Sunday, November 22, 2009

ဒိဋ္ဌ ကောင်းကျိုး

စာရေးသူ၏ ဖခင်ကြီးသည် အသက်အားဖြင့် ၇၉-နှစ်သို့ ရောက်ရှိနေပါပြီ။ ရောဂါဝေဒနာ ကင်းခြင်း၊ အစားအသောက်မှန်ခြင်း၊ အအိပ်အနေမှန်ခြင်း စသော အကြောင်းများကြောင့် ယခုအခါ ကိုယ်ကျန်းမာ စိတ်ချမ်းသာစွာဖြင့် လှိုင်သာယာမြို့ (၁၁)ရပ်ကွက် အမှတ် ၂၁၄-ဗိုလ်တာရာလမ်း နေအိမ်တွင် ချမ်းမြေ့ကြည်သာ နေထိုင်လျက်ရှိပါသည်။

ဖခင်ကြီးသည် ဧရာဝတီတိုင်း အင်္ဂပူမြို့နယ် ခွေးတောက်ချောင်းကျေးရွာတွင် နေထိုင်သည်။ ကိုင်းကျွန်းလုပ်ငန်း၌ သူရင်းငှါးလုပ်ကာ သားသမီး ၇-ယောက်တို့ကို နှစ်ရှည်လများ ပင်ပန်းကြီးစွာ လုပ်ကိုင်ကျွေးမွေးခဲ့ရရှာသည်။
ထိုမျှလောက် ဆင်းရဲပင်ပန်းစွာ လုပ်ကိုင်စားသောက်နေရသော်လည်း ဖခင်ကြီးသည် ဘုန်းတော်ကြီးကျောင်း အတွက် တလလျှင် တကြိမ် အလှည့်ကျ ဆွမ်းချက်လှူဒါန်းပါသည်။ ထိုအခါ ရပ်မိရပ်ဖလူကြီးများနှင့် ဘာသာရေး ခေါင်းဆောင် လူကြီးးများက သနားကြင်နာသဖြင့် ဖခင်ကြီးအား တလတကြိမ် အလှည့်ကျ ဆွမ်းချက်လှူဒါန်း သည်ကို ရပ်နားရန် ပြောကြပါသည်။

ဖခင်ကြီးက လက်မခံပါ။ လူမွဲသော်လည်း သဒ္ဓါတရား မမွဲ-ဟူ၍ ခံယူချက်ထားကာ လစဉ်ဆွမ်းလှည့်ကို ဘယ်သောအခါမှ မပျက်ကွက်ခဲ့ပေ။ တတ်စွမ်းသမျှ ဆွမ်းဟင်းလျာတို့ဖြင့် ထာဝရကုသိုလ် အရယူခဲ့သည်။
အလုပ်အကိုင် လုပ်ငန်းခွင်၌လည်း ဖခင်ကြီးသည် သူတပါးစိတ်ကျေနပ်လောက်အောင် ဆောင်ရွက်ပေးလေ့ ရှိသည်။ ကုသိုလ်ရေးနဲ့ပတ်သက်၍လည်း သဒ္ဓါစေတနာထားရှိ၍ နောက်မတွန့်တမ်း နည်းများမဆို လှူဒါန်းလေ့ ရှိသည်။ ထို့ပြင် နေ့ကြီးရက်ကြီး သီတင်းနေ့များတွင်လည်း ဥပုသ်စောင့်ခြင်းကို မှန်မှန်ပြုခဲ့သည်။

ယခုအခါ ကျေးလက်မှ ရန်ကုန်ဒေသသို့ ပြောင်းရွှေ့ရောက်လာသည်မှာ ၄-နှစ်ကျော်မျှ ရှိခဲ့ပြီ။ ကျေးလက်မှာ နေနည်းအတိုင်းပင် သူတပါးအပေါ် မေတ္တာထားရှိခြင်း။ ဖော်ရွေပျူငှာခြင်း၊ ကုသိုလ်ရေး လက်မနှေးခြင်း စသည့် မိမိ၏ ပင်ကို ဓလေ့စရိုက်တို့ကို ဆက်လက်ထားရှိ ဆောင်ရွက်သည်။ ထို့ကြောင့်လည်း အိမ်နီးချင်းများ၊ ရပ်ကွက်သူ ရပ်ကွက်သားများ၏ ကြည်ညိုလေးစားခြင်းကို ခံရသည်။

စာရေးသူအနေဖြင့် ဖခင်ကြီး၏ စားဝတ်နေရေးမှအစ အားလုံးတာဝန်ယူ၍ ပြုစုစောင့်ရှောက်ထားသည်မှာ ၁၀-နှစ်တာမျှ ရှိခဲ့ပါပြီ။ မိသားစုအပေါ်၊ ပတ်ဝန်းကျင်အပေါ်၊ ဘာသာသာသနာတို့၌ မွန်မြတ်သော စိတ်ထား ရှိသည့် ဖခင်ကြီးကို ကြည့်၍ အတိတ်ကကောင်းသော ကံတရားများသည် ယခုအခါ ကောင်းကျိုးတရားများ ပေးနေလေပြီ-ဟူ၍ ၀မ်းမြောက်ဝမ်းသာ ဖြစ်ရပါတော့သည်။

(စိတ္တသုခ-အရှင်စန္ဒိမ၊ ဓမ္မကထိက)
( မြတ်မင်္ဂလာ ၂၀၀၂-ဇူလိုင်လ)

No comments: