Sunday, November 1, 2009

တူညီသော်လည်း မတူညီခြင်း

လွန်ခဲ့သော နှစ်ပေါင်း ၂၀-ကျော်က ဖြစ်ပါသည်။ ကျွန်တော် တာဝန်ထမ်းဆောင်ခဲ့ဖူးသော စစ်တောင်းမြစ်ဝနားက ရွာတရွာတွင် သေးသေး နှင့် ကြီးကြီး ဟူသော အမွှာညီအကိုနှစ်ဦး ရှိသည်။ အမွှာညီအကို နှစ်ဦး၏ အမည်သညာများသည် ဆန့်ကျင်ဘက်သဘော ဆောင်နေကြဘိသကဲ့သို့ သူတို့၏စိတ်နေသဘောထား အကျင့်စရိုက် အမူအရာ အပြောအဆို စသည်တို့ကလည်း မတူကွဲပြား အဖြူနှင့်အမည်းအလား ခြားနားကြပါသည်။

အလွန်ထူးဆန်းသောအမွှာညီအကို နှစ်ဦးဖြစ်သည်။ တဦးနှင့်တဦး နာရီဝက်ပင်မခြားဘဲ ရှေ့ဆင့်နောက်ဆင့်ဆိုသကဲ့သို့ မွေးဖွားလာသူများ ဖြစ်သည်။ သေးသေးက အငယ်ဖြစ်၏။ ကြီးကြီးက အကြီးဖြစ်၏။ သေးသေးသည် ငယ်စဉ်ကတည်းက မိဘများအပေါ်ဆိုးသည်။ ကစားဖော်များနဲ့ ရန်ဖြစ်သည်။ လူကြီးသူမများ အပေါ်တွင်လည်း လေးစားရကောင်းမှန်းမသိ၊ အရွယ်ရောက်လာသောအခါ အရက်သောက်သည်၊ ဖဲရိုက်သည်၊ ကြက်တိုက်သည်၊ လောင်းကစား အမျိုးမျိုးလုပ်သည်။ ငယ်ငယ်ရွယ်ရွယ်နှင့်ပင် အိမ်ထောင်ကျသည်။ တဆက်မက အိမ်ထောင်သုံးဆက်ရှိခဲ့သည်။ အိမ်ထောင်ဆက်များခဲ့သော်လည်း အိမ်တဆောင် မီးတပြောင်နှင့် သားမယားတို့ကို ထားခဲ့သည်မဟုတ်။ မိဘအိမ်တွင်သာ ကပ်၍ နေခဲ့သည်။ မိဘက ကျွေးရသည်။ သူကဖြင့် ပျော်ချင်သလို ပျော်နေသည်။ သေးသေး ပထမအိမ်ထောင်နဲ့ ဒုတိယအိမ်ထောင်ကျစဉ်က အကိုကြီးကြီးမှာ လူပျိုဖြစ်၍ မိဘများနှင့်ပင် နေထိုင်လျက် သေးသေး၏ ၀န်တာကို မျှဝေခံစားရပေသည်။

ထို့အပြင် သေးသေးသည် အရက်သောက်ရင်း ကြက်တိုက်ရင်းမှ ခိုက်ရန်ပွားကာ ရိုက်နှက်မှုများဖြင့် မကြခဏပင် အချုပ်ခန်းထဲရောက်ခဲ့သည်။ သေးသေး၏ လက်သုံးစကားမှာ ( အမေက မွေး-ထောင်က ကျွေး)-ဟူ၏။ စကားနောက် တရားပါသည်ဟုပင် ဆိုရမည်လားမသိ။ တနေ့သောအခါ ခရီးသွားလင်မယားနှစ်ဦးကို လုယက်၍ ရက်ရက်စက်စက် သတ်မှုဖြင့် ထောင်ကျခဲ့ရလေသည်။

ကြီးကြီးကား ဤသို့မဟုတ်။ လူကြီးမိဘ ဆရာသမားတို့အား ရိုသေသည်။ အရက် ဖဲ လောင်းကစားဟူသည် မကောင်းမှုမှန်သမျှ ဘာမှ မလုပ်တတ်ပါ။ အပြောအဆို အမူအရာကအစ အားလုံးယဉ်ကျေးသည်။ လူချစ်လူခင်ပေါသည်။ မိဘများနှင့် ဒိုးတူပေါင်ဖက် လုပ်ကိုင်စားသောက်၍ နေသည်။ အရွယ်ရောက်သောအခါ မိဘများ ထိမ်းမြားပေး၍ ရွာထဲက အမျိုးသမီးတဦးနှင့် လက်ထပ်ခဲ့သည်။ အလုပ်ကြိုးစားသည်။ အိမ်ထောင်ကျ၍ လအနည်းငယ်ကြာသောအခါ ကိုယ့်အိုးကိုယ့်အိမ်နှင့် နေခဲ့သည်။ သို့သော် မိဘများကို ပစ်ပယ်မထားပေ။ ကျွေးမွေးထောက်ပံ့သည်။ ဇနီးဖြစ်သူကလည်း လိမ္မာရေးခြားရှိသည်။ ဤသို့ဖြင့် ရပ်ထဲရွာထဲ၌ ဘုရားဒကာ ကျောင်းဒကာ ဦးကြီးကြီးဟူ၍ ဖြစ်လာသည်။ ဘာသာရေး လူမှုရေးအားလုံး သူက ဦးဆောင်ခဲ့ရပါသည်။

လ နှစ်များ ကြာသောအခါ သေးသေး ထောင်ကလွတ်လာပါသည်။ ရွာသို့ ပြန်လာသည်။ ပိန်ချုံးချည့်နဲ့စွာဖြင့် တောင်ဝှေးကို အားပြု၍ လှမ်းခဲ့ရသည်။ ရွာထိပ်သို့ ရောက်သောအခါဝယ် သူထောင်မကျခင်က မရှိသေး။ ယခုမှ တွေ့လိုက်ရသော ရွှေသင်္ကန်း တ၀င်းဝင်းနဲ့ စေတီတဆူကို ဖူးတွေ့လိုက်ရပါသည်။

မိဘနှစ်ပါး အမှူးထား၍ ဦးကြီးကြီး+ဒေါ်လှလှ ကောင်းမှုဆိုပါလား-ဟု နှုတ်မှ တိုးတိုးညင်းညင်း ရေရွတ်ပြီး ဦးချလိုက်ပါသည်။ သေးသေး၏ ဘ၀တွင် သိတတ်သည့်အရွယ်မှစ၍ ယခုအကြိမ်သည် ဘုရားကို ပထမဆုံး ဦးချဖူးခြင်းဖြစ်သည်။

သို့သော် အားလုံးတို့သည် နောက်ကျခဲ့လေပြီတည်း။ သေးသေး ရွာသို့ ပြန်ရောက်၍ ၅-ရက်ခန့်ကြာသောအခါ ရောဂါပေါင်းစုံ၏ဒဏ်ကို ပြင်းထန်စွာ ခံစားရင်း သေဆုံးခဲ့ရလေသည်။ ဪ-မိဘအတူတူ နေ့ရက်အတူတူ မွေးဖွားခဲ့သော်လည်း အလုပ် (ကံ) ချင်း မတူသောကြောင့် (ကံ) အကျိုးပေးများမှာလည်း မတူနိုင်ခဲ့ပါတကား။

( မောင်သောင်းဝင်း-စစ်ကွင်း )

( မြတ်မင်္ဂလာ ၂၀၀၂-ခု ဇန်န၀ါရီလ )

No comments: