Monday, November 16, 2009

ဘာသာရေး ပြဿနာ ( ၉၁ )

( ဘဒ္ဒန္တ တိလောကသာရ ဖြေသည် )

(မေး) (စေတီဟောင်း ပြင်ဆင်ရာ၌)
အရှင်ဘုရား ရုပ်ပွားစေတီတော်ဟောင်း ပြင်ဆင်မှု အဆုံးအဖြတ်အရ ထိုရုပ်ပွားစေတီတော်ဟောင်းများတွင် ဌာပနာထားသည့် (မူလပင်ရင်းစေတီတော်မြတ်၏ ဘဏ္ဍာတော်) ရတနာရွှေငွေ ကျောက်သံပတ္တမြား အစရှိသော ပစ္စည်းတို့မှာ ရောင်းချထုခွဲ၍ ပြုပြင် ပြင်ဆင်နိုင်ခွင့် ရှိ-မရှိ သိလိုပါသည်ဘုရား။
ထို့အပြင် ဗုဒ္ဓအဆိုအမိန့် ၀ိနည်းအရ ရဟန်းသံဃာတို့က ဦးစီးဦးဆောင်ပြုလုပ်၍ ရုပ်ပွားစေတီတော် ဟောင်းများ၌ ဌာပနာဖောက်ကောင်း မဖောက်ကောင်း၊ ရုပ်ပွားစေတီတော်ဟောင်း၏ ထီးသစ်၊ ထီးဟောင်း စသည်တို့ကို ရဟန်းသံဃာတို့က ဦးစီးဦးဆောင် ပြုလုပ်ပြင်ဆင်ရန် အလှူခံကောင်း မကောင်း စသည်တို့အား (ဗုဒ္ဓဘာသာဝင် အများအကျိုးအတွက်ပါ) သိရှိလိုပါ၍ မေးမြန်းလျှောက်ထားအပ်ပါသည်။
(ဦးခင်မောင်မြင့်-သတင်းထောက်၊ ရေနံချောင်းမြို့)

(ဖြေ)
အသောကမင်းကြီးသည် အဇာတသတ်မင်း မြှုပ်နှံသိမ်းဆည်းထားခဲ့သော ဓာတ်တော်မွေတော်တို့ကို ဖော်ထုတ်ပူဇော်သည်။ ထိုတွင် အဇာတသတ်မင်း ဌာပနာထားခဲ့သော ပတ္တမြားကြီး တလုံးတွင် နောင်အခါ မင်းဆင်းရဲတို့သည် ဤပတ္တမြားကြီးကို ထုခွဲစီမံ၍ ဤဓာတ်တော်တို့ကို ပူဇော်စေသတည်း-ဟု ရေးထိုးခဲ့သော စာကိုတွေ့ရကြောင်းဆိုသည်။
အညာဒေသတွင် စေတီတဆူ ပြိုပျက်ရာ အချိန် ၁၇-ကျပ်သားရှိသော ငွေတုံးကြီးကို တွေ့ရပြီး နောင်အခါတွင် ဤငွေတုံးကို ထုခွဲ၍ စေတီကို ပြုပြင်ပူဇော်ကြပါကုန်ဟု ရေးထိုးထားကြောင်း ကြားသိရဖူးသည်။

ဤသည်တို့ကိုထောက်၍ ဓာတ်တော်မွေတော် ဥဒ္ဒိဿစေတီတော်များမှအပ ရွှေငွေစသော ရတနာပစ္စည်းဌာပနာတို့မှာ နောင်စေတီပျက်လျှင် ပြုပြင်ရန်အတွက် ပူးတွဲဌာပနာခဲ့ကြောင်း ထင်ရှားပါသည်။ ထို့ကြောင့် စေတီဟောင်းပြင်ဆင်သူတို့သည် ဆရာတော် သံဃာတော်တို့နှင့် တိုင်ပင်၍ ရတနာပစ္စည်းတို့ကို စီမံခန့်ခွဲသင့်ကြောင်း ဆရာတော် သံဃာတော်တို့ကလည်း ကိုယ်တိုင်ပြုပြင်ခြင်းထက် သြ၀ါပေး၍ ဒါယကာတို့အား စေခိုင်းသင့်ကြောင်း ကိုယ်တိုင်အလှူခံခြင်းထက် နာယက သြ၀ါဒါစရိယနေရာမှနေ၍သာ စီမံသင့်ကြောင်း အကြံပေးလိုပါသည်။
*********************************************************************************
(မေး) (အရှင်ဒါရုစိရိယ နှင့် အခြားပြဿနာ)
အရှင်ဘုရား
(၁) ထေရာပဒါန် ပါဠိတော် မြန်မာပြန်စာအုပ်ထဲမှ လက်ဝဲရံ ရဟန္တာမထေရ်စာရင်းတွင် ပါဝင်သော အရှင်ဒါရုစိရိယ မထေရ်သည် လူ့အသွင်နှင့် ပရိနိဗ္ဗာန်စံသွားသော ဗာဟိယဒါရုစိရိယ ဖြစ်ပါသလားဘုရား။
(၂) ဘုန်းကြီးကျောင်း တကျောင်းမှ အပြစ်တစုံတရာရှိ၍ နှင်ထုတ်ထားသော (သို့မဟုတ်-ထွက်ပြေးလာသော) ရဟန်း-သာမဏေ တပါးပါးအား အခြားကျောင်းတကျောင်းမှ လက်ခံသင့်ပါသလား၊ လက်ခံရိုးထုံးစံ ရှိပါသလားဘုရား။
(၃) ရဟန်းသံဃာများနှင့် စကားပြောသောအခါ လုပုဂ္ဂိုလ်များက တင်ပါး-ဟု သုံးနှုန်းလေ့ရှိပါသည်။ ၄င်း တင်ပါး-ဆိုသော စကားဝေါဟာရ၏ အဓိပ္ပါယ်ကို ရှင်းလင်းပါရန် ရိုသေစွာ လျှောက်ထားပါသည်။
(ဦးအောင်သန်း-အောင်လံမြို့)

(ဖြေ)
(၁) ပရိက္ခရာ ရှာရင်း လူဝတ်ဖြင့် ပရိနိဗ္ဗာန်ပြုသွားရသော ဗာဟိယဒါရုစိရိယသည်ပင် လက်ဝဲရံ ရဟန္တာစာရင်းဝင် အရှင်ဒါရုစိရိယ ဖြစ်ပါသည်။ ကမ္ဘာတသိန်း ပါရမီဖြည့်ခဲ့ပြီး ခိပ္ပါဘိည ဧတဒဂ်ရ မဟာသာဝကဖြစ်ပါသည်။ ကမ္ဘာတသိန်းအတွင်း သင်္ကန်းပရိက္ခရာဖြင့် လှူဒါန်းချီးမြှောက်မှု မရှိခဲ့ဖူး၍ ဧဟိဘိက္ခု ရဟန်းမဖြစ်နိုင်သဖြင့် သင်္ကန်းရှာဆဲတွင် ပရိနိဗ္ဗာန်စံခဲ့ရသည်ဟု ဆိုပါသည်။ သတိပြု သံဝေဂယူဖွယ်ပင် ဖြစ်ပါသည်။

(၂) ကျောင်းတိုက်ကြီးများ၌ မူလဆရာကိုယ်တိုင် သို့မဟုတ်-စာဖြင့် အပ်နှံမှသာ လက်ခံပါသည်။
ဤခေတ် သာသနာဝင်မှတ်တမ်းများတွင် ကျောင်းပြောင်းရွှေ့အပ်နှံမှု ပုံစံနှင့် လက်မှတ်ထိုးရန်ပါသဖြင့် နှင်ထုတ်ခံရသော ရဟန်း၊ ထွက်ပြေးလာသော ရဟန်း-သာမဏေများအတွက် ပြဿနာ ရှင်းပါသည်။

(၃) တင်ပါ-ဟူသော အသုံးအနှုန်းသည် ရဟန်းသံဃာများနှင့် စကားပြောသောအခါ လူပုဂ္ဂိုလ်များက မှန်ပါသည်ဘုရား၊ တင်ပါသည်ဘုရား-ဟု ၀န်ခံလျှောက်ထားသည့် နေရာတွင် သုံးလေ့ရှိသော စကားဖြစ်သည်။ တင်ပါသည်ဘုရား-ဟု ဆိုရမည်ကို တင်ပါဘုရားဟု ဆိုခြင်းဖြစ်ပါသည်။ ကာလကြာ၍ တင်ပါးဘုရား-ဟု အသံထွက်နေပါသည်။ တင်ပါသည်ဘုရားဟု အပြည့်အ၀ လျှောက်ထားတတ်ရန် လိုပါသည်။
********************************************************************************

(မေး) (ပဉ္စမပါရာဇိက)
အရှင်ဘုရား၊
မေထုန်, ခိုး, သတ်မျိုး, လိမ်-လေးဖြာရှိ၊ ပါရာဇိ ရှောင်ကြည်ဖွယ်။
နောက်တဖန် ပါရာဇိ, ရှိသင့်လျှင် ဘယ်တရား, မှတ်သားရမယ်။
ရဟန်းတို့ အကျင့်နယ်, မြင့်ထယ်(ထည်)သည့် မှတ်ရန်များ,
သိသာအောင် ရှင်ဆရာက, မြင်သာအောင် ပါဠိသွင်းလို့, ရှင်းပြစေသား။
(ဂန္ထ၀ါစက-မန္တလာနဂရ)

(ဖြေ)
မေထုန်, ခိုး၊ သတ်မျိုး လိမ်လေးဖြာရှိ၊ ပါရာဇိရှောင်စရာ။
နောက်တဖန် ပါရာဇိ၊ ရှိသင့်လျှင် ဤတရား၊ မှတ်သားဖို့ပါ။
ရဟန်းတို့ ကျင့်စရာ၊ မှတ်ပါကြ ထင်အရှား။
ပစ္စဝေက် မသက်မ၀င်၍၊ မဆင်ခြင်သုံးဆောင်မှုကို၊ တခုပါရာဇိလို့၊ ပါဠိသည်လိုပြတယ်၊ မှတ်ကြစေသား။

သစေ ပဉ္စမပါရာဇိကံ ပညာပေတုံ သက္ကာ အဘ၀ိဿ၊ အပစ္စဝေက္ခိတာဟာရပရိဘောဂေါ ပဉ္စမပါရာဇိကံ ကတွာ ပညာပေတဗ္ဗော ဘဝေယျ။ (သံ-ဋ္ဌ ၂-၉၅)
********************************************************************************

(မေး) (မဟာဝင်ဝတ္ထု)
အရှင်ဘုရား၊ သီဟိုဠ်ကျွန်း (သီရိလင်္ကာ)မှာ ဘီစီ ၇၇-မှ ၁၀၁-အတွင်း ဒုဋ္ဌဂါမဏိမင်းကြီးလက်ထက် ကောဋိတိမ္ဗရ အမတ်ကြီးသည် မိစ္ဆာဒိဋ္ဌိပေါင်းများစွာကို သုတ်သင်တိုက်ခိုက်ပြီး နောင်တွင် ရဟန်းပြု၍ ရဟန္တာဖြစ်သွားသည်ဟု ဆိုပါသည်။ သည်နေရာမှာ မိစ္ဆာပေါင်းများစွာကို သတ်ခဲ့သော အမတ်ကြီးမှာ အပြစ်မရှိဘူးလား။ သတ်ခဲ့သော အပြစ်များအတွက် ငရဲမကျဘူးလား။
(မောင်စန်းလင်း-သာကေတ)

(ဖြေ)
ပါဏာတိပါတအမှုကို ပြုလုပ်ရာ၌ မိဘကို သတ်ခြင်း၊ ရဟန္တာကို သတ်ခြင်း၊ စသော အနန္တရိယ ဂရုကံများကို ကျူးလွန်မိမှသာ ငရဲကျခြင်းစသည် အပြစ်ရရန် မြဲပါသည်။ အခြားသတ်မှုများမှာ ဒါန၊ သီလ၊ ဘာဝနာ၊ ၀ိပဿနာတို့ဖြင့် ကာကွယ်နိုင်ပါသည်။ မပျောက်သည့်တိုင် အကုသိုလ်အကျိုးမပေးအောင် တားမြစ်နိုင်ပါသည်။ လူပေါင်းတထောင်ကျော် သတ်ခဲ့သော အင်္ဂုလိမာလ ခိုးသူကြီးသည် မြတ်စွာဘုရားနှင့် တွေ့၍ ရဟန္တာဖြစ်သွား သည်ကို ထောက်ဆနိုင်ပါသည်။
*********************************************************************************

(မေး) ( နတ် နဂါး၊ နတ် ဘီလူး)
အရှင်ဘုရား၊ နတ်နဂါး နတ်ဘီလူးတို့သည် နတ်စည်းစိမ်တမျှ ခံစားကြရပါသည်။ သို့သော် တိရစ္ဆာန်ဇာတ်မျိုးမကင်းပါ။ ထို့ကြောင့် ၃၁-ဘုံတွင် ၄င်းတို့ကို ဘယ်ဘုံ၌ ထည့်သွင်းရပါမည်နည်း။ မည်သည့်ကံအကျိုးပေးကြောင့် ဤဘ၀မျိုးကို ရကြပါသနည်း။ နတ်နဂါးနှင့် နတ်ဘီလူး မည်သို့ ကွဲပြားခြားနားကြပါသနည်း။ ဘုံရော ခြားနားပါသလား။ မဂ်ဖိုလ်ကို ၄င်းတို့နှစ်မျိုးလုံး ရနိုင်ပါသလားဘုရား။
(ဦးမောင်ဦး-တောင်ငူ)

(ဖြေ) ဟိမ၀န္တာတောင်နှင့် ပင်လယ်သမုဒ္ဒရာတို့အတွင်းရှိ နဂါးများကို ရိုးရိုးနဂါးခေါ်၍ တောင်စဉ် ၇-ထပ်အတွင်း သီဒန္တရ-သီဒါ-ရ-တန်၌ နေသော နဂါးမျိုးကို နတ်နဂါး ခေါ်သည်။
မြတ်စွာဘုရား၏ အောင်ခြင်း ၈-ပါး၌ပါသော နန္ဒောပနန္ဒနဂါးသည် ယင်းသီဒန္တရ၌နေသော နတ်နဂါးမျိုးဖြစ်သည်။
ရိုးရိုးနဂါး၊ နတ်နဂါးအားလုံးပင် တိရစ္ဆာန်ဇာတိများဖြစ်၍ မဂ်ဖိုလ်ကို မရနိုင်ကြပါ။

ဘီလူးမှာလည်း လူ့ပြည်တောတောင်တို့၌ ရှိသော လူသားစား ဘီလူးမျိုးတို့မှာ အပါယ်ဘုံဘ၀၌ ပဋိသန္ဓေနေသူများဖြစ်၍ တန်ခိုးလည်း မကြီး၊ မဂ်ဖိုလ်လည်း မရနိုင်ကြပါ။
သာတာဂီရိ၊ ဟေမ၀တ၊ အာဠာဝကတို့ကဲ့သို့သော နတ်ဘီလူးများက စတုမဟာရာဇ် မျိုးနွယ်များဖြစ်၍ တန်ခိုးလည်းကြီးသည်၊ မဂ်ဖိုလ်ကိုလည်း ရနိုင်ပါသည်။ ပဋိသန္ဓေစိတ်စသည်ဖြင့် အကျယ်ဖြေကြားသင့်သော်လည်း ပြဿနာအားလျော်စွာ သိသာရုံ အဖြေပေးရပါသည်။
*********************************************************************************

(မေး) (မြောက်သို့ ဦးခေါင်းတော်ပြု၍ ပရိနိဗ္ဗာန်စံဝင်မှု)
အရှင်ဘုရား၊ မြတ်စွာဘုရားသည် မြောက်အရပ်သို့ ဦးခေါင်းတော်ပြု၍ ပရိနိဗ္ဗာန် ၀င်စံတော်မူခြင်းမှာ မြတ်စွာဘုရားတိုင်း၏ ဓမ္မတာဖြစ်ပါသလား။ တပည့်တော်တို့၏ ဘုရားတဆူတည်းသာ ဖြစ်ပါသလား။ သိလိုပါသည်ဘုရား။
(ဦးခန္တီစာရ)

(ဖြေ)
ဗုဒ္ဓ၀င်တွင် မြတ်စွာဘုရားသည် ကုသိနာရုံ အင်ကြင်းစုံရှိ မလ္လာမင်းတို့ လာရောက်ထိုင်နေကျ အင်ကြင်းပင်အောက်၌ ခင်းထားသော ညောင်စောင်းတော်ကို အင်ကြင်းနှစ်ပင်အကြား မြောက်သို့ ခေါင်းရင်းပြုစေလျက် နေရာရွှေ့ပြီး ခင်းစေသည်ဟု ဆိုပါသည်။ ပရိနိဗ္ဗာန် စံတော်မူပြီးသည့်နောက် လူ နတ် ဗြဟ္မာတို့ လာရောက်ဖူးမြော်သည့်အခါ နေရာကျယ်ကျယ်ဝန်းဝန်း ဖူးမြော်လွယ်အောင် အင်ကြင်းပင်တန်း၏ အလယ်ကျကျနေရာ၌ မြောက်သို့ ဦးခေါင်းပြု၍ ပရိနိဗ္ဗာန်ဝင်စံခြင်း ဖြစ်သည်။
သို့သော် ဘုရားရှင်တိုင်း၏ ဓမ္မတာမဟုတ်။ အခြေအနေအရ ကျင့်သုံးသွားသော ဂေါတမမြတ်စွာဘုရား တဆူတည်း၏ ကိစ္စသာဖြစ်ကြောင်း မှတ်သားသင့်ပါသည်။
*********************************************************************************

(မေး) (ပါဏာတိပါတကံမှာ စေတနာသုံးပါး ပါ-မပါ)
အရှင်ဘုရား၊ ဒါနပြုရာ၌ ပုဗ္ဗ၊ မုဉ္စ၊ အပရ စေတနာသုံးပါး ကုသိုလ်ဖြစ်သကဲ့သို့ ပါဏာတိပါတ သူ့အသက်သတ်ရာ၌ ယင်းကဲ့သို့သော စေတနာသုံးပါးလုံး အကုသိုလ်ကမ္မပထ မြောက်ပါသလားဘုရား။ ရှင်းရှင်းဆိုသော် ပါဏာတိပါတ၌ ပုဗ္ဗ၊ မုဉ္စ၊ အပရ စေတနာသုံးပါးလုံး အကုသိုလ် ဖြစ်-မဖြစ် သိလိုပါသည်ဘုရား။
(မြတ်သူမွန်-ရွှေမြိုင်)

(ဖြေ)
သတ္တ၀ါကိုသတ်ရာ၌ များစွာသော ပယောဂတို့တွင် ဇီဝိတိနြေ္ဒကို ဖြတ်တတ်သော နောက်ဆုံးပယောဂဖြစ်သော သိန္နိဋ္ဌာပက မည်သည့် သတ္တမဇော စေတနာ၌သာ ကံထိုက်ပါသည်။ ထိုနောက်ဆုံး ပယောဂဖြစ်သော သန္နိဋ္ဌာပက သတ္တမဇောစေတနာ ဇောသို့ မရောက်မီကာလ၌ သတ်အံ့ဟု ကြံသောစိတ်ကို၎င်း၊ သေပြီးသည့် နောက်ကာလမှဖြစ်သော စိတ်ကို၎င်း ကမ္မပထမြောက်သော ပါဏာတိပါတကံ၌ မသွင်းယူအပ်ပါ။ လွယ်လွယ်ပြောရသော် ဒါနကုသိုလ်စသည်တို့ကဲ့သို့ ပါဏာတိပါတ အကုသိုလ်နေရာ၌ ပုဗ္ဗစေတနာ၊ အပရစေတနာ အကုသိုလ်ဟူ၍မရှိ။ သတ်ဆဲ သေဆဲ၌သာ အကုသိုလ်ကမ္မပထ ဖြစ်ပါသည်။
********************************************************************************

(မေး) ( ဣနြေ္ဒ)
အရှင်ဘုရား၊ ဣနြေ္ဒ၏အဓိပ္ပါယ်သည် အစိုးရခြင်းဟု သိရသော်လည်း မရှင်းလင်းသောကြောင့် ရှင်းလင်းအောင် ဖြေကြားပေးတော်မူပါရန် ရိုသေစွာ လျှောက်ထားအပ်ပါသည်ဘုရား။
(ဦးမောင်ဦး)

(ဖြေ)
ဣနြေ္ဒဟူသော မြန်မာစကားမှာ ပါဠိတွင် ဣန္ဒြိယ-(ဣန္ဒ+ဣယ) (န) အစိုးရခြင်း၊ ကိုယ်၊ နှုတ် စသော အမူအရာ၊ စက္ခုစသော ဣနြေ္ဒဟု ဆိုပါသည်။
ထိုတွင် အစိုးရခြင်းအနက်မှတပါး အခြားအနက်များအရ ရှင်းလင်းသိသာနိုင်စရာ ရှိပါသေးသည်။
ထို့ပြင် ဣန္ဒြိဂုတ္တ (ပ) ဣနြေ္ဒကို စောင့်စည်းသောသူ၊ ဣန္ဒြိယဂုတ္တ-(ဣ) ဣနြေ္ဒကို စောင့်စည်းခြင်း၊ ဣန္ဒြိယဂ္ဂယှ-(န) ဣနြေ္ဒကို ယူတတ်သော အာရုံစသော ဆက်တွဲအနက်များ ဖြစ်ပါသည်။
ထိုအနက်များကို ထောက်ရှုပါက ပိုမိုရှင်းလင်းနိုင်လောက်ပါသည်။

( မြတ်မင်္ဂလာ ၂၀၀၂-မတ်လ )

No comments: