Wednesday, November 18, 2009

မိခင်ကျေးဇူး ပေးဆပ်သူ မျက်မမြင် ဦးတင်အောင်

မျက်မမြင်ဘ၀ဖြင့် မိခင်ကျေးဇူး ပေးဆပ်နေသူ တဦးကို မကြာမီက စာရေးသူ ဆုံတွေ့ခဲ့သည်။
သူ၏အမည်မှာ ဦးတင်အောင် ဖြစ်သည်။ အသက် ၆၀-နှစ်ရှိပြီ။ သူသည် ပုသိမ်မြို့ အိုးဘိုတန်း လန်းနေ ဦးသိန်းလှ ဒေါ်ရီတို့က မွေးဖွားသော သားသမီး ၅-ဦးအနက် အကြီးဆုံးသား ဖြစ်သည်။

ဦးတင်အောင်မှာ မွေးရာပါ မျက်စိမမြင်သူ ဖြစ်သည်။ မိဘများ၏ ကျွေးမွေးပြုစုကောင်းမှုကြောင့် ချမ်းမြေ့စွာ နေနိုင်ခဲ့၏။ ငယ်စဉ်က ဂီတ၀ါသနာပါသဖြင့် မယ်ဒလင်ဆရာကြိုင်ထံ မယ်ဒလင်တီးပညာ သင်ခဲ့သည်။ ဆရာ၏ အသင်အပြ ကောင်းမှုကြောင့် မြန်မာသီချင်းကြီးများကို ကျွမ်းကျင်စွာ တီးခတ်နိုင်ခဲ့၏။ ပွဲနေပွဲထိုင် ဧည့်ခံပွဲ များတွင် ဦးတင်အောင်၏ မယ်ဒလင် လက်စွမ်းက ထင်ပေါ်ကျော်ကြား၏။

ထို့ကြောင့်လည်း ညီငယ် ညီမငယ်များ၏ ညာသင်ကြားရေးတွင် ပင်ပန်းနေကြသော မိဘများကို တေးဂီတဖြင့် ၀င်ငွေရှာ၍ ကူညီပံ့ပိုးလို၏။ မိဘများက ခွင့်မပြုချေ။ မိဘများက ပုသိမ်မြို့ သန္တာရုံကျောင်းဆရာတော်ကြီး ဦးဝိမလဗုဒ္ဓိ ထံတွင် ဆည်းကပ်စေ၏။ ဆရာတော့်ထံတွင် ဘာသာတရားကို တစိုက်မတ်မတ် ကျင့်ကြံ အားထုတ်နိုင်ခဲ့၏။ ထိုအခါ ငယ်စဉ်က ၀ါသနာထုံခဲ့သော တေးဂီတကို လုံးဝစွန့်လွှတ်လိုက်သည်။

ထိုအချိန်၌ ဖခင်လည်း မရှိ၊ ညီ-ညီမတွေလည်း တက္ကသိုလ်မှ ဘွဲ့ရရှိကြ၍ လုပ်ငန်းတာဝန် ကိုယ်စီဖြင့် နယ်အသီးသီးသို့ ထွက်ခွါသွားကြသည်။ အိမ်တွင် အသက် ၈၀-ကျော် မိခင်ကြီးနှင့် ဦးတင်အောင်သာ ကျန်ရစ်ခဲ့၏။ ထိုတွင် ဦးတင်အောင်သည် မိခင်ကျေးဇူးကို ပေးဆပ်ရန် အခွင့်ရရှိခဲ့သည်။

ဤသို့ရရှိသဖြင့် ဦးတင်အောင်သည် ဆွဲခြင်းတလုံးတွင် မုန့်ပဲသရေစာများ ထည့်၍ အရပ်ထဲ၌ လှည့်လည် ရောင်းချ၏။ ကျောင်းသူ ကျောင်းသားလေးများက အားပေးကြ၏။ ကြင်နာသူများက အားပေးကြ၏။ ကလေးများကိုလည်း အခွင့်ရတိုင်း မိဘကျေးဇူးကို ပေးဆပ်တတ်ရန် သွန်သင်မှုပြု၏။ ဦးတင်အောင်ကို မိခင် လုပ်ကျွေးနေသူ၊ ဘုရားကျောင်းကန် ပြုပြင်နေသူ-ဟု သိရှိကြ၍ လေးစားရိုသေကြ၏။ ပေးကမ်းလှူဒါန်းကြ၏။

အဓိကအားဖြင့် ကိုယ့်စွမ်းကိုယ့်အားဖြင့် မိဘကျေးဇူးကို ပေးဆပ်နိုင်ခြင်းကို အထူးဂုဏ်ယူတတ်၏။ ဖခင်ကျေးဇူးကိုလည်း မမေ့၊ မိမိကိ်ု စေတနာသဒ္ဓါတရားဖြင့် လှူဒါန်းကြသူ စေတနာရှင်များအတွက်ကိုပါ ရည်စူး၍ ပုသိမ်မြို့ စက်တော်ရာ ဘုရားကြီးနှင့် တန့်တော်ဦး မတ်ရပ်ကိုယ်တော်ကြီးတွင် ရွှေသင်္ကန်းကပ်လှူ၍ လျှပ်စစ်မီးများ ပူဇော်သည်။ ထို့အပြင် ကျောင်းကန်စေတီပုထိုးများကိုလည်း ပြုပြင်လှူဒါန်း၍ အလှူဒါနအစုစုကို အမျှပေးဝေလေ့ရှိ၏။

မိဘဂုဏ်ကျေးဇူးကို ပေးဆပ်တတ်ကြသော သူများထဲတွင် မျက်မမြင် ဦးတင်အောင်သည် အတုယူဖွယ် ကောင်းလှပေသည်။

( ပုသိမ် လှကြည် )

No comments: