Monday, November 2, 2009

ဆိုးကျိုးပေးသည့် အကုသိုလ်

ကျွန်မငယ်ငယ်က ဒေါ်ဒေါ်မြင့်ကို အလွန်အားကျမိသည်။ ဒေါ်ဒေါ်မြင့်ဆိုသူမှာ အရပ်မြင့်မြင့်၊ အသားဖြူဖြူ၊ ဥပဓိရုပ် ကောင်းကောင်းနဲ့ မျက်နှာမှာ သနပ်ခါးတွေ ဖွေးနေအောင်လိမ်းပြီး ဆံထုံးအက်အက်ကြီးကိုထုံး၍ ဇွန်ပန်းကုံးတွေ ဝေနေအောင် ပန်ထားလေ့ရှိသော ချမ်းသာကြွယ်ဝသည့် အိမ်နီးချင်း အဒေါ်ကြီးတယောက် ဖြစ်သည်။

အမေရယ်-ဒေါ်ဒေါ်မြင့်လေ၊ ဥပုသ်နေ့က ရွှေစေတီကျောင်းမှာ လှူလိုက်တာ အားရစရာကြီးနော်။ သမီးဖြင့် သိပ်အားကျတာပဲ-ဟု ကျွန်မက အမေ့ကို ပြောမိသည်။ အမေက သိပ်တက်တက်ကြွကြွမရှိဘဲ အင်း-သူလဲ သူ့အကုသိုလ်တွေကျေအောင် လှူနေတာဖြစ်မှာပေါ့လေ။ ဒါပေမဲ့ သမီး၊ အကုသိုလ်ဟာ ကုသိုလ်လုပ်ရုံနဲ့ မပျောက်ပျက်နိုင်ဘူး။ အကုသိုလ်က တကဏ္ဍ၊ ကုသိုလ်က တကဏ္ဍစီ အကျိုးပေးသွားမှာ-ဟု ပြောပါသည်။

ဒေါ်ဒေါ်မြင့်တို့ မိသားစုသည် သားသတ်လိုင်စင် လုပ်ငန်းဖြင့် အသက်မွေးသူ ဖြစ်သည်။ အကုသိုလ်လုပ်ငန်းဖြင့် အကျိုးပေးသည်ဟု ပြောရမည်။ တနေ့တခြား ဒီရေအလား စီးပွားတိုးတက်လာပြီး ချမ်းသာကြွယ်ဝလာခဲ့သည်။ သို့သော်လည်း နံနက်တိုင်း ဒေါ်ဒေါ်မြင့်တို့ ခြံကြီးဘက်မှ ၀က်အော်သံများ ကြားရခြင်းကို ကျွန်မ မနှသစ်သက်ခဲ့ပါ။ ထို့နောက် ဒေါ်ဒေါ်မြင့် အသက် ၆၀-ခန့်တွင် ရုတ်တရက် ကွယ်လွန်သွားခဲ့ပါသည်။ နှစ်တွေကြာပြီမို့လည်း ဒေါ်ဒေါ်မြင့်ကို ကျွန်မ မေ့မေ့ပျောက်ပျောက် ဖြစ်ခဲ့ရသည်။

ကျွန်မ အိမ်ထောင်ကျပြီး ကိုယ်ဝန်ရှိစတွင် အိပ်မက်တခု မက်ခဲ့သည်။ အိပ်မက်ထဲတွင် တနေရာမှ အိမ်ဘက်သို့ လူတယောက် ခြေကျင်လျှောက်လာနေသည်။ ကျွန်မနောက်က ထိုသူကပ်လိုက်လာသည်ဟု ထင်သဖြင့် နောက်သို့လှည့်ကြည့်လိုက်ရာ ဒေါ်ဒေါ်မြင့် ဖြစ်နေသည်။ ဒေါ်ဒေါ်မြင့်က ညှိုးငယ်စွာဖြင့် ကျွန်မကို ကြည့်နေပါသည်။ ကျွန်မက ဒေါ်ဒေါ်မြင့်-ဘယ်သွားမလို့လဲ-ဟုမေးလိုက်သည်။

ဒေါ်ဒေါ်မြင့်လေ အေးအေးတို့အိမ်ကို လိုက်ခဲ့ချင်လို့-ဟု ပြန်ပြောသည်။ ကျွန်မက လိုက်ခဲ့လေ ဒေါ်ဒေါ်မြင့်။ လိုက်ခဲ့ပါ-ဟု ၀မ်းသာအားရ ပြောခဲ့ပါသည်။ ထိုအိပ်မက်ကို ကျွန်မစိတ်ထဲတွင် မေ့မေ့ပျောက်ပျောက် ရှိခဲ့ပါသည်။ ကျွန်မ မီးဖွားသောအခါ အလွန်ချောမောလှပဖြူဖွေးသည့် သမီးမိန်းကလေးတဦး ဖွားမြင်သည်။ မီးဖွားပြီးလျှင်ပြီးချင်း ကလေးမျက်နှာကို မြင်လိုက်ရသောအခါ ကျွန်မသည် ယခင်မက်ခဲ့သော အိပ်မက်ကို ချက်ချင်းသတိရလိုက်မိသည်။ ကလေးသည် ဒေါ်ဒေါ်မြင့်၏ ရုပ်ရည်နှင့် ချွတ်စွပ်တူနေခြင်းဖြစ်သည်။

ထို့ကြောင့်လည်း ကျွန်မသမီးကလေးသည် ဒေါ်ဒေါ်မြင့် ၀င်စားသည်ဟု တထစ်ချ ယုံကြည်ခဲ့သည်။ သို့သော် ကလေးမှာ အရိုးပျော့ရောဂါရလျက် ဦးခေါင်းမထောင်နိုင်၊ ထိုင်လည်း မထိုင်နိုင်၊ အိပ်ရာထဲတွင် ပက်လက်ကလေးသာ နေနိုင်ခဲ့ပါသည်။ ကလေးအထူးကု ဆရာဝန်ကြီးများဖြင့် နည်းမျိုးစုံ ကုသသော်လည်း မသက်သာပါ။ သမီးကလေးသည် ၁-နှစ်နှင့် ၆-လအရွယ်တွင် ကွယ်လွန်ခဲ့ပါသည်။

ဒေါ်ဒေါ်မြင့်သည် ကုသိုလ်ကောင်းမှုများ လုပ်ခဲ့သဖြင့် လူ့ဘ၀ကိုရသော်လည်း ယခင်ဘ၀က အကုသိုလ်အရှိန်များကြောင့် လူစဉ်မမီ၊ သက်ဆိုးမရှည်၊ ငယ်ငယ်ရွယ်ရွယ်နဲ့ လူ့လောကကို စွန့်ခွာသွားရခြင်း ဖြစ်သည်ဟု ကျွန်မစိတ်တွင် ခံယူမိပါသည်။ ထို့ကြောင့်လည်း ယခုဘ၀တွင် အကုသိုလ်အလုပ်များကို အတတ်နိုင်ဆုံး မလုပ်မိအောင် စောင့်ထိန်းမည်ဟု သန္နိဋ္ဌာန်ချလိုက်မိပါတော့သည်။

( စောကြည်သာခင် )

( မြတ်မင်္ဂလာ ၂၀၀၂-ခု ဖေဖော်ဝါရီလ )

No comments: