပည့် ဥတ္တရလုလင်ကို လွှတ်ပြီး စုံစမ်းခိုင်းတယ်။ သွားစုံစမ်းလိုက်၊ တွေ့သလောက် တပည့်က ပြန်ပြောလိုက်နဲ့ စုံစမ်းစစ်ဆေးနေတာ သုံးနှစ်ကြာသွားတယ်။ ဘုရားကိုချဉ်းကပ်ဖို့ စုံစမ်းနေတာ ဗြဟ္မာယုပုဏ္ဏား သုံးနှစ်ကြာသွားတယ်။

ဘုန်းကြီးတို့ အမျိုးကောင်းသား အမျိုးကောင်းသမီးတွေ တစုံတခု အဲဒီလိုမျိုးပေါ့။ ပျောက်စေဆရာလိုလို၊ အကြားအမြင်ပေါက်သလိုလို၊ ရေမန်းကောင်းသလိုလို၊ သတင်းကြားရင်လေ ဘယ်သုံးနှစ်ပြောမနေနဲ့ သုံးနာရီမဆိုင်းဘူး၊ ချက်ချင်းထပြေးတာ။ ဟိုကျတော့မှ ဘာဖြစ်လာသလဲဆိုတော့ အလိမ်ခံပြီး ပြန်လာခဲ့ကြရတာပဲ။ သူတို့က ဘာသာရေးမှာ စိစိစစ်စစ် စုံစမ်းတယ်။ ကျေနပ်ပြီဆိုတော့မှ ဘုရားဆီလာတာ။ ဘုရားထံမှောက်ရောက်တော့လဲ မြတ်စွာဘုရားကို ခြေဆုံး ခေါင်းဆုံးကြည့်ပြီးတော့ မဟာပုရိသလက္ခဏာ ၃၂-ပါးကို တခုချင်း စစ်ဆေးတယ်။ မဟာပုရိသ ပီသတယ်၊ ယောက်ျားမြတ် ဖြစ်တယ်ဆိုတော့မှ မေးခွန်းတွေ မေးလျှောက်တယ်။ သူမေးတိုင်းဖြေနိုင်တော့မှ စိတ်ချပြီဆိုပြီးတော့ သရဏဂုံ ခံယူဆောက်တည်တယ်။ ဘယ်လို သရဏဂုံ ဆောက်တည်သွားသလဲဆိုတော့ ဘုရားရဲ့ ခြေတော်နှစ်စုံကို ရှေ့ကိုချပေးတော်မူပါလို့ လျှောက်ထားတယ်။ ဘုရားက ခြေစုံချပေးလိုက်တော့ အဲဒီခြေဖမိုးပေါ်မှာ သူ့နဖူးကို တင်ထားပြီး ခြေမျက်စိနှစ်ဖက်ကို တင်းတင်းလေး ဆုပ်နယ်ပြီးတော့ မြတ်စွာဘုရားကို သူလျှောက်တယ်။

အရှင်ဘုရား၊ တပည့်တော် ဗြဟ္မာယုပုဏ္ဏားပါဘုရား။ အဲဒီလို လျှောက်ထားတယ်။ သူက ဂိုဏ်းဆရာကြီးတယောက်ဖြစ်ပြီး လူပေါင်းများစွာရဲ့ ဆရာတယောက်ဖြစ်နေပါလျက်နဲ့ ဘုရားရဲ့ခြေတော်ကို ဆုပ်နယ်ပြီးတော့ ခြေဖမိုးတော်ကို နမ်းရှုပ်ပြီးတော့ မြတ်စွာဘုရား ကိုယ်တော်မြတ်ကို ရှိခိုးတယ်တဲ့။ ဗုဒ္ဓံ သရဏံ ဂစ္ဆာမိ-တော့ မပါဘူး။ ဒါလဲ သရဏဂုံ တည်သွားတာပဲ။ အဲဒီလို အာဠာဝကဆိုတဲ့ ပုဂ္ဂိုလ်ကြီးတွေ၊ ဗြဟ္မာယုဆိုတဲ့ ပုဏ္ဏားကြီးတွေ သရဏဂုံ ဘယ်လိုဆောက်တည်တယ်ဆိုတဲ့ သဘောကို ဘုန်းကြီးတို့ ပရိသတ် သုတအနေနဲ့ သိသင့်သိထိုက်လို့ ကောင်းစွာမသွေ ဟောကြားတော်မူလိုက်ပါပေသတည်း။

( သီတဂူ ဆရာတော် )

( မြတ်မင်္ဂလာ ၂၀၀၂-ခု ဖေဖော်ဝါရီလ )

No comments: