Friday, November 20, 2009

ကောင်းမှုပြုသူနှင့် ထူးဆန်းသော မီးပုံးပျံကြီး

ရေစကြိုမြို့နယ် သဲပုံအနောက်ရွာတွင် ဦးငြိမ်း+ဒေါ်အေးကြိုင် ဟူသော တောင်သူကြီး ဇနီးမောင်နှံရှိသည်။ ဦးငြိမ်း+ဒေါ်အေးကြိုင် တို့သည် သဲပုံအနောက်ရွာ သာသနာ့မဏ္ဍိုင်ကျောင်းတိုက်တွင် များစွာသော ကောင်းမှုတို့ကို ပြုလုပ်ခဲ့သည်။

ထိုကောင်းမှုများကား ကျောင်းဟောင်းပြုပြင်သည်။ သုံးခန်းပတ်လည် အုတ်တိုက်၊ မီးဖိုတိုက်နှင့် ဇရပ် ကျောင်းတံတိုင်း၊ ဘုရားတံတိုင်းများ တည်ဆောက် လှူဒါန်းသည်။ ထို့အပြင် နှစ်စဉ် ၀ါဆိုသင်္ကန်းကပ်လှူခြင်း၊ ကထိန်သင်္ကန်း ၁၀-ကြိမ်ကပ်လှူခြင်း၊ ဥပုသ်နေ့တိုင်း ဆွမ်းပို့ခြင်းနှင့် လစဉ် လပတ် ဆွမ်းပို့ခြင်း အလှူများလည်း ပြုလုပ်ခဲ့သည်။

ဦးငြိမ်း+ဒေါ်အေးကြိုင်တို့သည် ဆွမ်းအလှူ ကုသိုလ်ပြုရာတွင် ဥပုသ်ဆွမ်းနှင့် လပတ်ဆွမ်းအပြင် တနှစ်အတွင်း အလျဉ်းသင့်သလို ဆွမ်းကပ်ဆွမ်းကျွေး အလှူလည်း ပြုလုပ်လေ့ရှိသည်။ ထို့ပြင် ကျောင်းတိုက်သို့ ရောက်ရှိလာသော အာဂန္တုက ဘုန်းကြီးများနှင့် လူဧည့်သည်မျးအတွက်လည်း ဦးငြိမ်း၏ အိမ်ကပင် တာဝန်ယူ ကျွေးမွေးလေ့ရှိသည်။ ကျောင်းတိုက်တွင် သုံးစရာထင်းကိုလည်း ဦးငြိမ်းကပင် အမြဲထာဝရ လှူဒါန်း၏။

ဦးငြိမ်၏ဇနီး ဒေါ်အေးကြိုင်သည် သံဃာတော်များအတွက် ဆွမ်းဝတ်အပြင် အိမ်၌ ရောက်ရှိလာသည့် ဧည့်သည်များကို ဧည့်ခံရာတွင် ဧည့်ဝတ်ကျေပွန်သူလည်းဖြစ်သည်။
ဤသို့သော ကောင်းမှုများပြုခြင်း၊ အလုပ်ကြိုးစားခြင်းတို့ကြောင့် ဦးငြိမ်းတို့ ဇနီးမောင်နှံသည် မရှိမရှားဘ၀မှ လှူရင်းတန်းရင်းဖြင့်ပင် ကြွယ်ဝချမ်းသာလာခဲ့သည်။ ယခုအချိန်မှာ ထန်း ၈-ရင်း၊ နွားနှစ်ရှဉ်းလုပ် မြေယာများဖြင့် ထင်ရှားသော တောင်သူကြီး ဇနီးမောင်နှံ ဖြစ်နေလေပြီ။

ဤကဲ့သို့ ဒါနကုသိုလ်ပြုခဲ့သော အလှူရှင် ဒါနရှင် တောင်သူဦးငြိမ်းသည် ၁၃၆၂-ခုနှစ် တန်ဆောင်မုန်းလဆန်း ၉-ရက်နေ့က လူတိုင်း မလွဲမသွေ သွားရသည့် မရဏလမ်းသို့ မြန်းရရှာလေပြီ။ တန်ဆောင်မုန်းလပြည့်နေ့တွင် ဦးငြိမ်းအတွက် ရက်လည်ဆွမ်းသွတ် တရားနာပွဲ ပြုလုပ်သည်။ နံနက်ပိုင်း တရားနာအပြီး လူကွဲချိန် (နံနက် ၈-နာရီမှ ၉-နာရီအချိန်) တွင် ထူးခြားသော ဖြစ်စဉ်တရပ် ပေါ်ပေါက်ခဲ့သည်။

ဦးငြိ်မ်းအတွက် ရက်လည်တရားမနာမီ ရက်ပိုင်းကပင် ဦးငြိမ်းအိမ်မှာ မီးပုံးပျံဟောင်းကြီးတခု ရှိခဲ့လေသည်။ ထိုမီးပုံးပျံဟောင်းကြီးတခုမှာ အိမ်ခန်းတခန်းစာမျှ ကြီးမား၏။ သို့သော် အပေါက်များဖြင့်ပြည့်နေသည်။ တယောက်ယောက်က ကောက်လာပြီး ဦးငြိမ်းအိမ်မှာ ပစ်ထားခြင်းဖြစ်သည်။ ထိုအချိန်တွင် ထိုမီးပုံးပျံ ဟောင်းကြီးသည် သူ့နဂိုတည်ရှာရာနေရာမှ မည်သူမှ မှိုင်းမသွင်း၊ မလွှတ်ရပါဘဲနှင့် အိမ်တံခါးပေါက်ဆီသို့ ၃-ကြိမ်မျှ အလိုလို ရွေ့ပြီးနောက် အထက်သို့ လူတရပ်စာမျှတက်သွားသည်။ ထို့နောက် လူတရပ်စာကနေ ကောင်းကင်သို့ အလိုအလျောက် ထိုးတက်သွားသည်။ ထိုအခါ ဦးငြိမ်းအိမ်က မီးပုံးပျံကြီးတက်သွားသတဲ့ -ဟူသော အသံများနှင့်အတူ မီးပုံးပျံကြီးသည် အထက်သို့ ဝေး၍ဝေး၍ တက်သွားလေတော့သည်။

သဲပုံတရွာလုံးက မီးပုံးပျံကြီး ကောင်းကင်သို့ တက်သွားသည့်ဖြစ်ရပ်ကို တအံ့တသြ ဖြစ်ကြသည်။ သူတို့တသက်တာတွင်လည်း မေ့နိုင်တော့မည် မဟုတ်ချေ။ ထိုမီးပုံးပျံကြီး တက်သွားခြင်းနှင့် ကောင်းမှုပြုသူ ဦးငြိမ်း ကွယ်လွန်ခြင်းသည် တစုံတရာ ဆက်စပ်မှု ရှိလိမ့်မည်ဟု စာရေးသူ ယူဆမိပါသည်။

( မောင်ထွန်းထွန်း-ချောင်းဦး)
( မြတ်မင်္ဂလာ ၂၀၀၂-ဧပြီလ )

No comments: