Monday, November 23, 2009

ဘာသာရေး ပြဿနာ ( ၉၃ )

( ဘဒ္ဒန္တ တိလောကသာရ ဖြေသည် )

(မေး) (အရုဏ်မတက်မီ ဆွမ်းတော်တင်ခြင်း)
အရှင်ဘုရား၊ အရုဏ်မတက်မီ ဘုရားဆွမ်းတော် တင်သင့်-မတင်သင့်၊ တင်မိပါက မည်သည့်အပြစ် ရှိပါသလဲဘုရား။ ဖြေဆိုတော်မူပေးပါဘုရား။
(မအေးအေး-ဥဿာမြို့သစ်၊ ပဲခူးမြို့)

(ဖြေ)
အရုဏ်တက်ချိန်ကို လက်တွေ့သိရှိရန်မှာ နံနက်နေထွက်ချိန် အရှေ့အရပ်တွင် နေထက်ဝက်ပေါ်သောအခါ နာရီကိုမှတ်ပါ။ ထိုနေထက်ဝက်ပေါ်ချိန်ကို နေထွက်ချိန်ဟု မှတ်ထားပြီး ထိုအချိန်မတိုင်မီ သာမန်တနာရီ အလိုသည် အရုဏ်တက်ချိန် ဖြစ်ပါသည်။

တနေ့ကြည့်ထားပြီးလျှင် နောက်နေ့မှစ၍ အရုဏ်တက်ချိန်ကို တိကျစွာ သိနိုင်ပါပြီ။ ထို့နောက် ၃-ရက်လျှင် (စက်နာရီဖြင့်) တမိနစ် အတိုးအလျှော့ကို မှတ်၍ အရုဏ်ကို ဆုံးဖြတ်ပါ။ နံနက်အရုဏ်ဆွမ်းကို အရုဏ်မတက်ဘဲ မတင်ရပါ။ အရုဏ်မတက်ဘဲ တင်လျှင် အရုဏ်ဆွမ်းမဖြစ်ဘဲ ညဆွမ်းဖြစ်နိုင်သဖြင့် အပြစ်ရှိပါသည်။ မိမိဥပုသ်စောင့်ထားလျှင်လည်း အရုဏ်တက်မှသာ စားသောက်နိုင်ပါသည်။

တန်ခူးလပြည့်နေ့တွင် နံနက် ၅-နာရီတိတိ အရုဏ်ယူ၍ ၃-ရက် တမိနစ်တိုးပါ။
ပြာသိုလပြည့်တွင် နံနက် ၅-နာရီခွဲ အရုဏ်ယူ၍ ၃-ရက် တမိနစ်လျှော့ပါ။ သာမာန်အရုဏ်တက်ချိန် ရပါသည်။
သို့သော် သာမန်မှတ်သားချက် မဟုတ်။ အတိအကျမဖြစ်နိုင်သဖြင့် အရုဏ်ကို တိုး၊ မွန်းတည့်ကို လျှော့-ဟူသော ရှေးစကားအတိုင်း လိုက်နာဖို့လိုပါသည်။
********************************************************************************

(မေး) (ဆွမ်းတော်တင် စားအပ်-မစားအပ်)
အရှင်ဘုရား၊ ၂၀၀၁-ခုနှစ် ဇွန်လအမေးအဖြေတွင် ဆွမ်းတော်တင်စားခြင်းနှင့်ပတ်သက်၍ ဘုရားဝေယျာဝစ္စ ပြုသူ ဖုန်းတောင်းယာစကာများသာ စားအပ်သည်ဟု ဆိုခဲ့ပါသည်။ တပည့်တော်မသည် ဘုရားကို ဆွမ်းတော် တင်သည့်အခါ ဆွမ်း၊ ဆွမ်းဟင်းမှစ၍ ဘာပဲလှူလှူ မိမိတတ်နိုင်သည့် ပန်းကန်အနေအထားနဲ့ အလျှံပယ် လှူရ၊ တန်းရမှ စိတ်ကျေနပ်ပါသည်။ ၀မ်းသာမိပါသည်။ စွန့်ချိန်တန်လျှင် စွန့်ပြီး စားခဲ့မိပါသည်ဘုရား။ ဘာပစ္စည်းပဲ လှူလှူ စွန့်၍ စားခဲ့ခြင်းသည် ကြီးလေးသော အပြစ်၊ ဖြစ်-မဖြစ် ဖြေကြားပေးတော်မူပါဘုရား။
(မြစန္ဒာ-ရွှေပြည်သာ)

(ဖြေ)
မြန်မာရာဇ၀င်၌ ပုဂံပြည် အနော်ရထာမင်းကြီးသည် သထုံပြည့်ရှင် မနူဟာမင်းကို ပုဂံပြည်သို့ ဖမ်းယူခေါ်ဆောင် လာသည်။ ထို့နောက် မနူဟာမင်းသည် စကားပြောတိုင်း ခံတွင်းမှ စက်ရောင်တပြောင်ပြောင် ထွက်နေသည်။ ထိုအခါ အနော်ရထာမင်းကြီး ထိတ်ထိတ်လန့်လန့် ဖြစ်ရသည်။ ပညာရှင်များ၏ အကြံပေးချက်အရ ဆွမ်းတော်တင်ကို စားမိမှ မနူဟာမင်း ခံတွင်းမှ စက်ရောင်ပျောက်ကွယ်ကြောင်း ဆိုပါသည်။

အမှန်မှာ ဆွမ်းတော်တင် အသန့်အပြန့် မဟုတ်၊ ဆွမ်းတော်ကိုချပြီး သင်ပုတ်စင်ပေါ် စွန့်ပြီးကာမှ ရွှေလင်ပန်းနှင့် ထည့်၍ ကျွေးခြင်း (မသန့်ပြန့်သော အာဟာရကို ကျွေးခြင်း)ကြောင့် ဖြစ်သည်။ ယင်းကိုအစွဲပြု၍ ဆွမ်းတော်တင်စားလျှင် ဘုန်းတန်ခိုးညံ့တတ်သည်ဟု အစွဲအလမ်း ဖြစ်ပေါ်လာပြီး ဆွမ်းတော်တင်ပြီးလျှင် မစားသင့်-စွန့်ပစ်ရသည်။ ဖုန်းတောင်းယာစကာတို့အား ကျွေးရသည်-စသည့် အစဉ်အလာဖြစ်နေပေသည်။

သို့သော် မြတ်စွာဘုရားသည်ပင် သောဏသူဌေးသား၏ ဆွမ်းကို ဘုဉ်းပေးပြီး ဗိမ္ဗိသာရမင်းကြီးကို စားစေခြင်း၊ ရှေးရှေးသံဃာတော်ကြီးများသည် ဆွမ်းခံပြန်တွင် သပိတ်ပါ ဘုရားကို ကပ်လှူ၍ နောက်မှချယူပြီး ဘုဉ်းပေးခြင်း ရှိကြပါသည်။ အချို့ ဘုရားအလွန်ကြည်ညိုသူတို့သည် ပြဿနာရှင် မမြစန္ဒာကဲ့သို့ တခမ်းတနား ဘုရားကို ဆွမ်းလှူပြီးမှ ချ၍ သုံးဆောင်ခြင်းလည်း ရှိပါသည်။ ထို့ကြောင့် သန့်သန့်ရှင်းရှင်း လှူဒါန်းပြီး စွန့်ယူ၍ စားသောက်ခြင်း၌ အပြစ်မရှိပါ။

ဝေယျာဝစ္စပြုသူဟု ဆိုသည်မှာ မိမိတင်လှူထားသော ဆွမ်းတော်တင် မဟုတ်။ အခြားသူ တင်လှူထားသော ဆွမ်းတော်တင်ကို စားလိုလျှင် ဗုဒ္ဓဝေယျာဝစ္စကို ရှေးဦးစွာ ပြုပြီးမှ စားသင့်ကြောင်း အဆိုရှိသည်။ ရဟန်းသာမဏေဖြစ်၍ မွန်းတည့်ခါနီးနေလျှင် ဦးစွာဆွမ်းတော်တင်ကို စားပြီးမှ ဝေယျာဝစ္စကို နောက်မှပြု၍လည်း ဖြစ်ကြောင်း၊ ဝေယျာဝစ္စမပြုလုပ်ဘဲကား မစားသင့်ကြောင်း ရှေးဆရာတော်ကြီးတို့ သွန်သင်ဆုံးမချက်ရှိလေသည်။ ဤမျှဖြင့် ဆွမ်းတော်တင် စားသင့်-မစားသင့် ဆုံးဖြတ်နိုင်လောက်ပေပြီ။
********************************************************************************

(မေး) (ဆုတောင်းသင့်-မသင့်)
အရှင်ဘုရား ပွင့်တော်မူပြီးဖြစ်သော ဘုရားရှင်တို့သည် သတ္တ၀ါတို့အား ဆုတောင်းခြင်းကို ညွှန်ပြပေးတော်မူခဲ့ပါသလားဘုရား။ တပည့်တော်တို့ ဘုရားရှိခိုးအပြီးတွင် ဆုတောင်းသင့်-မသင့် သိလိုပါသည်ဘုရား။
(သား မင်းဟန်-ကော့မှူးမြို့)

(ဖြေ)
အောက်ပါဆောင်ပုဒ်ကို ကျက်မှတ်ထားပါ။
၁။ ကျွတ်ဆုမတောင်း၊ ကောင်းစွာမကျင့်၊ ကျွတ်ခွင့်မရ၊ ခါဏုက။
၂။ ကျွတ်ဆုမတောင်း၊ ကောင်းစွာကားကျင့်၊ ကျွတ်ခွင့်မရ၊ ဘိရတ။
၃။ ကျွတ်ဆုသာတောင်း၊ ကောင်းစွာမကျင့်၊ ကျွတ်ခွင့်မရ၊ နိဿိတ။
၎။ ကျွတ်ဆုလည်းတောင်း၊ ကောင်းစွာလည်းကျင့်၊ ကျွတ်ခွင့်ကိုရ၊ ၀ိဝဋ္ဋနိဿိတ။

အလှူဒါနပြုပြီးတိုင်း နိဗ္ဗာန်ဆုကို တောင်းသင့်ကြောင်း သင်္ခါရုပတ္တသုတ်တွင် မြတ်စွာဘုရား ဟောကြားထား ပါသည်။ ဆုတောင်းရာ၌ ၀ိဝဋ္ဋနိဿိတ ဖြစ်ရန်၊ နိဗ္ဗာန်ဆုကိုသာ တောင်းပါ။ သြကာသကန်တော့ခန်းတွင် ဈာန်တရား မဂ်တရား ဖိုလ်တရားဟုဆိုရာ၌ ဈာန်တရားမှာ လောကီဆုဖြစ်သည်။

ထို့ကြောင့် မတောင်းသင့်ကြောင်း ရှေးဆရာတော်များ ဟောကြားပါသည်။ မဂ်တရား ဖိုလ်တရား နိဗ္ဗာန်တရားကို မျက်မှောက်ပြုရပါလို၏-ဟု ဘုရားရှိခိုးပြီး ဆုတောင်းရန် အထူးလိုအပ်ပါသည်။ အစတွင် ဖော်ပြပါ ပုဂ္ဂိုလ်လေးမျိုးမှာ သံသာရခါဏုက (ငရဲသစ်ငုတ်ပုဂ္ဂိုလ်)။
သံသာရဘိရတ (သံသရာပျော် ပုဂ္ဂိုလ်)။
ဝဋ္ဋနိဿိတ (၀ဋ်ဆင်းရဲမှီ ပုဂ္ဂိုလ်)။
ဝိ၀ဋ္ဋနိဿိတ (၀ဋ်ဆင်းရဲမှ လွတ်မြောက်မှုကို မှီသောပုဂ္ဂိုလ်) ဟု အဓိပ္ပါယ်ဖော်၍ မှတ်သားပါ။
********************************************************************************

(မေး) (ပစ္စည်းကောက်ရလျှင်)
အရှင်ဘုရား ကောက်ရသောပစ္စည်းနှင့် ပတ်သက်၍ ရဟန်းတို့ မည်သို့ဆောင်ရွက်ရမည်။ မဆောင်ရွက်ဘဲ သိမ်းပိုက်လိုက်ပါက မည်သည့်အာပတ်သင့်သည်ကို ရှင်းလင်းဖြေကြားတော်မူပါဘုရား။
(ဦးမောင်ဦး-တောင်ငူ)

(ဖြေ)
ပါတိမောက် သုဒ္ဓပါစိတ် ရတန၀ဂ်တွင် ရတနသိက္ခာပုဒ်ဟူ၍ ရှိသည်။ ယင်းသိက္ခာပုဒ်တွင် ရတနာပစ္စည်းတမျိုးမျိုးကို အရာမ်တွင်း၊ အရာမ်ပ တနေရာရာတွင် တွေ့ရှိပါက ချက်ချင်း ကောက်၍ မယူသေးဘဲ စောင့်စား၍ နေရမည်။ အတန်ကြာစောင့်စား၍ ဥစ္စာရှင်မလာမှသာ သင့်လျော်သလို ပြုရမည်။ (သင့်လျော်သလို ဟူသည်မှာ ရဟန်းတို့နှင့် အပ်သောပစ္စည်း ဖြစ်လျှင် ပံ့သကူကောက်၍၄င်း၊ သိမ်းထားသင့်သော ပစ္စည်းဖြစ်လျှင် ပစ္စည်းရှင်အား ပြန်ပေးနိုင်ရန် သိမ်းထား၍၄င်း၊ ရွှေ၊ ငွေ၊ ရတနာဖြစ်လျှင် လျစ်လျှူရှု၍ ဖဲသွားခြင်းဖြင့်၎င်း ကျင့်ရာ၏။ ထိုသိက္ခာပုဒ်အတိုင်း ကျင့်သုံးရပါသည်။( ၀ိ-ဋ္ဌ ၃-၁၅၂-၃)
********************************************************************************

(မေး) ( ရဟန်းခံလျှင်)
အရှင်ဘုရား ရဟန်းအဖြစ် လွန်စွာရခဲသည်ဟု သိရပါသည်။ ရဟန်းအဖြစ်သို့ ရောက်ရန်အတွက်-
(၁) သ်ိမ်အင်္ဂါနှင့် ပြည့်စုံမှု မရှိခြင်း။
(၂) ရဟန်းလောင်းဆုံးမသော ရဟန်းသည်လည်း သူ၏ကျင့်ဝတ်အာပတ်များ ရှိနေခြင်း။
(၃) ဥပဇ္ဈာယ်ဆရာ၏ ကျင့်ဝတ်များ ကျူးလွန်မှု ရှိခြင်း-စသည်များ အရေးကြီး-မကြီး ဖြေကြားပေးတော်မူပါဘုရား။
(မောင်မျိုးမြင့်အောင်-သဲကုန်း)

(ဖြေ)
ရဟန်းခံရာတွင် အထက်ပါအချက်များမှာ-
(၁) သိမ်သည် အရေးကြီးပါသည်။
သိမ်သမုတ်စဉ်က သိမ်မအောင်ခဲ့လျှင် ထိုသိမ်၌ ရဟန်းခံသောရဟန်း၊ ရဟန်း မဖြစ်နိုင်ပါ။
ထို့ကြောင့် သိမ်မှန်-မမှန် စစ်ဆေးရန် အရေးကြီးလှပါသည်။ ကျန်သော ၂-ချက် ၃-ချက်များ၌လည်း ထိုရဟန်းလောင်း ဆုံးမသော ရဟန်းနှင့် ဥပဇ္ဈာယ်ရဟန်းများ ပါရာဇိက အာပတ်ရှိနေသည့်တိုင်အောင် ၀န်မခံပါက (အခြား ကာရကသံဃာတို့လည်း ၅-ပါး ပြည့်ပါက) ရဟန်းလောင်း ရဟန်းဖြစ်ပါသည်။
*********************************************************************************

(မေး) ( သင်္ဂါယနာတင်ချိန်နှင့် မြန်မာမင်းများ)
အရှင်ဘုရား ပထမသင်္ဂါယနာတင်ချိန်တွင် မြန်မာနိုင်ငံ၌ မည်သည့်မင်း စိုးစံသည်။ မည်သည့်ဘာသာ ကိုးကွယ်သည်။ ထို့အတူ ဒုတိယ တတိယနှင့် စတုတ္ထသင်္ဂါယနာ တင်ချိန်များတွင်လည်း မြန်မာနိုင်ငံ၌ မည်သည့်မင်း စိုးစံ၍ မည်သည့်ဘာသာ ကိုးကွယ်သည်များကို သိလိုပါသည်ဘုရား။ တခုချင်း ဖြေကြားပေးတော်မူပါဘုရား။
(အောင်သူဖြိုး-ပြည်မြို့)

(ဖြေ)
ပထမသင်္ဂါယနာတင်သော ရာဇဂြိုဟ်ပြည် အဇာတသတ်မင်းသည် ဘုရားရှင် ပရိနိဗ္ဗာန် ၀င်စံတော်မူပြီး ၂၄-နှစ်ကြာအောင် မင်းပြုနေသည်။ ထိုအချိန်တွင် မြန်မာနိုင်ငံ တကောင်းပြည်၌ အဘိရာဇာမင်းဆက် စိုးစံနေသည်။ သာသနာ ၂၄-တွင် သတိုးမင်း နန်းစံသည်။ ထို့ကြောင့် ၄င်းတို့ ကပိလ၀တ်မှ ဆင်းသက်သူများပင်ဖြစ်၍ ဗုဒ္ဓကိုပင် ကိုးကွယ်မည်ဟု ယူဆရပါသည်။

သာသနာနှစ် ၁၀၀-၌ ဒုတိယသင်္ဂါယနာ တင်ချိန်တွင် ဒွတ္တပေါင်မင်းကြီး စိုးစံ၍ သားတော်များပင် ရဟန္တာဖြစ်ကြောင်း ဆိုသဖြင့် ဗုဒ္ဓဘာသာကိုပင် ကိုးကွယ်မည်ဟု ဆိုနိုင်ပါမည်။ တတိယသင်္ဂါယနာတင်ချိန် သာသနာ ၂၃၅-တွင် ဒွတ္တပေါင်မင်းကြီး၏ မြစ်တော် ရန်မန်မင်း ဖြစ်သည်။

စတုတ္ထသင်္ဂါယနာတင်ချိန် သာသနာနှစ် ၄၅၀-တွင် ငတပါးမင်းနှင့် ပါပိယံမင်းတို့ သရေခေတ္တရာတွင် စိုးစံဆဲဖြစ်သည်။ ၄င်းတို့သည် ဗုဒ္ဓဘာသာကိုပင် ကိုးကွယ်ကြောင်း သရေခေတ္တရာဘုရားကြီးများ တူးဖော်ရာ၌ တွေ့ရှိသော ရုပ်ပွားဆင်းတုတော်များအရ ထင်ရှားလှပါသည်။
********************************************************************************

(မေး) (ဘဘုန်း)
အရှင်ဘုရား ရဟန်းတော်များကို ထေရ်ကြီး ၀ါကြီးဖြစ်လျှင် ဘုန်းဘုန်း၊ ဘဘုန်း၊ ဘဘုရား စသည်ဖြင့် မခေါ်ဝေါ် မပြောဆိုရလို့ ဆိုကြပါတယ်။ ဘဘုန်းဟု ခေါ်သူများ ရှိပါသည်။ ဤသို့ခေါ်သူသည် အပြစ် ရှိ-မရှိ ခေါ်ဝေါ်သင့်-မသင့် ကို ဖြေကြားပေးတော်မူပါဘုရား။
(မလှဥမ္မာ-ထီးချိုင့်မြို့)

(ဖြေ)
သံဃာတော်နှင့် ရင်းနှီးခင်မင်သူ ကလေးအရွယ်များက ဤသို့ခေါ်ဝေါ်တတ်ကြပါသည်။ မရိုသေမှု မဟုတ်၍ အပြစ်မရှိပါ။
မြတ်စွာဘုရားရှင်အား နကုလပိတာ နကုလမာတာတို့က အလွန်ကြည်ညိုမြတ်နိုးလှသဖြင့် သားတော်ဘုရား၊ အဖေတို့ အမေတို့ကို ခွဲခွါ၍ ဤမျှကြာအောင် အဘယ့်ကြောင့်နေပါသနည်း-စသည်ဖြင့် လျှောက်ထားသည်။

ထိုအခါ ရဟန်းများက မေးလျှောက်ရာ မြတ်စွာဘုရားက-ဤနကုလပိတာ နကုလမာတာ သီတင်းသည် ဇနီးမောင်နှံသည် ရှေးရှေးဘ၀ငါးရာက ငါဘုရားနှင့် မိဘတော်ခဲ့ဖူးခြင်း ဦးကြီး မိကြီးတော်ခဲ့ဖူးခြင်းတို့ကြောင့် ဤသို့ ခေါ်ဝေါ်ခြင်းဖြစ်သည်-ဟု ဟောတော်မူသည်။ ယင်းသို့ခေါ်ဝေါ်မှုကို ခွင့်ပြုတော်မူခဲ့ပါသည်။

ထို့ကြောင့် ဘဘုန်း၊ ဘဘုန်းဘုရား ဟု ခေါ်ဆိုခြင်းအတွက် အပြစ်မရှိပါ။ ထိုခေါ်ဝေါ်မှုကို ရှမ်းပြည်နယ် တနယ်လုံးပင် အလေ့အလာ ရှိကြပါသည်။ မြန်မာနိုင်ငံရှိ ငယ်ရွယ်သော ယောက်ျားကလေး၊ မိန်းကလေးများလည်း အလေ့အလာ ရှိကြပါသည်။

( မြတ်မင်္ဂလာ ၂၀၀၂-ခု ဇူလိုင်လ)

No comments: